Ima̍tiyu 17
17
Ibi̍īyē yī Iji̍sɔ̄ɔsi pīyata̍
(Ima̍aki 9:2-13; Ilu̍uku 9:28-36)
1Ɔ̄chī erīiyī wā ge̍ ga ma̍, Iji̍sɔ̄ɔsi bī Ipi̍ta ba̍la aɛ̍nɛ̍ āchɛ ɛpa nīi re̍ka, Ije̍mēehi ba̍la Ijɔ̍ɔn ma̍ ku iyī nū la u̍tu. O̍ kpo̍ wā chɔbū wa̍a̍ ga yɛwu olichīichō ɔha̍, aa̍ lōri̍īwā. 2Ɔpɔ̄ɔpɛ̄, ibi̍īyē yī Iji̍sɔ̄ɔsi pīyata̍ i̍ngɔ̍ɔ ke̍e̍ abɔ̍ɔ la īkprī yī wā: Eyī yī nū hu̍ nya̍ri̍nya̍ri̍ bāa yɛnɔ ma̍. Ɛjā otūlibi̍īyē yī nū chī lɛ̍rɛ̍ kpɛ̍ɛ bāa ɔfra̍ta̍ta̍ ma̍. 3Ɔpɔ̄ɔpɛ̄, a̍chi̍kpo̍ yī nū āchɛ ɛta̍ ɛla̍ā ma̍ Imo̍sīisi ba̍la Ɛla̍yi̍ja nīi e̍ gblāa abɔ̍ɔ ē kwɔ̄kā ba̍la Iji̍sɔ̄ɔsi. 4Bū la ɛbɛ ɔla̍ā, Ipi̍ta hu oko̍o kpa̍ ka de Iji̍sɔ̄ɔsi bɛ̍ɛ̄nɛ̄ hīka, “Ādā be̍e! O̍ hwɔhi kpɛ̍ɛji nīi alɔ hɔ̄ amu ma̍. O̍ ge̍ hi wɔ ɔtū i̍ngɔ̍ɔ, ɔ̍lɔma̍ n ge̍ē gwo̍ a̍ywɔ̍da̍ ɛta̍ amu u̍ma̍: ɔha̍ - iyī wɔ, ɔha̍ - iyī Imo̍sīisi, ɔha̍ - iyī Ɛla̍yi̍ja.”
5Olo̍ nīi Ipi̍ta yɛ ma̍ ē kɛlā ma̍, akpɔ̍ɔwɔ ɔha̍ hu̍ bāa ɔnya̍ri̍nya̍ri̍ ma̍ wā ga kla̍ aa̍ Iji̍sɔ̄ɔsi brii. Ɔkɔlɛ̄lā ɔha̍ bū lipu̍ yī akpɔ̍ɔwɔ ɔla̍ā hīka, “Ɔyi̍ otōtū yī u lēchi̍ lēchi̍ hɔ̄ ma̍ a̍nɛ. N lɛ ɔwɔ̄wīyā gba̍a̍ ba̍la anu̍. Ala̍ ā darɔ̄ku lɛlā yī nū!”
6A̍chi̍kpo̍ yī nū ɛla̍ā po̍ ɔkɔlɛ̄lā nūma̍ ma̍, e̍ de kpo̍ tūuhwi dwɔ̄bi̍-dwɔ̄bi̍, pīya la eyī kla̍ ajɛ. 7Iji̍sɔ̄ɔsi wā dikpo̍ba̍ wā ge̍ de abɔ̄ gwō wā, da wa̍ ka ɛ̍lɛ ge̍ nīichō! Ɛ̍lɛ ge̍ e̍e tūuhwi ni̍! 8E̍ hu eyī hwa̍a̍ ma̍, e̍ i̍ ma̍ ɔ̄chɔ̄chɛ gɛ ni̍; ɔ̍chi̍kpa̍kpa̍ Iji̍sɔ̄ɔsi.
9E̍ yɛ ē hrāajɛ ē bū la yɛwu ɔla̍ā ma̍, Iji̍sɔ̄ɔsi ta̍ wā ɔna hīka, “Ala̍ ma̍ ko̍ō! Ala̍ e̍e koko̍o yī lɛlā yī yɛ̍ma̍ ɔlɛbɛ̍bi̍ nūma̍ de ɔ̄chɔ̄chɛ ni̍, kpɛɛ nīi Ɔyi̍ yī Ɔngrɔ̄ɔ ge̍ hye̍ēyī la okū o̍bū.”
10Bū la ɛbɛ ɔla̍ā, a̍chi̍kpo̍ yī nū ɛla̍ā che ɔ̄ ikpo̍ bɛ̍ɛ̄nɛ̄ hīka, “Oji̍ chī - ohu̍ nīi āchɛ ongū Lihɔ yī Iju̍u ka hīka Ɛla̍yi̍ja ɔ̍lɔ ge̍ē wā yɔbū a̍nɛ ma̍?”
11Iji̍sɔ̄ɔsi hīya aa̍ ɔkɔ hīka, “Lēchi̍ nɛ, Ɛla̍yi̍ja ē yɔbū a̍nɛ. Anu̍ ē wā ge̍ē gbla̍a ɔjāha̍-ɔjāha̍ wa̍a̍ lɔ̄lā a̍nɛ. 12N ā koko̍o de ala̍ gɛ ko̍ō! Ɛla̍yi̍ja ɔla̍ā wā mɛ̍, āchɛ i̍ chī je̍ ɔ̄ ni̍. E̍ ya̍ tāa anu̍ lɔkɔkɔ nīi o̍ hi wa̍ ɔtū ma̍ mɛ̍. I̍ngi̍ngɔ̍ɔ nīi e̍ ge̍ē ya̍ tāa Ɔyi̍ yī Ɔngrɔ̄ɔ ji̍gījigī a̍nɛ.”
13Bū la ɛbɛ ɔla̍ā, a̍chi̍kpo̍ yī Iji̍sɔ̄ɔsi de po̍ bɛ̍ɛ̄nɛ̄ hīka Ijɔ̍ɔn Ohuyenyi nīi ɔ̍lɔ yɛ ē kɛlā ku̍ ɔ̍lɔ ē de aa̍ a̍nɛ.
Iji̍sɔ̄ɔsi nyiya ɔɔ̍pɛ̄ ɔnɔ̄ngrɔ̄ɔ ɔha̍
(Ima̍aki 9:14-29; Ilu̍uku 9:37-43a)
14E̍ cha wā la ɛbɛ nīi āchɛ yɛ̄mɛ̄mɛ̄ grēeyī gblāa ma̍, ɔngrɔ̄ɔ ɔha̍ wā dikpo̍ba̍ Iji̍sɔ̄ɔsi ge̍ de ūnōowu tū ajɛ de ɔ̍. 15Ɔngrɔ̄ɔ ɔla̍ā ka de Iji̍sɔ̄ɔsi hīka, “Ādā, chu̍chu̍u, mlɛ̍ha̍ yī ɔyi̍ yī u ɔnɔ̄ngrɔ̄ɔ gɛ! Yapri̍ija ɔdwɔ̄bi̍ ya̍ nīi o̍ de nglo̍yi. O̍ ē ya̍ tāa anu̍ kpɛ̍ɛ ɛbɛ̍bɛ̍-ɛbɛ̍bɛ̍: O̍ ē ngma̍ ē ta̍tū la ɔla̍, o̍ ē ta̍tū la yenyi. 16N bī ɔ̄ wā ge̍ de a̍chi̍kpo̍ yī wɔ, e̍ i̍ nyiya anu̍ mɛ ni̍.”
17Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ āchɛ i̍chɛ̄ ku Ɔwɔ ni̍ ba̍la āchɛ ɔgblabɔ̄ nīi gblāa ma̍ la yɛchɛ nūma̍ ma̍! N ge̍ē u̍tu hɔ̄ ba̍la ala̍ kana̍ o̍bū ma̍/? N u̍tu ge̍ē hɔ̄ tāa ala̍ ligbo̍ kana̍ o̍bū ma̍? Bī ɔyi̍ ɔla̍ā ge̍ de u!” 18Iji̍sɔ̄ɔsi ka tāa yapri̍ija ɔdwɔ̄bi̍ ɔla̍ā nīi o̍ bīyɛchɛ hī ɔyi̍ ɔnɔ̄ngrɔ̄ɔ ɔla̍ā ke̍e̍. Ɔyi̍ ɔla̍ā de lɛ cha̍cha̍ i̍ngɔ̍ɔ ke̍e̍ bū la yɛ̄grāa ɔla̍ā.
19Bɛ̍ɛ̄nɛ̄, a̍chi̍kpo̍ yī Iji̍sɔ̄ɔsi gāa dikpo̍ba̍ ɔ̄ la i̍kplɛ̍pa̍ ɔha̍ ge̍ che ɔ̍ ikpo̍ hīka, oji̍ ɔ̍lɔ hu̍ nīi aɛ̍lɛ i̍ nū yapri̍ija ɔdwɔ̄bi̍ ɔla̍ā bīyɛchɛ mɛ ni̍ ma̍/?
20Iji̍sɔ̄ɔsi ka de wa̍ hīka, “Ɔtū ode chōche yī ala̍ nīi i̍ lɛ ɛmla̍a ni̍ ma̍ - ohu̍ a̍nɛ. Lēchi̍-lēchi̍, n ā koko̍o de ala̍! Ɔtū ode chōche yī ala̍ ge̍ lɔ̄kɔ̄kū pi̍nyɛ̍ ji bāa īkpɔ̄ɔ̄chi̍ nīi re̍ka imɔ̍si̍tāadi ma̍ nɛ̄ bɛ̍ɛ! Nɛ̄ni̍, ala̍ ge̍ da yɛwu nūma̍ hīka, ‘Pīya hī ɛbɛ nūma̍ ge̍ rɛ aa̍nū!’ O̍ ge̍ē hu ikpo̍. Ɔjāmɔjā nīi ala̍ ge̍ē ya̍ ē mɛ ni̍ nɛ i̍ hɔ̄ ni̍. 21[Ɔhā ojōji ba̍la lɛmiyɛ ɔchɔ̄chā; anu̍ ē nū ita yī yapri̍ija ɔdwɔ̄bi̍ nūma̍ ē mɛ a̍nɛ. Nɛ̄ni̍, ɔjɔ̄jā i̍ ē nū ɔ̄ mɛ ni̍.]”
Iji̍sɔ̄ɔsi gba̍a kɛlā ku̍ ɔpīyaku̍ yī nū
(Ima̍aki 9:30-32; Ilu̍uku 9:43b-45)
22A̍chi̍kpo̍ yī Iji̍sɔ̄ɔsi wā grēeyī wa̍a̍ gblāa abɔ̍ɔ la Iga̍līli ma̍, o̍ koko̍o de wa̍ hīka, “Ala̍ ma̍ ko̍ō! E̍ ge̍ē wa̍ābɔ̄ la Ɔyi̍ yī Ɔngrɔ̄ɔ de āchɛ̄ɛchɛ mɛ̍. 23E̍ ge̍ē de ɔ̍ ē ngmo̍. Ɔ̄chī ɔmɛta̍, o̍ chī ge̍ē hye̍ēyī wā la ɔhɔ̄leyī.”
A̍chi̍kpo̍ yī nū wa̍a̍ de kpo̍ he̍ēyīwɔnɔ.
Lɛlā yī i̍kpa̍da̍ ɔtɔ̍ɔ̄ta̍
24Iji̍sɔ̄ɔsi ba̍la a̍chi̍kpo̍ yī nū wā la Ikapa̍num ma̍, āchɛ nīi ē nāa okpo yī i̍kpa̍da̍ yī u̍nu̍ yī Ɔwɔ ma̍ wā dikpo̍ba̍ Ipi̍ta ge̍ che Ipi̍ta ikpo̍. Abā yī ɛ̍lɛ ma̍ ɔ̍lɔ ē ta̍ i̍kpa̍da̍?
25Ipi̍ta de chɛ̄.
Yɛ̄grāa nīi Ipi̍ta chɛ̄ ga u̍nu̍ ɔpɔ̄ɔpɛ̄ ma̍, Iji̍sɔ̄ɔsi che Ipi̍ta ikpo̍ yī lɛlā ɔla̍ā yɔbɔ̄ɔbū a̍nɛ. O̍ chikpo̍ hīka, “Isa̍yi̍mɔ̄ɔn be̍e! Kana̍ nīi a gbɛri̍ya̍ ma̍? Ānyɛ nīi ɛchwɔ̄lɛ̍ yī yɛchɛ nūma̍ ē da wa̍ okpo kɛ̄ɛ ē nāa okpo yī i̍kpa̍da̍ la abɔ̄ yī wā ma̍/? Āchɛ nīi - alɔcha ɔla̍ā ma̍ kɛ̄ɛ ɛchɛkɔcha?”
26Ipi̍ta ka de ɔ̍ ka ɔ̍lɔ Ɛchɛkɔcha ɔ̍lɔ ē de okpo a̍nɛ.
Iji̍sɔ̄ɔsi ka bɛ̍ɛ̄nɛ̄ hīka, “Ɔ̍lɔma̍, o̍ re̍ka alɔcha ɛlɛjā i̍ ē de ɔjɔ̄jā ni̍. 27Alɔ ma̍ i̍ chikpo̍ ge̍ē yɛ̍ɛ̄lā wu̍ wā ɔtū ni̍. Pīya ngla̍ ga li̍hu gāa ge̍ tū oku̍jā. Ɛbɛ̍ ɔrāarāa nīi a ge̍ē wu̍ ma̍, a ge̍ē ma̍ okpo ɔha̍ abɔ̍ɔ lipu̍ yī oko̍o yī nū. Okpo ɔla̍ā ge̍ē jōko̍o yī i̍kpa̍da̍ yī ami ba̍la awɔ. Bī okpo ɔla̍ā ge̍ de yī i̍kpa̍da̍ yī alɔ gɛ.”
Selectat acum:
Ima̍tiyu 17: YBASR
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2020 Bible Society of Nigeria (second edition)
