Tobit 11
11
Tobías mi' sujtel ti iyotot itat
1Che' läk'älix woli ik'otelob majlel ti tejklum Caserín läk'älbä añ ti Nínive, Rafael tsa' kaji isu'beñ jiñi Tobías:
2—Awujil bajche' wokol tsa' lak käyä jiñi atat. 3La' majlikoñla ti ñaxañ cha'añ mi lak chajpäñ jiñi otot che' maxto k'otem jiñi awijñam yik'ot jiñi yaño'bä. Che'eñ jiñi Rafael.
4Jiñi ángel yik'ot Tobías ñaxañ tsa' majliyob. Rafael tsi' su'be Tobías cha'añ yom wäñ añix ti ak'äb ich'aj jiñi chäy. Jiñi ts'i' tsäktsäkña tsa' majli ti ipat icha'tiklelob.
5Ti jiñbä k'iñ, ya' buchul jiñi Ana woli ichäñ k'el jiñi bijlel baki mi' kaj itilel iyalobil. 6Che'bä tsi' ike'le iyalobil, k'ax tijikña ipusik'al, tsi' isu'be iñoxi'al:
—¡Ixix tilel awalobil temel yik'ot jiñi wiñik tsa'bä majli yik'ot!
7Che'bä woliyobto ti xämbal majlel ti yotot itat, jiñi Rafael tsa' kaji isu'beñ:
—Tobías, wäle mik su'beñet cha'añ jiñi atat mi' kaj icha' k'otel iwut. 8Yom mi abombeñ iwut ti ich'aj jiñi chäy cha'añ mi' ilok'el isujl ya'bä añ ti' malil iwut, ya'i mi ikajel ik'otel iwut cha'añ mi' k'el isäklel pañämil jiñi atat.
9x-Ana tsi' bäñ mek'e iyalobil, tsi' yälä:
—¡Kalobil tsa'ix to kcha' k'eleyet, uts'at muk'ix kmejlel ti chämel!
Che' jiñi tsa' kaji ti uk'el.
10Jiñi Tobit xiti kotol tsa' ch'ojyi, tsa' k'oti ya' ti ti' pat yotot. 11Tobías tsa' majli ti ajñel ba'añ itat, ya'i tsi' bäñ mek'e, tsi' wujtäbe iwut, tsi' ibombe ich'aj chäy, tsi' isu'be:
—Ktat yom ma' tijikñesañ apusik'al.
12Ti' icha'ts'ijtlel ik'äb tsa' kaji ilok'säbeñ itokalel iwut. 13Che' jiñi Tobit tsi' mek'e iyalobil, tsa' uk'i, tsi' isu'be:
—¡Kalobil, ikäk'aletbä kwut, wolix kcha' k'elet!
14Ya'i tsi' ich'ujutesa Lak Yum, yik'ot ili t'añ:
«Ch'ujuläch jiñi Lak Ch'ujutat
Ch'ujuläch jiñi iK'aba'.
Ch'ujuläch ti' pejtelel iyángelob.
Mi ik'äyiñtel iñuklel ik'aba' ti' pejtelel k'iñ.
Cha'añ tsi' iyäk'äyoñ ti wokol,
ya'i tsi' icha' p'uñtayoñ.
Wäle wolix kcha' k'el kalobil Tobías».
15Awilañ, Tobías tijikña tsa' ochi majlel ti yotot, ti k'ambä t'añ tsi' ich'ujutesa Lak Yum. Ti wi'il tsi' isu'be itat bajche' tsa' koltäñti ti Lak Yum ti' pejtelel ixämbal, yik'ot bajche' tsa' mejli itaj jiñi tak'iñ, yik'ot bajche' tsi' ipäyä jiñi Sara cha'añ iyijñam, iyixik'al jiñi Ragüel. Läk'älix woli itilel jiñi Sara ti ti' jiñi ts'ajk ya' ti Nínive.
16Tobit tijikñajax ipusik'al tsa' kaji ich'ujutesañ Lak Yum, tsa' majli itaj tilel iyä'lib wolibä iyochel tilel ti ti' jiñi tejklum Nínive. Pejtelel jiñi wiñikob x-ixikob chumulo'bä ya' ti Nínive tsa' toj sajtiyob ipusik'al cha'añ woli ik'elob jiñi Tobit che' muk'ix ti bajñel xämbal, cha'añ ma'añix majki woli ichäñ chuk majlel. Jiñi Tobit tsa' kaji isu'beñ bajche' tsa' koltäñti ti' tojlel Lak Yum, cha'an tsi' iyäk'ä ik'uxbiya ti' tojlel yik'ot bajche' tsi' k'ok'esäbe iwut. 17Che' tsi' ik'ele iyä'lib, tsi' ich'ujutesa, tsi' isu'be:
«¡Kixik'al, ch'ujul Lak Yum tsa'bä ipäyäyet tilel ba'añoñ lojoñ! ¡Ch'ujul jiñi atat, ch'ujul jiñi kalobil Tobías yik'ot ch'ujuletäch jatet!
»¡Tijikña ajulel, ili jiñäch awotot! ¡Jiñi ich'ujutesäñtel yik'ot itijikñäyel Lak Yum la' ajñik awik'ot ti' pejtelel k'iñ!»
18Pejtelel jiñi judiojob ya'bä chumulob ti Nínive tsi' meleyob kolem k'iñijel. 19Che' ja'el jiñi Ajicar yik'ot Nadab, iyichak'ob Tobit, tsa' majliyob its'äktesabeñob itijikñäyel.
Selectat acum:
Tobit 11: CholDc
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Biblia Chol de estudio con DC- Derechos reservados por SBM