Yohani 5
5
Ukupozya pachiziwa
1Avila ivintunye vyoo vyasila, akuwa ichakulya chikulu ichachipepelwe chawa Yuda, nu Yesu aya kwe Yerusalemu. 2Kulyanye mwe Yerusalemu, mupipi nimpongolo yang'onzi, kuli ichiziwa namapembo yasano; chino mu Chiheberi watanji Betizata. 3Iwumba kulu ilyawalwalwe walalanga mumapembo-intonko, wachikonta, nawakwinyane. [Walindililanga aminzi ukuti yavunduke, 4amuno penye umungeli wa Mfumu e Leza wayanga mwiziwa aya avundula aminzi. Umulwale wino watalichila wapuwila mwiziwa pano aminzi yavunduzilwe apola kundwala yakwe yonsinye yino ali nayo]. 5Paponye palinji umuntu wumwi wino walwile kumyaka amakumi yatatu nakananimonsi. 6Ala Yesu wamulola alazile amanya kuno walwala pazimba; achaleka amunena ati, Wuzye ukulonda ukupola?
7Umulwale atolelela ati, Tatakulu, nsinumuntu uwakuti ndi aminzi yavundulwa ambika mwiziwa; ukuwa nkula nati inje nzana winji ayinjizile kali.
8Yesu amunena ati, Katuka, tola ichitala chako, uwapita, 9Napaponapapo umuntu akatuka atola ichitala chakwe, awapita.
Chochonye chachisilwe pawanda wakusolezya, 10achaleka wakapanzya wa chiYuda awanena wino wapozizwe awati, Ilelo apawanda wakusolezya achiwipe mwisundo litu ukusenda ichatala chako.
11Awatolelela ati, Wino ampozizye
awino anenile wati, Tola ichitala chako pitanga,
12Awamuwuzichisya awati, Weweni weyo wino akunenile wati tola ichitala chako uwapita?
13Ukuwa wino wapozizwe atamanyile wino wamupozizye, amuno pamasyonye yayo palinji iwumba kuli ilyawantu nga Yesu afyontomoka afuma.
14Apala pazimba, Yesu aya azana umuntu wino wapozizye mung'anda yakwe Leza ati, Lola, kanonzi uli chete. Utize uwifye swinya, chitize ichintu chiwipe chimwi ichilusye choo chize chikuponele.
15Umuntu awapita aya anena wakapanzya wachi Yuda ati, We Yesu awino ampozizye. 16Muno achonye-choo awaYuda awayimvya Yesu, amuno wapozizye pawanda wakusolezya. 17Yesu awatolelela ati, Tata akawomba penye, naninye nazipila ukuchita wowonye.
18Ukuvwanga kwamwatanye woo akusonkomola awa Yuda wonsi, awalonda ukumukoma; kusi akusula isundo lyawanda wakusolezya kutupu, ukuwa nakuno wavwanzile ati, Leza we Tata, kuno akuli kuyikolania nu Leza.
Amaka ya Mwana
19Yesu awatolelela awanena ati, Awenche nkuwanena nkuti, Umwana asiyichitila chimwi wenga; akachita chino akulola Yisi akuchita. Chino Yisi akachita, achino nu Mwanakwenye akachita. 20Amuno Umukwasi wakunda Umwanakwe akamulanjizya vyonsi vino weliwe akachita. Alimulanjizya nimilimo mikulu imilusye nayoo ayino awachita, ngamwensi mwize muzunguke. 21Ndivino Umukwasi akakatusya awafwe awapa uwumi, avino nu Mwananye akapa uwumi wano akulonda. 22Nanti aMukwasinye asipanzya wumwi weliwe wenga. Ukuwa walemeka Umwana ipanzyo lyonsi, 23alyakuti wonsi wachindike Umwana ndivino wakachindika Umukwasi. Wensi wino asinakuchindika Umwana atela as inakuchindika nu Mukwasinye wino wamutuma.
24Awenche nkuwanena nkuti: wensi wino akwivwa mazwi yane, wasuwila nawino wantuma, ali nuwumi wamuyayaya. Atalipanzwa, ukuwa walufuma kumfwa waya muwumi. 25Awenche nkuwanena nkuti: impindi ikwiza—iyizile nukwiza—pano awafwe waliyivwa izwi lya Mwanakwe Leza, nawano wivwa waliwa nuwumi. 26Ndivino Umukwasi antaliko ya wumi, avino waleka nu Mwanakwe nye ali. 27Swinya wamulemeka namaka yakupanzizya amapanzyo, amuno Amwana Muntu. 28Mutachizunguke kwechoo; impindi ikwiza pano wonsi wano wali munkungwe waliyivwa izwi lyakwe, 29wafume munkungwe: wane wakachita ichete walizyulupuchila kuwumi, nawo wane wakachita uwuwi walizyulupuchila kwipanzyo.
Wakalola kuvyakwe Yesu
30Nenji ntanga nchite chimwi nenga; ukuwa nkapanzya chino Leza wanena, achaleka ipanzyo lyane alyakusimichila amuno nsilonda ukuchita ukulonda kwane, nkandi ukulonda kwakwe wino wantuma.
31Ndachino nkuyipanichisizya nemwenecho nenga ye, uwukalola wane wutanga wivwike. 32Ukuwa kuli winji wino akumpanichisizya uwukalola, namanya kuno uwukalola wuno akampanichisizya awakusimichila. 33Mwatumile intumi zinu kwe Yohani, wapanichisizye ivyakusimichila. 34Nsinakulonda uwukalola wawuntu; navwanjila chonye-choo alyakuti mutulwe. 35Yohani walinji ngati alukozyo, luno lukupya mbali nukwaka, namwe mwalondesyanga ukulola ukuwala kwakwe impindintichi. 36Ukuwa indi nivyakumpanichisizya vino vyakula vyalusya ivyakwe Yohani: amilimo yino nkawomba, yino Tata wampa ukuti mbombe, yoyonye ayino ikumpanichisizya kuno Tata wantuma. 37Nutatanye wino wantuma akampanichisizya. Musitela mwivwe izwi lyakwe nawanda, nanti ampumi yakwe musitela muyilole, 38swinya musisunga amazwi yakwe mumyezo yinu, amuno mutasuwila wino Leza watuma. 39Mukasambilila Amawaliko Matele amuno mukwelengania mukuti mwakwe yoliyo mulizana uwumi wamuyayaya. Mumazwinye yayo mwavwangwa ivyane! 40Ukuwa naponye musilonda ukwiza kwenene ukuti nga muwe muwumi.
41Ntapechela ukuchindikwa nawantu. 42Ukuwa mwenji mbamanyile; mutakunda Leza mumyezo yinu, 43Nizila mumaka ya Mukwasi ukuwa mwakana ukumpochelela; angala winji wayizila mungamupochelela. 44Mwakunda ukuchindikana mwenga, ukuwa musilonda ululumbi lwakwe Leza wenga; ngafwandi mungasuwila wuli? 45Ukuwa kweni, mutize muwakwelengania mukuti ndiwalongola ku Mukwasi. Ukuwa Musa awino aliwalongola—amuno mwakwe Musa-nye amuno mwawika insingo. 46Ukuwa ndi nachawuzimanye mwasuwila Musa, fwandi naninye ngali mwansuwila, amuno wawalisile ivyane. 47Ngafwandi mungasuwila amazwi yano nkuvwanga wuli?
Selectat acum:
Yohani 5: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
