Luka 23

Wokplɔ Yesu va Pilato gbɔe

(Mat 27.1-2, 11-14; Mar 15.1-5; Yoh 18.28-38)

1Tete anyinɔƒe blibo la tso, eye wokplɔ Yesu yi Pilato gbɔ. 2Wotsɔ nya ɖe eŋu be: “Míekpɔ ame sia wòle míaƒe dukɔmeviwo ƒe susu trɔm. Egbe na mí be míagadzɔ nu na Roma Fiagã o, eye wògblɔ be yee nye Kristo, Fia la.” 3Pilato biae be: “Wòe nye Yudatɔwo ƒe fia laa?” Yesu ɖo eŋu nɛ be: “Ègblɔe ɖe eteƒe.” 4Pilato gblɔ na nunɔlagãwo kple amehaawo be: “Nyemekpɔ be ame sia da se aɖeke dzi o.” 5Ke woawo te gbe ɖe edzi be: “Ele zitɔtɔ dem dukɔa me kple eƒe nufiafia tso keke Galilea to Yudea-nutowo me va ɖo afi sia hã.”

Yesu le Herodes ŋkume

6Esi Pilato se esia la, ebia be: “Galileatɔe nye ame laa?” 7Esi wòse be Yesu tso nuto si dzi ɖum Herodes le la me la, eɖoe ɖe Herodes, ame si ŋutɔ hã nɔ Yerusalem ɣe ma ɣi la gbɔ. 8Esi Herodes kpɔ Yesu la, dzi dzɔe ŋutɔ, elabe enye eƒe didi xoxoxo be yeanyae le nu siwo wòse le eŋuti la ta. Enɔ mɔ kpɔm be Yesu awɔ nukunu aɖe yeakpɔ. 9Ale Herodes bia gbe Yesu ɣeyiɣi aɖe, ke Yesu meɖo nya aɖeke ŋu nɛ o. 10Nunɔlagãwo kple agbalẽfialawo le tsitre ɖe afi ma hele enu tsom vevie. 11Herodes kple eƒe asrafowo hã ɖu fewu le Yesu ŋuti, eye wodo vloe. Wotsɔ awu xɔasi aɖe do nɛ, eye wògbugbɔe ɖo ɖe Pilato gbɔ. 12Herodes kple Pilato zu xɔlɔ̃wo gbe ma gbe, elabe tsã la, futɔwo wonye.

Wotso kufia na Yesu

(Mat 27.15-26; Mar 15.6-15; Yoh 18.39—19.16)

13Pilato yɔ nunɔlagãwo, amegãwo kple dukɔ la ƒo ƒu, 14eye wògblɔ na wo be: “Miekplɔ ame sia va gbɔnye abe ame si le amewo ƒe susu trɔm le dukɔa me la ene. Esi medzro eƒe nya la me le mia ŋkume la, mekpɔ be nya siwo mietsɔ ɖe eŋu la dometɔ aɖeke melée o. 15Herodes hã kpɔe nenema ke, elabe egbugbɔe ɖo ɖe mí. Mikpɔ ɖa, ame sia mewɔ naneke si dze na ku o. 16Eya ta mana woaƒoe, eye maɖe asi le eŋu.” [ 17Le Paska ɖe sia ɖe dzi la, Pilato ɖea asi le gamenɔla ɖeka ŋu na wo.]

18Ke ameha la katã do ɣli hoo gblɔ be: “Kplɔe dzoe, ne nàɖe asi le Baraba ŋu na mí!” 19Wode Baraba sia gaxɔ me be ehe zitɔtɔ va dua me, eye be ewu ame. 20Pilato di be yeaɖe asi le Yesu ŋuti, eya ta wòtrɔ ɖe ameha la gbɔ, eye wògaƒo nu na wo. 21Ke wodo ɣli bobobo be: “Klãe ɖe ati ŋuti! Klãe ɖe ati ŋuti!” 22Pilato bia wo zi etɔ̃lia be: “Nu vɔ̃ ka koŋ wòwɔ? Nyemekpɔ be ame sia da se aɖeke dzi si ta wòadze na ku o. Ke mana woaƒoe, eye maɖe asi le eŋu!” 23Gake ameawo ganɔ ɣli dom sesĩe kokoko be neklã Yesu ɖe ati ŋuti. Mlɔeba woƒe ɣlia va glo Pilato. 24Ale wòtso nya me be woawɔ woƒe didi la dzi na wo. 25Eɖe asi le ame si wodi la ŋu. Ame sia nɔ gaxɔ me le zitɔtɔ kple amewuwu ta; ke etsɔ Yesu de asi be woawɔ woƒe lɔlɔ̃nu.

Woklã Yesu ɖe atitsoga ŋu

(Mat 27.32-44; Mar 15.21-32; Yoh 19.17-27)

26Esi wokplɔ Yesu yina la, wodo go ŋutsu aɖe si ŋkɔe nye Simon tso Kirene. Etso agbleta gbɔna, eye wolée, tsɔ atitsoga la nɛ be wòatsɔ akplɔ Yesu ɖo. 27Ameha gã aɖe kplɔ Yesu ɖo, eye nyɔnu siwo le avi kple konyi fam nɛ la le wo dome. 28Yesu trɔ ɖe wo gbɔ gblɔ be: “Yerusalem-nyɔnuwo, migafa avi nam o! Mifa avi na miawo ŋutɔ mia ɖokui kple mia viwo boŋ! 29Elabe ŋkekewo li gbɔna esiwo me woagblɔ le be: ‘Woyra konɔwo kple dɔ siwo medzi vi kpɔ o kpakple no siwo mena notsi vi kpɔ o.’ 30#Hos 10.8; Nyaɖ 6.16. Ɣe ma ɣi la, amewo agblɔ na towo be: ‘Mimu dze mía dzi!’ Woagblɔ na togbɛwo be: ‘Mitsyɔ mía dzi!’ 31Elabe ne wole esia wɔm ɖe ati mumu ŋu ɖe, ale ke wòava nɔ na ati ƒuƒu ya?”

32Wokplɔ ame bubu eve, siwo nye adzodalawo la hã yina wuwu ge akpe ɖe Yesu ŋu. 33Esi woɖo teƒe si woyɔna be: “Ametakoliƒe” la, woklã eya kple adzodalaawo ɖe atitsoga ŋuti le afi ma; ɖeka le eƒe ɖusime, eye evelia le eƒe miame. 34#Ps 22.18. [Tete Yesu gblɔ be: “Tɔ́, tsɔe ke wo elabe womenya nu si wɔm wole o.”] Wodzidze nu ɖe eƒe awuwo dzi, eye woma wo ɖe wo nɔewo dome. 35#Ps 22.7. Ameha la le tsitre le adzɔge henɔ nu kpɔm, esime dumegãwo nɔ fewu ɖum le Yesu ŋuti be: “Exɔ ame bubuwo ɖe agbe, nexɔ na eɖokui nenye eyae nye Kristo, Mawu ƒe ame tiatia la!” 36#Ps 69.21. Asrafowo hã ɖu fewu le eŋu. Wote ɖe eŋu tsɔ wain veve kpe nɛ 37gblɔ be: “Nenye wòe nye Yudatɔwo ƒe fia la la, ekem xɔ na ɖokuiwò.” 38Woŋlɔ nya siawo ɖe eƒe tagbɔ be: “YUDATƆWO ƑE FIA LAE NYE ESI.”

39Adzodala siwo woklã ɖe ati ŋuti kpe ɖe Yesu ŋu la dometɔ ɖeka hã dzui be: “Menye wòe nye Kristo la oa? Ɖe ɖokuiwò, ne nàɖe míawo hãe.” 40Ke evelia gbe nya nɛ gblɔ be: “Ɖe mèvɔ̃a Mawu oa? Wobu fɔ wò, abe ale si wobu fɔ eya hã ene. 41Míawo la, esiae dze mí, elabe nu siwo míewɔ la ƒe fetu xɔm míele, gake ame sia mewɔ nu tovo aɖeke o.” 42Tete wògblɔ na Yesu be: “Yesu, ɖo ŋku dzinye ne èva ɖo wò fiaɖuƒe la me.” 43Yesu gblɔ nɛ be: “Mele egblɔm na wò le nyateƒe me be ànɔ Paradiso la me kplim egbe!”

Yesu ƒe ku

(Mat 27.45-56; Mar 15.33-41; Yoh 19.28-30)

44 # Mos II, 26.31-33. Azɔ anɔ abe ŋdɔ ga wui eve me ene la, viviti do ɖe xexea me katã va se ɖe ɣetrɔ ga etɔ̃ me. 45Ɣe ƒe keklẽ nu tso, eye mawuxɔmetsovɔ la dze ɖe eve siã. 46#Ps 31.5. Yesu do ɣli sesĩe be: “Tɔ́, asiwò mee metsɔ nye gbɔgbɔ dee!” Esi wògblɔ esia ko la, emia nu. 47Esi asrafoawo dzikpɔla kpɔ nu si dzɔ la, ekafu Mawu gblɔ be: “Nyateƒe, ame sia la, ame dzɔdzɔe wònye!” 48Esi ame geɖe siwo va afi ma be yewoakpɔ nu sia teƒe la, kpɔ nu si dzɔ la, wotrɔ dzo hele akɔta ƒom kple nuxaxa. 49#Luk 8.2, 3. Yesu ƒe ame nyanyɛwo katã kple nyɔnu siwo kplɔe ɖo tso Galilea la, le adzɔge hele nu siawo kpɔm ɖa.

Yesu ɖiɖi

(Mat 27.57-61; Mar 15.42-47; Yoh 19.38-42)

50Azɔ ŋutsu aɖe nɔ anyi si ŋkɔe nye Yosef. Etso Arimatia-du me le Yudea. Enye adaŋudeha la me nɔla, eye wònye ame nyui kple ame dzɔdzɔe. 51Eya melɔ̃ ɖe woƒe nyametsotso kple woƒe nuwɔna la dzi o. Enye ame si nɔ mɔ kpɔm na Mawu ƒe fiaɖuɖu la ƒe vava. 52Eyi ɖe Pilato gbɔ ɖabia Yesu ƒe kukua. 53Eɖee le atitsoga la ŋuti, xatsa aklala ɖe eŋu, eye wòtsɔe yi ɖamlɔ yɔdo si woɖe ɖe agakpe si me womeɖi ame ɖo kpɔ o la me. 54Gbe ma gbee dzadzraɖo le egɔme dzem na Dzudzɔgbe la. 55Nyɔnu siwo va kple Yesu tso Galilea la zɔ kple Yosef yi ɖakpɔ yɔdoa kple ale si wotsɔ Yesu ƒe kukua mlɔ anyi ɖe emee. 56#Mos II, 20.10; Mos V, 5.14. Wogbugbɔ va dzra atike ʋeʋẽe kple ami ɖo.

Le Dzudzɔgbe la, wodzudzɔ le se la nu.

Selectat acum:

Luka 23: EB14

Evidențiere

Partajează

Copiază