Yohani 1
1
Izwi lyawumi
1Pano insi yachilinji ukutumbulwa, eLizwi walinjipo; walinji nu Leza, eLizwinye walinji we Leza. 2Pakutalikatalika eLizwi walinji nu Leza. 3Mwakwe weliwe amuno Leza welewulizile ivintu vyonsi; pasi chimwi ichitumbulwa chino chatumbuzilwe pano asipo. 4ELizwi ayili ntaliko yawumi, uwuminye woo awuno walesile ukuwala kuwantu. 5Ukuwala kukawalila mumfinzi, nayo imfinzi nanti kuzimya ukuswepa.
6E Leza watumile intumi yakwe, izina lyakwe walinji we Yohani, 7wino wizile kukuwumbulila awantu ivyakuwala. Wizile kukuwawumbulila, alyakuti wonsi wivwe Ilandwe wasuwile. 8Ukuwa weni atalinji wekuwala; wizizile kukuwumbula ivyakuwala. 9Kokonye kwalini akuwala kwakusimichila, ukuwala kuno kukwizanga munsi akuwalila awantu wonsi.
10Paponye eLizwi, walinji munsi. Mwakwe weliwenye amuno Leza watumbulizile insi, nawantu wamunsi watamumanyile. 11Wizile munsi, yakumwawo ukuwa awantu wakwe watamupochelezile. 12Ukuwa kweni, wamwi wamupochelezile awamusuwila nukumusuwila; achaleka wawonye waleka wawa awanakwe Leza. 13Watawile awanakwe Leza wakumiwele yawuntu, ukukwatwa ndivino awana wakakwatwa nuyisi; e Leza-nye umwenecho awino walinji amukwasi.
14ELizwi awa amulawa awakwikala mwakwe sweswe. Atulola uwukankala wakwe, ninkumbu mvule nukusimichila kukulu. Wonye-woo awuli wukankala wuno wapochelezile ku Mukwasi amuno walinji amwanakwe wenganye-nsu.
15Yohani wawumbuzile ivyakwe weliwe. Wapundanga akuti, Wee awino natakanga nkuti, Asyalichile pakwe nene, ukuwa weni wakula wandusya, amuno pano ntani nkwatwe weni walinji-po.
16Mukuvulisya kwankumbu zyakwe watupepa swensi-pyu, akatupepa nanti kulechelezya. 17Leza wavwanjizile amasundo mumulomo wakwe Musa; ukuwa wino walesile inkumbu nukusimichila we Yesu Klistu. 18Pasi wumwi wino akatela alola Leza nawanda. Emusyupu, wino wakolana nu Leza swinya wikala apaliponga nu Yisi awino wamuwumbula.
Imbila yakwe Yohani ekabatizya
(Mateyu 3:1-12; Marko 1:1-8; Luka 3:1-18)
19Wakapanzya wawa Yuda wamwe Yerusalemu watumile wasimapepo na Walevi kwe Yohani, awaya awamuwuzya awati, Ngaweweni?
20Yohani atakanile ukutolelela, ukuwa wavwanzile palwenze awumbula ati, Nenji insi ne Mesaya.
21Nga awamuwuzya awati, Ngafwandi weweni? Wuzye we Eliya?
Yohani atolelela ati, Awe, nsi ne weliwe.
Awati, Wuzye nche wemutumwa? Atolelela ati, Awe.
22Awamunena awati, Ngafwandi weweni, uleke tukanene wane watutumile. Ngafwandi wenji ukuti wuli?
23Yohani atolelela ati, Nenji indi awoo:
Nelizwi lyakwe wumwi wino akupunda mulumpalang'ang'a:
akuti, Yololani inzila yakupita Imfumu e Leza!
(Choo achino umutumwa Ayizeya wavwanzile.)
24Intumi zyozyo zyatumilwe nawa Falisi. 25Awawuzya Yohani awati, Ndi usi we Mesaya, pamwi Eliya, nanti amutumwa, nga ukubatizya muno achani?
26Yohani awatolelela ati, Nkubatizya naminzi; mwakwe mwemwe mwimilile wumwi wino mutamumanyile. 27Weyonye awino akwiza pansizi pakwe nene, wino ntazipila ukusapula utumikowa twandyatu zyakwe,
28Vyonsinye-vyoo vyachisilwe mu Betane, kapela yaluzi e Yordani, kuno Yohani wabatizyanga.
Umwanang'onzi wakwe Leza
29Uwacha Yohani alola Yesu akuya kuno ali, Yohani ati, Lolani Umwanang'onzi wakwe Leza, wino akasenda uluwembu lwamunsi! 30Wee awino natakanga nkuti, Umuntu akwiza pansizi penene, ukuwa kweni wakula wandusya, amuno pano ntani nkwatwe weni walinji-po, 31Ntamumanyile vino ali, ukuwa nenji niza mukubatizya naminzi alyakuti awa Israeli wamumanye.
32Woo awuli wukalola wakwe Yohani uwakuti, Naweni Umuzimu wukwika wafuma mwiyulu ngati ankunda awikala peweliwe. 33Napaponye nachilinji ukumumanya, ukuwa Leza, wino wantumile kukubatizya naminzi wanenile ati, Ulilola Umuzimu wichila pamuntu; weyonye awino akubatizyanga nu Muzimu Mwimichile. 34Yohani ati, Nawulola, swinya nkuwanena nkuti, Awili Mwanakwe Leza.
Awasambilizi wakwe Yesu awakutalika
35Swinya awucha Yohani walinji nawasambilizi wakwe wawili, 36alola Yesu akupita ati, Lolani Umwanang'onzi wakwe Leza!
37Awasambilizinye wawo wawili awivwa vino Yohani akuvwanga awakonka Yesu. 38Yesu apepetuka, alola wakumukonka, awawuzya ati, Nga mukuvwamba chani?
Awatolelela awati, Rabi (alili lyakuti Musambilizya) nga ukakwikala-kwi?
39Awatolelela ati, Zanji mulole, Achaleka awapita nawe awaya awalola kuno wikalanga, awikala nawe uwandanye wowo. (Lyatezil e lyatemba yawa amanguzi.)
40Wumwi uwakwe wawili wino wivwile Yohani akuvwanga, nga awakonka Yesu, walinji we Andreya, umunyina Simoni Peter. 41Napaponapapo e Andreya aya azana umunyina e Simoni amunena ati, Twati atuzana Mesaya, (Izwi lino likusula ukuti Klistu). 42Apano amutwala kwe Yesu.
Yesu amulolechesya ati, We Simoni, umwanakwe Yohani. Izina lyako wawa we Kefasi. (Alililyonga nilyakwe Peter, swinya likusula Mfuzi.)
Yesu ayita Filipu nu Natanaeli
43Awucha Yesu alungama ku Galileya. Aya azana Filipu amunena ati, Tuyange! 44(Filipu wafumile ku Betisaida, akaya kakwe Andreya nu Peter.) 45Filipu azana Natanaeli amunena ati, Twazana wino Musa wawalisile mwekalata wamasundo, wino nawatumwa wawalisile. We Yesu, umwanakwe Jozefu, uwamwe Nazareti.
46Natanaeli amunena ati, Wuzye ichizima chimwi chingafuma mwe Nazareti?
Filipu atolelela ati, Zanga ulole.
47Yesu alola Natanaeli akuya kweweliwe, avwanga ivyakwe ati, Umu Israeli wakusimichila wee; mwakwe weliwe muli ukusimichila kutupu!
48Natanaeli amuwuzya ati, Ngawamanya wuli?
Yesu amutolelela ati, Nakuweni pano walinji mumukunyu mwisika, pano Filipu wakwitanga.
49Natanaeli atolelela ati, Musambilizya, we Mwanakwe Leza! Wemfumu yawa Israeli!
50Yesu ati, Wuzye wasuwila amuno nakunena nanti, Nakuweni mumukunyu mwisika? 51Anyoka amunena ati, Nkukunena nkuti: Ulilola ivintu vikulu ukukusye choo! Ulilola iyulu lyiyuka nawangeli wakwe Leza wakukwela nukwika pa Mwana Muntu.
Selectat acum:
Yohani 1: WWN82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.
