Johana 6
6
1-15: Mat. 14, 13-21; Mal. 6, 32-44; Luk. 6, 10-17.
1Neke pambele pa idzi neke baho Jesu alovońasage ińandza jitibelija ija mu-Galilaja.
2Neke baho vamuninilage avanu avolofu, pakuva vafivwene ifilŏle ifyolofu, fye avonehidze pavatamwa.
3Neke umwene Jesu inukilage kukidunda neke kwe akikalage navańigendwa vakwe.
4Neke lino ikyâka kya va-Juda, kye vitigila je pasa, kyali pîpi. 2, 13; 11, 55.
5Neke baho umwene Jesu, pe ikwinamula amîho neke avonage hava avanu ikipuga vikwadza kwa mwene. Neke baho alongage kwa Filipi neke atigilage: twigula kwi ifilyo fya kulya vond’ava?
6Neke pe alongagavo, lwali lwa kumugemya hela, avwene umwene idzelye ulwa kululima.
7Neke umwene Filipi apilusage neke atigilage: ifilyo fya palupija magana gavili (200) fisifuluka, nde vańambasage hela padôdo vonda.
8Neke baho alongage umuńigendwa vakwe jumwi, ju Andeleja, umunuṅuve va Simono Petele neke atigilage:
9pokali baha akakwa-midzi, akańamwe uvugali vwa ngano isima dzihanu nisomba dzivili dza mboga. Neke utu tukuvapaka pi avolofu ava?
10Neke umwene Jesu atigilage: muvalongelage avanu, ukuta vikalage pasi. Neke ikivungu kikyo ilisoli lyali lyolofu. Neke baho avagosi vikalage pa-ńi, avali vańa-mbilima dzihanu (5000).
11Nebe baho Jesu neke inulage uvugali neke ahongedzage neke avapelage avikalile. Na dzi somba nadzo ndesi, neke avapelage, ndevye vakelaga avene.
12Neke lino vavye vigwite, neke baho Jesu neke avalongelage avańi-gendwa vakwe neke atigilage: mulundasage utuvuluvulu, utusigalye, tutane ukwanangika.
13Neke baho avene valundasage utuvuluvulu twa vugali uvwa ngano uvuhanu, twe vasigidze vavo, avalidzaga, neke vamemyage ifihivi fińi-kyumi na fivili.
14Neke lino avanu, vavye vakivwene ikilŏle, kye avonise Jesu, neke baho vatigilage: uju ndakyene je muvidzi jujo, je vatigilaga ikwadza kwen’eńi kuno.
15Neke Jesu, avye aluvwene ulwa kuta, vikola mukwadza mukumugomela ngufu ulwa kumutemya uvutwa, neke baho atyegelage kangi kukidunda jujo mwene. 18, 36.
16-21: Mat. 14, 22-33; Mal. 6, 45-52.
16Neke avańigendwa vakwe, vavye vavwene vuhwe, neke baho vasu-lunukilage kuńandza
17neke vingilage mukyômbo neke valovoṅasi-hidzage mu-Kapelenahumu. Neke ikîsi kyagwe, numwene Jesu asafikile ku vene.
18Neke baho ińandza jigalukage, pakuva lyali lyolofu ilivelo, ilyapulaga.
19Neke lino vavye vagendile apańa-melo idzińa-makyumi gavili na dzihanu (25), nambi makyumi gadatu (30), neke baho vavonage u-Jesu igenda pakyâńa pańandza neke vavonage ahegēlye pîpi kukyômbo neke vogo-page.
20Neke umwene avalongelage atigilage: mutane ukogopa, je nene.
21Neke lino, pe vitigila tumukwegele mukyômbo, neke baho vavonage ikyômbo kifikile nakalingi kuṅumbuṅumbu, kwe vahelelaga.
22Neke avanu ikipuga, avimile imwambu ijingi ja ńandza, valukagulage pamilavo ukuta ikyômbo ikingi si pe kyali nda, kikyo kyene, kye vingilye avańigendwa va Jesu kitahanga numwene, valuka-gulage nukuta, vahegile va vańigendwa vakwe vene.
23Neke baho fifikage ifyômbo ifingi ifihuma ku-Tibelija, fihegēlelage kukivungu, kye valilye uvugali vwa luhongedzo lwa mutwa. v. 11.
24Neke lino avanu ikipuga, vavye valukagwe ukuta Jesu asupali, vasupali navańigendwa vakwe, neke baho vingilage mufyômbo fifyo va vene, neke valovońasihidzage ukuhelela mu-Kapelenahumu neke vakamusakulage Jesu.
25Neke lino vavye vamuvwene imwambu jila ja ńandza, neke vatigilage: ve labi, ukadzile ndali?
26Neke umwene Jesu apilusage atigilage: ndakyene ndakyene unene ndikuvalongela nditigila: uńeńe, lwe mukusakulila musikusakulila lwe mukivwene ikilŏle, nda mukusakulila, lwe mulye uvugali neke mwigute.
27Mutane ukugimba ifya kulya, ifijaga kangi, nda mugimbage ifilyo ifikwikala ukufika kuvûmi vwa mbêpali, fye alavapela umwânava munu; ndivwene je mwene, je akangidzwe kwa dadye, kwa Nguluvi. 4, 14; 5, 36.
28Neke avene vamuvudzage vatigilage: tugitage ndavuli lino pakugagimba amalimo ga Nguluvi?
29Neke apilusage Jesu neke avalongelage atigilage: amalimo ga Nguluvi, ge itigila mulimage, ge ga kumufuvwa je atumilwe kwa mwene. 1. Joh. 3, 23.
30Neke baho avene vamuvudzage vatigilage: lino vwivonesa ikilŏle kiki neke tulolage neke tukufuvwage unefwe? Fili kwi, fye vwigimba uveve? 2, 18.
31Avadadisu unefwe vaponelaga imana muluṅalaṅala mula, ndevye lolilwe pahâte ulwitigila: „avapelaga uvugali uvuhu-makukyâńa neke validzage.“
32Neke umwene Jesu avalongelage atigilage: ndakyene ndakyene unene ndikuvalongela nditigila: mutane ukuta, je Mose je avapelaga uvugali uvuhuma-kukyâńa vula, nda hamu, je dâda vangu, je ikuvapela uvugali uvwa ndakyene uvuhuma-kukyâńa. v. 49.
33Ndivwene vwe vugali vwa Nguluvi, uvwihuma kukyâńa uvukujihulila uvûmi ińi.
34Neke baho avene vamulongelage vatigilage: ve mutwa, ungatupela mbêpali uvugali uvu!
35Neke baho Jesu neke avalongelage atigilage: je nene nde vugali vwa vûmi june. Je ikwadza ukwangu asiladagana kangi, neke je akufuvwa unene, asilavuja akeluke ponu. v. 48; 4, 14; 7, 37.
36Neke lino ndevye ndavalongye: ukumbona namîho uko mumbwene, ukufuvwa uko musikufuvwa. v. 26. 29.
37Neke vonda, ve akumela udâda, avo valadza ukwangu, neke je ikwadza ukwangu, ujo najune sindilamudagila pe livala. 17, 6-8; Mat. 11, 28.
38Pakuva sindisulunwike ukuhuma kukyâńa mukulima, lwe ṅelye june, hamu ndadzile mukulima, lwe akelye je anumile unene. 4, 34.
39Neke umwene, je anumile unene, akelye ukuta vonda, ve amelye ju mwene, atane ukujaga nambi jumwi, akelye ukuta unene ndali ndivadzulu-busage pakigono ikya kududzihidza. 10, 28. 29; 17, 12.
40Ndivwene umwene udâda akelye ukuta vonda, avakumuvona umuswamuve neke vamufuvwage, ukuta vavuvonage uvûmi vwa mbêpali; neke najune ndilavadzulubusa pakigono ikya kududzihidza. 5, 29; 11, 24.
41Neke baho ava-Juda neke vaṅulage ulwakwe lwe atigye: je nene nde vugali uvuhuma-kukyâńa.
42Neke avene vatigilage: si je Jesu, umuswamuve va Josefe juju uju? Tusimudzelye na ju dadye na ju ṅina? Lino ilonga ndavuli ukuta ndisangwike ndihumile kukyâńa? Luk. 4, 22.
43Neke apilusage umwene Jesu neke atigilage: mutane ukuṅulanila.
44Ilemwa umunu ukwadza ukwangu, je asisuṅilwe kwa dâda, je anumile unene, nekelino jemwene, je ndilamudzulubusa pakigonokya kududzihidza. v. 65.
45Lwandikilwe ṅani na muhâte dza vavidzi ulwitigila: „vonda valavedza viganidzwa kwa Nguluvi.“ Neke vonda, avipulika kwa dâda neke valuvulage, avo vikwadza ukwangu.
46Neke lino mutane ukuta pwali jumwi, je valoleṅine mihonamîho nudâda. Ila nda, valoleṅine numuhuma kwa Nguluvi, je mwene je amuvwene udâda namîho. 1, 18.
47Ndakyene ndakyene unene ndikuvalongela nditigila: umuńa-kufuvwa, i navo uvûmi vwa mbêpali. 3, 16.
48Je nene nde vugali, uvwihulila uvûmi junene. v. 35.
49Avadadińu valyaga imana muluṅalaṅala neke vafwe ndeni. v. 31. 32; 1. Kol. 10, 3. 5.
50Neke uvugali uvu, vwe vwene uvwihuma kukyâńa, ukuta validzage neke vatane ukufwa.
51Je nene nde vugali vwa vûmi uvuhuma-kukyâńa. Umunu je akuvulya uvugali uvu, j’alavedza mûmi mbêpali hela. Neke kangi uvugali, vwe ndilatavula unene, je ńama jangu ja muvili, ijikujihulila uvûmi ińi. Heb. 10, 5. 10.
52Neke baho valwidzage va vene ava-Juda neke vatigilage: akutupela ndavuli umunu uju ińama jakwe ja muvili neke tulidzage?
53Neke umwene Jesu avalongelage atigilage: ndakyene ndakyene unene ndikuvalongela nditigila: ngana musikujilya ińama ja muvili ja mwâna va munu, ngana musiku-jińwa nidanda jakwe, apo swe ve musili navo uvûmi umweńo.
54Neke umuńa-kujilya ińama jangu ja muvili, umuńa-kujińwa nidanda jangu, apo ujo i navo uvûmi vwa mbêpali neke unene ndilamudzulubusa pakigono ikya kududzi-hidza.
55Ndivwene ińama jangu ja muvili fye filyo ifya koluli nidanda jangu fye fińwo ifya koluli.
56Neke je akujilya ińama jangu ja muvili na ji danda jangu akujińwa, ujo ikwikala umwangu, najune ndikwikala umwakwe. 1. Joh. 3, 24.
57Ndevye anumile udâda umûtni, ndevye kangi najune ndili mûmi uvuve-la-mwadâda, apo nave, je ikundya unene, alavedza mûmi mu mwangu unene.
58Vulivo uvwene uvugali uvuhuma-kukyâńa, vusili ngita vula, vwe valyaga avadadińo neke kangi vafwidzage, hamu, uvwene uvu umuńa-kuvulya alavedza mûmi mbepalimbêpali.
59Neke dze avalongelaga muluholanilo lwamu-Kapelenahumu.
60Neke lino avolofu avańigendwa vakwe, vavye vapulike idzi, neke vatigilage: ilidzwi ili, lye alongile, likângafu, je nani umuńa-kumupulika?
61Neke umwene Jesu, avye avavwene mwileme avańigendwa vakwe ukuta vikwibungulila pa idzi, dze alongile, neke baho avalongelage atigilage: dzikuvakangavika idzi?
62Apo lino mulagita ndavuli, ngana mwali muvone umwâna va tnunu ikwinuka ipilukila kuko, kwe ali pamwandi? 3, 13.
63Umwene je Mubepo, je ipela uvûmi, neke ijene ińama ja muvili jisivumbulila kinu. Neke lino amadzwi, ge ndivalongye unene, je Mubepo, vwe vûmi vuvo. 2. Kol. 3, 6.
64Ulwene povali avangì ndevye muvelye vuli, avasifuvwa. Avwene Jesu avadzelelye ṅani gu mwingilo avasamufuvwaga na ju muńa-kumusutula amudzelelye ṅani. 13, 11.
65Neke atigilage: lwe lwene lwe ndilongile nigye: ilemwa ukwadza ukwangu, je asipelilwe kwa dâda. v. 44.
66Dze dzene dze vāpilukilye avolofu avańigendwa vakwe neke vatane ukugendasa nave kangi.
67Neke baho Jesu avavudzage avańikyumi navavili neke atigilage: musisakula ukuhega najuńeńe?
68Neke apilusage Simono Petele neke atigilage: ve mutw’ave, tuhelelage kwa nani? Vwi nago juve amadzwi aga vûmi vwa mbêpali. v. 63.
69Neke tukufuvilwe tukuvwene ukuta vwi mwîmike va Nguluvi. 1, 49; 11, 27; Mat. 16, 16.
70Neke apilusage Jesu neke atigilage: sindavahalile june muli vańikyumi navavili? Neke uńeńe ndevye mugenda vuli ujungi Setano.
71Aselengaga je Juda, umwa-Simono, u-Isikalyoto; avwene ali je muńa-kumusutula ulwa mbele, je ali va pikyumi navavili.
Selectat acum:
Johana 6: II
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
New Testament in Bena © Bible Society of Tanzania, 1958.
