मत्ती 3

यूहन्ना पवित्र शनान देने आला

1उनै दिनें च यूहन्ना पवित्रशनांन देने आला आईयै यहूदीया दे जंगल च ए परचार करना लगया; 2“मने गी फेरो, किके सोर्ग दा राज कोल आई गेदा ऐ।” 3ए उवै जेसदी चर्चा यशायाह पविखवक्ता थमां कित्ती गेई;

“जंगल च एक आले देने आले दी बाज आवा दी ऐ,

के प्रभु दा रस्ता त्यार करो, ओसदी सेड़क सीधी बनाओ।”

4एस यूहन्ना ने ऊंट दे बालैं दे कपड़े पाएदे हे, ते लक च चमें दा टोटा बन्ने दा हा। ओसदी रुट्टी त्रिडियां ते जंगली मखीर हा। 5ओस बेलै यरूशलेम ते सारे यहूदीया, ते यरदन दे आले दूआले दे सब लोक ओदे कोल चली आए। 6उनै अपने-अपने पापें गी मनियै यरदन नदी च ओस थमां पवित्रशनांन लेता।

7जेलै ओसने मते सारे फरीसियें ते सदूकियें गी पवित्रशनांन लेने आसतै अपने कोल औंदे दिखया, तां उनेंगी आखया, “ए सप दे बचयो, तुसेंगी ए गल्ल कोसनें आखी के औने आले कैर थमां नस्सो? 8एस आसतै मन फराने दे योग फल अनो; 9ते अपने-अपने मने च ए नेई सोचो के साड़ा पिता अब्राहम ऐ; किके आऊँ थुआड़े कन्ने आखना ऐ के परमेसर इनें पत्त्थरें थमां अब्राहम आसतै औलाद पैदा करी सकदा ऐ। 10ते ओनें कुआडी बूट्टें दी जड़ उपर रखी दी ऐ, एसकरी जेका-जेका बूट्टा छैल फल नेई दिंदा, ओ बढ़या ते अग्ग बेच सुटया जाग।

11“आऊँ तां पानी कन्ने तुसेंगी मन फेरने दा पवित्रशनांन दिनां ऐ, लेकन जेड़ा मेरे बाद औने आला ऐ, ओ मेरे कोलां जादै शक्ति आला ऐ; आऊँ तां ओदी नोक्क चुकने दे योग नेई; ओ ते तुसेंगी पवित्र आत्मा ते अग्गी कन्ने पवित्रशनांन देग। 12ओसदा शज ओदे अथ्थ बेच ऐ, ते ओ अपने खलाड़े गी छैल करियै साफ़ करग, ते अपनी कनक गी पंढे च किट्ठा करग, पर पोह गी ओस अग्गी च जाली देग जेड़ी कदें ईस्लग नेई।”

13ओस बेलै यीशु गलील जिले थमां यरदन दे कंडै यूहन्ना दे कोल ओदे कोलां पवित्रशनांन लेने आसतै आया। 14लेकन यूहन्ना ए आखीयै उसी रोकना लगया, “मिकी तेरे अथ्थ दा पवित्रशनांन लेने दी जरुरत ऐ, ते तू मेरे कोल आया ऐ?” 15यीशु ने उसी ए जबाब दिता, “ऊन तां इयै गै ओना दे, किके साड़े बासतै एस रीति कन्ने सारी तार्मिकता गी पूरा करना ठीक ऐ।” ओस बेलै ओसने ओदी गल्ल मनी लेती। 16ते यीशु पवित्रशनांन लेईयै चट पानीयें चा उपर आया, ते ओस आसतै अम्बर खुली गीया, ते ओसने परमेसर दी आत्मा गी कबूतर आला लेखा उतरदे ते अपने उपर ओदे दिखया। 17ऐ अकाशवाणी ओई; “ऐ मेरा प्यारा पुत्तर ऐ, जेस उपर आऊँ मता गै खोश ऐं।”

Selectat acum:

मत्ती 3: DOG

Evidențiere

Împărtășește

Copiază