Mateu 14
14
Fun Erudes Nafabul Uan Tagfasurung
Mk 6:14-29; Lk 9:7-9
1Ginanya, Erudes, talun Galilea at fun. Kanya nadungug sabaliwas Isus at nafakamulun. 2Ay kanya nalong sat ngay fagsuguan te, “Nu gamatangan au, kafag taw, Uan way Tagfasurung nadog yay gleleg. Aroro katanya mafafakamulun at ngay madulo.”
3-4Erudes nalong takatanya aroro ebi ataw kanya andadwa sat kaka Felipe at mangena Erudias. Uan glong gugat sas Erudes te, “Kamabo way o tam faugali nu gtiug o anya.” Nu katanya, kanya nafagamat ay nafaubung Uan laman gfaylatan Erudias. 5Ay Erudes kaylat gfabul Uan, ay wa nafabul aroro kalimu ngay taw Udyu, aroro kafag ngay taw gafanud te, Uan, Dius at taglong at sadi.
6Ay abandi Erudes anke fagmafulun gina ndasug at fangasalug fag menit. Ay Erudias at baguina gfalelegan at bilug sis salubangan ngay mangama at maful sanya. Ay Erudes maksvn nu kaylat. 7Ay kanya nafatuyanan sanya fag baguina te, “Gfon kban emu nusnge wain am fagetun.”
8Ay kata at mina at longan, kafag baguina nalong te, “Ku fakaylatun, fasai sik laman Uan Tagfasurung at alfuyu ay foni sa angku.” 9Ay Erudes kabalu aroro sat nafafanud, ay at ngay betaw nadungug ay kanya nasugu laman namafasludan takatanya fag fagetun. 10Ay arodi Erudes nasugu laman nanlifung Uan at liug sisad ubung, 11ay nabuba at alfuyu masuadan si sik laman ay nafon sanya fag baguina. Ay kafag baguina nafon yangay sat mina. 12Ay Uan at ngay tagadal andasug ay nabul Uan at bilug siginans fagubungan ay nanamoli. Ay arodi kafag ngay tagadal nanamasaful sas Isus.
Isus Nafayafun Limak Libuk Mangama
Mk 6:30-44; Lk 9:10-17; Uan 6:1-13
13Ay Isus nu nadungug at kinfasludan sas Uan, kanya nasakay sa sik sakayan lino ay nalo sanya ginan fag talun ay andasug sa sik talun at yud e taw. Ay fagayu taw nu nasaful te, Isus nalo wan, naguyan anya sa sangaba talun siginan at ngay furuan. 14Ay Isus nu naduksun siginans sakayan lino, kanya nalag ngayuk taw, ay anfanyu ay gfafia at ngay ke fakasaitun.
15Ay menit nu gakafalyuun wan, Isus at ngay tagadal nanangakbang sa anya ay nalong te, “Ste we bale, ay kayabi wan. Falaoi wan kafag ngay taw, ma ro nanrvbvy at fakonun sa sangay furuan.”
16Ay Isus nabalus te, “Kya masine gfalao anya. Am ro tagfayafun anya fagayu.”
17Ay at ngay tagadal nalong sas Isus te, “Ay newa em buba lima wayk tinapay ay duak albon.”
18Ay Isus nalong te, “Fastei.”
19Ay Isus nalong sa sangay taw te, “Malunggungi sas wa makmak.” Ay Isus nabul kafag limak tinapay ay kafag duak albon, ay natangda sas banwa ay naseg Dius. Ay nu ntabu wan, kanya nalungud at ba tinapay ay nafon sat ngay tagadal. Ay at ngay tagadal nafon sa sangay taw. 20Ay fagayu taw naon ay napsug. Ay at ngay tagadal nafaful at nagsawadan, ay nu fagayu wan, labi dua yak sabi mapnu. 21Ay at nafangon malgau limak libuk mangama, saman ya ngay mangena ay at ngay sisian.
Isus Nalo sis Tungud Lino
Mk 6:45-56; Uan 6:16-21
22Ay arodi Isus nasugu at ngay tagadal te, “Sakayi wan sas sakayan lino ay gunai wan angku sas dife.” Ay kadugenya, Isus gfauli ngay taw. 23Ay sanya ginan, kanya gsesadian gundaud sa sik buksul laman nandarangin. Ay ginanya fag yabi, kanya gsesadian yay sanya. 24Ay ginanya at ngay tagadal at sakayan ngayayu wan siginans tigyangan, ay lugwak gfaidapan anya aroro tagmara gfablang at sakayan.
25Ay balabag di, sdaga kamenit gina yay madulum, Isus nalo sis tungud lino ay nanangakbang sat ngay tagadal. 26Ay at ngay tagadal nalag Isus nu glo sis tungud lino, ay kanya fagayu garinun kalimu ay glong te, “Atsi sik labang.” Ay at kaksvnan nu kalimu, nauro.
27Ay arodi vtv Isus nalong sa anya fagayu te, “Faksvni ay amatanganan. Au way, lag am kalimu.”
28Ay Pedru gbalus Isus te, “Ku Fun, nu o tua fia, longi sa angku te, akbangi sa emu sanya stungud lino.”
29Ay Isus glong te, “Gewan!”
Ay Pedru naduksun siginans sakayan ay nalo sas tungud lino ay nanangakbang Isus. 30Ay Pedru nu nalag te, maksvn nu gtagmara, anlimu, ay gfasigad kalubgub, ay nauro te, “Ku Fun, gubuki angku!”
31Ay arodi vtv Isus nafalugde at take ay nated Pedru ay nalong anya te, “Sik taw o at yud maksvn am fagafanudun. Wain am fagfainfolianun am amatanganan?”
32Ay duama nu nasakay sas sakayan lino, anragang wan nu gtagmara. 33Ay tagsakay sanya fag sakayan naseg Isus te, “Matuyan o wan Dius at Baguama.”
34Ay Isus ay at ngay tagadal nu ndife wan, andasug sas furuan Genesaret. 35Ay sanya fag talun at ngay taw nu natoglag wan Isus, kanya fagayu nanamoyung yay sat ligung fag ngay furuan. Ay e nataban sas Isus fagayu at ke fakasaitun, 36ay kafag ngay taw get sas Isus laman at ngay ke fakasaitun nanted dewa way ro sit farangfangan lanbung. Ay fagayu at nated anfia wan.
Selectat acum:
Mateu 14: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
