MATIUS 9
9
Nonga Heimoknya Hwebok Yuba
(Mrk. 2:1-12; Luk. 5:17-26)
1Yesus ara onoʾ mek ekla bunaʾ ak welewoka bukoka dara, onsok alja heikek sam yok. 2Heik enyek anara, nimi ben hnon esonaʾ adya yangawoka bo yeilimek. Bo yeilimek nim edya dib senenaʾ ara, Yesus adya eiyisuk dara, alda neiknaʾanya bek, ”Najab o, or anja ganya hekgulul! Anja malya unaʾ era seleb anak ab memenggen bar!” hyok.
3Dara, Yahudi yuba neksin nang anyagan ulumek nim edya dara, ”Ban benera Imik Neyung si malya nenelamla,” hyek. 4Yesus ara sikja ganya seininaʾ era seleb ella ubsuk dara sikenek, ”Ugunda hekasa malya ganya ek seinilelum do? 5Wera har nerek pe yongona lebnesom: Malya unaʾ seleb memenggen, anaʾ ak gom, Sekoka balom, an danyek gom? 6Bok wenyek dara, nimi dibaʾ me aldib soko dubuk an ara, nim adya malya unaʾ sikenek ab sobaʾ memelesil ulumla geknebaʾ ara, wen laga unuwanamna,” hyok. Dara onoʾ Yesus ara nonga heimoknya bek, ”Anda sekoka, anja esonaʾ doboka bobmenekanya, anja ek bilom!” hyok. 7Dara nonga heimokaʾ anyek hweboknya bera, alda sekoka alja ek sam byuk. 8Wera Imik Neyung adyaʾ senenggom migib era, nim ek seleb elegosukaʾ anasa leboka, nimi nidyaʾ ban unumokaʾ anyek eibek nim edya dara, ganya lok uboka Imik Neyung ak gigilemek.
top Yesus Ara Matius Bek Ebok Yuba
9Wera Yesus ara anyaganyebaʾ ara loboka byuk. Wera anam balamok salek, nimi ben hnon alda rupiah mok soko amba molowoka dolosuknya, alja si nera Matius, alja wa wen ek sam bulumokaʾ ak eibuk. Dara Yesus adya alak, ”Anda nak diriga yalom!” hyok. Dara Matius bera sekoka, Yesus ak dobol byuk.
10 #
Luk. 15:1-2
Wera Yesus ara Matius bedyaʾ ek sam anam bukoka delemok salek, nimi nauba rupiah mok soko amba molowoka dolomek nang eb, nimi heik yokaʾ dam nang edya malya nang senelesik nang eb, Yesus alja yuba doro diriga ban nang eb, neikaʾ bukoka delemek. 11Dara Parisi nang edya ban unulumekaʾ ak eibsik. Anya sikja Yesus alja yuba doro diriga ban nang ek, ”Hekasa ugunjaʾ neklesilnya beb, mok soko amba leboka rupiah molowoka dosin nang eb, nim adya malya senelesak nang eb neikaʾ bukoka delemak do?” wenyaboka heibsik. 12Dara Yesus adya sikja heibsik yuba keboka, sikenek saaboka lebsukaʾ ara, ”Nimi eikaʾ ulumak nim ek dara, hwenaʾ nanga hwebneseng senenggulumak bok, neiknaʾ nim ek danyek, hwebneseng senelemak. 13#Hos. 6:6; Mat. 12:7Ugunda ban yub enera hekasa lero momnya dobokaʾ anyek seiniwoka einiwanalum: Nara pam unuruwaʾ oboka gibil yangganaʾ ak perob senenggulumna bok, alda angoo yadyek senen ganya ek perob senelamna. Anasa nara nimi seleb pe ulumab senelemak nim ek youbsununaʾ aboka yanggumsa bok, alda nimi nara malya nanga seneldalamak nang enyek, youbsununaʾ aboka yeilimsa,” hyok.
Imik Neyung Amba Gwaneng Lonaʾ Amba Yuba
(Mrk. 2:18-22; Luk. 5:33-39)
14Nen seleb dara, Yohanes Pembaptis bedya yuba donaʾ nang era Yesus ak yek. Dara sikja Yesus ak, ”Nub Parisi nim eb dara, Imik Neyung amba gwaneng loboka giblemab bok, hekasa anja yuba doro diriga ban nang era lolomak do?” aboka heibek. 15Anasa Yesus adya sikenek, ”Ugunja dara, hekaʾ senelum do? Nimi ben hnon gela dosonya benyek, or anam ulusobok dara, nimi masa delemnemab aboka yeiliseng nim era solom ganya bobneseng de? Hyak unuwanggunuseng! Bok gela dobnelanya bera sik gangganek loboka bo binimla sum ok, wera sikda Imik Neyung amba gwanenga lobnemak. 16Nimi hnon youmaʾ akleng ek sam wenyok akleng gweldekdobaʾ edya denewoka winggulumak. Unuwaneseng dara, wenyok gweldekdobaʾ edya youmaʾ akleng ab nauba so gweldeganamso dara, malya so danamso. 17Anasonya neikek, wenyok anggur mek era, youmaʾ malya goub ak gweboka bonggulumak. Anaso unuwaneseng dara, goub era joboka anggur mek ara yek weiningganeseng. Anasa wenyok anggur mek era, onoʾ al wenyok goub ak sam gweboka bolomak, dara penya-penya pe ulurak,” hyok.
Imik Neyung E Bo Unya Bedya Gelma Hwebok Yuba
(Mrk. 5:21-43; Luk. 8:40-56)
18Wera Yesus ara anam wenyaboka lelesuk salek, nimi ben hnon Imik Neyung e bo ulumoknya Yesus ak yok. Bera Yesus adyaʾ saramek sam koma lumugoka lebokaʾ ara, ”Nadya gelma era wene salek hyak dib somogal. Bok neyung anda yeindeboka anja soruka salal yabamen enyek, merewanamlaʾ bar,” hyok. 19Dara Yesus ara sekoka, alja yuba doro diriga ban nang eb, benyeb neikaʾ byik.
20-21Wera pikek anam balamek salek, gela hnon neik ek dangamok salek era, gibnaʾ obadya lemok gel gek Yesus adyaʾ weilik berem oka yookanya, alja akleng ak mekaʾ salawok. Wera gel genedya dara, ”Nara Yesus adyaʾ akleng ek mekaʾ ok bebeganamnaʾ anaba merewanamna,” senewoka seiniwok. 22Dara ban salek enyek, Yesus ara gel genyek saaboka keeboka, ”Najaba gel o, anda ganya siklewoka ublom! Anda dib senewanalemaʾ adya, anda seleb merelam!” hyok. Dara wene sab-sab gel gera gobdo merewok.
23Wera Yesus ara balamokaʾ ara, Imik Neyung e bo unya bedyaʾ ek byuk. Wera benggong yub ab, nimi nauba yuba iriri alamek ak eibsuk dara, 24sikenek lebsukaʾ ara, ”Ugunda nidyaʾ goboka yibilulum! Ban gelma enera somoganggumla bok, alda hogung dem ok mamla,” hyok. Dara sikda Yesus ak nauba okseb goluwek.
25Wera nimi nidyaʾ ara seleb goboka beiyik yibek dara, Yesus ara e lomok wekoka, gelma enedyaʾ soruka salawok. Dara gelma era embengaʾ bukok. 26Dara unuwal an yub era mok soko me nidyaʾ oboka lelewok.
Heng Lum Nanga Penya Hwebsuk Yuba
27Wera onoʾ Yesus ara anyaganyebaʾ goboka bok dara, nimi penya heng lum nang moumenaʾ eimik dobdo birik. Dara penya nang enedya dara, ”Wei, Daud mamnya o, nuk angoo yadyek senewoka araweisiya!” aboka lebdek. 28Yesus ara ek wekel yabok salek, penya heng lum nang dara, onoʾ anyagan yarek. Dara Yesus adya sikenek, ”Ugunja dara, aldib nunda alja dib hwebnesil senerum de?” aboka heibsuk. Wenyek sikja, ”Nunda al alja dib hwebnesil senenam,” herek. 29Dara Yesus adya sik penya nang edya heng ek soruka diyiboka, ”Ugunda nak dib senenurumaʾ sok, wera ugunuk anaso dosulul,” hyok. 30Wera sik penya nang dara, henga gwelegoka eibdek. Dara Yesus adya sikenek, nunda unu hwebsil aboka yok nim ek salyaʾ nekdo yabanaʾ ara hyak mem aboka yuba sekok. 31Bok, sik penya nang edya dara, wera nunda unu hwebsil aboka mok soko me nidyaʾ wenyab girigarek.
Bisaʾ Gologomoknya Hwebok Yuba
32Wera onoʾ heng lum nang moumenaʾ era seleb barek dara, lunuwoka bisaʾ gologoka yuba sanggulumoknya hnon Yesus ak bo yek. 33Dara Yesus adya bisaʾ era yakoka hwebok dara, bera wene sab-sab merewoka yuba sabok. Dara nimi nauba loka daboka lelemekaʾ ara, ”Nunda Israeli sokok ara, anasonya nera hnon mekaʾ eibnenggumouba!” alamek. 34#Mat. 10:25, 12:24; Mrk. 3:22; Luk. 11:15Bok Parisi nim edya dara, ”Bisaʾ ganya yamaʾ dubnya bedya, bisaʾ gologoka yaklamla,” aboka lelemek.
Yesus Ara Nimi Nauba Ulumekaʾ Ak Yadyek Ubok Yuba
35 #
Mat. 4:23; Mrk. 1:39; Luk. 4:44 Wera Yesus ara nauba heikek bini, mek heikek bini, hnon heikek ebaʾ ara, onoʾ yok heikek bini ura yabalamok. Alda Yahudi nim edya yuba don e pik Imik Neyung adyaʾ perob yuba leb elegoka, hnonda Imik Neyung adya eimik wenewanasilaʾ anyek perob yuba neklesuk. Dara onoʾ hnonda nonga malya ura balasuknya neb, yok-yok neiknaʾ salalesuknya nera nauba hwelesuk. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34Nimi ganya hmeng uboka, ganya eb menegoka, bo usin nang orokaʾ anasoʾ ak eibuk dara, alda angoo yadyek senewousuk. 37#Luk. 10:2Dara Yesus adya alja yuba doro diriga ban nang ek, ”Gwaneng liʾ ara, nauba ululabok, nonga yongon nang ek dara, mekaʾ ulumak. 38Anasa wa damnya bek, gwaneng nonga yongon nanga bokol yousululaʾ aboka, mololelulum,” hyok.
Selectat acum:
MATIUS 9: LAINLC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
