Yoosuwa 2
2
GIBAH SINAM RUUBEN
1Tohuk lakal Yoosuwa, Tikible-Golo deqsita aracak namma num gibah ruube. Farrintoh too namma numuk iyyemii, «Kanqaan baaxok axcihiiy Yeriko deqsitta magaala sasot rebsimak gexay gibitay gaca» iyye. Too namma num gexxeeh; woo magaala gufen waqdi, Racab deqsitta xiiqareh xiinah buxa gexeeniih; wokkel elle xiinen. 2Too bar Yerikô-malik Israayil marak tu takkem gibah temeetem yoobbe. 3Too waqdi Racabah farmo ruubeeh teetik iyyeemih, «Ku buxah addal yan mari inkih tan baaxo gibita'gidih yemeete mara'mmay, buxak ken eyyeeqay yol ken bah» iyye.
4-6Too waqdi kaak intemii, «Sinam temeeteh sugte'mmay akak yemeeten ikke maaxiga. Tonna'mmay oson magaalah afa alfintaamak naharat ayro culte waqdi yi buxak gexen. Elle gexen qaxa maaxiga'mmay xayih lakat keenik gexxeenik ken aybeebexetton» keenik inte. Takkay immay Racab woo namma numuy gibah yemeetehiyya qari amol tan kafte talbi-qaalay sartan akak bicsaanahiyyah gubat ken tooqoreh raaqisse. 7Malik mari magaalak ken goranah yewqe waqdi magaalah afa alfeenih. Sarrak malik mari woo gibâ-marih goranah Ordon weeqaytuk akak taban gitah amma 'yaanam fan gexe.
8Tohuk lakal Racab woo gibâ-mari xiine'kal yanin waqdi qari amo keenil tewqeeh, 9annah keenik inte. «YALLI a baaxo siinih yeceem aaxigeeh; kulli num sin meysih raba. 10Isin Masrik gexxen saaku Qasa Badak tabten waqdi, YALLI Qasa Bad siinik foocat elle kafise inna noobbeh. Amoorâ-malikih nammayay Ordon weeqaytuk ayrô-mawqa le kabut raqta baaxol yenehiyyay migaaqah Sicon kee Qoog deqsitak yenehiyya elle qidden inna kaadu noobbeh. 11Woh noobbe waqdi meysih afqado nel dub inte. YALLAY sin Dagelta kinnihiyya qaran kee baaxo inkih xiinisam aaxigeh. 12Tonna'mmay taway anu sin elle abbaxuk sugga exce innal, yi buxah marah toh abettoonumuh YALLIH-migaaqal yoh xiibittaanam siinik faxa. 13Yi ina kee yi abbaay yi tooboko kee yi maqanxiixiiy ken buxah mara inkih qide waytaanamah xagana yoh cula. Sin marak, ‹Ken maqidina› inxica» keenik inte.
14Osonuuy teetik iyyeenimih, «Nanu inxicci innam abe waynek, Yalli nee qiday. Nanu abak sugnem gersi marah warse waytek, YALLI a baaxo neh yacayu waa saaku koh amqennoomuh xagana koh culla» teetik iyyen.
15Racab qari magaalat maroh yan gidaarat xakabuh yeneeh; sarrakaay woo mara akattat uxuyya hayteh qarik taagatak addah ken oobisse. 16Too waqdi keenik inteemih, «Gexxan waqdi woo qaleela le baaxo gexa. Tokke gexe wayteenik, woo malik mari sin geele. Oson yaduureenim fan tokkel sidiica ayro sasot sugaay; tohuk lakal isinni gexoh gexxaasita» keenik inte.
17Woo mari teetil gacseemih, «Afak nek teyyeeqe xagana koh duudusenno. 18Tonna'mmay atu abtaamahaa, nanu sin magaala nabbixe'gidih namaate saaku, woo nee akattat toxeeh akak rubte taagatat qasa akatta astah uxuyay sug. Ku abba kee ku inaay ku tooboko kee kok ramad elli haa mara inkih isi buxal sugus. 19Numuk teeni siinik afah eweqqa 'yeh rabe kaa tekkek, kaat yakku waa raba usuk isih isil baahem deqsitele. Tonna hinna'mmay, ku qarih addat yan marak numuk teenal tu baaheenik, toh nek way. 20Takkay immay tahat numuk teena lih yabte koo tekkek, away afak nek teyyeeqe Yalla kee xagani qangara nee matabbixam ixig» teetik iyyen. 21Is tahal ken lih bicteeh, sarrak ken rubsusseh. Oson gexxa 'yen waqdii, qasa akatta taagat caxxat toxee.
22Teetik elle gexen ikkel qaleela fanah gexeeniih, wokkel yombooqoren. Malik maray ken lakal gexehiyya sidiica ayroh gide ken goranat sugen. Sarrak ken weenih Yeriko fan yuduuren. 23Tohuk lakal taaxige gibâ-mari nammay qaleela-le-baaxok oobeeniih, weeqaytuk tabba 'yeenih Yoosuwa fan yuduuren. Too waqdi tikka 'tem inkih kaah warsen. 24Sarrak iyyeenimih, «YALLI a baaxo inkih neh yeceem digga le. Macaay intek, wokkel enna 'ya mari inkih meysih bux nek haak raaqe» iyyen.
Selectat acum:
Yoosuwa 2: NKM
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te