Matayo 5

Imbulanidzo dza Yesu ku kidunda

(Luka 6:20-23)

1UYesu pe aliweene ililugu likomi lya vaanu, iikwinukaga pa kidunda, akwikalaga. Avanyigendwa#5:1 Avanyigendwa Lole ku Figanulo. vaakwe vakumwadzilaga, 2neke avangage ukuvawulanidza atigilage,

3“Váfuunyiliilwe avakwiwona vákeepile uNguluvi mu numbula,#5:3 Váfuunyiliilwe avakwiwona vákeepile uNguluvi mu numbula Ikikelo pa kikelo, Váfuunyiliilwe avahangala va numbula.

pakuva uwutwa wa kukyanya waawo.

4Váfuunyiliilwe avanyonyovafu,

pakuva uNguluvi alavanyaamadza.#Isaya 61:2

5Váfuunyiliilwe avaleele,

pakuva uNguluvi alavapeela inyi yonda.#Ndzimbililo 37:11; Valoma 4:13

6Váfuunyiliilwe ávadagiine ni ngʼelo ya wugolofu,

pakuva valiiguta.#Isaya 55:1-2

7Váfuunyiliilwe aviipyanila,

pakuva uNguluvi alavapyanila navo.

8Váfuunyiliilwe avanya numbula ndzelu,

pakuva valamuwona uNguluvi.#Ndzimbililo 24:3-4

9Váfuunyiliilwe avateepudzi,

pakuva valaakemeelwa ukutigila vaana va Nguluvi.

10Váfuunyiliilwe aviipumuswa wiimila wa kulima idza wugolofu,

pakuva uwutwa wa kukyanya waawo.

11“Múfuunyiliilwe ngana avaanu vakuvaliga, vakuvapumusa nu kuvalonga wuviifu mu wudesi wiimila wa neene. 12Mukeelage nu kuheeya, pakuva uNguluvi ávaviikiye uluwonolo lwenyo lukomi kukyanya. Pakuva avavidzi navo avavalonguwe unyeenye ndeeni kye vaapumwiswe.

Umuunyo nu lumuli

(Maluko 9:50; Luka 14:34-35)

13“Unyeenye gwe muunyo ku vaanu va nyi. Neke kangi umuunyo ngana gúhuukile, gwisopwa kiki, ukuta gunoge kangi? Umuunyo ndawuli ugo gungaya malimo, apo gwivagila ukutaagwa kwivala gulivatwage na vaanu.

14“Unyeenye lwe lumuli ku vaanu va mwe naanyi. Uwudzenge úwudzengiilwe pakyanya pa kidunda, wiilemwa ukufihwa. 15Kangi avaanu vasiikunga itala neke vagubikile ni ndiilo, nda haamu, vakuyiviika pa kinenevekelo, ukuta yivamulikage vonda avali mu nyumba. 16Ndeeni nu lumuli lwenyo, luvamulikage avaanu ukuta vagiwonage imigendele gyenyo minofu, ukuta vamupeelage indolo uDadiinyo ye ali kukyanya.

Imbulanidzo dza Yesu ulwa milagililwe gya Mose

17“Mutanage ukuhoodza ukutigila, ndaadzile mu kuhedza imilagililwe gya Mose,#5:17 Imilagililwe gya Mose Lole ku Figanulo. enewuli idzaasimbiilwe na vavidzi. Lolage, sindaadzile mu kuhedza, nda haamu, ndaadzile mu kukwilidza dzonda idzo idzaasimbiilwe. 18Ndakyene ndikuvalongela ndiitigila, ukufikila ikyanya ni nyi pe fiiyagaanika, sikookali nambe kadelemusi kamwinga akadebe ka milagililwe akalaayagaanika, ukufikila fyonda ifili mu milagililwe pe fíkwiliye. 19Umuunu ye avedzaga ye iidzumba nambe lulagi lumwinga mu ndebe idzi, nu kuvawulanidza avangi, ukuta navo vadzumbe, uyo ahadza iitambulwa mudebe hiilo ku wutwa wa kukyanya. Neke kangi ye iigendela indagi idzo nu kuvawulanidza avangi ukudzigendela, ahadza iitambulwa mukomi ku wutwa wa kukyanya. 20Lwe lwene ndikuvalongela unyeenye ukutigila, ngana amalimo geenyo ga wugolofu gasiilutila pa ago ga Vafwalisayo na vawulanidzi va milagililwe, apo musiliingila nambi ku wutwa wa kukyanya.

Imbulanidzo wiimila wa ligooga

(Luka 12:57-59)

21“Múpuliike ukutigila, avanyakataali vaalongeliilwe ululagi ulwitigila, ‘Utanage ukukoma,’#Kuhega 20:13 apo umuunu ye avedzaga ye akumukoma umuyagwe, iivagila ukuhigwa. 22Neke kangi uneene ndikuvalongela ndiitigila, umuunu ye avedzaga ye akumuviipila umuyagwe, ahigwage. Kangi umuunu ye avedzaga ye akumuliga umuyagwe iitigila, ‘Uveeve munya madzimu,’ iivagila ahigwage ni kiwungu. Kangi umuunu ye avedzaga ye akumukemeela umuyagwe iitigila, ‘Ve mupuvaave,’ iivagila uluhigo lwa kutoodzwa ku mooto ugusiidzima mbeepali!#5:22 Mooto ugusiidzima mbeepali Kwe kutigila, umooto gwa Gehena. Lole Umooto ugusiidzima mbeepali ku Figanulo.

23“Wiimila wa idzo, ngana wiitawula uwusembe kwa Nguluvi pa kiteekelelo mu tembeli, neke kangi wiiwuke ukutigila, umuyago ali ni nongwa naave, 24uwuleke uwusembe uwo baaho pa kiteekelelo. Uhelele tandi ukiiteepule nu muyago uyo, neke upiluke utawule uwusembe waako uwo.

25“Kangi ngana kuli muunu ye akukutaaha ku kiwungu, waangupe ukwiteepula nave pe uli mu ngʼaasi. Ngana usilimile ewo, ahadza akukusindika kwa muhidzi, nave akukusindika kwa muvina va vakolokolooni, uyo ahadza akukusopa mu ndinde. 26Ndakyene ndikuvalongela ndiitigila, usilaahuma umo ukufikila pe wiivedza úhombile fyonda fye wiidzigilwa!

Imbulanidzo wiimila wa wudumuli-noolane

27“Múpuliike ululagi ulwitigila, ‘Utanage ukudumula uwutoolane.’#Kuhega 20:14 28Neke kangi uneene ndikuvalongela ndiitigila, umuunu ye avedzaga ye akumulola umwayuuva pa kumudoboka, iivedza ádumuwe uwutoolane nave mu numbula yaakwe. 29Ngana iliiho lyako likukuhulila ulime indzanangifu, ulikopole nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali. 30Kangi ngana iliwoko lyako likukuhulila ulime indzanangifu, apo ulidumule nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali.

Avali mu wutoolane vatanage ukulekana

(Matayo 19:9; Maluko 10:11-12; Luka 16:18)

31“Kangi múpuliike ululagi ulwitigila, ‘Umugoosi ye avedzaga ye akumugotola umudala vaakwe, amupeelage ihaate ya kumugotola.’#Lwiwuko 24:1 32Neke kangi uneene ndikuvalongela ndiitigila, ye avedzaga ye akumugotola umudala vaakwe pe asimwibiite mu wudumuli-noolane, akumuhambusa umudala vaakwe ukuvedza mudumuli-noolane. Kangi ye avedzaga ye akumutoola umudala umugotole, umugoosi uyo nave iivedza mudumuli-noolane.

Ulukenyelo wiimila wa kuyiiga

33“Kangi múpuliike ukutigila, avanyakataali vaalongeliilwe ululagi ulwitigila, ‘Utanage ukuyiiga wudesi, neke kangi ukwilidzage uluyiigo lwako lwe úyiigile kwa Mutwa Nguluvi.’#Valevi 19:12; Mbalilo 30:2; Lwiwuko 23:21, 23 34Neke kangi uneene ndikuvalongela ndiitigila, utanage ukuyiiga nambe padebe. Pe wiiyiiga, utanage ukutambula kukyanya, pakuva kukyanya uko, kye kideego kya wutwa kya Nguluvi. 35Pe wiiyiiga, utanage ukutambula inyi, pakuva inyi, pe peene pe iiviika uNguluvi amagulu gaakwe.#Isaya 66:1 Pe wiiyiiga, utanage ukutambula uwudzenge wa Yelusalemu, pakuva uwudzenge uwo, wa Mutwa Mukomi.#Ndzimbililo 48:2 36Kangi mutanage ukuyiigila imituwe gyenyo, pakuva mwilemwa ukuhambusa nambe lufwili lumwinga mu fwili dzeenyo ukuvedza mbalafu, enewuli niitu. 37Lino, ngana mwikwidikila, mutigilage, ‘Eena,’ enewuli ngana mwikaana, mutigilage, ‘Nambi.’ Ngana mwikoongeledza madzwi agangi, ago giihuma kwa Setano.

Ulukenyelo wiimila wa kulumbila umukole

(Luka 6:29-30)

38“Kangi múpuliike ukutigila, avanyakataali vaalongeliilwe ukutigila, ‘Liiho pa liiho, ni liino pa liino.’#Kuhega 21:24; Valevi 24:20; Lwiwuko 19:21 39Neke kangi uneene ndikuvalongela ndiitigila, utanage ukumulumbila mukole umuunu ye akukulimila imbiifu. Nda haamu, umuunu ye akukudzagula uludzeedze ulwa kundiyo, umupituhidzage nu lwa kungʼigi. 40Kangi, ngana umuunu iisaka uhigwe, ukuta anyamule igwanda yaako, umulekelage ni likoote lyako. 41Kangi, ngana umuunu akukugagiilidza ukunyamula ikitegulo kyakwe#5:41 Ngana umuunu akukugagiilidza ukunyamula ikitegulo kyakwe Kwe kutigila, umukolakyanda uMuloma aali nu wutawulilwe wa kumugagiilidza ewo uMuyahudi. ukufikila ulugendo lwa kivalilo kimwinga, ugendage ni kitegulo ikyo fivalilo fivili. 42Kangi, ngana umuunu akukunyilika kiinu, umupeelage. Ngana umuunu iisaka ukwadzimya ukuhuma ukwako, utanage ukumukaanila.

Ukuveenda avanya wukava

(Luka 6:27-28, 32-36)

43“Kangi múpuliike ukutigila, avanyakataali vaalongeliilwe ululagi ulwitigila, ‘Umwendage umuyago,’#Valevi 19:18 na vaanu viilonga ukutigila, ‘Umusuulage umunya wukava vaako.’ 44Neke kangi uneene ndikuvalongela ndiitigila, muveendage avanya wukava veenyo, nu kuvalapangilila kwa Nguluvi vonda avakuvapumusa, 45ukuta muvedzage vaana va Dadiinyo ye ali kukyanya. Umwene akuvavalihidza ilidzuwa avaanu vonda, avagolofu na vahosi. Kangi iitoonyehedza indoonya ku vaanu avagolofu na vahosi. 46Ngana mukuveenda avo avakuveenda unyeenye swe, mulaanukila uluwonolo luki? Na vahaki-pembe#5:46 Vahaki-pembe Lole Avahaki-pembe ku Figanulo. vasiilima ndeeni? 47Ngana mukwihungila ye mwídzeeliye ngʼaani, mwilima kiki íkilutiye ku vangi? Ongo, avaanu avasikumufuuwa uNguluvi navo vasiilima ndeeni? 48Lino muvedzage vakwilifu, ndawuli uDadiinyo ye ali kukyanya kye mukwilifu.

Selectat acum:

Matayo 5: BEZ

Evidențiere

Partajează

Copiază