MATÌÙT 2
2
It ap hesagal ineileken wolok wagaukwa wene
1At Yesùt a'nogo, o propinsi Yurea o Pe'lehem ta'lagaike. Ta'lagaike atem higit he, o atoma kain etagepogot he, ap etage Herotet atì welagaike. Were'ma re, it ap ina'la kagalek mene hesagal hùthìkì lagaukwa mene aike o mo eroma nen yegelogo lagai wagarek a'loma higit en o Yerusalem wagaukwa. 2Wagaukwasik, it en he, mel isukwa:
“Apùnì Yahurì mene inoe kain Etagepogot ta'lagasik werek a'naga, o kì ta'lagasik werek. Nit o mo yegelogo lagai wagarek a'loma were'ma, ap kain atì ta'lagama ìlùk, hesagal aike weinam agama re, at atì ninetaùken oba hìpìrethìlìk hogorasuogolùk hesagal atì nineileken nen wolok hinok wani wago,” ilùk isukwa. 3Isukwama re, at kain Herotet atì asuk holhìkesik he, at mel, apùnì o Yerusalem welagaukwa mene mel, ina'maken apik lagaike. 4Ina'maken apik lagaikesik he, at kain Herotet a'nogo nen he, it ap Ala esewerek inogogì kaintek mel, Ala ane helal waganek esewerek mene mel, omakìma atogorogo hisasikesik he,
“At Karìsut atì, hit en he, o koma ta'lasigin ìlùk ìkì lagep nogo,” ìlùk hinok wanhike. 5Hinok wanhikomo re, it en he,
“O Pe'lehem propinsi Yurea a'lomaat o. A'loma ta'lasigin, ìlùk, it ap Ala ane yogoisìkì lagaukwa mene aike nen ìkì logolìk he,
6 #
Mi.5:2
Hit apùnì o Yurea o kota Pe'lehem welagasep mene yì sanì! O kota he'nakìt yoma etage werek kolegat he, o Pe'lehem yì nek he, etage lek, abelma negen, ìlùk usak lek. An nagainapùrì Isirael mene ap kain mene awe a'ma logogun atì, o sili hit were'ma yoma hinekele'ma nenat ta'lasìgìn o,
ìlùk helal waganogo hesikomo werek o,” isukwa. 7Isukwama re, at Herotet a'nogo nen he, it ap hesagal hùthìlìk ineileken nen wolok wagaukwa mene amanogo hinagasogo wogisek lìlìk, mel yogoisasike:
“Hesagal atì mera nen weinam aga. Sekek hogo yogone'ni,” ìlùk hinok inoba hobuk wanhìke. 8Wanhikomo it en he,
“Tì'nogo,” ìlùk yogosukwama re, at en he,
“Halok he, hit o Pe'lehem atoma lani o. Lìlìk he, omalik ta'lagasik werek atì hanorogo hera'no. Nen, arat heratep halok he, hobuk an netaùken at oba hìpìrethìlìk hogorasi lak en yogonesi we'no,” ìlùk yogoisasike. 9Yogoisasikomo re, inasuk holìlùk, hesagal o mo eroma nen yegelogo lagai wagarek atoma weinam agaikomo ineileken hasukwa mene a'nogo alep laga kolek he, opolik ineileken nen wolok lagaukwa. Ineileken nen wolok lagaukwa lagaukwa re, hesagal a'nogo omalik ta'lagaike ba higit hogo asi lìlìk he, arat kamo isike. 10Atì'nogo kamo isikomo it amanogo hesagal a'nogo ineileken hasukwasik he, ina'la hai apik hakasukwa. 11Ina'la hai apik hakìlìk ouma kisukwa re, omalik a'nogo agosa Marìa agoumo were'ma ineileken hìlìk, ineitep awì yagasogo hogorasukwa. Hogoratì logolìk he, oko hùko hano mene emas mel, kemenyan kamì apen hùke atì mel, e mur amusu mel, yegelogo wogosukwa. 12Wogosukwasik nogo ikenem at Ala nen he,
“Hit hobuk hinapotkwe Herotet oba lagùp,” ìlùk hùsipi negen yogoisasikomo inabì halùk he, kwe hùnogokwe nen inaua lagaukwa.
Yesùt tago wolok hese o Mesit lagaike wene
13It ap hesagal ineileken nen wolok wagaukwa mene amanogo arat lagaukwama re, hùako at Yùsùp nogo ikenem malaikat pogot oba nen wagaikesik he, abì ba mel yogosike:
“Yùsùp. Hat he, omalik tago arì agosa eperagat wogisek, o Mesit atoma hese lan o. Lìlìk he, atomaat logoino. Were'ma, an nen yogohetì halogat we'no. At kain Herotet a'nogo nen omalik tago arì wasigìlùk ìlì'logo o,” ìlùk yogosikomo abì hasike. 14Abì halùk eluk agaikesik he, hùakoat omalik ketago a'nogo agosa eperak wogisek o Mesit lagaike. 15#Hos.1:1 Lagaikesik, o atoma motok welagaike. Were'ma, at kain Herotet a'nogo ebe wa'lagaikomo nen wagaike. Atì hagasike atì re, it ap Ala ane yogoisìkì lagaukwa mene aike nen he,
“An naput o Mesit atoma nen wesuagalùk waesìgìn o,”
ìlùk Ala nen isikomo helal waganogo hesike atì higit hogoat haga'lasuagalùk hagasike atì.
Omalik o Pe'lehem mene inoasukwa wene
16At kain Herotet a'nogo nen it ap wene warìsasike mene a'nogo,
“Wesugun a? Lek a,” ìlùk, yerìsek welagaike welagaike re, inebe legat en he,
“Lalnapama hìgì,” ìlùk a'mage apik lagasike. A'mage apik lagasikesik he,
“Omalik ketago mene o Pe'lehem atoma mene mel, o era'lukwe atoma mene mel, hùlì ap hesagal ineileken nen wolok wagaikasik,
Ti hùlì ba nen hogo, ìlùk sekek hogo yogoneta hùlì nen, umur 2 tahun mene mel, hobuk ta'larìk wagaika mene mel, ap hùgì obogat motok inoa'no,” ìlùk, agoromì laksasike. 17Atì'nogo haga'lagaike atì re, at Yeremia Ala ane yogoisìkì lagaike mene nen ìkì logolìk he:
18 #
Yer.31:15 “O Arama nen leku matenem ninasuk holhìk,
inane ngai-wai apik ikenem ninasuk holhìk, ogo.
At he Erahel eagwì inebe lek en inouak le apik aga logolìk,
Netaùken sebelusak lek. Nabìt. Le ago motok logogin,”
ìlùk isikomo helal waganogo hesike mene atì higit hogoat haga'lasuagalùk hagasukwa atì.
Yesùt tago wolok o Nasaret wagaike wene
19At kain Herotet a'nogo arat wa'lagaikomo re, malaikat Ala nen lakhei wagaikomo wagaikesik he, Yùsùp o Mesit atoma logolìk nogo ikenem hùako abì ba re, mel yogosike:
20“Yùsùp. Heluk ame o. Mela'lùk he, omalik tago arì agosa eperak wogisek o ap Isirael mene were'ma lan o. Omalik tago arì wasuogolùk ìkì lagaika a'nogo re, ebe arat wa'laga o,” ìlùk yogosike. 21Yogosikomo re, Yùsùp en omalik tago a'nogo agosa eperak wogisek he, ap Isirael mene were'ma wagaike. 22Wagaikomo re, it apùnì nen he,
“O propinsi Yurea amanogo hobuk ap kain he, etage Arikilaùt atì opase Herotet obùlù'mo menhagama werek o,” ìlùk isukwama, Yùsùp asuk holhìkesik he, o atoma lasak ayùk agaikesik were'ma, at Ala nen,
“O Yurea atoma lagùn o,” ìlùk, abì ba hùsipi yogosikomo, o Kalilea atomaat wagaike. 23Wagaikesik he, o kota etage Nasaret atì ki wagaikesik, atomaat kamo isike. Atì'nogo hagasike atì re, it ap Ala ane yogoisìkì lagaukwa mene nen ìkì logolìk,
“At ap a'nogo awì Nasaret mene ugun o,”
ìlùk isukwa higit hogoat haga'lagaike atì.
Selectat acum:
MATÌÙT 2: LAIDNI
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
