Mateu 22
22
Isus at Faydayuanan sabaliwas Fangadadwa fag ngay Fakonun
Lk 14:16-24
1Ay Isus gdog yay nafoyung sa kafag ngay taw sik faydayuanan te, 2“Dius nu gfagtainan kata sik fun nu gfalganan sik ngay fakonun laman sat baguama at fangadadwa. 3Ay kafag fun nasugu at ngay fagsuguan, laman nantaban sanya ebi ataw at nagewan fag ngay taw. Ay kafag ngay taw wa kaylat sanya. 4Ay kafag fun nasugu yangay tibak fagsuguan te, ‘Longi sa ebi ku nagewan fag ngay taw te, Katsi wan. Nafalganan kwan ebi ku longan fag yafun. Nafilas kwan ku ngay baka ay ku ngay fagbaugun at mataglu. Wainyayam wan. Nafalganan kwan ngay fakonun laman sas fangadadwa.’
5“Ay kanya fag ngay taw wa kaylat gdungugan at fun at ngay fagsuguan at longan, ay gfaning way at mesa algan ay nalo wan. At sadi sa wat gamasun, ay at sadi sat famalaoun, 6ay tiba nagamat kafag fun at fagsuguan ay nafauri ay anggan nafabul anya. 7Ay kafag fun maksvn nu kadotama ay nasugu at ngay tagfawayan laman namabul ngay taw takamabul ay nangirug at furuan.
8“Ay arodi kafag fun nalong sat ngay fagsuguan te, ‘Nafalganan kwan ku longan fag yafun daul. Ay dewa katanya kwa gfasakbo ya ebi ku nagewan fag ngay taw. 9Ay katsi, loi wan sa sangay dalan daul, ay fagayu ay nalag ngay taw sanya, gewani stae sa ku nafalganan laman sas fangadadwa fag ngay fakonun.’ 10Ay at ngay fagsuguan nalo wa fia sa sangay dalan daul, ay gfaful fagayu at nalag taw dewa at mauri ay at masine. Ay nu katanya ankapnu wan at betaw sas fakadadwaan fag bale.
11“Ay kanya fag fun nasakbo sas fakadadwaan fag bale, laman nanlag at ngay betaw. Ay manlag di sanya at sadi we lanbung sas fangadadwa baliwa. 12Ay kanya nainto anya te, ‘Sama, wain am fagnasakboun ay wo e lanbung sas fangadadwa baliwa?’ Ay kanya fag mangama wa mafabalus.
13“Ay kafag fun nalong sat ngay fagsuguan te, ‘Salodi kafag mangama at take ay at bitis ay ukasi sat madulum. Ay kanya ban gwayway gugat sanya ay gfaringgit at bagang.’ ”
14Ay Isus nalong yangay te, “Dewa ngayu at nagewan, ay wa ban ngayu at nafili.”
O Masine Gfon Famayad sas Talun Ruma at Fun
Mk 12:13-17; Lk 20:20-26
15Ay ngay taw Fariseu maful ay gkamatoan sit dayu sabaliwa nu namae asalanan Isus sit longan. 16Ay kafag ngay taw Fariseu nasugu at ngay tagadal sas Isus gasfuan fun Erudes at ngay taw ay nalong te, “Takamoyung, saful ami te, matuyan tuo, ay matuyan nu gfoyung o Dius at fakaylatun, ay di o gamatangan nusnga setaw taw at longan, ay di o e fagfili nusnga sinu fag taw. 17Tain nu sa emu? Foyungi emi. O gfaning manga tam tam faugali nu gfon tam famayad sas talun Ruma at fun, o mannga duan?”
18Ay Isus saful way kafag ngay taw at algan mauri, ay glong te, “Sik ngay takamaningan wayam! Wain ay fagfaskudun angku? 19Falagi angku salapi ay fon sas talun Ruma at fun.” Ay kanya fagayu nafon sik salapi. 20Ay Isus nainto anya te, “Sinu at ke aninu ay at ke ngayan at marirukan ste fag salapi?”
21Ay kafag ngay taw nabalus anya te, “Talun Ruma at fun.”
Ay Isus nalong anya te, “Nu katanya, foni sas talun Ruma at fun, anya mandi at afud. Ay foni sas Dius, Dius mandi at afud.”
22Ay kafag ngay taw nu nadungug Isus at famalus andulo. Ay kanya fagayu nalo wan.
O at Kinbul Gdog yay ban Gleleg
Mk 12:18-27; Lk 20:27-40
23Ay arodi sik ngay taw Saduseu ankakbang sas Isus. Kafag ngay taw gfoyung gugat te, ngay taw ban wa gdog ya gleleg. 24Ay kanya nainto sas Isus te, “Takamoyung, ebi Muisis nafoyung te, sik mangama nu nbul ay way nke sisian, at faduksay fag mangama nantiugi yap sat faduksay at bubay ay namae sisiani, tuga ban at faduksay at sisian. 25Ebi si emi e fituk duksayan mangama. Ay at kaka nafamubay ay abandi nbul, ay wa nke sisian. Ay at arian natiug at kaka at bubay. 26Ay katanya yangay at fadua ay at fatulu anggan sitsigon at fuyu. Ay kafag duksayan anbul ay wa nke sisian. 27Ay abandi, kafag mangena anbul yangay. 28Gina ban fagayu taw nadog naleleg, sinu ban at ke bubay fia kafag mangena, aroro kafag duksayan nabubay anya?”
29Ay Isus nabalus anya te, “Gsalan am, aroro wam anyamag Dius at Longan ay at fagmabalyananun. 30Aroro gina ban fagayu taw nadog naleleg, wa ban e gdaddadwaan ya. Ginanya ban fagayu taw kata Dius at ngay tagbarita sis banwa. 31Ay nu saman baliwa at ngay kinbul nu gdog gleleg, o nunda yam natap Dius at Longan sa ayu te, 32‘Au wan Abrayam, Isak ay Akub at Dius.’#22:32 Nu Galin 3:6. Dius bunwa at mabulan fag ngay taw at Dius, nu bunway tagleleg tua fag ngay taw at Dius.”
33Ay fagayu taw nu nadungug, andulo at foyungan.
Tiba Tungud fag Suguan sis Muisis at Faugali
Mk 12:28-31; Lk 10:25-27
34Ngay taw Fariseu anful nu nadungug te, Isus nababo taw Saduseu sit aringang. 35Ay sanya sik tagfoyung Muisis at Faugali, gfaskud Isus te, 36“Takamoyung, inday fag suguan tiba tungud at mafanud sis Muisis at Faugali?”
37Ay Isus gbalus anya te, “ ‘Esugi am Fun, am Dius, sas fagdaul am amatanganan, ay sas fagdaul am fakaylatun, ay sas fagdaul am fagsafulun.’#22:37 Deuterunumyu 6:5. 38Kanya wan taguna, ay tiba tungud fag suguan sis Muisis at Faugali. 39Ay at faduak suguan ‘Esugi am iba kaksvn nu kesug o emu.’#22:39 Lebitiku 19:18. 40Sanya ginan way fag duak suguan Muisis at Faugali ay anggan Dius at taglong fagayu at ngay longan.”
Sinu ke Kasugfunanan Dius at Nafili fag Fun
Mk 12:35-37; Lk 20:41-44
41Ay gina kafag ngay taw Fariseu maful, Isus nainto sa anya fagayu te, 42“Tain nu gamatangan am sabaliwa Dius at nafili fag Fun, sinu at ke kasugfunanan?”
Ay kanya fagayu nabalus anya te, “Fun Dabid at kasugfunanan.”
43Ay Isus gdog yay ginto sa anya fagayu te, “Nu katanya, wain fun Dabid at fagfangayanun anya te, ‘Ku Fun,’ gina at Masine fag Falad nafamatanganan anya? Kanya nalong te,
44‘Tam Fun nalong sa ku Fun te,
Malunggungi sa ku siun baliwa,
ay namababo au emu sa am ngay fawayan.’#22:44 Alubad 110:1.
45Fun Dabid nu nafangayan way Dius at nafili fag Fun te, ‘Ku Fun,’ tain ro kanya nu siginan fun Dabid at kasugfunanan?”
46Ay ngay taw sanya wa mafabalus Isus nusdi sik aringang. Ay siginan ginanya fag menit, we mananginto ya sa anya.
Selectat acum:
Mateu 22: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
