Luka 17
17
Uluwembu
(Mateyu 18:6-7, 21-22; Marko 9:42)
1Yesu anena awasambilizi wakwe ati, ivintu vyakuponezya awantu muluwembu vyandi vilange vikapona; ukuwa akalanda kasikolo kwewino akuleka vikupona! 2Chingazipa ndiweliwenye anganyepelelwa niwe kulu ilyakusila munsingo yakwe asumbilwe mwesumbi, ukulusye ukuponezya wumwi uwawatichinye waa muluwembu. 3Muwachenjela!
Ndi umunyonko akuwembuka, mukalipile, ukuwa ndi watontolokwa, umutetela. 4Ndiwawifya kwewewe impindi munenulambali uwanda wonga, ndiswinya wanyoka impindi munenulambali akukunena akuti, Napela, wazipila umutetela.
Isuwilo
5Awasolwa awanena Imfumu e Yesu awati, Kuzya isuwilo litu.
6Imfumu e Yeau atolelela ati, Ndi muli nisuwilo ngati ambeyu yamuti, munganena umutinye woo muti, Yipe nimisisi yakonye ukayilembeke mwesumbi! wulizumila.
Umulimo wamuwomvi
7Ndiwumwi pakwe mwemwe ali numuwomvi wino aka lima pamwi umuchemi wang'onzi, wino ndi wawela wafuma kuvyalo, wuzye ungamunena uti, Pitisya, zanga ulye ichakulya? 8Awe! Ukuwa, ungamunena uti, njanizya ichakulya zuwa, uzwale undindilile ntele indye ing'we nukung'wa; ngapano nawe ulye ung'we nukung'wa. 9Umuwomvi asisalifwa kukutontela isundo lyamulimo wakwe wuno akawomba. 10Avino namwenye chili; muwala ndimwachita ivintu vyonsi vino mwakomelezwa, amuti, Swewawomvi awowo; twachita wuno amulimo witunye.
Yesu apozya awamambombo ikumi
11Ala pano Yesu alemile umusinzo akuya kwe Yerusalemu, alepula pakasi pe Samariya nu Galileya. 12Ala winjila mukaya kamwi awamambombo ikumi awamusunkania. Awimilila lwapatali, 13awapunda awati, Yesu! Tatakulu! Tufwile inkumbu!
14Yesu awalolechesya awanena ati, Yanji kayilanjizyani kwe wasimapepo alyakuti wakawalole.
Awala pane wakupita awatelefwa. 15Wumwi uwakwe woliwo, ala walola kuno wapozwa, anyoka, awapita akupunda akulumbula Leza nizwi kulu. 16Afika apona pansi pamanama yakwe Yesu, awamusalifya. Umuntunye weyo walinji amu Samariya. 17Yesu amunena ati, Wano watelefizwe wali ikumi; ngawanji mufundikambali walikwi? 18Ngamuno chani chino ikandinye lyeni lyoo lyonganye-nsu lyanyosile kukuyasalifya Leza? 19Nga Yesu amunena ati, Katuka pitanga: isuwilo lyako lyakupozya,
Ukwiza kwa Wufumu
(Mateyu 24:23-28, 37-41)
20AwaFalisi wamwi awawuzya Yesu, pano Uwufumu wakwe Leza wuliyizila. Nawe awatolelela ati, Uwufumu wakwe Leza wusikwiza wukulolwa. 21Pasi wumwi wino aliti, Lolani, woo koo! nanti akuti, Wowo koko! amuno Uwufumu wakwe Leza wuli mwakwe mwemwe.
22Anyoka anena awasambilizi ati, Impindi iliyiza pano muliwalonda ukulola uwanda wumwi wonga uwa Mwana Muntu, ukuwa mutaliwulola. 23Wamwi waliwawanena wakuti, Lolani, koko! nanti akuti, Lolani, koo! Kusikwezya mwize muye kweneko mukavwambange. 24Chili ndivino ukumesya kukachilingania mupela akumesya mbali nukuwuyenye akumesya, avino nu Mwana Muntu aliwa pawanda wakwe. 25Ukuwa pakutalika watela ayimbe nivintu vivule akanwe ninkulonye yoo. 26Ndivi no chalinji pamanda yakwe Nowa,
avino chiliwa napamanda ya Mwana Muntunye. 27Wonsinye walyanga nukung'wa, watwalananga, ukwizafika napawanda wuno Nowa winjizile muwato; Intalala iyiza ing'wezya wonsi. 28Swinyanye chiliwa ndivino pamanda wakwe Loti. Wonsinye walyanga nukung'wa, wakalanga nukukazya, nukukomela nu kuzenga. 29Ukuwa pawanda wuno Loti wafumile mu Sodomu, umulilo awufuma mwiyulu ngati amvula awocha wonsi. 30Wowonye avino chiliwa na pawanda wuno Umwana Muntu alisokoloka.
31Pawandanye wowo umuntu wino ali pamusonje wang'anda yakwe atize yize awakwika ukuti akinjile mung'anda mukusenda ivyakwe vino vili mwenemo; awowonye, nawino ali kuchalo atize ayize awele aye kung'anda. 32Yizukani muka Loti! 33Wensi wino akulonda ukukakatizya uwumi wakwe aliwusumba; nawensi wino wiza wawusumba awino alilanga alinawo. 34Nkuwanena nkuti, Uwusiku wowonye, waliwala wane walazile pachitala chonga: wumwi asendwa, umuwuye asyala. 35Walila awanachi wawili wakusya apaliponga: wumwi asendwa, umuwuye asyala. [ 36Awonsi wawili walilanga wali kuvyalo: wumwi asendwa, umuwuye asyala.]
37Awasambilizi awamuwuzya awati, Akwinye, Mfumu?
Yesu atolelela awanena ati, Kuno kuli ichala akuno namawimba yakuwanga.
Selectat acum:
Luka 17: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
