Yoosuwa 8
8
QAAY MAGAALAH MABBUX KEE BAATI
1Tohuk lakal YALLI Yoosuwak iyyemii, «Tikka 'ta qaskar gabat haay, woo Qaay fan gex. Mameysitinay niya kok baxaqe waytay, Qaay magaalah malik kee woo magaalal tan ummattak qeebih koo aysiiseyyo. Woo magaala kee baaxo sinim abeyyo. 2Qaay magaala kee malikik, duma Yerikô-magaala kee tet malikik abba haytem abetto. Tonna'mmay magaalal geytoonu waytan duyye kee saq isinnih haysitetton. A magaala darreek gacca 'teeniih garciik abbixetton» kaak iyye.
3Yoosuwa inkih tan qaskar luk Qaay magaala gexa'gidih bical gace. Qaskarak addak dooren marak soddom alfih num yeyyeeqeeh, barat ken ruube. 4«Magaalak darret ombooqoraay; takkay immay kaxxam akak maxxeerina. Tet tabbaxoonuh bical gaca. 5Too waqdi yoo kee yi mara magaalat xayyoowennooh; Qaay magaalah mari net yamaate waqdi, naharsi saaku akah abne innah, wadirih nenkeleelebeh kudenno. 6Magaalak ken nayxeerem fan salafak nee ayraddelon. Duma akah abne innah keenik kudnam akkalelon. 7Too waqdi isin edde tombooqoren aracak eweqqa 'teenih Qaay magaala abbixetton. YALLAY sin Dageltah yanihiyya a magaala siinih aceele. 8Anu sin amrisaamah tet xabba haytan waqdi, YALLI sin akah amrise innal, gira teetit ruuba» keenik iyye. 9Tohuk lakal Yoosuwa ken ruubeeh; osonuuy edde yambooqoroonu waan arac fan gexeeniih, tokkel Qaay magaalak ayrô-culma le kabul Qaay kee Beetalak fanal sasot sugen.
Yoosuwa woo bar woo elle yinfiddigen aracal elle xiine. 10Maaca dibroh ugutta 'yeh qaskar gaaboyse. Sarrak kaa kee Israayil abbobti woo qaskar Qaay magaala fan been. 11Kaa'lih tan qaskar woo magaala akak culan afa fanah yemeeteeniih; tokkel ken kee woo magaalak fanal yan dorrak kilbat le kabut raaqa aracal yinfiddigen. 12Koona alfih qaskariita bahha heeh, Qaay magaala kee Beetal deqsitta magaalak fanal, Qaayak ayrô-culma le kabut raaqa aracal, raarisak akah sugan innah ken cabe. 13Qaskarak mango exxa magaalak elle yinfiddigen aracak kilbat le kabut raaqa aracat qeebi abaana'gidih bical gacen. Raqqa 'ye mariiy Qaay magaalak ayrô-culma le kabut qeebi abuh bical gacen. Yoosuwa woo bar woo dorral elle xiine.
14Qaay malik Yoosuwâ-mara yuble waqdi, sissikuk kullim bical hee. Kaa kee kay mara salafak ken yaataku waa mari yanim maaxaginnoonuy duma qeebi keenit elle aben Ordon weeqaytih kabu yemeeten. 15Yoosuwa kee kay mara wadir wadirih kudak woo bacarih tan baaxo fan yaawweenim ceelen. 16Too waqdi magaalah addal suggu 'ye marah, a marih lakal yardeeni'gidih seeco tekkeeh; Yoosuwak lakak elle yayraddeenimil magaalak axxeeruk yexxeeren. 17Magaalah addal sugga 'te labha inkih, magaala luk ten gasoh afoofa fakimit cabba hayteeh, Israayil marih lakal dadahteeh; magaala dibuk raqte.
18Too waqdi YALLI Yoosuwak iyyemii, «Ama gabat lito macaxu Qaay magaala fan esces. Ama magaala koh aceeyyok» kaak iyye. Yoosuwa YALLI kaak akah iyye innah, macaxu Qaay magaala fan yescesse. 19Yoosuwa too macaxu too magaala fan akah yescesse innaak, sasot suge mari Qaay magaala fan arduk gexeenih yibbixeeniih, gira teetit ruuben. 20Qaay mari wadirih wagga hee waqdi qeeriy qaraanat af le yublen. Too waqdi woo Israayil maray bacarih tan baaxo fan kudehiyya ken yabbixe'gidih wadir keenit yuduure. Tohih sabbatah akak yawqen faxo magennon. 21Yoosuwa kee kay maraay, aki xaqut sugte ken qaskar magaala tibbixeeh gira edde ruubeenim yublen waqdi, wadirih uduurra 'yeenih Qaay mara seleenih. 22Too waqdi woo Israayil maray magaala yibbixeh suge qeebit yengeleeh; tonna leemiik Israayil mari inkitanuuk marot ken hayya heeh sella ken hee. 23Malikik kalih marak num asillimi mahannoonuuy; num keenik nuwwuk macabinnoonuy inkih ken qiden. Qaay malik xabba heenih Yoosuwal baahen.
24Israayil mari, Qaay maray woo bacarih tan baaxo fanah ken yeyreddehiyya inkih woo bacaril qiden. Sarrak kaadu uduurra 'yeenih magaalah addal raaqe mara inkih selli heen. 25-26Yoosuwa Qaay mara selli haanam fan woo macaxu Qaay fan ascassuk suge. Too ayrot agabu kee labhâ fanal taban kee namma alfi yakke maray Qaay magaalal suggu 'ye inkih selli heen. 27Sarrak YALLI keenik elle iyye innal, wokkeh addal sugga 'ye saq kee duyye Israayil mari isih haysite. 28Yoosuwa woo magaalat gira ruubeeh abur tet abe. Too arac uxih a saaku fan abuuruh yan. 29Qaay malik caxak bagut takareeh, ogot kaa qide. Too caxah bagut carra fan takayrit suge. Ayro culte waqdi Yoosuwa, «Malik raysa caxak oobisa» iyye. Too waqdi kay raysa caxak oobiseenih magaalak afal qiden. Too aracal qalumuk fayya 'ta caddot xeet sittin bagul xisen. Woo xeet a saaku fan elle yan.
MUUSAL OOBE AMRI YIKRIYEN
30Tohuk lakal Yoosuwa Qeebal deqsitta qaleh amol, YALLAY Israayil doore Dagelta kinnihiyyah sadgat elle aban arac bicse. 31Woo arac Muusay YALLIH naqasuh yenehiyyal oobe Yallih amri elle yan kitab elle iyya innal bicse. Woo kitaabal Israayil marak YALLI iyyaamah, «Yoh sadgat elle aban arac bicissan waqdi, birtak bicsen mansafat ore ween xeetik bicisa» 'yaanam iyya. Tonnal too arac bicseenik lakal too aracal cado akak carrisan saqa sadgatah qiden. Amaanah-xiinaanamih-astah-aban-sadgoota kaadu tokkel aben. 32Tohuk lakal Israayil marih foocal, Yoosuwa woo xeetik bagul, Yalli Muusal oobise amriy kitaabal yuktubehiyya qagisak yuktube. 33Tohuk gaba kalen waqdi, Israayil mara kee ken abbobtiiy doolat-abbobtiiy cokmaaba kee ken addat suggu 'ye beedi inkih, woo YALLIH Qahdih Sandug isinnik fanal hayya heenih, Leewih seekat afkanuk foocal soolen. Sahdak garab keenik Geriidim deqsitta qalet darre cabba heeh sooleeh; aki garab kaadu tonnah Qeebal deqsitta qalet darre cabba heeh soole. Ken fanal YALLIH Qahdih Sandug abbaxuk ten seeka solte. YALLIH naqasuh yen Muusa addunyal yan saaku, «Yallih barkat edde geyan wakti gufa waqdi tonnah aba» 'yaanam keenik iyyeh yen. 34Tonna leemiik Yoosuwa woo Yallih amri elle yan kitaabal yunkuttube Yallih amri inkih, barkat kee abaaroh agantah, too kitaabal elle tan innal, anay fayya haak keenih yikriye. 35Muusal oobe amrik qangara cabe'kal, wokkel suggu 'ye marak urru kee agbi agantah num raaqe'kal akah yaabben innah yikriye. Allî-baaxoh maray ken addat suge kaadu edde yoobbe.
Selectat acum:
Yoosuwa 8: NKM
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te