Johana 17
17
1Dze dzene dze alonga ga Jesu neke baho inamulilage amîho gakwe kukyâńa neke atigilage: ve dâda, jifikile isala. Umudzusage mu-ńa-ndolo umuswamuvo, na ju muswamuvo nave ukuta akudzusage vwi muńa-ndolo na juve.
2Ndevye umugotolye uvutavulilwe vwa pańama ja muvili jonda, ulwa kuta avapelage uvûmi vwa mbêpali vonda, ve umupelye. Mat. 11, 27.
3Neke lino uvwene uvûmi vwa mbêpali vwe uvu, ngana vakudzelye uveve, ukuta uli Nguluvi uva ndakyene juve, neke vamukagulage na je umutumile, u-Jesu Kilisiti. 1. Joh. 5, 20.
4Unene ndikudzusidze muńa-ndolo mu-ńi muno, ndimalile namalimo, ge umelye uveve, ge utigye ndilimage.
5Neke lino, ve dâda, najuve undzusage muńa-ndolo ukwako kuko, indolo dze ndali nadzo, pe ndili ku kwako kuko, pe jisina jigavwa na ji ńi jonda. v. 24; 1, 1; Fil. 2, 6.
6Ndivasīkulye ilitavwa lyako avanu, ve umelye, avabagule ku-ńi kuno. Vali vako, neke lino umelye unene. Neke avene ilidzwi lyako valigendye. v. 9.
7Neke lino valudzelye nukuta fyonda fi fivedzaga, fye umelye uveve, fihumile ukwako.
8Pakuva na dzi nôngwa, dze vwamelye unene, ndigotwe kuvene, neke avene vadzanukye; neke valudzelye ndakyene nulwa kuta ndihumile ukwako neke valufūvilwe ulwa kuta unumile uveve. 16, 30.
9Unene ndikuvańilikila vavo, sindikujińilikila ińi, hamu, ndikuvańilikila vavo, ve umelye uveve, pakuva vako juve. 6, 37. 44.
10Neke fyonda ifyangu fyako juve, fyonda nifyako fyangu june; neke ndidzukye muńa-ndolo muvene. 16, 15.
11Ndilumalile ulwa kuva mu-ńi iji, avene vali va mu-ńi iji, neke unene ndikwadza ukwako. Ve dâda, ve mwîmike, uvakŏlēte-hedzage mwitavwa lyako, lye umelye unene, ukuta vavedzage ńalumwinga, ndevye tuli ńalumwinga najufwe. 10, 30.
12Pe ndali navo mu-ńi muno, apo ndavakŏlēte-hedzaga june mwitavwa lyako, lye vwamelye uveve, ndivalindile, neke asijagile umujanavo ujungi, ju mwâna va lwanangiko mwene, ukuta dzivilatukage idzandikwe pahâte. 6, 39.
13Neke lino unene ndikwadza ukwako, neke idzi ndilonga mu-ńi muno, ukuta ulukelo lwangu vavedzage nalo, ulupedzidze umwanavo. 15, 11.
14Unene ndivagotolye ilidzwi lyako, neke baho ińi jivasulage, pakuva avene vasili va mu-ńi iji, ndevye najune sindili va mu-ńi iji. 15, 19.
15Lwe ndińilika sinditigila: uvahedzage ku-ńi kuno, hamu, nditigila: uvakengelage kuvuhaluka. 2. Tes. 3, 3.
16Avene vasili va mu-ńi iji, ndevye najune sindili va mu-ńi iji.
17Uvahambusage vîmike muvwa ndakyene vwako; ilidzwi lyako vwe vwa ndakyene vuvo. 6, 63.
18Ndevye unumile unene ku-ńi kuno, najune ndivatumile ku-ńi jijo. 20, 21.
19Ndikwijelulilila june kuvene, navo ukuta vavedzage vêlulile muvwa ndakyene. Heb. 10, 10.
20Neke lino sindikuvańilikila vavo vene, hamu, ndikuvańilikila navalafūvwa ukwangu palidzwi lyanavo,
21ukuta vonda vavedzage ńalumwinga, ndevye najuve, ve dâda, uli umwangu unene, najune ndili umwako juve, navo ukuta vavedzage umwesu unefwe, ukuta na ji ńi jifuvwage, ukuta unumile uveve. Gal. 3, 28.
22Neke na dzi ndolo, dze vwamelye unene, nadzo ndivatavulye va vene, ukuta navo vavedzage ńalumwinga, ndevye najufwe tuli ńalumwinga. Apos. 4, 32.
23Unene ndivedzage umwanavo vavo, kangi uveve uvedzage umwangu unene, ukuta vavedzage vipedzidze kuluńa-lumwinga, ukuta na ji ńi jilukagulage, ukuta unumile juve, nukuvenda uvendile avene, ndevye undzendile june. 1. Kol. 6, 17.
24Ve dâda, avene vonda, ve umelye juve, nditigila vavedzage nanene konda, kwe ndivedza unene, ukuta vadzilavage indolo dzangu, dze umelye uveve, pakuva vwandzendile, pe jave nukugavwa ińi. 12, 26.
25Ve dâda, ve mugolofu, najo ińi jisikudzelye ponu, neke unene ndikudzelye, na vava ava navo valudzelye ukuta unumile juve.
26Ndivavulanidze ilitavwa lyako, kangi ndiku-vavulanidzaga ndesi, ukuta uvwênde, vwe vwandzendelaga, vuvedzage umwanavo, ukuta najune ndivedzage umwanavo.
Selectat acum:
Johana 17: II
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
New Testament in Bena © Bible Society of Tanzania, 1958.
