Johana 8
8
1Neke baho umwene Jesu neke inukilage pakidunda ikimono.
2Neke ilavage ulwa milavo ukuhelela mutembele (neke avanu ikipuga kyonda neke kihelelage, bahe ali. Neke umwene ikalage neke avadalikilage inôngwa).
3Neke baho avakagulihâte nava-Fwalisaja neke vamuletage umudala, je vamwaganidze muvugoni, neke vamuvikage pagati.
4Neke vamulongelage u-Jesu neke vatigilage: ve mwiganidzi, umukiṅinavo uju vamwaganidze muvugoni, pe ihidzwa.
5Neke lino mumilagililwe u-Mose atulagye atigye, avalivo avo muvavulagilage amaganga. Uveve lino vwitigila kiki?
6Neke dzen’idzi valongaga dza kumugemya hela, pakuva vatigilaga, tuvedzage nadzo idza kumutovelela. Neke baho umwene Jesu agundamage pasi mukwandika nikyâla pamuganga.
7Neke avye avwene vamudadambalye pakumuvudza, neke baho image neke atigilage: uńeńe umudzila vuhosi ponu je mwene je avalongolelage pakutodza iliganga kwa mudala.
8Neke kangi umwene neke agundamage pakwandika pamuganga.
9Neke avene, vavye valupulike ulu, neke baho vańĕtage jumwijumwi neke vatalage va vavina, neke vamulekage mumo ju Jesu mwene numukiṅinavo, je ali pagati baho.
10Neke lino, avye inamwike u-Jesu, neke amuvudzage umukiṅinavo atigilage: vali kwi, asikukĕlye jungi inôngwa jako?
11Neke baho umwene apilusage atigilage: hamu, ve mutw’ave, asiṅĕlye munu. Neke baho atigilage: apo humbi najune sindi-kukukĕlela inôngwa jako. Lino uhelelage, utane ukuvwila kangi uvuhosi.] 5, 14.
12Neke baho Jesu neke avwilage kangi pakulonga navo neke atigilage: unene nde lumuli lwa ńi, je akuninila unene, asilage-ndela mukîsi, hamu, alavedza nalo ulumuli lwa vûmi. 1, 5. 9.
13Neke baho ava-Fwalisaja vamulongelage vatigilage: uveve vwikwijoleka ulwako, apo uvolesi vwako vusi vwa koluli.
14Neke apilusage Jesu atigilage: nde ndivedzage ndikwijoleka ulwangu, napo uvolesi vwangu vwa kuloli ndeni, pakuva ndikudzelye na kwe ńumile na kwe ndihelela, neke uńeńe musindzelye na kwe ndihumile na kwe ndihelela. 5, 31.
15Uńeńe pe mwihiga, mwigendela lwa vunu, unene sindihiga munu.
16Neke kangi unene, nde ndivedzage ndihiga, napo uvuhigilo vwangu vwa koluli mbandu. Pakuva unene sindili jena, hamu, tuli pamwinga na ju je anumile unene. v. 29.
17Neke na mumilagililwe gyeńo juńe mwe mwene mwe lolilwe ulwakuta: uvolesi vwa vavili vwita-ṅanila.
18Lino je nene, je ndi-kwijoleka ulwangu neke nudâda, je anumile, nave ikolela ulwangu.
19Neke baho vamulongelage vatigilage: ali kwe kwi udado? Neke apilusage Jesu neke atigilage: musindzelye nambi unene, na ju dâda nave musimudzelye. Muka muvedzage mundzelye unene, apo na ju dâda ngali mumudzelye. 14, 7.
20Neke agene amadzwi aga alongelaga palisanduko lya fya hongele, pe ali mukuvadalikila avanu inôngwa mutembele. Neke si pe ali ujungi umuńa-kumwibata umwene, pakuva jali jave isala jakwe Ukufika. 7, 30; Luk. 22, 53.
21Neke baho avwilage kangi Jesu neke avalongelage atigilage: unene ndihelela neke uńeńe mulasakula neke lino mulafwa nadzo indzanangifu dzeńo. Kwe ndihelela unene, kwe mwilemwa ukudzifika uńeńe. 7, 34; 13, 33.
22Neke balio ava Juda vatigilage: vona ikwivulaga mwene, pakuva itigila: kwe ndihelela unene, kwe mwilemwa ukudzifika uńeńe? 7, 35.
23Neke umwene atigilage: uńeńe muhumile pasi apa, neke unene ndi-humile kukyâńa. Uńeńe muhumile kwen’eńi kuno, neke unene sindihumile kwen’eńi kuno. 3, 31.
24Neke lino ndivalongye ukuta mulafwa nadzo indzanangifu dzeńo. Ndivwene ngana musikūfuvwa unene, ukuta je nene, apo mulafwa nadzo indzanangifu dzeńo.
25Neke baho vamuvudzage vatigilage: neke uveve juve nani? Neke umwene Jesu apilusage atigilage: ndinaka luki, ndandye ndidzova.
26Unene ndzolofu, idzili kweńo idza kuvalongela uńeńe nidza kuvahiga. Neke je anumile unene, je va koluli, najune dze ndapulike kwa mwene, dze dzene dze ndikujivula na ji ńi.
27Neke avene valemwage pakulufika ukuta akumulonga ju dadye.
28Neke baho Jesu neke avalongelage atigilage: nde lusiku, pe mulava mumwinwise umwâna va munu, apo mulakumbuka ukuta je nene nukuta unene sindilima ulwangu ndili jena, hamu, dzonda, dze andziganidze udâda, dze dzene dze ndilonga unene.
29Neke umwene je anumile unene, ndili nave unene. Umwene asiku-ndeka ndili jena unene, pakuva unene mbêpali ndilima, lwe akulukya jumwene. v. 16.
30Neke pe akudzilonga idzi, neke vamufuvwage avolofu. 7, 31.
31Neke baho Jesu neke avalongelage ava-Juda, avamufuvwaga, neke atigilage: ngana mukugūmilila amadzwi gangu, apo mulavedza vańigendwa vangu ndakyene. 15, 14.
32Apo muladzikagula idza ndakyene neke idza ndakyene dzilavakombodza.
33Neke avene vamulongelage vatigilage: twe va mukipelela kya Abalahama unefwe, je tusina tuleva ponu kwe munu. Vwilonga ndavuli ukuta: apo mulavedza muli vakombodzwa? Mat. 3, 9.
34Neke baho Jesu apilusage atigilage: ndakyene ndakyene unene ndikuvalongela nditigila: umuńa-kwangula uvuhosi, je musutu kuvuhosi jujo. Lom. 6, 16. 20; 1. Joh. 3, 8.
35Neke umusutu asivedza mbêpali muńumba nda, neke umwâna va munu ujo ívedza muńumba mbêpali.
36Apo kiba ngana avakombwidze umuswamuve, apo ve mukombwidzwe ndakyene. Lom. 6. 18. 22.
37Ndivadzelye najune ukuta uńeńe muli va mukipelela kya Abalahama, neke lino mwisakula ukumbulaga unene, pakuva amadzwi gangu gasikuvakola uńeńe.
38Najune ndikudzilonga, dze ndidzilolile kwa dâda, na juńe mukudzilima, dze mupulike kwa dadińo juńe.
39Neke avene vapilusage vatigilage: unefwe udadisu je Abalahama. Neke umwene Jesu atigilage; muka muvedzage muli vâna va Abalahama, apo nga mwilima, dze alimaga ju Abalahama.
40Neke lino uńeńe mwisakula ukumbulaga unene nde munu, je ndivalongye idza ndakyene, dze ndipulike kwa Nguluvi. Abalahama si ngali adzilimile idzen’idzi nda.
41Uńeńe mwilima amalimo ga dadińu juńe. Neke baho avene vatigilage: unefwe tusili va mwe luhengo nda, tuli nudadisu jumwinga hela, neke je Nguluvi.
42Neke avalongelage Jesu atigilage: ngana udadińu je Nguluvi, apo ngali mukundzenda najune, ndivwene unene ndihumile kwa dâda neke ndadzile; ndivwene sindadzile ulwangu june, hamu, anumile ju jula.
43Musikujifika kiki uńeńe indongele jangu? Pakuva mwilemwa ukupulika ilidzwi lyangu.
44Uńeńe muli vâna va dadińu va Setano, pakuva mukelye hela ukulima, dze idoboka udadińu. Umwene jula muvulagavanu mbêpali ukuhuma pavwimilo; asimye mudza ndakyene nidza ndakyene umwakwe dzisumuli. Umwene pe ilonga idza vudesi, apo ilonga dzi dzakwe mwene, pakuva mudesi, kangi dadye va vudesi. 1. Joh. 3, 8-10; 2. Pet. 2, 4.
45Neke unene uńeńe musikufuvwa, pakuva ndilonga ulwa ndakyene.
46Uńeńe lino, ndevye mugenda vuli, je nani je akungomedza indzanangifu? Ngana ndilonga lu lwa ndakyene, apo musikufuvwa kiki? 2. Kol. 5, 21; 1. Pet. 2, 22.
47J’amelile mwa Nguluvi, ipulika amadzwi ga Nguluvi. Kye mulesile mutane ukupulika uńeńe, pakuva musimelile mwa Nguluvi. 18, 37.
48Neke baho vapilusage ava-Juda neke vatigilage: lolaga lino, tusigolwise lwe tutigye uli mu-Samaliti uveve, na pe tutigye uli numudemono? 7, 20.
49Neke apilusage Jesu neke atigilage: unene umudemono sindili nave, hamu, unene ndikumuginya ju dâda mwene, neke uńeńe mukumbejula unene.
50Neke unene sindisakula indolo dzangu, kwali umwene, je isakula je ihiga. 5, 41.
51Ndakyene ndakyene unene ndikuvalongela nditigila: umuńa-kulivika ilidzwi lyangu, ujo asilakuvona ukufwa nambi ponu. 6, 40. 47.
52Neke baho ava-Juda vatigilage: lino ukelidze hela ukuta uli numude-mono. Abalahama afwe, navavidzi vonda vafwe, kangi uveve vwitigila: je akulivika ilidzwi lyangu, asilagedza ukufwa mbêpali!
53Neke uveve ulutye na kwa dadisu Abalahama, je afwe, na kuvavidzi, avafwe? Vwikwidzusa kiki uveve?
54Neke apilusage Jesu atigilage: ndika nigilage ndiginye ndili jena, apo uluginyo lwangu lusika lwivedza luginyo nda. Kwali umwene, je dâda je ikunginya, je najuńe mwitigila, je Nguluvi visu.
55Neke lino uńeńe musimudzelye ponu umwene, neke unene ndimudzelye. Ndika nditigilage sindi-mudzelye najune, apo ngali ndilińine nańeńe uvudesi. Hamu, unene ndimudzelye nilidzwi lyakwe ndilivikile. 7, 28.
56Umwene Abalahama udadińu alukelaga ulwa kuta alakivona ikigono kyangu. Neke akivwene neke akelage.
57Neke baho ava-Juda vatigilage: uveve, je usina ugona imyâka nambi makyumi gahanu, vwitigila vwamuvwene Abalahama?
58Neke baho umwene Jesu neke avalongelage atigilage: ndakyene ndakyene unene ndikuvalongela nditigila: pe asana avedza Abalahama, unene ve pondi.
59Neke baho vinulage amaganga neke vaganage vatodze ukwakwe. Neke umwene Jesu neke apungapungage neke ahumage mutembele. 10, 31.
Selectat acum:
Johana 8: II
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
New Testament in Bena © Bible Society of Tanzania, 1958.
