Yohana 5
5
OMULEMA W’AMAGURU NAKIZIBWA. — NIBABEHEREZA YEZU KUHENA SABATO.
1Ebyo ka byahwereho, niluba lunaku lukuru lw’Abayahudi, kai Yezu nanegera Yeruzalemu. 2Muli Yeruzalemu h’elembo ly’enabalega, haliho itunga elyo bakweta mu kiyahudi bati: Betsaida, lili n’emilyango itanu#5, 2 Enabalega ezaletwaga kutambwa mw’eklezia zarabahoga mw’ilembo elyo.. 3Muli lyonene halambiremo embaga ningi y’abarwere, abahume n’abasuntizi n’abalema, nibalindirira ikonzo ly’amenzi. 4Kuba mumalaika w’Omukama yahanantukiraga mw’itunga omwo nka lumo, hatyo amenzi gayugukaga. Omuntu ayahanantukiramoga wo kutandika, amenzi gayukire, yakizibwaga buli ndwara ekuba emukwasire. 5Haliga haliho aho omuntu yamazire myaka makumi asatu na munana arwere. 6Mbe Yezu ka yamubwene alambire, namanya okwo yamazire enaku ningi, namugambira ati: Okwenda kwehulira? 7Omurwere namusubiramo ati: Mukama wange, tindi na muntu wo kunsagara mw’itunga, aho amenzi gayugulirwa; kuba ine ka nkuba nkiza, ondi yanebembererayo. 8Yezu namugambira ati: Imuka, twara ilaro lyawe, olibate. 9Aho n’aho omurwere ogwo nayehulira, natwara ilaro lye nalibata. Kandi olunaku olwo lwaliga luli lwa sabato.
10Mbe Abayahudi nibagambira ayakizibwe bati: Ni lunaku lwa sabato, okuzibirwa kutwara ilaro lyawe. 11Nabasubiramo ati: Ayankiza niwe yangambira ati: Twara ilaro lyawe, olibate. 12Mbe nibamubuza bati: Ni muntu ki ogwo ayakugambira ati: Twara ilaro lyawe, olibate? 13Ayakizibwe tiyamumanyaga, kuba Yezu yaliga yarugire mu mbaga eyaliga esumbire aho. 14Kumara Yezu namusanga mw’eklezia, namugambira ati: Lora, wakizibwa; otasuba kuhena, otagwerwa ebibihire kukiraho. 15Omuntu ogwo nagenda natengera Abayahudi okwo niwe Yezu yamukirize. 16Nicho Abayahudi bahigiraga Yezu, obwo yakozire ebyo olwa sabato. 17Yezu nabagambira ati: Tata achakora na hati, n’ene nkukora#5, 17 Mungu Tata akulinda ensi naku zona, nikwo na Mwana wena nakora atyo.. 18Mbe nicho Abayahudi bakaniraga kuhiga kumwita, nawe t’obwo yatambukire sabato chonka, nawe n’obwo yayesire Mungu Ise, nayelenganisya na Mungu.
OBUMO BWA YEZU N’ESE. — OMUKIZA W’ABAFU N’OMULAMUZI. — ENANDIKO ZIKUMUNANYISYA.
Mbe Yezu nasubamo nabagambira ati:#5, 18 Yezu akwemanyisya okw’ali Mwana wa Mungu, Omupersona wa kabili. 19Koto koto nkubagambira nti: Mwana takuhicha kukora kintu ha bwe, kitali echo yabwene Tata nakora; kuba byona eby’oliya yakozire nibyo n’Omwana nakora atyo. 20Tata akwenda Mwana, akumwoleka byona ebyo akukola; kandi ebikorwa bihango kukira binu alibimwoleka, niho mukume. 21Kuba nk’okwo Tata akuzor’abafu nabaha obulame, nikwo na Mwana abo akwenda akubaha obulame. 22Tata takulamura muntu, nawe obulamuzi bwona akabuha Mwana, 23niho bona bakuze Mwana, nk’okwo bakukuza Tata. Atakukuza Mwana, takukuza Tata ayamutumire.
24Koto koto nkubagambira nti: Akuhulira ebigambo byange, kai akekiriza ayantumire, ali n’obulame obutahwaho, taliza kulamurwa, nawe yarugire mu lufu, naza mu bulame. 25Koto koto nkubagambira okw’olunaku lukwiza, na hati lwahikire, olw’abafu balihuliriramo ilaka ly’Omwana wa Mungu, kai alilihulira alilama. 26Nk’okwo Tata ali n’obuzima muli wenene, nikwo yahere na Mwana kugir’obuzima muli wenene; 27kandi akamuha n’obuhicha bwo kulamula, obw’ali Mwana w’omuntu. 28Echo kitabakumisya, kuba olunaku lukwiza olwo abali mu bituro bona balihuliriramo ilaka ly’Omwana w’omuntu; 29abakozir’ebizima balirugamo, babone kuzoka kw’obulame; nawe abakozire amabi, kuzoka kwo kulamurwa. 30Ine ha bwange nenka tinkuhicha kukola kintu. Nkulamula okwo nkuhulira; kandi elamu yange eli mu mwanya, kuba tinkuhigamo ebyo nkwenda, nawe ebyo ayantumire akwenda.
31Ine nkemanyisya omwene, kwemanyisya kwange kukuba kw’endimi#5, 31 Embona za Yezu ni Mungu Tata wenene na Yohana Batista.. 32Haliyo ondi akummanyisya, kai nkumanya okwo kumanyisya okwo akummanyisya kukomereze. 33Mukatuma hali Yohana, namanyisya ebikomereze. 34Ine tinkumanyisibwa muntu; nawe ebyo nkubigambira muhiche kuchunguka. 35Ogwo yaliga ali lumuli nilwaka, kai nilumulika. Kai imwe mukayenda kusemererwa katungu kanoro ha lumuli lwe. 36Ine ndi no kumanyisya kwange okukukira okwa Yohana; kuba ebikorwa ebyo Tata yampere kuhicha, ebikorwa ebyo ine nkukora, nibyo bikumanyisya okwo Tata yantumire. 37Kandi na Tata ayantumire niwe wenene akummanyisya; kai timukahuliraga ilaka lye, hona timukabonaga okw’akususa. 38Kai ekigambo che timuli nacho mul’imwe, obwo mutekiriza owe yatumire. 39Mukuhigunya mu Nandiko, kuba mukuchwa muti: Muli zonene nimwo mulibonera obuzima obutahwaho; kai na zonene nizo zikummanyisya. 40Kai timukwenda kunizaho, mubone obulame. 41Ine tinkwanankula ikuzo elikuruga mu bantu. 42Nawe nkubamanya, okwo mutali n’obwenzi bwa Mungu mul’imwe. 43Ine nkeza mw’izina lya Tata, nimubura kunkunda; ondi k’aliza mw’izina lye, niwe mulikunda. 44Imwe mukuhicha muta kwikiriza, imwe abakukuzanya mwenka? kai mutakuhiga ikuzo elikuruga hali Mungu wenka. 45Mutachwa muti: n’ine ndibachulira hali Tata: alibachulira ni Musa, owe mukutegezaho. 46Mukiba nimwikiriza Musa, munomuno mwakunikirize n’ene kimo; kuba wenene akayandika ebili hal’ine. 47Nawe mukabura kwikiriza Enandiko ze, kai ebigambo byange mukubikiriza muta?
Selectat acum:
Yohana 5: KED1946
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
First published in 1946 by the White Fathers. Published online with the permission of the White Fathers.
