Sakaryas 14
14
Yawi Kadasug laman Namagtainan
1Umdasug ban sik menit laman Yawi nanginsaful. Gina ngay taw gdama, at ngay fawayan nu gafudan at naago fag ngay ramraman siginans taw Erusalem. 2Aroro ginanya ban Yawi namaful fagayu talun at ngay taw laman namawayan Erusalem. Ay kanya ban fagayu nangagbilug Erusalem, ay nangago fagayu nusnge wain sit ngay bale, ay namakamulun at mauri sa sangay mangena. Kanya fagayu nantaban sik wabilug ngay taw Erusalem sa tangayayu fag talun. Dewa katanya, at kinsawad ban gbanwan yay gugat sit furuan. 3Nu katanya, Yawi namawayan tibak talun kata ebi at nafakamulun. 4Ginanya ban fag menit, kanya nanmalindug sas Buksul Ulibu, sas Erusalem at fakamenitan baliwa. Kafag buksul umkafud dua siginans fakamenitan sitsigons fakayabian. At taguna fag afud umdugdug sabaliwas fawalan fag alvngvdan ay at faduak afud umdugdug sas fasiunan fag alvngvdan. Ay sit wabilug umke datag daul. 5Ngay taw Erusalem nu glagyu am, sanya fag datag ay dalan, aroro kafag dalan gdasug sas Asel. Nanlagyu am kata ay mangaguyang at nafakamulun ebi gina guig, gina Usya at fun sis talun Uda. Yawi ku Dius kadasug gadgaloan at ngay tagbarita.
6Ginanya ban fag menit, di maroy ay di marios. 7Ginanya ban fag menit saman tua tibak menit, aroro wa ban kayabi, menit way lang. Yawi way lang tagsaful te, ginanya ban fag menit nu kadasug.
8Ginanya ban fag menit, siginans Erusalem e sik mamam malyo gfamilugan. Ay sik afud mamam nanfamilugan sas Dagat at Mabulan#14:8 Dagat at Mabulan: sas Ebreu, Tagsis Fakamenitan fag Dagat. ay sik afud nanfamilugan sas Mediteranyu fag Dagat.#14:8 Mediteranyu fag Dagat: sas Ebreu, Tagsis Fakayabian fag Dagat. Ay gfamilugan tua gugat dewa mangune ay abagat. 9Yawi namagtainan sas fagdaul daga. Kanya way lang at fagtoglagun fag Dius, ay at ngayan way lang ban takadungug.
10-11Ginanya ban namadatag wan fagdaul talun Geba sas fawalan fag alvngvdan sitsigons Rimun ay sas fasiunan fag alvngvdan Erusalem. Dewa katanya, Erusalem ban wa kabali, siginan Benamin at Sakbawan ay gtaglayun sa Taguna fag Sakbawan, sitsigons Sakbawan tagsis Fugungan, ay siginans Kananel fag bale ngabat fagulitan sitsigon fun at fagturisan rawvg ubas. Wa ban e gdog ya nanrasras Erusalem, ay at ngay tagbanwan ban gbanwan tua manabayan.
12Yawi ban namadasug at maksvn fag faurianan sa sangay talun at nanamawayan Erusalem: Ginanya ban fag menit, kanya fagayu at bilug, ay at mata, ay anggan at leplep kadan dewa yay gleleg. 13-15Ay katanya yangay ban at kumdasug sat ngay fagbaugun sit fagmafulan: sat ngay kabayu, mola,#14:13-15 mola: Fagbaugun takata sik kabayu. At mama sik asnu ay at mina sik kabayu. kamelyu, ay asnu. Yawi ban gfalakayan kanya fag ngay taw, ay galay ban at sadi gfawayan at kaiban, ay kanya yay ban fagayu tagawayan. Ay anggan ban tibak taw Uda namawayan yangay Erusalem. Ay kanya ban fagayu namul at kinfamato fag ngay ramraman: gintu, sanbung salapi ay at ngay lanbung.
16Sanya ginan, at kinsawad ban fag ngay taw sas fagayu talun at nanamawayan Erusalem nangadasug sanya fag furuan laman nanseg Yawi ay nangasadi nangaful sabaliwa nu Kawat ngay Fayag. 17Dewa katanya, tam Fun, Yawi at Mabalyanan, wa gfadasug ya arak sas fagayu at yud nalo sas Erusalem laman nanseg anya. 18Ay anggan ngay taw Igiptu at yud nalo sas Erusalem, dumalan yangay Yawi at fagnamadasugun fag faurianan kata at kumfasludan sa sangay talun at yud nangalo sas Erusalem laman nangaful sabaliwa nu Kawat ngay Fayag. 19Kata kanya at faurianan sa sangay taw Igiptu ay sas fagayu talun at yud nalo sas Erusalem laman nangaful sabaliwa nu Kawat ngay Fayag.
20Ginanya ban fag menit ngay talun nu nanseg Yawi, riruki sa sangay kabayu at ngay fadkalingan sik longan te, “Mafasamanan Laman Sas Yawi.” Ngay bisu tagsis Yawi at bale umsik mafasamanan yangay kata ngay taya tagsis fagirugan. 21Ay fagayu bisu sis Erusalem ay sis Uda umyud e malong laman at mafasamanan sas Yawi at Mabalyanan. Aroro fagayu taw takadasug laman namon at fanggalangun namul kafag ngay bisu tiba laman at fagseudan. Ay ginanya ban fag menit, we gfalao ya sis Yawi at Mabalyanan at bale.
Selectat acum:
Sakaryas 14: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines