Yohanes 2

Srɔ̃ɖeɖe si wowɔ le Kana

1Le ŋkeke etɔ̃a gbe la, wowɔ srɔ̃ɖeɖe aɖe le Kana le Galilea. Yesu dada hã nɔ eteƒe, 2eye wokpe Yesu kple eƒe nusrɔ̃lawo hã va srɔ̃ɖeƒe lae. 3Esi wain vɔ le wo si la, Yesu dada te ɖe Yesu ŋu gblɔ nɛ be: “Wain vɔ le wo si.” 4Yesu gblɔ nɛ be: “O, nɔnye, esia menye wò nya o. Nye ɣeyiɣi mede haɖe o.” 5Yesu nɔ yi ɖe ame siwo nye subɔlawo la gbɔ hegblɔ na wo be: “Nu sia nu si wògblɔ na mi la, miwɔe.” 6Esi wònye dekɔnu na Yudatɔwo be woaklɔ wo ɖokui ŋu hafi age ɖe aƒeme ta la, woɖi kpezɔ ade ɖe aƒea me. Tsi tɔmedeze eve alo etɔ̃e nɔa zɔ siawo dometɔ ɖe sia ɖe me. 7Yesu gblɔ na subɔlawo be: “Midu tsi kɔ ɖe zɔawo me.” Wodu tsia kɔ ɖe wo me, woyɔ banaa. 8Tete wògblɔ na subɔlaawo be: “Miku tsia ɖe yi na nuɖuɖudzikpɔla la.” Ale woku tsia yi nɛ. 9Nuɖuɖudzikpɔla la ɖɔ tsi si trɔ zu wain la kpɔ. Menya afi si wòtso o, ke subɔla siwo du tsi la ya nya. Nuɖuɖudzikpɔla la yɔ ŋugbetɔsrɔ̃ la, 10eye wògblɔ nɛ be: “Ame sia ame kua wain nyuitɔ na amewo gbã, eye ne amewo no eya mu vɔ, emegbe hafi wòhea esi menyo o la ɖe go. Ale ke wɔ wò ya nèdzra wain nyuitɔ ɖo va se ɖe fifi?” 11Esiae nye dzesi gbãtɔ si Yesu wɔ le Kana le Galilea-nutome heɖe eƒe ŋutikɔkɔe fia, eye eƒe nusrɔ̃lawo xɔ edzi se.

12 # Mat 4.13. Esia megbe la, Yesu kple nɔa, nɔvia ŋutsuwo kple eƒe nusrɔ̃lawo dzo yi Kapernaum, eye wonɔ afi ma ŋkeke aɖewo.

Yesu nyà asitsalawo do goe le mawuƒe la me

(Mat 21.12-13; Mar 11.15-17; Luk 19.45-46)

13 # Mos II, 12.1-27. Yudatɔwo ƒe Ŋutitotoŋkeke la tu aƒe, eye Yesu yi Yerusalem. 14Ekpɔ ame siwo le nyi, alẽ kple ahɔnɛ dzram la kpakple gaɖɔlilawo wobɔbɔ nɔ mawuxɔ la me. 15Tete wògbi ka wɔ ameƒokae, eye wònyà ame siwo katã si alẽ kple nyiwo le la do go tso mawuxɔa me. Ekaka gaɖɔlilawo ƒe gawo hlẽ, eye wòmu woƒe kplɔ̃wo ƒu anyi. 16Egblɔ na ame siwo le ahɔnɛwo dzram la be: “Mitsɔ nu siawo do goe le afii, eye migatsɔ Tɔ́nye ƒe aƒe la wɔ asi mee o.” 17#Ps 69.9. Tete eƒe nusrɔ̃lawo ɖo ŋku mawunya sia dzi be: “O, Mawu, ŋuʋaʋã ɖe wò aƒe la ŋu le bibim le menye abe dzo ene.” 18Yudatɔwo va Yesu gbɔ hebiae be: “Esi nèwɔ nu siawo la, dzesi kae le asiwò nàfia mí?” 19#Mat 26.61; 27.40; Mar 14.58; 15.29. Yesu ɖo eŋu na wo be: “Mikaka mawuxɔ sia, eye le ŋkeke etɔ̃ me la, magatui.” 20Yudatɔwo gblɔ be: “Wotsɔ ƒe bla ene vɔ ade tu mawuxɔ siae, eye wòa nèle gbɔgblɔm be yeatui le ŋkeke etɔ̃ mea?” 21Ke nu si ŋuti wòle nu ƒom le lae nye eƒe ŋutilã ƒe mawuxɔ. 22Eya ta esi wofɔe ɖe tsitre tso ku me la, eƒe nusrɔ̃lawo ɖo ŋku edzi be egblɔ nya sia. Ale woxɔ mawunya la kple Yesu ƒe nya si wògblɔ la dzi se.

Yesu nya nu le amegbetɔ ƒe dzɔdzɔme ŋu

23Esime Yesu nɔ Yerusalem le Paskaa ɖuɣi la, ame geɖe siwo kpɔ dzesi siwo wòwɔ la xɔ edzi se. 24Ke Yesu ŋutɔ meɖo ŋu ɖe wo ŋu o, elabe edze si ame sia ame 25eye mehiã be ame aɖeke naɖi ɖase le amegbetɔ ŋuti nɛ o. Eya ŋutɔ nya nu si le amegbetɔ ƒe dzime.

Selectat acum:

Yohanes 2: EB14

Evidențiere

Partajează

Copiază