Maluko 7

Avaanu vaniniilage indagi dza Nguluvi, valekage mivedzehedze gyawo

(Matayo 15:1-9)

1AVafwalisayo pamwinga na vawulanidzi va milagililwe vakeefu avaahumile ku Yelusalemu, vaalundiine pe agenda uYesu. 2Viiwonaga avanyigendwa vaakwe avangi viiliya ikyakuliya na mawoko agali lupumba, kwe kutigila vasinaa vakalavaga ngita kye lwasakulwaga mu mivedzehedze. 3AVafwalisayo na Vayahudi vonda, vasaaliyaga ikyakuliya kitakalava amawoko ukufikila mu kisuguluuni, pakuva viinatilaga imivedzehedze gya vakuhwawo. 4Kangi pe viihuma mu ligulilo, vasaaliyaga kikivedzaga kitakalava amawoko, ukuta vahedze ulupumba.#7:4 Kitakalava amawoko, ukuta vahedze ulupumba AVayahudi vaafuuwaga ukutigila, ukupamya ifiinu mu magulilo nu kutaangʼana na avasili Vayahudi, kwe kuvedza lupumba. Viinatilaga imivedzehedze igingi gya vanyakataali, ngita igya kukalafya ifitonga, ifiviya ni fikoongʼolo ifingi ifya fyuma.

5Neke aVafwalisayo na vawulanidzi va milagililwe pe vamulundaniye uYesu, vamuwuudziidze viitigila, “Kye kiki avanyigendwa vaako vasiikolaatidza imivedzehedze gye vatulekiye avakuhwesu, viiliya ikyakuliya na mawoko agali lupumba?” 6UYesu iihigaga iitigilaga, “Ndakyene wugendela wa muvidzi uIsaya, uNguluvi avaviliye unyeenye nye vakedusi pe aatigiye,

‘Avaanu ava vakuunginiya ulwa pa mulomo hela,

neke kangi inumbula dzaawo dzili kutaali naane.

7Na pe vakwifuunya ukwangu vakwifwahidza hela,

viiwulanidza imbulanidzo idza milagililwe gya vaanu hela.’#Isaya 29:13 ”

8Neke uYesu aginage ukulonga atigilage, “Múdzilekile indagi dza Nguluvi,#7:8 Indagi dza Nguluvi Lole ku Figanulo. lino mwikwinatila imivedzehedze gya vaanu.

9“Kangi unyeenye múweene lunofu ukukaana indagi dza Nguluvi, mwikwinatila imivedzehedze gyenyo. 10UNguluvi aalongile wugendela wa muvidzi vaakwe uMose ukutigila, ‘Uvaginiyage udaado nu nyoko,’#Kuhega 20:12; Lwiwuko 5:16 na, ‘Ye akumuliga udaadiye enewuli ungʼina, uyo akomwage.’#Kuhega 21:17; Valevi 20:9 11Neke kangi unyeenye mwilonga ukutigila, ‘Umuunu iikwidikwa ukuvalongela avavaha vaakwe ukutigila, “Ikiinu kye ndikali ndikuvapeela ngita kuvatanga, lino ndítawuwe wusembe kwa Nguluvi.” ’ 12Apo lino musikumuleka umuunu ukumutanga udaadiye nambe ngʼina! 13Pa kuwulanidza ewo, mwibedalila ilidzwi lya Nguluvi pa kwinatila imivedzehedze gyenyo gye mwikwanuungʼana. Kangi mwikwinatila imivedzehedze igingi gyoloofu ngita igyo, igisiikwidiingʼana ni ndagi dza Nguluvi.”

Ifiinu ifikumuhulila lupumba umuunu

(Matayo 15:10-20)

14UYesu iikemeelaga kangi ililugu lya vaanu, iilongaga ukutigila, “Unyeenye nyivonda mupulikidzage wunofu nu kulufika. 15Sikookili ikiinu ikiikwingila mugati mwa muunu ukuhuma kwivala ikikumuhulila lupumba. Nda haamu, ikiinu ikiihuma mugati mwa muunu, kye kyene ikikumuhulila lupumba. [16Ye ali na masiikidza agiipulika, apulikage.]”#7:16 Amadzwi aga simoogali mu wusimbe uwungi uwa kataali.

17UYesu pe aaviye álilekile ililugu lya vaanu, iikwingilaga mu nyumba. Avanyigendwa vaakwe vakumuwuudzaga ulwa kiganulo kya kihwananidzo ikyo. 18Neke avawuudzage atigilage, “Na yuunye musikulufika? Musiidzeela ukutigila sikookili ikiinu ikiikwingila mu lileme lya muunu ikikumuhulila lupumba? 19Umuunu pe áliye ifiliyo fisiikwingila mu numbula, fiikwingila mu lileme nu kuhuma kwivala.” Pa kulonga ewo, uYesu iidiike ukutigila, ifiliyo fyonda filiiwage.

20Iitigilaga kangi, “Ikiihuma mugati mu numbula ya muunu, kye kyene ikikumuhulila umuunu avedze lupumba. 21Mugati mu numbula ya muunu mwe mwene mwe giihuma amahoodzo amaviifu, uwugoni, uwuhiidzi, uwuwuladzi, uwudumuli-noolane, 22ikyoyo, amalanga, uwudzandzi, uwudobofu wuviifu wa muvili, igiila, amaligo, ulwinunumulo nu wupuva. 23Imbiifu dzonda idzi dziihuma mu numbula, dze dzeene idzikumuhulila lupumba.”

Ulufuuwo lukomi lwa mwayuuva ye asili Muyahudi

(Matayo 15:21-28)

24UYesu pamwinga na vanyigendwa vaakwe vaahegile apo, viihelelaga ku mbala dza Tilo.#7:24 Tilo Uwu waali wudzenge wukomi wa avasili Vayahudi. Iikwingilaga mu nyumba yimwinga, asaakeeliye avaanu vadzeele ukutigila ali umo. Kangi aalemiilwe ukufihama. 25-26Ku luvala ulo aali kwali umwayuuva yumwinga uMugiliki, aali va ku Foyinike ku nyi ya Silya. Pe aapuliike imola dza Yesu, iihelelaga neke iigwisage pa magulu ga Yesu, amugongoolage amunaniye umwalive ye aali nu mubepo umuviifu. 27UYesu iitigilaga, “Uleke tandi avaana valiye viigute, pakuva si lunofu ukunyamula ikyakuliya kya vaana nu kusopela imbuwa.”#7:27 Vaana…imbuwa UYesu pe iitambula vaana, iihwananidza na Vayahudi, enewuli avanyigendwa vaakwe. AVayahudi viiwonaga ukutigila vaginalifu ukulutila avasili Vayahudi avangi, pe vakuvahwananidza ni mbuwa. 28Umwayuuva uyo iitigilaga, “Ulo huulo Mutwave, nadzi mbuwa nadzo dzaadziliya utuwuluwulu twe viigwisa paanyi avaana.” 29UYesu akumulongelaga iitigilaga, “Pakuva úlongile ulo, lino uhelelage. Umubepo umuviifu gúmuhegile umwaliwo.” 30Umwayuuva uyo iihegaga iihelelaga ku kaaya, akumuwonaga umwalive ágonile pa wulili, umubepo umuviifu gúmuhegile.

UYesu akumunaniya umukitalonga umudibafu

31UYesu iihegaga mu mbala dza Tilo, iihelanidzaga mu wudzenge wa Sidoni, iihelelaga ulubali lwa kunena mwa nyandza ya Galilaya, iifikaga mu mbala dza Ndzenge Dzinyikyumi (10). 32Uko vakumuleetelaga umuunu umudibafu, kangi mukitalonga. Vakumunyilikaga uYesu amuviikile amawoko, ukuta apone. 33UYesu akumuhedzaga umuunu uyo pa lilugu, akumusindikaga pa lubali apangaya vaanu, iikwingidzaga ifyala mu masiikidza ga mudibafu, iifuunyilaga amati mu kyala, akumubakaga mu lulimi. 34Iilolaga kukyanya, iihuguvalaga, akumulongelaga iitigilaga, “Efwata!” Kwe kutigila, “Dinduke!” 35Umusika guugo amasiikidza ga muunu uyo, giidindukaga nu lulimi lwakwe lwiwopokaga, iivangaga ukulonga wunofu. 36Neke uYesu avakaanidzage vatane ukulonga kwa muunu ye avedzaga. Neke kangi kye aaginaga ukukaanidza, aveene vaaginaga ukutagalidza. 37Avaanu viidzumaga hiilo viitigilaga, “Álimile dzonda wunofu, pakuva akuvadindula avadibafu vapulikage, avakitalonga valongage wunofu!”

Selectat acum:

Maluko 7: BEZ

Evidențiere

Partajează

Copiază