KEJADIAN 48
48
Nai Yakub anfe tetus neu Nai Efraim ma Nai Manasye
1Anbi leku fauk namuni onane hanaf nem neu Nai Yusuf nak in amaf namen anaek. Es nane te in anao nok in anah sin nua sin, esle' Nai Nai Manasye ma Nai Efraim sin ankiso Nai Yakub. 2Leku Nai Yakub in nen nak Nai Yusuf in nem, in nahelnon, oke te antok anbi in hala tupa. 3Nai Yakub nak neu Nai Yusuf nak, “Uisneno Akuasat Afin-finit In nalil'on nalali neu kau anbi Lus, anbi pah Kanaan, ma In anfe nalali kau tetus.” 4In namolok neu kau nak, “Au of umfauba ho sufam nane anfani uf namfau; Au of a'fe pah le i neu ho sufam anfani sin ini tal nabal-bal.”
5Nai Yakub namolok piut nak, “Yusuf, ho anah sin nua sin Nai Efraim ma Nai Manasye le nahonis sin anbi Mesir le i nahun na'ko au fe ka aum a'tia fa bale i, au kiso sin anfani au anah, namnes onle Nai Ruben ma Nai Simeon. 6Leka ho mupeni li'ana anteni, au of ka ubaina fa sin anfani on au anah mes sin anfani ho anah; bnak neu sin of sin ansimo na'ko Nai Efraim ma Nai Manasye. 7Au mo'e lasi nane amsa neu ho aina bi Rahel. Anbi lanan au fani aum u'ko Mesopotamia, ho aina anmate anbi pah Kanaan, ka na'lo fa na'ko Efrata, ma au nekak antu' nae le'uf. Au sub in anbi nane, anbi lanan in ninen anao neu Efrata.” (Tabu le i Efrata antek nak Betlehem.)
8Leka Nai Yakub ankiso nit Nai Yusuf in anah sin nane, in natoti nak, “Sekau in anah sin esle' i?”
9Nai Yusuf natae nak, “Le i au anah sin le Uisneno anfe sin neu kau, anbi pah Mesir, le i.” Nai Yakub nak, “Amhaumakab sin nem neu kau he au fe neu sin tetus.” 10Nai Yakub in ka nit fa nok alekot natuin in namnasi ma in matan sin nanipu amsa. Nai Yusuf anhaumakab li'ana sin nane neu Nai Yakub, ma in anho sin ma in anek sin. 11Oke te Nai Yakub nak neu Nai Yusuf nak, “Anbi au tenab au of ka u'eku teni oke ko fa, mes leku le i Uisneno anfe neu kau sona he au it ho anah sin amsa.” 12Namuni te Nai Yusuf naiti in anah sin na'ko Nai Yakub in aifan, oke te in anli'u anbi in amaf matan.
13-14Nalali onane te Nai Yusuf natokob in anah sin anhaumak Nai Yakub, Nai Efraim le akliko anbi aon bian a'li ma Nai Manasye le anael anbi aon bian a'ne'u. Mes Nai Yakub an aiksuli in niman ma in antao in niman ne'u neu Nai Efraim in nakan, ma in antao in niman a'li neu Nai Manasye in nakan. 15Nalali onane te in anfe tetus neu Nai Yusuf, nak,
“Uisneno, In le nane Uisneno kun, le' Nai Abraham ma Nai Ishak sin nabes neune.
In le nane es anpanat kau antia leku le i;
16In le nane ahake neno le nafetin nalali kau na'ko ale amle'ut.
So nati' Uisneno anfe tetus neu anah-anah le i.
So nati' natuin li'ana-li'ana le i au kanak ma Nai Abraham ma Nai Ishak sin kanan anpe' ma anao piut!
So nati' sin nasuf ma naka'un,
ma sin sufan nane anpe' ma nahenu pah pinan.”
17Nai Yusuf in nekan kan malin fa leka in ankiso in amaf antao in niman ne'u neu Nai Efraim in nakan; oke te in an na' in amaf in niman he nati' natnanib na'ko Nai Efraim in nakan neu Nai Manasye in nakan. 18In nak neu in Amaf nak, “Kaisa onane, Ama. Anmone nael esle' i; amtao Ama ho nimam ne'u neu in nakan.”
19Mes in Amaf antite, ma in nak, “Au uhin, au anah, au uhin. Nai Manasye in kuasat of anaek kun ma in sufan nane of anfani uf anaek. Mes in olif nane in kuasat of ahaek anesi na'ko in, ma in olif sufan nane of anfani uf-uf anaet ma abe'it.”
20Oke te in anfe anteni tetus neu li'ana-li'ana nane anbi neno nane, ma in nak, “Atoni Israel of antek ho kanam leka sin anfe tetus neu atoni bian. Sin of namolok nak, ‘So nati' Uisneno anmo'e ko on Nai Efraim ma Nai Manasye.” Nok nane te Nai Yakub in nahunun Nai Efraim na'ko Nai Manasye.
21Oke te Nai Yakub nak neu Nai Yusuf, nak, “Onle ho mit, au tabu maten anhaumak nalali, mes Uisneno of antuntaku ki ma neki ki amfani neu hi am uf sin pah. 22Neu ko, ma ka neu fa ho biaf sin, au fe ani Sikhem neu ko, pah maafa nane le au simo na'ko atoni Amori eki suni ma au as'anef.”
Selectat acum:
KEJADIAN 48: AOZ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te