Luk 2

Bɔma Jisɔs

(Mt 1:18-25)

1Kegbu kanci, Ɔkɨm Ɛmaŋ Ɔgɔstus ɔjɛ nsɨm ya oni naŋɔnɛ ŋɔ ɔra na irɛ nji ira irɨmantunɛ Rom ɔrɔbɔrirɨna na kɛkpa-manrɛ kɔbagɛ bani. 2Nfa na kɛbɛrɔsɔ rɛbagɛ bani nci kɛjaga ndi Kirinus ɔra oni retu Siria. 3Mɨnɛ oni naŋɔnɛ oruŋɛ na rɔrɛ nduosi ɔkarɔbi rirɨna rimɔ.

4Josɛb osugɛ rɔrɛ Nasarɛd ndurɔra na Galili oruŋɛ na rɔrɛ Bɛtɨlɛhɛm ndurɔra na Judia, rɔrɛ ndubama Ɔkɨm Debid. Josɛb orua kafa ndiosi na kɛtɨbi Debid. 5Orua kɔrɔbi rirɨna rimɔ na ndi Meri, ɔwanɛ rɔraganɛ ɔmɔ ŋɔ ɔra na esukpa. 6Mɨnɛ ndi barakafa, bɔma bɔbɨnɛ mɔ kosi. 7Ɔma wɔ ɔmɔ ŋɔ rɛbɨnɛ, wɔ orumanɛ. Ofua mɔ na bɔfɔ mɨnɛ ɔyɔmɛ mɔ rika rɔkpa,#2:7 Rɔkpa Na mbu bani Jus barɔbɔ boti bedidi ndi ɛmaŋɔŋ nji bacincɛ bariɛnɛ eninaŋ.

Bababɛrɛ-bɔrɔri na onyiɛ-rotuma Ɛbrɔkpabi

8Jɔ kandi bababɛrɛ-bɔrɔri bara na rekurakwa na rɔrɛ kandu bababɛrɛ bɔrɔri bɔbɛ. 9Onyiɛ-rotuma Ɛbrɔkpabi ɔmɨlɛnɛ na rɔsɔrɔbɛ mɨnɛ boyi Ɛbrɔkpabi boriɛ bɔnyɛgɛ bɛ, ɔkɨmkɨm bofu bosibɛ. 10Nsu onyiɛ-rotuma Ɛbrɔkpabi ɔkanɛbɛ ya, “Kafɔnɔnu bofu! Nwu na brikaramu kɔkanɛ nu, ramundɛ rakɔjɛ oni naŋɔnɛ ɔkɨmkɨm kɔrɔmetima. 11Ɛrɛn na rɔrɛ Ɔkɨm Debid bama ɔnyaŋɛyu, Krais, Ɔkɔ-rokuku. 12Nfa na eriŋ nji minkɔfɛ: Kuminfɛ wɔ mbɔd ŋɔ bafua na bɔfɔ mɨnɛ ɔyɔm rika rɔkpa.”

13Mɨnɛ gbɨna banyiɛ-rotuma Ɛbrɔkpabi bajuju ecii basi na kaju bariɛ bawusɨmanɛ na onyiɛ-rotuma Ɛbrɔkpabi ŋɔ owu na rotuma, basɨmanɛ ramu bakɔnɔ, bakaŋɛ Ɛbrɔkpabi ya,

14“Boyi bɔyɔmɛ bɔjɛ Ɛbrɔkpabi na kaju,

mɨnɛ reŋunɛ retumɛ na bani rokuku mbɛ resi rɛbɛ rejuga ji na kɛrɔ!”

15Ndi banyiɛ-rotuma Ɛbrɔkpabi baŋbɨnɛnɛ na kaju, bababɛrɛ-bɔrɔri bakanɛ bacɛmɛ ya, “Yɔgɛ rerua na rɔrɛ Bɛtɨlɛhɛm rɛkafɛ mbu bɔjaga, mbu Ɔkɨm-kaju owukanɛ yu.”

16Baruŋɛ fɨrifɨri mɨnɛ bafɛ Meri na Josɛb, mɨnɛ bafɛ wɔ mbɔd ɔyɔm rika rɔkpa. 17Ndi bababɛrɛ-bɔrɔri bafɛ mɔ, bakanɛ britɛ bamɔ mbu onyiɛ-rotuma Ɛbrɔkpabi ɔkanɛ ɔbaŋa wɔ ŋɔ. 18Mɨnɛ ɛkpaju ɛyɛ bɛ fɛb mbɛ bafugɛ mbu bababɛrɛ-bɔrɔri bakanɛ. 19Nsu Meri ɔrɔbɔ birɛmbi fɛb na etima ɛmɔ, odiŋɛnɛ etima mbu bɛjaga. 20Ndi bababɛrɛ-bɔrɔri baŋbɨnɛnɛ na kwabɔrɔri bɔbɛ bɔra, bakaŋɛ mɨnɛ bajigɛ Ɛbrɔkpabi na mbu bafugɛ mɨnɛ bafɛ. Ndi gba nambunɛ bɔjagi nansɛrɛ onyiɛ-rotuma Ɛbrɔkpabi ɔkanɛ bɛ.

Batu Jisɔs rirɨna

21Ndi Jisɔs ɔyɔmɛ rayi ranabaranaa, britɛ bamɔ bakasi mɔ bɔyɛmɛ orumanɛ nansɛrɛ Ibina Mosis ikanɛ. Mɨnɛ bajia mɔ ya Jisɔs, rirɨna ndi onyiɛ-rotuma Ɛbrɔkpabi ɔjɛ mɔ nabɔ basɔgɛ esukpa ɛmɔ.

Babɛ Jisɔs baruŋɛ na ɛtɔ-Ɛbrɔkpabi

22Ndi kegbu kebigɛ nci Josɛb na Meri bakorunɛ nabɔ Meri ɔjaga rofia, kɛmanci Ibina Mosis ikanɛ. Babɛwɔ baruŋɛ Jɛrusalɛm bakasɛ mɔ ibɔ bajɛ Ɔkɨm-Kaju. 23Aya barɛ na Ibina Ɔkɨm-Kaju, “Kɛbɛrɔsɔ wɔ orumanɛ naŋɔnɛ bakɔkɔsɛmɔ ibɔ bajɛ Ɔkɨm-Kaju.” 24Barua mɨnɛ bakasi kefin na ibubugi ifa ara akifɔnɔ ibubugi abɛ bɔ minsul minfa, aya Ibina Ɔkɨm-kaju ikanɛ.

25Kegbu kanci oni ŋɔ oyinɛ Simiɔn ɔra otumɛ na Jɛrusalɛm. Simiɔn ɔra brika oni ŋɔ ɔfɔnɔ bofu Ɛbrɔkpabi mɨnɛ ofumanɛ Isɨrɛl ifɔnɔ rɛnyaŋɛ. Keriragi-kɛkɔ kɛra na amɔ, 26mɨnɛ kesimɔ ɔjɔɛ ya amɔ ɔbaŋɛ ta ɔfɛ ɔŋɔŋɔ ŋɔ Ɔkɨm-kaju ɔsa ya amɔ kuotigɛ Ɔnyaŋɛ-rokuku. 27Ndi Meri na Josɛb babɛ Jisɔs banɔ rika ɛtɔ-Ɛbrɔkpabi kosi mbu Ibina Mosis ikanɛ ya basi na wɔ mbɔd, Kɛkɔ kɛbɛ Simiɔn ɔnɔ rika ɛtɔ-Ɛbrɔkpabi. 28Ɔtama ɔcɛ wɔ ŋɔ na ibɔ imɔ mɨnɛ ɔka Ɛbrɔkpabi ya:

29“Ɛbrɔkpabi, ami ori ɔyɛ,

mɨnɛ kunku yɔgɛ mba na reŋunɛ na etima emia,

ndi ayɔgɛ ɔŋɔŋɔ ŋɔ asa na ami.

30Nfɛ na jɛnɛ ramia mbu awusi kɔnyaŋɛ bani bayɛ,

31Irɛ nji ira ɛyɔ ɛfɨra kuifɛ mɨnɛ resi ndi.

32Nsɨm ɔyɛ ŋɔ ociacia ɔra rɛjaɛ ɔjɛ irɛ Jɛntail sɛnsɛn,

mɨnɛ kuɔjɛ bani bayɛ Isɨrɛl ejig.”

33Ɛkpaju ɛyɛ britɛ Jisɔs na mbu bafugɛ Simiɔn ɔtanɛ ɔbaŋa mɔ. 34Simiɔn ɔjɛbɛ reŋunɛ mɨnɛ ɔkanɛ Meri ya, “Wɔ ɔyɛ ŋɔ kuosi bani ecii na Isɨrɛl batɔ bajuju babarabara. Wɔ ŋɔ kuotumɛ eriŋ nji esi ɛyɛ Ɛbrɔkpabi nji bani ecii bakɔkɨn, 35mbu kubɔjaga na esikafa ratanɛ ndɛ rarabani ecii ŋɨbaŋɨba na botima rajaga rofia. Mɨnɛ kuafugɛ romima aya akaŋkaŋ mɔ ɔjɨma wu na etima.”

36Ɛfɔnɔ mɨnɛ ɔkanɛ-rotuma Ɛbrɔkpabi, Ana, wɔ Fanuɛl, ŋɔ osi mbari rɔrɛ Asha. Ɔtɨm kuguru mɨnɛ basa mɔ ju rinabaritaa adiadi. 37Osu na ekud ta ɔtɨma ɔjaga iram ju inaa irɨma rinaa. Okisugɛ ɛtɔ-Ɛbrɔkpabi; jaga na jɔ ɔkpɔgɛ Ɛbrɔkpabi, ɔkarɛnɛ ŋbɔ mɨnɛ ɔrɔbɔ njɔm. 38Ɔmɛ kandi owu kɨmanɛ bɛ, ɔsamɛ Ɛbrɔkpabi, mɨnɛ ɔtanɛ ɔjɛ bani mbɛ bafumanɛ reyindi Ɛbrɔkpabi ekowu nyaŋɛ Jɛrusalɛm ɔbaŋa wɔ ŋɔ.

Baŋbɨnɛnɛ ndu Nasarɛd

39Ndi Josɛb na Meri basi mbu bɔyɔmɛ bɔjɛ ya basi aya Ibina Ɔkɨm-Kaju ikanɛ, baŋbɨnɛnɛ bagbaŋɛ rɔrɛ rɔbɛ Nasarɛd ndu rɔra na Galili. 40Jisɔs ɔtɨma na mintigiri mɨnɛ na nkatid, mɨnɛ reŋunɛ Ɛbrɔkpabi rɛra na amɔ.

Jisɔs na Ɛtɔ-Ɛbrɔkpabi

41Ju nandunɛ britɛ Jisɔs baruŋɛ Jɛrusalɛm bakakan kɛtɔmɔ ciataŋɛ. 42Ndi Jisɔs ɔjaga ju jubi na rifa, abɛ fɛb baruŋɛ kɛmanci barabaruŋɛ kɛtɔmɔ kanci, kɛmanci rɛmaɛ rɛbɛ rɛyɔmɛ rɛjɛ. 43Ndi kɛtɔmɔ kɛyɛ, britɛ Jisɔs babɨnɛ kɔgba, Jisɔs osu na Jɛrusalɛm, bakigbɨra. 44Barɔŋɛ ya ɔra na kɔrɔbani mbɛ bawubɛrɔsɔ, bacɛ rɔcɛ reyi ndɨm nayɛ babɨnɛ mɔ kodugi na rɛkaba bani kɛtɨbi na bacɛmɛ babɛ. 45Ndi babɔ bakifɛ mɔ, baŋbɨnɛnɛ baruŋɛ Jɛrusalɛm kodugi mɔ. 46Ndi ecia rayi rataa bafɛ mɔ ketu na Ɛtɔ-Ɛbrɔkpabi na bakpɛbɛ Ibina, oyumɛ ratu na mbu batanɛ mɨnɛ ɔsɨna bɛ rasɨn. 47Ɛkpaju ɛyɛ oni naŋɔnɛ ŋɔ ofugɛ mɔ na kɛgbɨra kɔtanɛ kɛmɔ mɨnɛ na rɛfɛlɛ ramu rɛmɔ. 48Ndi britɛ bamɔ bafɛ mɔ, ɛkpaju ɛyɛbɛ, mɨnɛ minka ɔmɔ ya, ‘Wɔ, bu na asiyu nya? Mintɛ ɔyɛ na ami rɛra reduga wu jɛnɛ manimani.”

49Ɔfɛlɛ bɛ ramu ya, “Bu na minduga mi? Minkigbɨra ya nkɔkotumɛ na ɛtɔ mintɛ omia nsiŋɛ rɛsɛ rɛmɔ-ɛ?” 50Nsu bakijɔɛ mbu ɔkanɛ bɛ. 51Jisɔs ɔnyɛgɛ britɛ bamɔ bagbaŋɛ ndu Nasarɛd, mɨnɛ ɔŋɔrɛ retu ɔjɛ bɛ. Minka ɔmɔ ɔrɔbɔ birɛ mbi fɛb na etima. 52Jisɔs ɔtɨma na ɛkpaju mɨnɛ na nkatid. Ɛbrɔkpabi na bacɛmɛ bani bafɔnɔ kɔrɔmetima na amɔ.

Selectat acum:

Luk 2: Olulumo-Ikom

Evidențiere

Partajează

Copiază