Matie 4

Sataa yɛ ‑mä Zezwii 'pä

(Maakö 1.12-13; Lwiikö 4.1-13)

1‑Mi'la 'plɩɛ 'wëë, 'n Lagɔ 'a 'Wugɔmʋʋ ‑nyɛ Zezwii yiɛ ‑mä 'muse 'klʋ mö, nzɩɩ Sataa 'kɔ ‑mä 'pä. 2Zezwii plɛnɩ 'ylɩ a gwlɩ 'sɔ 'mö su. Sabʋ 'n zlɩgä, ɔ'ɔɔ ‑lu li 'lɩlɩlɩ. Yɩ 'plɩɛ 'wëë 'n ngɔmʋ yoo 'lɩbhä. 3'N Sataa, ‑mäpänyɔ yoo yɔwʋ 'dio. Ɔ lɛ naa: «N‑n ‑kä ‑tiamö Lagɔ a 'Yu glɩnɩɩ, kpɩ nɩ ‑n yɩlɩɛ dɛ'ɛ 'wʋʋ, gbä yɩ 'kä lile 'mö yinɩ.» 4Ɔ gbää sa'aa, Zezwii lɛ naa: «Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Lilea a 'yize,

ma‑a 'nɩɛ 'nglɩ ‑kä, nɩkpɛ 'kä ‑bhölɩ,

‑maa wɛlɩɩ ‑yɩ wlʋä ‑mä Lagɔ a nglii,

mɩɩ 'nyɛmɔɔ ‑bhölɩbhölɛ. #4.4 Detlenɔɔmö 8.3. »

5'N Sataa ‑nyɔɔ yiɛ ‑mä Zeluzalɛɛmö, Lagɔglɔɔ 'mö mö, ‑mä Lagɔbudu 'Kɔdʋʋ a ‑badeyi 'wlu, 'n ɔ yoo ‑mä 'gïla. 6Ɔ lɛ naa: «N‑n ‑kä ‑tiamö Lagɔ a 'Yu glɩnɩɩ, 'bhöö mä'ä ghäyɩ 'wʋ, ‑n 'kä ‑nanyɩ zɛmö 'pä. Ɛ'ɛ ‑bhö nyɩasɛ, ‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Lagɔ yi 'ɔ zuzukuu 'dɩ 'nyɛ yɩ ‑kamö 'wʋ ‑kʋ,

yi ‑kamö ‑su ‑n tɩa kpiyi a'bhë gozo. # 4.6 Soomö 91.11-12. »

7Ɔ gbää sa'aa, Zezwii lɛ naa: «Sɛ'ɛ yɩ cɛlɩ'ɛɛ nɩɩ: Tɩ ‑na ‑Lowli Lagɔ 'mö 'bɩa ɔ ‑käa bhɛnɩ a za.#4.7 Detlenɔɔmö 6.16.»

8Zezwii 'nyɔ'ɛɛ sa'a 'dɩɩ, 'n Sataa ‑nyɔɔ yi'ɛɛ ‑gäga 'käda ‑bhlʋ 'wlu mö. Mä'ä 'pɩwʋ a bhlɩɩ 'wuë, ɛ ‑nyɛ ɛ 'mö a wʋlʋnɔɔ 'wuë 'sɔ, 'n ɔ yonyɩɛ 'ylimö tulanɩ. 9Ɔ lɛ naa: «N‑n ‑kä dɛ'ɛ na dlɩ 'mö ‑kokomïladigbï glu 'pä n‑n ‑kaa bʋbɔɔ, ‑li 'la 'wuë ‑n yɩlɩɛ da'a 'wʋʋ, n ‑yimi 'nyɛ.» 10Ɔ gbä'ɛɛ sa'aa, Zezwii lɛ naa: «Sataa, 'dionɩɩ gwë! ‑Maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ: ‑Na ‑lowli Lagɔ a 'yize a dlɩ 'mö, ‑lɛ ‑n kää ‑n 'kä ‑kokomïladigbï glu 'pä ‑n 'kɔ bʋbɔ.#4.10 Detlenɔɔmö 6.13. »

11Zezwii 'nyɔa'aa sa'a 'dɩɩ, 'n Sataa yoa'aa yɔwʋ 'bhöö. 'N Lagɔzuzukuu yiɛ yi, 'n yi yoo 'yli ‑wʋ.

Zezwii yɛ 'ɔ libhoo ‑mä Galilee‑bhölɩɩ 'mö tɛɛ

(Maakö 1.14-15; Lwiikö 4.14-15)

12Zezwii 'nʋä nɩɩ wa yɛ Zaa ‑jie 'mö 'pää, 'n ɔ yiɛ ‑mä Galilee‑bhölɩɩ 'mö a ‑glɔɔ wa laa Nazalɛɛtɩ mö. 13Ɔ möä, ɔ'ɔɔ ‑mä Nazalɛɛtɩ sɛ glɩ. ‑Maa Yizlaɛlɩ a ‑gligbï ‑mimii 'sɔ wa laa Zabilɔɔ 'n Nɛfötalii, yɩ ‑wʋä ‑lɛ 'nyu 'kɔdʋʋ yɔwʋʋ, 'yɩ bhlɩɩ 'mö a ‑glɔɔ wa laa Kapɛnaɔmö ‑mä ɔ möä. 14Wɛlɩɩ Lagɔ a 'möbhïlanɩnyɔ Ezayii bhïla a‑a, yɩ 'kä 'yli 'wlʋnɩ a za, nza ɔ möä ‑mä glɩɛ. Sɛ'ɛ ɔ gbä a‑a nɩɩ:

15 Zabilɔɔ a ‑nʋänyɩ,

Nɛfötalii a ‑nʋänyɩ,

abhʋa glɩɛ ‑mä 'nyu 'kɔdʋʋ a 'yioo yɔwʋʋ,

abhʋa glɩɛ ‑mä Zludɛɛ ‑gömöö,

abhʋa wa laa Galileewaa ‑waa Lagɔ ‑yii,

16 abhʋa glɩɛ ‑mä guylukwëa 'möö,

lɩlɛ 'kädɛ yeanyɩ 'wʋ ngäla!

Abhʋa glɩɛ ‑mä guylukwëa 'mö, mää 'kwie 'kämanɩɛ,

a yi lɩlɛ 'kädɩ ghlɩ. # 4.15-16 Ezayii 8.23–9.1.

17Zezwii ghlɛɛ ‑mä glɔ 'la 'möö, 'n ɔ yiɛ nɩkpabhë a 'yila 'klʋ Lagɔwɛlɩɩ a bhïlabhlu tɛɛ, ɔ lɛ naa: «A 'wuë, a nɩ ligba a 'kä 'a ‑lizokuu kɛ'mö ‑sɛ, ɛ'ɛ ‑bhö nyɩasɛ, ‑maa 'pɩwʋ mää Lagɔ 'kämanɩɛ yɛ 'dio.»

Zezwii yɛ 'ɔ tɛkägänɩwaa wäzɩ

(Maakö 1.16-20; Lwiikö 5.1-11)

18'Ylɩ ‑bhlʋ 'mö, Zezwii ‑wʋ ‑mä Galilee a 'nyu 'kɔdʋʋ yɔwʋ nɛmö dɔ'wʋ, 'n ɔ yiɛ ‑dɛdapäwa 'sɔ 'ylɩmö, ‑daayuë wa glɩnɩ. ‑Bhlʋ a nglɩɛ Simɔɔ 'mö wa la'ɛɛ Piɛlɩ. ‑Mɔ'la a nglɩɛ Adlee. Wa ‑wʋ ‑dɛda 'pä dɔ'wʋ. 19'N ɔ yuëë wäzɩ, ɔ lɛ naa: «A nɩ yi a ‑kaa ‑gänɩ. Sɛ a sɛɛ zïbhïï 'nyu 'möö, n 'kanyɩ ‑sɩbhä na nɩkpa a sɛtɛlɩwa 'wʋ 'zʋa.» 20Ɔ 'nyʋää sa'a 'dɩ cuu, 'n wa yiɛ 'wa ‑dɛdɩɩ yɔwʋ 'bhöö, 'n wa yoo 'bɩwʋ bhlinɩ. 21Ɔ ghlɛɛ 'yukudɛɛ, 'n ɔ yiɛ ‑daayuë ‑mumuë 'sɔ 'ylɩmö, Zaakö, Zebedee a yowli, ɔ ‑nyɛ ɔ ‑daayu Zaa 'sɔ. Wa ‑wʋ'ɛ wabhlɩ ‑mä 'wa gɔlʋʋ 'mö, wa ‑nyɛ wa dɩba 'sɔ. Wa ‑wʋ 'wa ‑dɛdɩɩ 'wlu gïganɩ dɔ'wʋ, 'n Zezwii yuëë wäzɩ. 22Ɔ 'nyʋä 'dɩ cuu, wa tɩ ‑mä wa dɩba gɔlʋʋ 'mö 'n wa yoo 'bɩwʋ bhlinɩ.

23‑Mä Galilee‑bhölɩɩ a ‑gwlɩɩ 'wuë 'mö ‑mä Zezwii 'tʋä 'wʋ. ‑Mä a Zwiiföwaa a Lagɔbïdii 'mö, 'n ɔ 'cɩanɩɛ ‑mä Lagɔwɛlɩɩ. 'Pɩwʋ mää Lagɔ 'kämanɩɛ a 'Mänatɩtɩɩ, 'n ɔ biiɛ saa 'wuë. ‑Waaa ‑yɛɛ, sɛɛ gwii 'lɩbhʋä bhʋlʋbhlʋʋ, 'n ɔ yɛmanuë ‑sɩbhä. 24'N Zezwii a nglɩɩ yiɛ tenyii mö. ‑Mä Silii‑bhölɩɩ 'wuë 'mö, 'n yɩ yiɛ ‑mä ghlɛ. Saa 'wuë 'n nɩkpa ‑nyɛ guzuwa 'bhöönɩɛ ‑sɩbhä 'n wa ‑lɛmɔnyɩɛ. ‑Mumuë kä zuzukuzoku ‑gömö, ‑mumuë ‑sukusuku lɩbhʋä, kpälɛkpälɛwa plɛ. Wa 'wuë sɛɛ gwii lɩbhʋä sa'a bhʋlʋbhlʋʋ, ‑sɩbhä wa ‑nyʋä yiɛ 'n Zezwii yɛmanuëë. 25‑Sɩbhä a za, nɩkpa 'kɔkɔmlɛ 'kɔkɔmlɛ mʋa ‑gänɔɔ. ‑Muë 'bhöönɩ ‑mä Galilee, bhlɩɩ wa laa Dɛkapɔɔlɩ, ‑mumuë 'bhöönɩ ‑mä. ‑Mumuë 'bhöönɩ Zeluzalɛɛmö, ‑mumuë bhöönɩ ‑mä Zwidee‑bhölɩɩ 'mö, ‑mä Zludɛɛ ‑gömö a bhlɩɩ 'mö, ‑mumuë 'bhöönɩ'ɛ ‑mä.

Selectat acum:

Matie 4: bet

Evidențiere

Partajează

Copiază