Ijɔ̍ɔn 12

Imeri̍ de yanɔ̄ kla̍ Iji̍sɔ̄ɔsi la Ibɛ̍tāni

(Ima̍tiyu 26:6-13; Ima̍aki 14:3-9)

1Ɔ̄chī yī Ɔwɔ̄wīyā yī Owu̍lā wā ge̍ de hī ɔ̄chī erīiyī ma̍, Iji̍sɔ̄ɔsi ga Ibɛ̍tāni la ɛbɛ nīi Ila̍jārɔsi hɔ̄ ma̍. Anu̍ nīi Iji̍sɔ̄ɔsi de ɔ̍ hye̍ēyī la okū īchāha̍ a̍nɛ. 2E̍ ya̍ Iji̍sɔ̄ɔsi wɔga, ya̍ ojōre̍ yī yɛnɔ de ɔ̍ abɔ̍ɔ. Ima̍ta chrɛ̄ɛrɔ̄ yī ojōre̍ ɔla̍ā a̍nɛ. Anu̍ Ila̍jārɔsi ma̍ hyāhɔ̄ la okpōkōlō kū ojōre̍ tāa Iji̍sɔ̄ɔsi. 3Bɛ̍ɛ̄nɛ̄, Imeri̍ bī yēkpē yī yanɔ̄ oni̍pī kwɛ̍kwɛ̍ ɔha̍ nīi e̍ ya̍ la ɔchi̍ nīi re̍ka ina̍adi ma̍ wā. Yanɔ̄ ɔla̍ā lwɔ̍la̍ kpɛ̍ɛji. O̍ de okru̍utu yī yanɔ̄ oni̍pī kwɛ̍kwɛ̍ ɔla̍ā chīyēkla̍ Iji̍sɔ̄ɔsi cha̍cha̍ la ikpo̍. O̍ chōo̍chē bī inyɛ̄lɛ̄hu̍ yī anu̍ ɔlɔjā ngū Iji̍sɔ̄ɔsi anu̍ cha̍cha̍. Li̍pī ɔlwɔnyɛ yī yanɔ̄ ɔla̍ā de u̍nu̍ ɔla̍ā wa̍a̍ nāa che. 4A̍chi̍kpo̍ yī Iji̍sɔ̄ɔsi ɔha̍ nīi re̍ka Iju̍dasi Isikɛ̍rīyɔti ma̍ hɔ̄ abɔ̍ɔ. Anu̍ pi̍i̍ ge̍ē chɔ̄ɔwɛ ē tū Iji̍sɔ̄ɔsi īchāha̍ a̍nɛ. 5O̍ ka bɛ̍ɛ̄nɛ̄ hīka, oji̍ - ohu̍ nīi ɛ̍lɛ i̍ de yanɔ̄ oni̍pī kwɛ̍kwɛ̍ nūma̍ nāa ra̍ ina̍ra ohu igwɛ̍ɛrwɔ̄ hɛ̄ɛbɛ de okpo ɔla̍ā tū alyeklo̍ wɔbɔ̄ ni̍ ma̍/? 6I̍ lɛha̍ yī alyeklo̍ nīi o̍ yɛ ē ma̍ - ohu̍ nīi o̍ ka i̍ngɔ̍ɔ a̍ni̍. Uwī ke̍e̍ nɛ. Wu̍chē lɔkɔ nīi anu̍ ē bī riba nīi e̍ ē de okpo ē tū a̍nɛ ma̍, o̍ chikpo̍ ge̍ē wu̍ ɛpiyabuna la anu̍.

7Iji̍sɔ̄ɔsi da ɔ̍ hīka, “Pi̍ye̍mā hī ɔnyā ɔla̍ā nīi o̍ ge̍ de onīi hōhī ma̍ lā gbo̍ ɔ̄chī yī onyōnyi yī u. 8Alyeklo̍ ma̍ ge̍ē gblāa amu myɛ̄grāa-myɛ̄grāa ba̍la ala̍. Ami ma̍, n i̍ chī ge̍ē hɔ̄ amu ba̍la ala̍ i̍ngɔ̍ɔ ni̍.”

Alɛhu̍ yī Iju̍u miya tū Ila̍jārɔsi i̍ngi̍ngɔ̍ɔ

9Āchɛ yī Iju̍u yɛ̄mɛ̄mɛ̄ po̍ hīka Iji̍sɔ̄ɔsi ɔ̍lɔ hɔ̄ abɔ̍ɔ la Ibɛ̍tāni ma̍, e̍ pɛ̍ kpɛ̍ɛ ga abɔ̍ɔ. E̍ i̍ gāa ke̍e̍ wu̍chē yī Iji̍sɔ̄ɔsi ni̍. E̍ gāa hɛ̄ɛbɛ ge̍ē ma̍ Ila̍jārɔsi nīi Iji̍sɔ̄ɔsi de ɔ̍ hye̍ēyī la okū ma̍ i̍ngi̍ngɔ̍ɔ. 10Wu̍chē yī ɔla̍ā, alɛhu̍ aligbe miya ge̍ē de Ila̍jārɔsi ē ngmo̍ titi. 11Wu̍chē oji̍ nɛ, lɛlā yī nū - ohu̍ nīi Iju̍u yɛ̄mɛ̄mɛ̄ yɛ ē pīya hī alɛhu̍ yī wā ge̍ yɛ ē chɛ̄ku Iji̍sɔ̄ɔsi a̍nɛ.

Iji̍sɔ̄ɔsi ga Ijɛru̍sālɛm bāa Ɔchwɔ̄lɛ̍ ma̍

(Ima̍tiyu 21:1-11; Ima̍aki 11:1-11; Ilu̍uku 19:28-40)

12Ɔ̄chī ɔ̍mɛpa, okru̍utu yī āchɛ ɛla̍ā nīi wā ge̍ē ya̍ Ɔwɔ̄wīyā yī Owu̍lā ma̍ po̍ hīka Iji̍sɔ̄ɔsi ɔ̍lɔ yɛ amu yewā la Ijɛru̍sālɛm mɛ̍. 13E̍ hɛ̍ īpū āpārī bī la abɔ̄ yɛ grāa anu̍, chūukwa ka ɔ̍lɔ ge̍: “U̍chuwi̍i! Ɔwɔ ge̍ de ɔpiyɛ de ɔ̄chɛ nīi yɛ ma̍ yewā riyī yī Ādā ma̍ oo! Ɔwɔ ge̍ de ɔpiyɛ de Ɔchwɔ̄lɛ̍ yī I̍sɛ̄rɛli oo!”

14Iji̍sɔ̄ɔsi ma̍ ɛbɛ̍ obīho̍ ɔha̍ pīya hyāhɔ̄ la ichō yī nū. Ɔla̍ā lɛ i̍ngɔ̍ɔ ke̍e̍ lɔkɔ nīi Īpū yī Ɔwɔ ka hɔ̄ ma̍ ma̍:

15“A ā tūuhwi ni̍ oo, ipwo̍gra yī Isa̍yɔn!

Ma̍ Ɔchwɔ̄lɛ̍ yī wɔ nīi yɛ aa̍ yewā!

O̍ che la ichō yī ɔ̍drɔ̄ yī ɛbɛ̍ obīho̍ ke̍e̍.”

16A̍chi̍kpo̍ yī nū i̍ je̍ ochi̍chi̍ yī lɛlā nūma̍ yɛ̄grāa ɔla̍ā ni̍. Iji̍sɔ̄ɔsi de rīgā yī nū chabɔ̄ bū la ohye̍ēyī la okū yī nū ma̍ o̍bū nīi e̍ bla hīka Īpū yī Ɔwɔ ɔ̍lɔ kɛlā ku̍ ɔ̍lɔ i̍ngɔ̍ɔ - ohu̍ nīi ɛ̍lɛ ya̍ i̍ngɔ̍ɔ de ɔ̍lɔ a̍nɛ.

17Āchɛ ɛla̍ā wa̍a̍ nīi hɔ̄ abɔ̍ɔ yɛ̄grāa nīi Iji̍sɔ̄ɔsi hī Ila̍jārɔsi ɛra̍ de ɔ̍ hye̍ēyī la okū ma̍ koko̍o yī lɛlā ɔla̍ā wa̍a̍ de āchɛ. 18Anu̍ - ohu̍ nīi āchɛ yɛ grāa anu̍ i̍ngɔ̍ɔ a̍nɛ. Wu̍chē oji̍ nɛ, e̍ de po̍ mɛ̍ hīka ɔ̍lɔ ya̍ u̍ku̍rɔ̍ ɔlɛbɛ̍bi̍ ɔnɔ̄kɔ̄kū ɔla̍ā a̍nɛ. 19Āchɛ yī Ifa̍rasīi ka ɔ̍lɔ ge̍ ehe̍e! Lɛlā nūma̍ ɔ̍lɔ i̍ yɛ amu ge̍ē ngmɛ̍rɛ̍ de aa̍ ni̍ oo! Āchɛ̄ɛchɛ cha̍cha̍ ɛ̍lɛ pīya ku ɔngrɔ̄ɔ nūma̍ mɛ̍ ko̍ō!

Āchɛ yī Igri̍iki ɛha̍ gāla̍ Iji̍sɔ̄ɔsi

20Āchɔga ɛha̍ nīi - Igri̍iki ma̍ wā la Ijɛru̍sālɛm yɛ̄grāa yī ɔwɔ̄wīyā ɔla̍ā ge̍ē ya̍ otūlichō de Ɔwɔ. 21E̍ ga ɛbɛ yī Ifi̍līipu nīi - Olibɛsa̍yi̍da yī Iga̍līli ma̍ ge̍ che ɔ̍ ikpo̍ ka ɔ̍lɔ ge̍, ādā, aɛ̍lɛ chikpo̍ ge̍ē ma̍ Iji̍sɔ̄ɔsi.

22Ifi̍līipu pīya ge̍ de koko̍o de A̍ndru. Aa̍ āchɛ ɛpɛpa gāa ge̍ de ka de Iji̍sɔ̄ɔsi ɔlɔjā. 23Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ ma̍ ko̍ō! Yɛ̄grāa gbajɛ nīi e̍ ge̍ē de rīgā ɔnɔ̄kɔ̄kū de Ɔyi̍ yī Ɔngrɔ̄ɔ mɛ̍. 24Lēchi̍-lēchi̍, n koko̍o de ala̍! Ūkpō yī igu nīi re̍ka iwi̍iti ma̍ ge̍ lɛ ūkpo̍he, o̍ ge̍ē ba̍ la ūkpo̍he i̍ngɔ̍ɔ kpɛɛ, ɔ̍chi̍kpa̍kpa̍ e̍ de nyi la ajɛ nīi o̍ pīyaku̍ o̍bū. O̍ ge̍ pīyaku̍ mɛ̍, o̍ ē chōo̍chē wā īkpō yɛ̄mɛ̄mɛ̄ bɛ̍ɛ̄nɛ̄. 25Ɔ̄chɛ nīi ɔhɔ̄leyī yī anu̍ ɔlɔjā ge̍ hi ɔ̍ ɔtū, o̍ ge̍ē ngmla̍a anu̍ pīyēbi̍. Ɔ̄chɛ nīi ɔhɔ̄leyī yī anu̍ ɔlɔjā ge̍ ta̍ ɔ̄ anyī la yɛchɛ nūma̍, ɔlɔjā ge̍ē lɛ ɔhɔ̄leyī ku yɛ̄grāa i̍mɔ̄mɛni̍. 26Ɔ̄chɛ nīi ge̍ chikpo̍ ge̍ē chrāa ami ɛrɔ̄, ɔlɔjā ge̍ ku u la u̍tu. O̍ ngma̍ nīi ɔ̍chɛ̍ yī u ē hɔ̄ la ɛbɛ nīi ami ɔlɔjā hɔ̄ ma̍. A̍dā yī u ge̍ē de otūlichō de ɔ̄chɛ nīi ē chrāa ami ɛrɔ̄ ma̍.

Iji̍sɔ̄ɔsi kɛlā ku̍ ɔpīyaku̍ yī nū

27“U̍ma̍ama, ūkpɔ̄tū ti̍ya ami tū kpɛ̍ɛji mɛ̍. Kana̍ kpɛ̍ɛ nīi n ge̍ē ka bɛ̍ɛ̄nɛ̄ ma̍? N ā ka hīka, ‘A̍dā yī u ge̍ e̍e chɛ̄ nīi ichi̍ nūma̍ ge̍ e̍e wā la ami ni̍?’ Ɔla̍ā chī - ohu̍ nīi n wā a̍nɛ ma̍ bɛ̍ɛ! N wā hɛ̄ɛbɛ ge̍ē mi̍chi̍ nūma̍ wa̍a̍. 28Ādā, bī rīgā ɔnɔ̄kɔ̄kū ge̍ de riyī yī wɔ gɛ!”

Ɔpɔ̄ɔpɛ̄ ɔkɔlɛ̄lā ɔha̍ bū abɔ̍ɔ la ichō ka hīka, “N bī rīgā ɔnɔ̄kɔ̄kū ge̍ de ɔ̍ mɛ̍. N chī ge̍ē gba̍a ē ya̍ i̍ngɔ̍ɔ we̍!”

29Āchɛ ɛla̍ā wa̍a̍ nīi rɛ abɔ̍ɔ ma̍ po̍ ɔkɔlɛ̄lā ɔla̍ā ma̍, e̍ ka hīka yakpla̍ ɔ̍lɔ gbo a̍nɛ.

Āchɛ ɛha̍ ka hīka ɔyɛ̍ɛ̄chɛ̄rɔ̄ yī Ɔwɔ ɔ̍lɔ kɛlā tāa ɔ̍lɔ a̍nɛ.

30Iji̍sɔ̄ɔsi koko̍o de wa̍ hīka, “Ala̍ ma̍ ko̍ō! I̍ wu̍chē yī u - ohu̍ nīi ɔkɔlɛ̄lā nūma̍ bū la ichō wā a̍ni̍. Wu̍chē yī ala̍ nūma̍ nɛ. 31Yɛ̄grāa nūma̍ nīi Ɔwɔ yɛ ē hlɛ̍ɛ̄pɔ̄ yī ajɛyɛ̄ɛchɛ nūma̍ bɛ̍ɛ̄nɛ̄ a̍nɛ. Yɛ̄grāa nūma̍ nīi o̍ ge̍ē kpo̍ ɔchwɔ̄lɛ̍ yī yɛchɛ nūma̍ ē hrāajɛ bɛ̍ɛ̄nɛ̄ a̍nɛ. 32E̍ ge̍ de u hu hwa̍a̍ hī ajɛ o̍bū mɛ̍, n ge̍ē pi āchɛ wa̍a̍ tū iyī u.” 33Bū la lɛlā nūma̍ nīi Iji̍sɔ̄ɔsi ka ma̍, o̍ yɛ ē chabɔ̄ yī ita yī ɔpīyaku̍ nīi o̍ ge̍ē ku̍ ma̍.

34Āchɛ ɛla̍ā che ɔ̍ ikpo̍ bɛ̍ɛ̄nɛ̄ hīka, “Je̍ka īpū yī Lihɔ yī alɔ hīka Ɔhɔ̍ɔnyɛta̍ Nīi Ɔwɔ Ɔ̍lɔ Hōhu Ma̍ ɔ̍lɔ ge̍ē hɔ̄ ku yɛ̄grāa ɔha̍lɔha̍? Kana̍ nīi a chōo̍chē ka hīka ɛ̍lɛ ge̍ē hu Ɔyi̍ yī Ɔngrɔ̄ɔ hwa̍a̍ ma̍? Kɛ̄ɛ ɔ̄nyɛ chī - Ɔyi̍ yī Ɔngrɔ̄ɔ ɔ̍lɔma̍ ma̍?”

35Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Ala̍ ma̍ gɛ ko̍ō! Ɛbɛ ɔlɛgēdēgēdē e̍e hɔ̄ amu ba̍la ala̍ yɛ̄grāa ɔha̍ pi̍nyɛ̍ we̍. Ala̍ yɛɛ ga iyɔ̄bū iyɔ̄bū yɛ̄grāa nīi o̍ e̍e hɔ̄ ma̍ de ala̍ ma̍ gɛ. Nɛ̄ni̍, ɛbɛ odobū ge̍ē wā ge̍ē hɛ̍ ala̍ la ɔbū. Ɔ̄chɛ ɔyɛɛ la ɛbɛ odobū i̍ ē je̍ ɛbɛ nīi o̍ yɛ gāa ma̍ ni̍. 36Ala̍ ā de ɔtū che ɛbɛ ɔlɛgēdēgēdē nūma̍ la olo̍ nīi o̍ e̍e hɔ̄ amu de ala̍ we̍ ma̍ gɛ, hɛ̄ɛbɛ nīi ala̍ ge̍ de pīya āchɛ yī ɛbɛ ɔlɛgēdēgēdē.”

I̍chɛ̄ni̍ yī āchɛ yī Iju̍u

Iji̍sɔ̄ɔsi kɛlā nūma̍ ma̍, o̍ ku̍ pīya hī wā ge̍ trɛ̍ba. 37Okru̍utu yī lɛlā ɔlɛbɛ̍bi̍ ɔnɔ̄kɔ̄kū nūma̍ wa̍a̍ nīi o̍ ya̍ nīi e̍ ma̍ ma̍, e̍ i̍ gba̍a chɛ̄ku ɔ̍ mɛ̍ ni̍ kpɔ̍. 38Onūma̍ ya̍ nīi lɛlā yī Ayisa̍ya nīi o̍ mwɔ̍ɔmu ma̍ ge̍ē de ē pīya ichɛ̄ɛhi. O̍ ka hīka,

“Ādā, ɛrɔ̄ yī wɔ nīi alɔ ka ma̍, ɔ̄chɔ̄chɛ i̍ chɛ̄ ni̍.

Ɔ̄nyɛ kpɛ̍ɛ nīi Ādā de wɔhu̍ yī nū chabɔ̄ hu̍ ɔ̄ ma̍?”

39Ɔjā nīi gba̍a ohu̍ nīi e̍ i̍ chɛ̄ku ɔ̍ ni̍ ma̍, Ayisa̍ya gba̍a kɛlā ɔha̍ hīka,

40“Ɔwɔ de wa̍ priyī mɛ̍.

O̍ de wa̍ ūkpɔ̄tū ngmu̍wɔ̍hu̍ mɛ̍.

Nɛ̄ni̍, īkprī yī wā ge̍ myɛ̍ma̍ mɛ,

nīi ūkpɔ̄tū yī wā po̍ ochi̍chi̍ yī lɛlā mɛ,

e̍ ge̍ē pīya kpa̍ta̍ ē wā dikpo̍ba̍ u.

N chī ge̍ē de wa̍ ē nyiya ke̍e̍.

Ami Ɔwɔ ka i̍ngɔ̍ɔ a̍nɛ.”

41Ayisa̍ya ma̍ rīgā yī Iji̍sɔ̄ɔsi ma̍ nīi o̍ kɛlā nūma̍ a̍nɛ. Iji̍sɔ̄ɔsi ke̍e̍ nīi o̍ chī ka ku̍ ɔ̄ a̍nɛ.

42O̍ de lɔ̄lɛ i̍ngɔ̍ɔ nyaa ma̍, alɛhu̍ yī Iju̍u yɛ̄mɛ̄mɛ̄ chī chɛ̄ku Iji̍sɔ̄ɔsi. Wu̍chē yī Āchɛ yī Ifa̍rasīi, e̍ i̍ chɛ̄ ka i̍ngɔ̍ɔ la ɔgbādu ni̍. Nɛ̄ni̍, e̍ ge̍ē de wa̍ ē wu̍ligbo̍ ē hī ogrēeyī yī wā. 43Lɛlā ɔhwɔhi hwɔhi la īkprī yī āchɛ̄ɛchɛ hi wa̍ ɔtū la ɔyɔ̍ɔ̄ya̍ hi̍ lɛlā ɔhwɔhi hwɔhi la īkprī yī Ɔwɔ a̍nɛ.

Lɛlā yī oko̍o yī Iji̍sɔ̄ɔsi ge̍ē hlɛ̍ɛ̄pɔ̄

44Iji̍sɔ̄ɔsi ka hwōō de wa̍ bɛ̍ɛ̄nɛ̄ hīka, “Ɔ̄chɛ nīi ge̍ chɛ̄ku u, i̍ amami lōru̍u nīi ɔlɔjā chɛ̄ku u a̍ni̍. O̍ chɛ̄ku ɔ̄chɛ nīi de u tɛ̄rɔ̄ ma̍ i̍ngi̍ngɔ̍ɔ. 45Ɔ̄chɛ nīi ge̍ chī ma̍ u mɛ̍, o̍ re̍ka ɔlɔjā ma̍ ɔ̄chɛ nīi de u tɛ̄rɔ̄ ma̍ mɛ̍. 46Ami re̍ka ɛbɛ ɔlɛgēdēgēdē nīi wā la yɛchɛ nūma̍ ma̍ a̍nɛ. N wā hɛ̄ɛbɛ nīi ɔ̄chɛmɔ̄chɛ nīi ge̍ chɛ̄ku u ma̍ i̍ ge̍ē tū la ɛbɛ odobū gɛ ni̍. 47Ɔ̄chɛ nīi ge̍ po̍ ɛrɔ̄ yī u nīi i̍ chɛ̄ ya̍ i̍ngɔ̍ɔ ni̍, n i̍ ge̍ē hɛ̍ ɔlɔjā lɛpɔ̄ ni̍. N i̍ wā ge̍ē hɛ̍ yɛchɛ lɛpɔ̄ ni̍. N wā ge̍ē hɛ̍ yɛchɛ ɔhɔ̍ɔ̄hɛ̍ ē ta̍. 48Ɔ̄chɛ nīi ge̍ ta̍ u, nīi i̍ ge̍ chɛ̄ nāa lɛlā yī u ni̍, ɔjā nīi ge̍ē hɛ̍ ɔlɔjā lɛpɔ̄ ma̍ hɔ̄ abɔ̍ɔ. Lɛlā yī oko̍o yī u nīi n ka ma̍ ge̍ē hɛ̍ ɔlɔjā lɛpɔ̄ la ɔ̄chī ɔkwɛ̍ɛjī a̍nɛ. 49Lēchi̍ nɛ, Wu̍chē oji̍ nɛ, n i̍ ē ka wɔ̄bɔ̄bɔ̄ yī ami ɔlɔjā ni̍. Ɔwɔ Ādā nīi de u tɛ̄rɔ̄ ma̍ ē ka ē de u lɔkɔ nīi n ge̍ē ka ke̍e̍ ma̍ a̍nɛ. 50N chī jo̍ōkū hīka lɛlā ɔyɔ̍ɔ̄ya̍ lɔkɔ nīi o̍ ē ka ma̍, anu̍ ē bī ɔhɔ̄leyī i̍mɔ̄mɛni̍ wā a̍nɛ. Lɛlā nīi n ē ka wa̍a̍ ma̍, onīi Ɔwɔ A̍dā ka amɔ̍lɔ ge̍ ka ma̍ nɛ.”

Selectat acum:

Ijɔ̍ɔn 12: YBASR

Evidențiere

Partajează

Copiază