Yohani 16
16
1Nawanena ivintu vyonye-vyoo alyakuti mutize mupunuzwe. 2Wize wawawinge mung'anda zyakupepela. Impindi iliyiza pano wino akuwakoma aliwakwelengania akuti, pakuchita wonye-woo, akupa ilumbo kwe Leza. 3Waliwawachitila ivintu vyonye-vyoo amuno watamanya Tata nanti anenenye, 4Ukuwa nawanena ivintunye vyoo; alyakuti pane impindi yiza-iza ukuti wachita ivintunye vyoo, mwize muwakwizuka kuno nawanenile.
Umulimo wakwe Muzimu Mwimichile
Pakutalika ntawanenile ivintu vyonye-vyoo, amuno nalinji namwe. 5Ukuwa kanonzi nkuya kwakwe wino wantumile; ukuwa pasi wumwi uwakwe mwemwe wino akumbuzya akuti, Nga ukuya-kwi? 6Kanonzi muno nawanena ivintunye vyoo, imyezo yinu yizula namalanda. 7Ukuwa nkusimichila: mwenji chawazipila amuno napita, amuno ndi intapisile, Kavwa atanga ayize kwemwemwe. Ukuwa ndinapita, apano ndiya nkawatumile ekavwa. 8Ndiwiza-wiza alileka awantu wamunsi wize wiluke ivyaluwembu luno wachita, ivya wulungamane nga, nivyipanzyo lyakwe Leza. 9Alileka wamanye ivyaluwembu, amuno watansuwila. 10Alileka wamanye ivyawulungamane, amuno nkuya kwe Tata mutalitela mundole nawanda. 11Alileka wamanye ivyipanzyo, amuno nankolelo wakwe wane wakakana Leza wapanzwa kali.
12Nchili indi nivintu vivule ivyakuwanena, ukuwa kanonzi vyatela vyavula. 13Ukuwa alila pano Muzimu wakusimichila wizawiza, aliwawakolelela mukusimichila konsi. Amuno ataliwavwanga nukulonda kwakwe, ukuwa aliwavwanga vino akwivwa awawanena vino vilipona. 14Alinchindamika, amuno alisenda amazwi yano nkataka ayano ayize awanene. 15ivintu vyonsi vino Tata alinavyo avyane; achaleka nati, Muzimu alisenda ivyane avino ayize awanene.
Amalanda nichimwemwe
16Kwasyala katichi mutalindola; swinya akapindi katichi mulindola.
17Awasambilizi wakwe wamwi awanenana wakuti, Ngachonye-choo chikusula chani? Vino akutunena akuti, Kwasyala katichi mutalindola, swinya akapindi katichi mulindola; swinya akuti, muno, nkuya kweTata. 18Awati, Nga akapindi katichinye kako chikusula chani? Tutamanyile chino akutaka!
19Yesu amanya kuno walondanga ukumuwuzya, achaleka awanena ati, Ntili, Kwasyala katichi mutalindola, swinya mukapindi katichi mulindola. Wuzye chonye-choo achino mukuvwanzyania? 20Awenche nkuwanena nkuti, muliwalila muwalosya nukulosya, ukuwa awamunsi waliwasechela; muliwa namalanda, ukuwa amalanda yinu yalipiluka ichimwemwe. 21Akula umwanachi wawa mulupanda awa namalanda, amuno impindi yakwe iyawulumila yafichila; ukuwa ala wapapa umwana ayiwilila uwulumila wonsi, awa nichimwemwe muno umwana wakwatwa munsi. 22Avino namwenye chili; kanonzi muli namalanda, ukuwa ndiwalola swinya, nimyezo yino iyize isechele, muwe nichimwemwe chino wumwi atanga awapoke.
23Pawandanye wowo mutalimbuzya chimwi. Awenche nkuwanena nkuti, Chonsinye chino mwiza mwalenga kwe Tata mwizina lyane aliwapa. 24Ukufika nilelo musitela mulenjele chimwi mwizina lyane; lenganji mwandi mupochelele, alyakuti ichimwemwe chinu chikule.
Nachimvya awamunsi
25Nawanenela ivintu vyonye-vyoo mumilumbe. Ukuwa impindi ikwiza pano ntaliwakuma imilumbe nawanda, ukuwa ndiwawilulila ivya Mukwasi. 26Pawandanye wowo muliwalenjela mwizina lyane; nsinakuwanena nkuti
ndiwawalambilizizya, 27amuno nu Tatanye wawakunda. Wawakunda
amuno mwankunda swinya mwasuwila kuno nafuma kwe Leza. 28Nafumile kwe Tata njiza munsi; kanonzi nandi insye insi inje kwe Tata.
29Awasambilizi wakwe awamunena awati, Lola, kanonzi ukuwumbula apatiswe, nanti kuma imilumbe. 30Kanonzi twamanya kuno wamanya ivintu vyonsi; umuntu wumwi atanga awafwa nukukuwuzya. Chonye-choo chaleka twasuwila kuno wafuma kwe Leza.
31Yesu awatolelela ati, Wuzye kanonzi mwasuwila? 32Lolani impindi ikwiza, yiza nukwiza, pane mwensi mulisalangana, wila muntu aye kumwawo, munsye nenga. Ukuwa kweni nsinenga, amuno Tata alinani. 33Nawanena ivintu vyonye-vyoo alyakuti muwe numutende mwakwe nene. Awamunsi waliwawayimvya. Ukuwa SJmpanji! Nachimva awamunsi!
Selectat acum:
Yohani 16: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
