MATIYE 8

Yeesu seere hulum bə fə̃yaŋ

(Mar. 1.40-44; Liki 5.12-14)

1Bə minti Yeesu sorkoŋ warda cəərə pərkiŋ daŋ, kaa ablaw həənu bəlam du da. 2Kəya hulum bə fə̃ya kəman bəŋ suru da. Wə vaŋ də guguuru tiinu, wə wəətunu minti: «Barkaŋ, giidim a doo haa laŋ, tam sə a neke bə seeren minti ten harə la wəra *cetceti haa pə mo!» 3Kəya Yeesu məɗaŋ kəəsu, wə məlnu du suru, wə wəətunu minti: «Gəəzi, giidən gə doo-de haa, hebkəna tam wəra bə seerə-seere.» Də ko toŋ kəyaŋ, fə̃yaŋ təəkunu, wə haraŋ wəra cetceti. 4Kəya Yeesu wəətunu minti: «Doo kusrum la, a waate *hulum cəərə kel gə minti jəŋ ba anə ceki. Səma, ɗee la a veɗe kusrum haa a hulum bə keere Pepeŋ. Ayə kar gə minti *Moyisi a wəətənəy səməy la wəra kir minti yə asə la wəra minti tam bə seerə-seere.»

Yeesu seere hulum bə joŋre kə hulum bə tiinə kəsootoŋ wəra

(Liki 7.1-10)

5Bə minti Yeesu kəlaŋ giidə vil də Kapernam naŋ, kumna də sooto kəsaŋ kəman bəŋ suru da. Wə əsəŋ bə jəw kamkama 6minti: «Barkaŋ, hulum bə joŋre nin aker da lam wə hətəŋ hurufi wəra, wə bə lese ablaw.» 7Yeesu wəətunu minti: «Ten də kusrən, ten ɗe yaŋ a siiru wəra.» 8Kumna də sootoŋ hərnu kel minti: «Barkaŋ, ten paapa bə nakə-neke kir minti tam kalə la gerdəna ba. Səma, waatə kel la nəmti məna təwa, hulum bə joŋre nin seere yaŋ wəra. 9Ten ha'aŋ kumna bə waatan səman yaŋ gəm. Ten waate sam kəsooto katən gəm. Ten waate kəman məna minti: ‹Ɗee laŋ!›, wə ɗe. Ten waate naayaw minti: ‹Bəəda!›, wə bi da. Ten waate hulum bə joŋre nin minti: ‹Jəə la anəkay!›, wə ji.» 10Bə minti Yeesu əskəŋ kel teŋ kəyaŋ, wə ŋələŋ ablaw. Wə əsəŋ bə waate kaa gə minti bə ɗe guuduŋa minti: «Gəəzi, ten waataŋ, aduubə də kaanə *Israyelaŋ, ten fəlaŋ hulum də ada hõy də de damdi hulum toŋ ana ba. 11Ten waataŋ ha'aŋ, kaa ablaw gə minti teŋ paapa kaanə Ziwifi baŋ pəəti yaŋ a gud koŋ da daana a tiinə koŋ da bə hame kəɗwəya a *Kumna kə Pepeŋa də *Abraham, *Izaki daana *Zakopi. 12Səma kaanə Ziwifi ablaw gə minti teŋ a sə a fele ko bə kumnaŋ, yə bə vay warna taakaw na dər tilməŋ na. A ko toŋa ha'aŋ, yə hage yaŋ, yə herɗe kisni yaŋ ada kas gəəliŋ.» 13Kəya Yeesu waataŋ kumna də kəsootoŋ minti: «Ɗee la akera nəmti ta. Karman bə minti tam doŋ guuduŋ, wə ji yaŋ damdi tam a ɗuknuŋ ana.» A ko toŋa faɗi, hulum bə joŋre nuutuŋ seereŋ wəra.

Yeesu seere kaa kə ɗeme ablaw

(Mar. 1.29-34; Liki 4.38-41)

14Kəya Yeesu kooroŋ ger Piyer. Wə fəlaŋ akaarə Piyer tookaŋ lam a kəɓəra kasi kusrə bə zalmə-zalmeŋ. 15Wə ɗootona kaasa, kəya kusrə arsaŋ warna sara na anə sããya. A faŋ apəya, a əsəŋ bə doy irku di faɗi. 16Bə minti koŋ ziɓiŋ wəraŋ, yə humtunu kaa gə minti kəwal ciiriŋ suru da ablaw. Kəya wə əsəŋ bə pi kəwala wəra cəərə kaŋa də kel gə kuŋ daana wə seerteŋ kaŋ wəra keɗe ku ɗemeŋa. 17Wə jəŋ kel teŋ bədoona haa bə de ku kel gə minti Ezay, *hulum bə jogte ku mini kə Pepeŋ a wəətənəy wəra minti: «Wə də kusru, wə humuŋ dege náŋ daana ɗeme náŋ wəra keɗe cuuru .»

Eele bə minti tam fəlu bə tepe gud Yeesuŋ

(Liki 9.57-60)

18Bə minti Yeesu asaŋ kaa kə ablaw gə ɓəkə-ɓiki wəra cuuru cẽẽ, wə waataŋ *kaa gə guuduŋ minti té cakɗə la warna agal nayta də kan kəmtəŋ na. 19Ajew də minti yə tuluŋ ku turtiŋaŋ, *hulum bə hate ku gili kə Pepeŋ kəman bəŋ suru, wə wəətunu minti: «Hulum bə hateŋ, ten tepe guuduma a ko bə minti tam ɗe adaŋ keɗe.» 20Yeesu hərnu kel minti: «Anə gəbaygaŋ də tələŋkə neete, anə kasko də kuli neete gəm. Səma, ten *Kormə Hulúm , ko nin bə isi lam bə faake paapa.» 21Hulum baalaŋ aduubə də kaa gə minti bə ɗe guudu wəətunu minti: «Barkaŋ, taakan la kəm bə ɗe a ge barən warda a tələŋkə da.» 22Yeesu hərnu kel minti: «Tapə la guudəna. Taakə kaa kə mee-me la bə jogɗe titi neeteŋa.»

Yeesu zeme kaŋkaw kəmtəŋ

(Mar. 4.31-41; Liki 8.23-25)

23Kəya Yeesu luŋ giidə turtiŋa də *kaa gə guuduŋ. 24Ɗe a gole kənaŋ, kaŋkaw kəmtəŋ haŋ ne bə ji gəg-gəg-gəgi cəərə kan kəmtəŋa. Layte bə kan də acce diŋ golde bə dere turtiŋ. Tó Yeesu a kina. 25Kəya kaa gə guuduŋ bəŋ suru, yə gunnu wəra bə naakte kuya minti: «Barkaŋ, áŋ bə bese wəra, seerə áŋ la wəra!» 26Yeesu minti: «Aŋ jəŋ walka taŋ naanaanə bədoona mo? De nəətiŋ bə kerpə-kerpe.» Kəya wə faŋ apəya faɗi, wə jəmaŋ təbay a kaŋkaw daana a kan. A ko toŋa ada faɗi, koŋ doŋ ɗeket-keti. 27Kəya kaŋ ŋələŋ ablaw, yə əsəŋ bə le ku kumsi minti: «Hulum toŋ haa gidiirə hulum muntu mo minti koo kaŋkaw, koo kan kəmtəŋ humi kosoŋ cuuruŋ?»

Yeesu seere kaa kəman ɓasi də kəwal ciiri

(Mar. 5.1-20; Liki 8.26-39)

28Bə minti Yeesu tuluŋ warna agal nayta də kan kəmtəŋ na giidə seŋka də Gadaraŋaŋ, kaa kəman ɓasi də kəwal ciiri vaŋ warda aduubə də teɗker da bə bi a ŋefe duuru. Yə a jəŋ wəra gə leele kas kəwal, yə də waŋ ablaw gəm. Hulum nəkaŋ bə he kəkəy toŋ pəda kas walka di. 29Yə tuukuŋ suru kəyaŋ, yə əsəŋ bə naakte kuya minti: «Kormə Pepeŋ, kel naareŋ haŋ maa sarəma mo? Tam bəŋ haa a ji daŋgay də are hebkəna ajew də koŋ bay neke mo?» 30Anə maŋŋa sar ko toŋa, gaduuru a jəŋ ablaw anə gəd-gədi bə hame. 31Kəwal əsəŋ bə ji kamkama a Yeesu minti: «Jəəne minti tam sarme are haa sarmeŋ, vaa are la cəərə gaduuru teŋ na lam naŋ.» 32Kəya Yeesu minti: «Aŋ ɗee la!» Kəyaŋ, kəwal pəŋ wəra cəərə kaa té ɓasiŋa, yə kooroŋ bə ɗe a feke cəərə gaduuruŋa. Ɗe a goleŋa, gaduuruŋ sorkoŋ warda də tara cəərə pərkiŋ da, yə vaŋ anə cuuwa dər kan kəmtəŋa, yə meŋ wəra ada cap-cap-capi. 33Kaa gə minti a jəŋ bə əmuŋ rəyaŋ də tara. Yə kooroŋ warna giidə vil na a tope bəlam də kel gə minti jəŋ keɗe, daana kə kaa ɓasi gə minti a jəŋ də kəwal ciiriŋ gəm. 34Kəya kaa gə giidə vil vaŋ warda keɗe, yə kooroŋ da a jeme dər Yeesu. Bə minti yə əsnu kəyaŋ, yə əsəŋ bə jəw kamkama minti wə koorə la wəra giidə seŋka kə teŋa.

Selectat acum:

MATIYE 8: KERNT05

Evidențiere

Partajează

Copiază