Génesis 5
5
Adão ya da quiti jira ahri
1Cohamacʉ to wahma bajuamehneriro Adão ya da quiti jira ahri. Tiro Adãore bajuamehneno, to yoaro seheta jia tihtirore bajuamehneha. 2Mʉnore, numino cʉ̃hʉre bajuamehneha. Tinare bajuamehne tuhsʉ,
—Ahrinare noano wahajaro —ni cũha.
To bajuamehneri dachoihta tinare,
—“Masa” wama tijaro ahrina —niha tiro.
3Ã yoa Adão 130 cʉhmari to cjʉachʉ waro, to macʉno masa bajua tiha, Sete cjihto. Tiro to pʉcʉro yoaro seheta jia tiriro jiha. 4To macʉno Sete bajuari baharo, Adão sehe 800 cʉhmari cati namo, paina mʉa, numiare pohna ti namoha. 5Jipihtiro 930 cʉhmari cjʉaro, yariaa wahaha.
6Ã yoa Sete 105 cʉhmari to cjʉachʉ waro, to macʉno Enoso cjihto masa bajuaha. 7To masa bajuari baharo, Sete sehe 807 cʉhmari cati namo, paina mʉa, numiare pohna ti namoha. 8Jipihtiro 912 cʉhmari cjʉaro waro, yariaa wahaha.
9Ã yoa tiro Enoso 90 cʉhmari to cjʉachʉ waro, to macʉno Cainã cjihto masa bajuaha. 10To masa bajuari baharo, Enoso sehe 815 cʉhmari cati namo, paina mʉa, numiare pohna ti namoha. 11Jipihtiro 905 cʉhmari cjʉaro waro, yariaa wahaha.
12Ã yoa tiro Cainã 70 cʉhmari to cjʉachʉ waro, to macʉno Mahalale cjihto masa bajuaha. 13To masa bajuari baharo, Cainã sehe 840 cʉhmari cati namo, paina mʉa, numiare pohna ti namoha. 14Jipihtiro 910 cʉhmari cjʉaro waro, yariaa wahaha.
15Ã yoa tiro Mahalale 65 cʉhmari to cjʉachʉ waro, to macʉno Jére cjihto masa bajuaha. 16To masa bajuari baharo, tiro Mahalale sehe 830 cʉhmari cati namo, paina mʉa, numiare pohna ti namoha. 17Jipihtiro 895 cʉhmari cjʉaro waro, yariaa wahaha.
18Ã yoa tiro Jére 162 cʉhmari to cjʉachʉ waro, to macʉno Enoco cjihto masa bajuaha. 19To masa bajuari baharo, Jére sehe 800 cʉhmari cati namo, paina mʉa, numiare pohna ti namoha. 20Jipihtiro 962 cʉhmari cjʉaro waro, yariaa wahaha.
21Ã yoa tiro Enoco 65 cʉhmari to cjʉachʉ waro, to macʉno Matusalẽ cjihto masa bajuaha. 22Tiro Enoco sehe Cohamacʉ to cahmano sehere “Potocãta jira” ni, yoaa tiha. Ã jiro Cohamacʉ tirore ñʉ ji coaha. Ã yoa to macʉno Matusalẽ masa bajuari baharo, tiro 300 cʉhmari cati namo, paina mʉa, numiare pohna ti namoha. 23Jipihtiro 365 cʉhmari waro catiha tiro. 24Cohamacʉ to ji coaro seheta ahri yahpai jia tiha. Cʉ̃ nʉmʉ catirirore Cohamacʉ to naa wahachʉ, wacũeno butia wahaha tiro.
25Ã yoa Matusalẽ Cohamacʉ naariro macʉno 187 cʉhmari to cjʉachʉ waro, to macʉno Láme cjihto masa bajuaha. 26To masa bajuari baharore, Matusalẽ sehe 782 cʉhmari waro cati namo, paina mʉa, numiare pohna ti namoha. 27Jipihtiro 969 cʉhmari cjʉaro waro, yariaa wahaha.
28Ã yoa Láme 182 cʉhmari to cjʉachʉ waro, to macʉno cjihto masa bajuaha. 29To macʉnocãre “Noé” ni, wama pisuha, masa sochʉ yoahtiro to jichʉ masino. Ã jiro wihãriro Noé to dohse jia tihtire õ sehe ni yahu cũha to pʉcʉro Láme:
—Dóipʉta ahri yahpai jiina ti yʉhdʉrʉcari buhiri Yawe tuaro dahrachʉ yoa dutimaha mari jipihtina masare. Ã jina mari chʉhtire tuaro mari dahraa mehne bocaro cahmana. Wiho mejeta ahriro nijinocã marine tíre sochʉ yoarohca —ni cũha. (“Noé” nino, “sochʉ yoariro” nino, ahri pʉa wama cʉ̃no sehe bo cure bisica hebreo masa ya dʉsero mehne)
30Noé masa bajuari baharore, Láme sehe 595 cʉhmari cati namo, paina mʉa, numiare pohna ti namoha. 31Ã yoa jipihtiro 777 cʉhmari cjʉaro waro, yariaa wahaha.
32Ã yoa tiro Noé sehe 500 cʉhmari cjʉaro waro, ahrina tiaro mʉare pohna tiha. Sẽ, Cã, Jafe wama tiinare Noé pohna tiha.
Selectat acum:
Génesis 5: GVC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO