Jenesis Nuarin-tas alupas 3.
Nuarin-tas alupas 3.
1 Et ahiyek Iva a nimyeuv. 6 Erau eropse a Atam im Iva um ehcamai vaig. 11 Et atijai itai ira rau a Atua. 14 Neruvaig irai nimyeuv. 15 Intas upyi asaig vai Kristo. 16 Neruvaig ira atimi. 21 Nitai aso atimi uhup. 22 Nahlo pan itac Atam, im Iva.
1IS esjilid narapakau u nimyeuv irai iji itai eklim edo irai pece asega is ago a Ihova Atua uja. Is ika a nimyeuv ehele intakata, Is idim ika a Atua, Arumu jim hegaig nohwaicai asega anliin nahapol aijaurau; ka oʼo?
2Is ika a intakata ehele nimyeuv, Et eti itap vai cumrau inhegaig vaig nohwaicai anliin nahapol:
3ja is tas a Atua va nohwancai juju anliin nahapol, um ika, Arumu jim caig aijaurau, um jim ubli, va aru jim emesmas aijaurau.
4Is ika a nimyeuv ehele intakata, Aru idim eti emesmas aijaurau:
5et idim ato a Atua mika, uhpu asalgei nesganimtamirau an nopan inig aru caig aijaurau, arupu idivaig Atua aijaurau, par ato niji itai upene im niji itai has.
6Is wat almoi nohwancai a intakata, mika is upene incaig vaig, um upene acen nalmoi vaig, im lep nohwancai upene va uhpu arapakau vaig, is leh nohwan aien, um caig, is lep alayi natamnyu un aien; is um caig aien.
7Is um asalgei nesganimtarau, erus ato arau mika erus tup atga arau; erus atij neri nateg arau, um ago inlepei imi rau.
8Erus atahaijeg nohrai Ihova Atua uja arau anliin nahapol an jupki: is atpuh a Atam im ehgan ui cai an nahapol vai Ihova Atua uja.
9Is ahlaig vai Atam a Ihova Atua uja, um ika ehelen, Aiek ak eda?
10Is ika aien, Ekmun atahaijeg nohram ainyak anliin nahapol, ek mun imtitai euc ainyak vai intup atga unyak; ek mun atpuh ainyak.
11Is ika ehelen aien, Et mun asaig ehelum a di mika na tup atga aiek? Na mun caig nohwancai aiek kis tas alep vaig ainyak, um ika, Namu jim caig aiek, ka oʼo?
12Is ika ehelen a Atam, Is alaak nohwan a intakata as ati yin aiek mika yi amen ehelek aien; ek mun caig ainyak.
13Is ika a Atua ehele intakata. Inhe nigki na mun ago aiek? Is ika a intakata, Et mun efaifa vai nyak a nimyeuv, ek mun caig ainyak.
14Is ika a Ihova Atua uja ehele nimyeuv, Napu has esjilid aiek va nedo inigki, irai iji itai eklim edo irai pece auata upene asega, im lep niji itai eklim edo irai pece aleg asega; napu atahas aiek an nobohtan, um caig nobohtan irai iji adiat:
15ekpu lep ati namcel jipe vai euc im intakata ainyak, im lep vai ilpu hal unyum im inhal o un; etpu ehtoplec nidjinum aien, ja napu ehtoplec nijinalak an neduon aiek.
16Is ika ehele intakata aien, Etpu idim esjilid nohocred unyum an napos vaig ilpu hal unyum; napu apos ilpu hal unyum aiek um ohocred; napu upoupo aiek irai natamnyu unyum, etpu esjilid iram aien.
17Is ika ehele Atam aien, Etpu has nobohtan va nedo unyum; nikavaig, na mun atahaijeg intas o ehgam aiek, um caig nohwancai inig kis tas alep vaig ainyak, um ika, Namu jim caig aiek: napu ohocred aiek irai iji adiat va nitai caig incam;
18etpu ededel niji itai upun-upun im nefelelicai has vai euc napu lep hegaig inceslum an nobohtan aiek;
19napu ihlup aiek va nitai caig incam, um yetpan an nopan iyehki napu lep adumoij pan an nobohtan aiek; as ahes an nobohtan aiek: na idim obohtan aiek; napu lep adumoij pan an nobohtan aiek.
20Is anvi nidai ehgan a Atam par ika Iva; is idim risi atimi asega aien.
21Is ago nitai aso Atam im ehgan a Ihova Atua uja ira arasi itai eklim edo irai pece, um aso rau iran.
22Is ika a Ihova Atua uja, Almoi Atam, et ika aien yi idivaig cataij par ato niji itai upene im niji itai has: kit etpu lep ada nikman aien im leh nohwancai umumoh vaig, um caig, mika yi umoh irai iji mesese:
23va nitai inigki is ahlo pan itac yin a Ihova Atua uja anliin nahapol Itena, mika yi auritai aien an nobohtan inig is ahes iran aien.
24Is ahlo pan itac Atam aien; is ati ohwat Jerub is ero aien an nahaijin Itena an ridjai o un, im lep nauitoga cap is ae sjipe par atapnes nefalaig yetpan u nauincai umumoh vaig.
Selectat acum:
Jenesis Nuarin-tas alupas 3.: ABO
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)