Mateu 6
6
Isus at Foyungan sabaliwa Tagfon sat Yud e Kwa
1“Lag gfakamulun at masine, kanya nu ay famalagan way lang ay iba. Nu katanya way ay fakamulun, wa ban am e fagnamulun at masine siginan ay Mama sas banwa.”
2“Ay nu katanya, gina o gfon sat yud e kwa, lag o gfasaful sam iba kata ngay takamaningan at fakamulun gina si sangay bale fakafulan ay gina si sangaba dalan laman tibak taw sumeg anya. Matuyan nu glong au ayu te, kanya fag taw nabul wan at fagnamulun ma ban. 3Ay nu gfon am sat yud e kwa, lag gfasaful dewa sa ay fagadgalangan fia,#6:3 lag gfasaful… fagadgalangan: sas Griegu, lag gfasaful sam wala fag daluap am siun fag daluap at fakamulun. 4laman masuksukan nu gfon am. Ay ay Mama wan taglag ay fakamulun at masuksukan, namon at masine sa ayu.”
Isus at Foyungan sabaliwa sik Tagdarangin
Lk 11:2-4
5“Ay nu gdarangin o, lag gfaning takamaningan nu gdarangin. Aroro kanya at fakaylatun nu gdarangin namalindug dewa sis bale fakafulan ay dewa sasad sagbatan dalan, laman fagayu taw glag anya. Matuyan nu glong au ayu te, kanya fag ngay taw nabul wan at fagnamulun ma ban. 6Ay o nu gdarangin o, sakboi way sam bale sa sik suluk, ay dingdingi way am sakbawan, ay darangini sam fagyudun glag fag Mama. Ay am Mama taglag am fakamulun at masuksukan, mon ban fia at masine sa emu.
7“Ay gina o gdarangin, lag gfayu am longan nu dway e masuad, kata ngay taw at yud gtoglag Dius. Aroro kanya gamatangan te, ‘Nu nafayu aktua ku longan, e gdungug wa ro fia ku darangin.’ 8Ay lag am gfaning takatanya fag ngay taw, aroro ay Mama nasaful wan nusnge wain ay fagayudanun fagayu gina am gaetun sa anya. 9Ay nu gdarangin am longi te,
‘Em Mama sas banwa,
Ngay taw nangus sumeg tua am ngayan,
10ay masine nu gfagtainan tuo ngay taw.
Ay nusnga setaw am algan, masine nu umfasludan ste swa daga kata nu nfasludan sas banwa.
11Ay foni emi em fakonun katsi fag menit.
12Ay falyami em ngay asalanan kata nu gfalyam ami em ngay iba at asalanan sa emi.
13Ay dirii emi laman dimi gafaskudan sas asalanan,
nu bunway falangfei emi siginan at mauri.’
14Aroro nu nafalyam tuam ay iba at ngay asalanan sa ayu, anggan ay Mama sas banwa gfalyam yangay ay ngay asalanan. 15Ay nu dway am nafalyam ay iba at ngay asalanan sa ayu, anggan ay Mama sas banwa wa gfalyam ay ngay asalanan.
Isus at Foyungan sabaliwa nu Yud Gfangon laman Gdarangin
16“Ay gina am yud gfangon#6:16 yud gfangon: ngayuk taw wa kon kaduge at nafili fag buknga laman gdarangin sas Dius. laman gdarangin, ay mata dangay mafabaluanan kata ngay takamaningan. Aroro takamaningan wa nafasineun at mata laman namasaful sat iba te, wa gfangon ginanya fag buknga. Matuyan nu glong au ayu te, kanya fag taw nabul wan at fagnamulun ma ban. 17Ay gina o yud gfangon laman gdarangin, fasinei am buk ay fegusi am mata, 18laman ngay taw wa sumaful te, katsi mangaro wo gfangon laman gdarangin, nu bunway am fagyudun glag fag Mama tagsaful. Ay am Mama taglag am fakamulun at masuksukan, namon at masine sa emu.
Tagsis Banwa fag Ramraman
Lk 12:33-34
19“Lag gfaful ay ngay ramraman ste swa daga aroro ste fatung kon way ay anenay gfamin way, ay tagfangkamul masakbo way ay mafangkamul way. 20Ay fagfafulun ang yakman ay fagmaramramanun sas banwa. Aroro sanya we fatung ay we anenay ay we gfamin ay nafaful. Ay we tagfangkamul masakbo sanya laman nanfangkamul. 21Aroro nu inda ay ramraman, sanya yangay anggan ay amatanganan.
Tam Bilug at Salung
Lk 11:34-36
22“Am mata am bilug at salung. Nu malyo tua am mata,#6:22 E gamatangan te, malyo am mata at masuad te, kamon, ay yud malyo, kaungit. fagdaul am bilug mayamag yangay. 23Ay am mata nu dway malyo, anggan fagdaul am bilug madulum way. Ay am fagmayamagun nu madulum way, ida madulum yay ban daul fagdaul am bilug.
Wa Mafafaning Duak Fun
Lk 16:13
24“Sik taw wa mafasfuan gfaning duak fun. Aroro kauri ro at sadi, ay kesug at sadi. Ay gfaning at sadi, ay kamabo sat sadi. Wam mafasfuan mafafaning Dius ay sas ramraman.
Isus at Foyungan sabaliwas Fagafanawaun
Lk 12:22-31
25“Nu katanya, glong au ayu te, lag am gafanawa te, daginan ban ay fakonun ay ay fanginum ay ay lanbung. Aroro ay leleg at kamafanudan gtungud tua sik fakonun, ay ay bilug at kamafanudan gtungud tua sik lanbung. 26Amatangani ngay manuk tungud, we tanum ay we gutluan, ay we fungsuan, ay dewa katanya, ay Mama sas banwa gfon tua gugat at fakonun. Ay ay kamafanudan gtungud tuam ngay manuk tungud. 27Sinu am at mafafaaba ay leleg sik kadugayan sirut, siginan ay fagafanawaun?
28“Ay wain ay fagafanawaun te, ‘Wami e lanbung’? Damai ngay barugwak sa sangaba talun. Kanya wa gfakamulun ay wa kawat at lanbung. 29Ay glong au ayu te, nusnga fun Sulumun nasulun at tiba tungud at lanbung at masine nu kalag, kanya ya kamasine sik barugwak. 30Ay Dius nu gfae lanbung tua makmak katanya sa sangaba talun, dewa melo katsi, ay balabag ban e gukas wan sasad afuy, kaugat waro Dius nu gfon ayu ay lanbung. Ya maksvn nu gafanud am. 31Nu katanya, lag gafanawa te, ‘Daginan ban em fakonun?’ ay ‘Daginan ban em fanginum?’ ay anggan ‘Daginan ban em lanbung?’ 32Aroro fagayu taw at yud gtoglag Dius, kabavn grvbvy takatanya. Ay ay Mama sas banwa nasaful wan nusnge wain ay fagayudanun. 33Abat ngate am gafanawa, ugatani yakman te, setain Dius nu gfagtainan fia ayu, ay ugatani nu gfaning am at fakaylatun, ay Dius gfon ban sa ayu fagayu ay fagayudanun. 34Aroro katanya, lag gafanawa katsi te, ‘Tain ban balabag?’ Balabag ya ban nu gamatangan am tiba. Lag gfamut ay fagafanawaun katsi.
Selectat acum:
Mateu 6: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
