Mateu 8
8
Isus Nafafia sik Tagabangbang
Mk 1:40-44; Lk 5:12-14
1Ay Isus nu natagbung wan siginans buksul, ngayuk taw galo anya. 2Ay arodi sik taw tagabangbang#8:2 bangbang: sik fakasaitun sis balat tagfatoglag te, kafag taw wa masine ya magamut sas fagngayuan. ankakbang sa anya ay namalub sit akbang, ay get sa anya te, “Ku Fun, nu kaylat o, fafiai angku laman masine kwan.”
3Ay Isus nafalugde at take ay nated kafag taw at ke fakasaitun ay nalong te, “Sabv, kaylat au nu kafia o.” Ay arodi vtv kafag taw at bangbang anfia wan. 4Ay Isus nalong dayvm anya te, “Lag kamansulit sas nusdi sadik taw. Loi wan ay namalag o emu sas tagfon fanggalangun, ay foni sik fanggalangun kata ebi Muisis at longan, laman sik famasaful sa sangay taw te, anfia wo ay masine wo.”
Isus Nafafia sik Tagfangguna Tagfawayan at Fagsuguan
Lk 7:1-10
5Ay gina Isus andasug sas Kapernaum, sik tagfangguna tagfawayan ankakbang sa anya ay maksvn nu get sa anya te, 6“Ku Fun, ku fagsuguan gtaygilidan way lang si ku bale, wa malelegan, ay maksvn nu kasait at bilug fagdaul.”
7Ay Isus gbalus anya te, “Kin, nangalo kro emu laman namafia au anya.”
8Ay kafag tagfangguna gbalus te, “Deyud, ku Fun. Kwa matuyan. Kapla kway ro nu sak tua ro wo gsakbo sa ku bale. Aringangi way lang, ay ku fagsuguan ro umfia wan. 9Aroro e fun au tagtungud yay angku, ay e tagfawayan kyay si ku daga vtv. Ay nu nalong au sat sadi te, ‘Loi wan,’ kanya glo wan. Ay nu nalong kyangay sat sadi te, ‘Stei,’ kanya stae wan. Ay nu nalong au sa ku fagsuguan te, ‘Fakamuluni tuy,’ kanya ro namakamulun fia.”
10Ay Isus nu nadungug katanya at longan, andulo maksvn ay nalong sa sangay tagalo anya te, “Matuyan nu glong au ayu te, sas fagayu taw Israel kwa batang gdungug takaksvn nya nu gafanud. 11Glong au ayu te, ngayu bank taw umdasug siginans fakamenitan ay siginans fakayabian ay malunggung gfangon gasfuan Abrayam, Isak ay Akub gina ban Dius gfagtainan. 12Satu ro ngay taw Udyu wan Dius at fagfagtainanun, ay at matuyan, kanya ban fagayu gaukasan way sat dayu, at maksvn nu madulum, ay gwayway ban gugat ay gfaringgit at ngay bagang.”
13Ay Isus nalong sanya fag tagfangguna te, “Ulii wan. Umsure ro sa emu kata am fagafanudun.” Ay gina Isus garingang, kafag fagsuguan anfia wan.
Isus Nafafia Ngayuk Taw
Mk 1:29-34; Lk 4:38-41
14Ay Isus nu nasakbo sas Pedru at bale, nalag Pedru at nugangina nu gtaygilidan aroro garagnat. 15Ay Isus nated at daluap ay at ragnat anfia wan. Ay kafag mangena nlindug ay nafalganan sik fakonun laman sas Isus.
16Ay nu gakayabiun wan, e nanantabanan sa anya ngay taw at ke mauri fag falad. Ay siginan way sik aringang Isus naiyan kafag ngay mauri fag falad sanya ginan fag ngay taw, ay nafafia at ke ngay fakasaitun. 17Katanya laman namafasludan Dius at taglong Isayas at naguna nafoyung te,
“Kanya wan at nafalyam tam fagmamomuyun
ay anggan at nafafia tam ngay fakasaitun.”#8:17 Isayas 53:4.
Duak Mangama Ganangaloun Isus
Lk 9:57-62
18Ay Isus nu nalag ngayuk taw sit ligung, kanya nalong sat ngay tagadal te, “Bastam, nandife tam lino.”
19Ay arodi sik tagfoyung Muisis at Faugali nanangakbang sas Isus ay nalong anya te, “Takamoyung, galo kban emu nusnga nday ban o.”
20Ay Isus nabalus anya te, “Amatangani, sik idu talun e fagnansarirungan tua. Ay manuk tungud e fugad tua. Ay au, taw at Baguama, kwe fagtiugan.”
21Ay at sadi Isus at tagadal nalong anya te, “Ku Fun, guli kyay laman namoli ku mama.”
22Ay Isus nabalus anya te, “Aloi way angku, ay fabayani wa at ngay kinbul at namoli at ngay mabulan.”
Isus Nafasiwang sik Fulug
Mk 4:36-41; Lk 8:22-25
23Ay Isus ay at ngay tagadal nasakay sa sik sakayan lino. 24Ay arodi gina sis wabilug lino, sik maksvn fag fulug andasug. Ay lugwak natabun at sakayan. Ay ginanya Isus gtiug way. 25Ay at ngay tagadal ankakbang sa anya ay gfulo anya te, “Em Fun, falangfei emi, gakalubgubun watam!”
26Ay Isus nabalus anya te, “Wain ay fakalimuun? Wa maksvn nu gafanud am.” Ay Isus anlindug ay nasalag tagmara ay lugwak. Ay sanya ginan anke fagmanabayanun wan.
27Ay Isus at ngay ufud kadulo ay gidgintoan te, “Sinu tuy fag taw? Newa dewa tagmara ay lino gfaning tua anya.”
Isus Nafafia Duak Mangama at ke Mauri fag Falad
Mk 5:1-20; Lk 8:26-39
28Ay Isus andasug sas dife lino sa sangay taw Gerasa at talun. Ay sanya duak taw gfansaful ansure siginans fagfolian ngay kinbul ay gfablang Isus. Ay kafag duak taw maksvn nu gfangadotama. Ay we taw ya manandalan sanya. 29Ay kanya fag duak taw nauro te, “Nataw am fagyafakamulunun ro sa emi, o Dius at Baguama? O am fagnastieun namaidapan o emi, dewa yud yay andasug nu gfaurianan fag menit?”
30Ay sanya at dayu sik ngay bumbu gfangudkudan. 31Ay kafag mauri fag ngay falad maksvn nu get sas Isus te, “Am algan nu nangaiyan wayo emi, fasai emi sa sangay bumbu.”
32Ay Isus nalong anya te, “Kin, loi wan.” Ay kafag mauri fag ngay falad naubun kafag taw ay nasakbo sa sangay bumbu. Ay arodi vtv kafag ngay bumbu natarung siginan sik tungud tubi ay nataglayun sasad lino ay napnut.
33Ay ngay tagalaga kafag ngay bumbu gabanganan guli sat furuan laman namansulit sabaliwa kafag ngay bumbu ay kafag duak taw tagfansaful. 34Ay arodi fagayu taw sis furuan nalo wan laman namablang Isus. Ay kanya fagayu nu nalag anya, gfainfanyuan sa anya te, “Anin ngatu, loi wan ste ginan.”
Selectat acum:
Mateu 8: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
