Yohani 21
21
Yesu aloleka kuwasambilizi munenulambali
1Pansizi pavintunye vyoo, Yesu ayilolesya swinya kuwasambilizi wakwe pakwe sumbi wa Tiberiya. Pakuyilolesya kwakwe wachisile woo. 2Simoni Peter, nu Tomasi (wino witwanga ilyakwe Ntembwa), nu Natanaeli (wino wafumile kwe Kana wa Galileya), nawanakwe Zebediya, nawasambilizi wanji wawili, walinji apaliponga. 3Simoni Peter anena awasambilizi wawuye ati, Naya mukuvwima inswi.
Awawuye awamunena awati, Swensinye akuno tukuya. Achaleka awaya awinjila muwato; ukuwa uwusikunye wowo wonsi nanti kulema inswi yimwi. 4Alila ilanzi lyatunka, Yesu aya ayimilila pachituntu, ukuwa awasambilizi weni watamumanyile ndi we Yesu. 5Nga awanena ati, Walumendo simutalemile chimwi?
Awamutolelela awati, Nanti chongachonga.
6Awanena ati, Sumbilani amakonde yinu lwakwe ndilo wawato, kweni mwandi muzane chimwi. Achaleka awasumbila amasumbo yawo, ukuwa muno walemile inswi mvule, awapotwa ukukwema.
7Umusambilizi wino Yesu wakunzile anena Peter ati, A Mfumu! Ala Simoni Peter wivwa kuno a Mfumu, ayinyepelela umwinjilo wakwe mumutembeleko (amuno watezile azuzile) apuwila muminzi. 8Ukuwa awasambilizi wanji awaya muwato kuchituntu, awakwema isumbo ninswi mwenemo-pwi. Watalinji ukutali nichituntu ukuwa, intampwe umwanda wonga (100). 9Awala wafumila pachituntu awalola umulilo wamakala ninswi zyosilwe penepo, awalola nubuledi. 10Ngapano Yesu awanena ati, Letani inswi zimwi zino mwafuma mwalema.
11Simoni Peter aya muwato akwemela ikonde kuchituntu, ikonde Iyizwile ninswi nkulu, zyonsi ponga zyapenzilwe umwanda wonga ninswi amakumi yasana ninswi zitatu (153); chingatenga inswi zyavuzile wowonye, isumbo litalepusile. 12Yesu awanena ati, Zanji mulye. Patalinji umusambilizi wumwi wino wanga amuwuzye ati, Ngaweweni? Amuno wamanyilenye-nto kuno walinji aMfumu. 13Yesu aya atola ichakulya, awapa; ninswinye achita wowonye.
14Yoyonye yalinji ampindi yachititatu yino Yesu wayilanjizizye kuwasambilizi pano wazyulupuzilwe kumfwa.
E Yesu nu Peter
15Awala walya, Yesu anena Simoni Peter, ati, Simoni, mwanakwe Yohani wuzye wankunda walusya vyoo?
Atolelela ati, Eta, Mfumu wamanya kuno nakukunda.
Yesu. amunena ati, Sunganga awana wang'onzi zyane. 16Yesu anyoka amunena impindi yachitiwili ati, Simoni, mwanakwe Yohani, wuzye wankunda?
Atolelela ati, Eta, Mfumu, wamanya kuno nakukunda.
Yesu amunena ati, Sunganga ing'onzi zyane. 17Anyoka amuwuzya impindi yachititatu ati, Simoni, mwanakwe Yohani, Wuzye wankunda?
Peter awa namalanda amuno Yesu wamuwuzizye impindi zitatu ati, Wuzye wankunda? ngapano ati, Mfumu, wamanya ivintu vyonsi; wamanyanye kuno nakukunda!
Yesu amunena ati, Sunganga ing'onzi zyane. 18Awenche nkukunena nkuti, pane walinji wemutichi wazwalanga umupango wenga uya nakuno ukulonda; ukuwa ndiwiza wakota, uliwakunzulula amakasa yako winji akuzwika akutwala nakuno utakasi ukuya. 19(Yesu wavwanjizile chonye-choo watakanga ukufwa kuno Peter wanga afwe kukuchindamichila Leza.) Ngapano Yesu amunena ati, Nkonka!
E Yesu mu musambilizi winji
20Peter apepetuka alola umusambilizi winji weyo, wino Yesu wakunzile—wino weyamizile kwe Yesu pachakulya amuwuzya ati, Mfumu, Wuzye weweni wino wandi akukutilile? 21Ala Peter walola umusambilizinye weyo, awuzya Yesu ati, Mfumu, nga umuntu wee weni chili wuli?
22Yesu amutolelela ati, Ndinkulonda ukuti alange amumi nsuke njize njize, wuzye achako? Wenji nkonka!
23Achaleka amazwinye yaa ayaya kuwawuye ukuti umusambilizinye weyo atanga afwe. Ukuwa Yesu weni atatili atanga afwe; watili, Ndinkulonda ukuti alange amumi nsuke njize njize, wuzye achako?
24Umusambilizinye wee awino wavwanzile ivintunye vyoo, weyonye awino swinya wawalisile ivintunye vyoo; twamanya nukumanya kuno chino watasile achakusimichi la.
Amazwi yakupelelechezya
25Kuli nivintu vinji ivivule vino Yesu wachisile. Vino ndivyanga viwalikwe vyonsi chonga-chonga, insi itanga ikwile ukuwika wakalata wane wanga wawalikwe.
Selectat acum:
Yohani 21: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
