Jénésis 9
9
Ocím mú Osówo o/ryí ne Núwa
1Osówo o/jware Núwa ne bwǎn emen ḿbé banyinchéng, o/fu, fwon n̂ ba-jê, ba-sú ké ejíí emúmú. 2Kángkáng enyam ne bunurung ne ekworê byi/chi byi-kû běn eshî. Me nn/yip kámbyí kángkáng n-tî ké bubwô enen. 3Ba-man n eryí kámbyí kántîk cibicibi ne eshǎan-byichí. 4Enyam nyí e/tôong ne baróng ké byiko nké nke nké *da n̂g echi ba-ryí*. Me n/ciring běn ńkyín, ké nǎ, dyikpen ndyi ké baróng. 5Nang yeě nké o/ju onet, n/chi n-kye ǎ busông. N-ju ng to enyam nang erá nyí e/ju onet. 6Me n/chi onet wǎ me oyén, ne ké bubwô ámbu, nang yeě nké o/ju onet, orî-onet o/chi o-ju ǎ to.
7Ben ba-man ba-fwon bwǎn chwóó eringe nyí bwǎn enen badakáng ejíí emúmú.
8Osówo o/chîraa ne Núwa ne bwǎn emen ḿbé banyinchéng, o/fu, 9me n-kú m-bâ eryí ocím ne ben ne bwǎn enen 10ne kángkáng byěm ḿbyí mbyi byikpó, bunurung ne enyam, kángkáng byěm ḿbyí byi/byí ké ńsukyíkang ne ben. 11Me mu n-kúng ng ejá ńnyín n-ryí ocím ne ben. Me n/ryí ocím n/fu, mm*ba/chi n-chîkúng omu o-ju kángkáng byěm ké ejíí*. Omu oo*ba/chi o-chîbên ejíí*. 12Wǎ ekap nyí mu n-ryí i ocím mún ne ben ne kángkáng bunurung ne enyam, mú o/chi o-waa ne banyá, 13me nn/tî busháng-eshwa ejí ké éfíbí. 14Nang nkéré orá nké n/chi bubóng bu-jîi, busháng-eshwa bu-byí, 15me n/chi n-zîim ocím ejí mú n/ryí ne ben ne enyam kángkáng n/fu, omu oo*ba/chi o-chîju kángkáng byěm ké ejíí*. 16Â busháng-eshwa bu/byí kyíbóng, me n/chi n-ri kámbú n-zîim ocím ejí mú n/ryí ne ben ne enyam kángkáng nyí ké ejíí, mú o/chi o-waa ne banyá. 17Ányi ekap nyí ocím mú me mu n-ryí i ne kángkáng byěm ḿbyí mbyi byikpó ké ejíí.
Núwa ne Bwǎn Emen
18Bwǎn-Núwa ḿbé ba/byí ké ńsukyíkang ne nyǐ ba/mû Shêm ne Hâm ne Jáfet. Hâm o/mû bonchí-Kínan. 19Bwǎn-banyinchéng ḿbé Núwa ḿbén ashí achât nké mbe banchí ḿbé kángkáng banet ḿbé ké ejíí.
20Núwa o/mû mkpang-kyifát, ne o/mû mbwôp kashú-onet mú o/chi kyifát-byirim-byichí ḿbyí odachi bato ké mbyí. 21Nyǐ o/jwáp bato ḿbé o/chi, ba-kpet ǎ ebwóm, o-pii osíndyíbang, o-rí sáre ké kafâ-mpyep emen mú badabi ké byídí. 22Ké nkéré mú Hâm mú bonchí-Kínan o/ri o/fu, bonchí emen mu osíndyíbang, nyǐ o/byí o-da-sét bwǎn-bané emen ḿbé áku ashí afee. 23Shêm ne Jáfet kâng ba-yip kyídí ba-cít ké byikem, ba-cen kyikû esim ésim ba-nung ké kafâ-mpyep ba-cít bonchí ebe. Ba/bírî bashú ebe kú eringe nyí baa*ba/chi ba-ri bonchí ebe osíndyíbang*. 24Ké nkéré bato baa/fûu Núwa ne o-jwo ńkyí wǎn emen mú wǎsíng o/chi ǎ, 25o/raa o/fu, kyishû kyiwaa ne Kínan ké byiko. Nyǐ o/chi o-kyú ósóng mú bwǎn-bané emen. 26Kye n̂g Óburúkpâbí mú mu Osówo mú Shêm akpee. Kínan o/chi o-kyú ósóng mú Shêm. 27Kyi/bát Osówo ochi Jáfet o-fwon chwóó. Kyi/bát bwǎn emen bakyú ne bwǎn-Shêm. Kínan o/chi o-kyú ósóng mú Jáfet.
28Ńdyí omu o/na buce bu-sú bu-cít ejíí, Núwa o/chîrí égot-aje ebónge ne bajam-aje káchâtkányi esim diǐkpú, 29ne o/rí égot-aje enyii ne bajam-aje káchâtkányi esim diǐkpú ne o-kpú.
Selectat acum:
Jénésis 9: BKY
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Published by the Bible Society of Nigeria @ 1985