Maluko 1

UYohana uMudzabisi iiwuyapa ingʼaasi ya Yesu

(Matayo 3:1-12; Luka 3:1-18; Yohana 1:19-28)

1Uwu we wutalilo wa Mola iNofu iya Yesu Kilisiti,#1:1 Kilisiti Kwe kutigila Mesiya, umuunu ye aahaaguliilwe nu kutumwa nu Nguluvi kuvapoka avaanu vonda ngita Mupoki, nu kutema avaanu mu wutwa waakwe ngita Mutwa. Lole UKilisiti ku Figanulo. uMuswamuve va Nguluvi. 2Yaavangile ngita kye aasimbile umuvidzi Isaya ukutigila,

“Lolage, ndikumutuma umulongodzi-mola vangu,

akulongole pawutalo apaako,

ndikumutuma kuwuyapa ingʼaasi yaako.”#Malaki 3:1

3“Uyu ye muunu ye iipulisa iikemeela mu lungʼalangʼala iitigila,

‘Mumuwuyapilage ingʼaasi uMutwa,

nu kugolosa umwa kugendela umwene.’ ”#Isaya 40:3

4Neke ahumilage uYohana uMudzabisi iidalika nu kudzabika avaanu mu lungʼalangʼala ukutigila, avaanu vapelage indzanangifu dzaawo nu kudzabikwa, kwe kuwoneesa ukutigila vápitwike ukuhuma ku wuhosi waawo, ukuta uNguluvi avapyanile. 5Avaanu voloofu ukuhuma mu Yelusalemu na ku Yudeya yonda, vaahelelaga ukwakwe kumupulikidza dze iidalika. Avangi vaanakaga nu kupela indzanangifu dzaawo, neke vadzabikwage nu Yohana uMudzabisi mu mukoga Yolodani. 6Mu figono ifyo uYohana aafwalaga imyenda#1:6 UYohana aafwalaga imyenda Imyenda igyo gyali ngita giigila gye aafwalaga muvidzi uEliya, 2 Vatwa 1:8. gya lwage lwa ngamila,#1:6 Ngamila Iyi ye ndiimwa iyiikwamilwa wiimila wa kunyamula avaanu ni fitegulo. mu kigudi iipinyaga umukandalo gwa ngwembe. Ikyakuliya kyakwe kyali amadeede nu luuki lwa mudaasi. 7Pe iidalika aatigilaga, “Iikwadza umunya ngufu ukulutila uneene, pakuva sindivagiye nambe kugundama nu kuwopola ingʼova dza ndaatu dzaakwe.#1:7 Kuwopola ingʼova dza ndaatu dzaakwe Mu mivedzehedze gya Vayahudi, umugendzi pe iikwingila mu nyumba, umusutu amuwopolaga indaatu nu kumukalafya amagulu. Amalimo ago gaali ga musutu va paanyi hiilo. 8Uneene ndikuvadzabikila ululenga, neke umwene ahadza akuvadzabikila mwa Mubepo uMwimike.”#1:8 Ahadza akuvadzabikila mwa Mubepo uMwimike Lole Ukudzabikwa mwa Mubepo uMwimike ku Figanulo.

Ukudzabikwa nu kugemywa kwa Yesu Kilisiti

(Matayo 3:13–4:11; Luka 3:21-22; 4:1-13)

9Mu figono ifyo, uYesu aahumile ku Nasaleti ya ku Galilaya kuhelela ku mukoga Yolodani kudzabikwa nu Yohana. 10UYesu pe aaviye iihuma mu lulenga iiwonaga kukyanya kwidinduka, nu Mubepo uMwimike ngita ngundya iikwika pakyanya apaakwe. 11Ilidzwi ukuhuma kukyanya liipulisaga liitigila, “Uveeve yuuve Muswamu-vangu, ve Mwende vangu, ye ndíkeeliidzwe naave mbandu.”#Ndzimbililo 2:7; Isaya 42:1 12Neke uMubepo uMwimike amusogodzage uYesu kuhelela ku lungʼalangʼala kugemywa. 13Akwikalaga kuuko figono makyumi gatayi (40) iigemywa nu Setano. Uko aali ni fingʼooko ifya mudaasi, na vanyamwandza va Nguluvi#1:13 Vanyamwandza va Nguluvi Lole Avanyamwandza ku Figanulo. avamuwombelaga.

UYesu iihaagula avanyigendwa va kutala

(Matayo 4:12-22; Luka 4:14-15; 5:1-11)

14UYohana uMudzabisi pe aaviye ádindiilwe mu ndinde, uYesu iihelelaga ku Galilaya iidalika iMola iNofu dza Nguluvi. 15Pe aadalikaga aatigilaga, “Fífikile ifigono, uwutwa wa Nguluvi#1:15 Uwutwa wa Nguluvi Lole ku Figanulo. wúhegeliye, lino mupelage nu kufuuwa iMola iNofu iyiidalikwa.” 16Ikigono kimwinga, uYesu pe iihelanidza mu ngʼumbungʼumbu ya nyandza ya Galilaya, akuvawonaga uSimoni#1:16 USimoni UYesu amupeeliye ilitaawa ilingi ukutigila Petulo, Maluko 3:16. nu Andeleya umunyalukolo vaakwe, viitega indzafu dzaawo mu nyandza, pakuva vaali valovi. 17Neke uYesu atigilage, “Mwadze muuniniilage! Ndihadza ndikuvahambusa valovi va vaanu.”#1:17 Valovi va vaanu Kwe kutigila, uYesu ahadza akuvahambusa vavaleetage avaanu kumuniniila uYesu. 18Pe vaaviye vápuliike ilidzwi ilyo, umusika guugo vakudzilekaga indzafu dzaawo, vakumuniniilaga uYesu. 19Pe aaheliye pawutalo padebe, akuvawonaga uYakobo nu Yohana avaswamuve va Sebedayo, vali mu waato viiwuyapa indzafu dzaawo. 20Umusika guugo, uYesu akuvakemeelaga, neke vamulekage uSebedayo udadaawo mu waato umo pamwinga na valima-malimo vaawo, vakumuniniilaga uYesu.

UYesu iilosa umubepo umuviifu

(Luka 4:31-37)

21UYesu na vanyigendwa#1:21 Vanyigendwa Lole Avanyigendwa ku Figanulo. vaakwe vaahegile ukuhelela ku wudzenge wa Kapelenahumu. Mu kigono ikya Sabato#1:21 Kigono ikya Sabato Lole Ikigono ikya Sabato ku Figanulo. uYesu iikwingilaga mu luholanilo,#1:21 Luholanilo Lole Uluholanilo ku Figanulo. neke avawulanidzage avaanu ilidzwi lya Nguluvi. 22Avaanu viidzumaga hiilo imbulanidzo dzaakwe, pakuva asaawulanidzaga ngita avawulanidzi va milagililwe.#1:22 Avawulanidzi va milagililwe Lole ku Figanulo. Umwene aawulanidzaga mu wutawulilwe wonda. 23Mu luholanilo umo, aali mwali umwadaada umunya mubepo umuviifu. 24Umusika guugo iikoolaga iitigilaga, “Tuli wuki nu veeve Yesu ve muhuma ku Nasaleti? Wáadzile mu kututipula? Ndiidzeela ukutigila, uli Mwimike va Nguluvi!” 25UYesu akugukenyelaga iitigilaga, “Dzike! Uhume mwa muunu uyu!” 26Umubepo umuviifu gukumuhulilaga lidzilisi, gwikoolaga mbandu, umusika guugo gukumuhumaga umuunu uyo. 27Neke baaho avaanu vonda vadzumage mbandu viiwuudzage veene vatigilage, “Idzi mola dziki? Idzi dze mbulanidzo dza lino idzili nu wutawulilwe? Lolage, iikenyela nagi mibepo imiviifu, nagyo gikumwidika!” 28Imola dza Yesu dziipulisaga kisaatu imbali dzonda idza Galilaya.

UYesu akuvananiya avatamwa voloofu

(Matayo 8:14-17; Luka 4:38-41)

29UYesu pamwinga na vanyigendwa vaakwe uYakobo, uYohana, uSimoni nu Andeleya vaahegile mu luholanilo ulo, neke vahelelage vakiingilage mu nyumba ya Simoni nu Andeleya. 30UYesu pe aaviye áfikile, vakumulongelaga imola idza mutamwa umukwive va Simoni, ye aali ágonile pa wulili, aavawaga imungo ya lihilidzi. 31UYesu iihegelelaga, akumwibataga iliwoko nu kumwinamula. Umwayuuva uyo iinanaga umusika guugo, iivangaga ukumuwombela. 32Pa kyamihe ilidzuwa pe lísotile, ni Sabato pe yíhelaniidze,#1:32 Sabato pe yíhelaniidze AVayahudi vaalagiidzwe vatanage ukulima amalimo ga kunyamula ifitegulo, enewuli kuhelela mu lugendo mu kigono ikya Sabato, Yelemya 17:21-22. vakumuleetelaga uYesu avatamwa na áviibiitwe ni mibepo imiviifu. 33Uwudzenge wonda wiilundanaga pa mulyango. 34Neke uYesu avananiyage voloofu avaali ni fitamwa ifili poloofu, nu kulosa imibepo imiviifu gyoloofu. Akugikenyelaga gitane ukulonga kiinu, pakuva gyamudzeeliye ukutigila umwene ye ani.

UYesu iidalika mu Galilaya

(Luka 4:42-44)

35Ikigono ikya kavili pe yiitema yinyavambula, uYesu aalamwike iihelelaga apoono apangaya vaanu, neke alapangilage. 36USimoni na vayagwe viihelelaga kumutemula. 37Pe vamuweene viitigilaga, “Avaanu vonda vakukusakula!” 38UYesu akuvahigaga iitigilaga, “Tuhelele ku ndzenge idzingi idzili biihi ndikadalike nako, pakuva ulo lwe lwene lwe ndaadziye.” 39Iihelelaga iidalika mu nyolanilo dzaawo mu Galilaya yonda, nu kulosa imibepo imiviifu mu vaanu.

UYesu akumunaniya umunya kinyamuvili

(Matayo 8:1-4; Luka 5:12-16)

40Umwadaada yumwinga ye aali ni kinyamuvili aaheliye kwa Yesu, neke afugamage, agongoolage ukuvaladzwa ikitamwa kyakwe atigilage, “Ngana úkeeliye, ndiigongoola uumbaladze.”#1:40 Ndiigongoola uumbaladze Umuunu ye aavedzaga nu wutamwa wuwuvedzaga wa kinyamuvili, aavedzaga lupumba. AVayahudi avaali lupumba vaapeeliilwe imilagililwe gya kuvaladzwa, ukuta vaanukilwe nu Nguluvi, Valevi 13:1–14:32. 41UYesu akumuwonelaga lusungu, iigolosaga iliwoko lyakwe, akumupamyaga,#1:41 Akumupamyaga AVayahudi vaalagiidzwe vatanage ukumupamya umunya kinyamuvili, ukuta vatane ukuvedza lupumba, Valevi 5:3. akumulongelaga iitigilaga, “Ndíkeeliye, uvalale!” 42Baaho ikinyamuvili kikumuhegaga, iiponaga. 43UYesu amukaanidzaga iitigilaga, 44“Kitagela kulonga kiinu kwa muunu. Nda haamu, uhelelage ukiiwoneese kwa muteekedzi,#1:44 Muteekedzi Uyu aali nu wutawulilwe uwa kulonga ukutigila, umunya kinyamuvili ávaliidzwe, ukuta ahangage na vaanu avangi kangi, Valevi 14:1-32; Lwiwuko 24:8. Lole Avateekedzi ku Figanulo. ukatawule uwusembe wiimila wa kuvaladzwa ngita kye aalagiidze uMose mu milagililwe.#1:44 Milagililwe Lole Imilagililwe gya Mose ku Figanulo. Wuvedzage we woolesi ku vaanu vonda ukutigila úvaliidzwe.” 45Neke umuunu uyo ahelelage iilonga ku vaanu vonda nu kudalika dze álimiliilwe nu Yesu. Wiimila wa ulu, uYesu aalemiilwe ukwingila mu wudzenge pa weelu, neke asigalage kwivala apoono pa kinyele, napo kangi avaanu ukuhuma imbali dzonda vaahelelaga ukwakwe.

Selectat acum:

Maluko 1: BEZ

Evidențiere

Partajează

Copiază