Yohani 3
3
E Yesu nu Nikodemu
1Kwalinji esongo wawa Yuda wino izina lyakwe walinji we Nikodemu, umuFalisi. 2Weyonye awino wayile kwe Yesu uwusiku afika ati, Rabi tukumanyile kuno wemusambilizya wino Leza watuma. Pasi wumwi wino angachita imilimo mikalambane ndivino yino ukuchita suka ndi Leza ali nawe.
3Yesu awatolelela ati, Awenche nkuwanena nkuti: pasi wino angalola Uwufumu wakwe Leza suka ndiwakwatwa swinya.
4Nikodemu amuwuzichisya ati, Nga umuntu angakwatwa swinya wuli ndi wesongo? Ngavino atanga ayinjile munda yakwe nyina nga akwatwe impindi yachitiwili!
5Yesu amutolelela ati, Awenche pasi wino anginjila mu Wufumu wakwe Leza suka ndiwatela wakwatwa naminzi mbali nu Muzimu. 6Kuvyamuwili umuntu akakwatwa nawawakwasi wakwe, nako kumuzimu akakwatwa nu Muzimu. 7Utazunguka muno nakunena nati, Mwensinye mule mukwatwe swinya. 8Umuza wukapupa konsi kuno wukulonda; ulanga ukwivwa ukupupa kutupu, nanti kumanya kuno wukufuma nanti akuno wukuya. Avino chili kwewensinye wino wakwatwa nu Muzimu.
9Nikodemu awuzya ati, Nga chonyechoo chingawa wuli?
10Yesu amutolelela ati, Ngavino wewenye we musambilizya mukulu uwawa Israeli, nga utamanya choo wuli? 11Awenche tukavwanga chino twamanya, swinya tukawumbula chino twalola, ukuwa naponye mwensinye mwakana ukupochelela amazwi yitu. 12Ndimwakana ukusuwila ivintu vyamunsi vino nkuwanena; nga fwandi nenji mungansuwila wuli ndi nkuwanena ivintu vyamwiyulu? 13Pasi umuntu wumwi wino akatela akwela aya mwiyulu nkandi Umwana Muntu, wino wisile pansi ukufuma mwiyulu.
14Ndivino Musa watumpuzile inzoka yachela chamukuwa mulumpalang'ang'a, avino nu Mwana Muntunye ale ayize atumpulwe, 15alyakuti wensi wino akuwika insingo mwakwe weliwe awe nuwumi wamuyayaya. 16Amuno Leza wakunzile awamunsi nkaninye, achaleka atuma Umwanakwe emusyupu, alyakuti wensi wino akuwika insingo mwakwe weliwe atize afwe ukuwa awe nuwumi wamuyayaya. 17Amuno Leza atatumile Umwanakwe munsi kukupanzya ukuwa kukutula.
18Wensi wino akawika insingo muMwana atapanzwa; ukuwa wensi wino asinakumusuwila wapanzwa kali, amuno atasuwila uMwanakwe Leza emusyupu. 19A vino ipanzyo lili: ukuwala kwiza munsi, ukuwa awantu weni wakundisya imfinzi ukulusye ukuwala, amuno wakachita iviwipe. 20Wensi wino akachita iviwipe wapata ukuwala asilonda ukuya kuno kuswefile, amuno asilonda imilimo yakwe iloleke palwenze. 21Ukuwa wensi wino akachita ivyakusimichila akayilanjizya palwenze, alyakuti ukuwala kulanjizye imilimo yakwe kuno akatontela Leza.
E Yesu nu Yohani
22Pansizi pavintunye vyoo, e Yesu nawasambilizi wakwe awaya munsi yakwe Yudeya. Alanga ali nawo kokonye akapindi kamwi, alanga akubatizya. 23Nu Yohani-nye wabatizyanga mwe Aenoni, kupipi nakwe Salimu, amuno kwalinji aminzi mavule. Awantu wayanga kokonye alanga akuwabatizya. 24(Yohani wachilinji ukwiyalilwa mung'anda yavingololo.)
25Awasambilizi wakwe Yohani wamwi awatalika ukupanzyania nu muYuda kuvyakusamba pakupepa. 26Achaleka awaya kwe Yohani awaya awamunena awati, Musambilizya, wuzye ukwizuka umuntu weyo wino mwalinji nawe mumbalama mwe Yordani, wino wavwanganga ivyakwe? Weyo, nawe kanonzi akubatizya, nawantu wavule wakuya kweweliwe!
27Yohani atolelela ati, Pasi wumwi wino angawa nachimwi suka ndi Leza wamupa. 28Mwemwenye nalwinu mwewakalola wane pano natili, Insi ne Mesaya, ukuwa natumwa pankolelo pakwe weliwe. 29Esiwinga awili mweni nawinga; ukuwa ichiwuza chakwe siwinga awino akakwimilila alanga akuteyelezya, akunda nkaninye pakwivwa izwi lyakwe siwinga. Pakwe chonyechoo indi ni chimwemwe kutaluvile. 30Kalele awakula, nani ndange nkuchepa.
Wino wafuma mwiyulu
31Wino wafuma kupela wakula walusya wonsi: wino wafuma munsi awamunsi swinya akuvwanganga ivyamunsi. Wino wafuma mwiyulu wakula walusya wonsi. 32Akavwanga vino walola swinya wivwa nukwivwa, ukuwa pasi wino akasuwila amazwi yakwe. 33Wensi wino akasuwila amazwi yakwe akapanichisizya kwechochonye kuno Leza awakusimichila. 34Wino Leza watuma akavwanga amazwi yakwe Leza, amuno Leza akamwizuzya nu Muzimu wakwe. 35Umukwasi wakunda Umwanakwe wamulemeka ivintu vyonsi mwikasa lyakwe. 36Wensi wino akuwika insingo mu Mwana ali nuwumi wamuyayaya; wensi wino asinakutontela Umwana atalitela awe nuwumi, ukuwa uwukali wakwe Leza wulilanga wuli pakwe weliwe amanda nuwinji.
Selectat acum:
Yohani 3: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
