MATEO 28
28
Jesosa shequi'yapoa emano'yo jaa
(Mc 16.1-8; Lc 24.1-12; Jn 20.1-10)
1Majoya aje ejomishocajji sábado epojja jjayejjequiajo domingo epojja jjapojjaquianijo mecajjeahuanei María Magdalena, pea María pea-ai poquiapoa meijjani baa. 2Ma mecajjeahuaneitiiya o poquianijotii meshi janobajjimanei huehuahuehuapoa Emeshimeseneija ángel Eyajje nequioqueapoajojoya meijjani jaahuasijje. Ohuaya meijjani jaahuasijje nequiñaquimajje mei-ai enaba cuiaca'ajji'ya nequiashiñacapoa. Majoya ángel mei-aibiajjetii anioqueapoa. 3Ángel queajeaja'anee aniapoa baasiyo jama. Oja yamijo ba'e oja daqui quea-osheneenee poa bo quea-oshenee jama. 4Ma meijjanijaahuanajji poani soldadocuana ángel queajeaja'anee quea-oshenee ani bamajje queametenee ponanapoa. Cacacacamajje emano'yo jayojja jaabichajeaquinanapoa cuana meshiyasijje o yajjajo. 5Majoya aje angelya ma beca epona jama huohuime acapoa ba'a: —¡A'a quiana oe queamete pojji! Ecuea eba Jesosaja eyami ba'yohua quiana poeyanaje, ma acui ecuiata'apeejo manomeeca'yonaje sa-ajja'yohua poeyanaje. 6Oya ca chama'yo jjeya jiquiojo. Oya shequi'yonaje. Ma ecua ohuaya eshe nequiahuaa huohuicanaje, jamaya oya po'yonaje. Bahua'yocue quiaa jiquio huananobiacanaje meijjaniyasijje. Oya chama'yo jiquiojo. 7Jjeyanei quiana oe poquicue o shajja-ajjajji poanajecuana huohuiñaqui'yohua. Jama quiaa oe añaqui'yocue ba'a: “Oya shequi'yonaje. Ebionei oya poquije provincia Galilea meshiyasijje miquianaya cuama poquijjimahuajo. Majo aniya quiaa oya baje'yo eshequi'yo nequi.” Jamaya oe añaqui'yocue quiaa o shajja-ajjajji poanajecuana.—
Jesosa eponacuanajo jjabameequi'yapoa
8Ma angelya jama huohuime acajje eponacuana meijjanipejjejo ani cuajicuajipoqui'yapoa. Queamete, queabihui pea-ai cuajicuajipoqui'yapoa o shajja-ajjajji poanajecuana oja huohui esohui o huohuiñaqui'yohua. 9Majoya eponacuana cuajicuajipoquianijotii Jesosa o ani cojjaneijo jjanequija'aqui'yapoa. Jesosa jama poa onijje ba'a: —Queabihui pocue quiana.— Oya eshequi'yo nequi bamajje eponacuaa queabihuiya oya bihuiacapoa oja ecuioshajjajo aniya. Jesosaja ejeojji mapapea-aicapoa cuaa bihuijo. 10Majoya aje Jesosaa jama acapoa ba'a: —Eponacuana, a'a queamete pojji. Huohuiqui'yocue e shajja-ajjajji poanajecuana, ecue dohuecuanaya o huacuaya poquijjijo provincia Galilea meshiyasijje. Majo nequiya eya bacaje'yo cuaa.—
Soldadocuana siajje poa Jesosajo
11Majoya aje eponacuana poqui'yanijo beca soldadocuana, ma Jesosa jaa meijjanijaahuanajji ponequinaje poe'yapoa Jerusalén meshiyasijje. Eyacuiñajjija equi-aijo chacochacopoquiani etii poanicuana huohuicaña'yapoa ma ohua bacanequinaje huisotiijo meijjanipejjejo nequiya. 12Oja esohui shajja-ajjamajje poquiapoa cuana judío etii poanicuana huohuiya ma soldadocuaa huohuicaña'yonaje esohuiya. Majoya aje etiicuaa ojee oopana mimimimimajje bejjo queahuiso soldadocuana quiacapoa Jesosaja eyamijo siajje epojji sosejje. 13Jama acapoa etii poanicuaa oya ba'a: —Jama esohui anishocue cuana ba'a: “Mecajje ecuana cahuianijo o shajja-ajjajji poanajecuaa pojja'a oja yami siica'yonaje poemajje.” Jama huohuime anishocue cuana. 14Bacue, emeshimese Pilatohua oja yami chama' shajja-ajjacajo ecuaaya oya huohuije. Majoya ohuaya miquiana quecuamee'yojjima acaje ecuanaja esohuijo— jama huohuimeya acapoa etii poanicuaa.
15Jamajjeya soldadocuaa oja quia bejjo jjeshecapoa esohui siajje yajji sosejje. Jjeyaneitii pea-aiya oya esohuiya oja siajjetii judiocuaa acapoquiani.
Jesosaa oja esohui oe-ejjenei huohuicapoa cuana
(Mc 16.14-18; Lc 24.36-49; Jn 20.19-23)
16Majoya aje Jesosaja babaca 11 huisometiiya poquiapoa provincia Galilea meshiyasijje ma Jesosaa huohuicanaje eyiyo nequiyasijje epoquijji. 17Jesosa majo nequi ba'yomajje oja babacacuaa oya bihuiacapoa oja cuioshajjajo nequiya. Jamatii becacuaa Jesosa e'ejojonei shequi'yonaje jjashahuabaquijjima bihuiacapoa. 18Majoya aje Jesosaa o aniyasijje jjanequichipiquimajje jama huohuime acapoa cuana ba'a: —Eyacuiñajjiya eya Emeshimesenei enequipoquijjitii pomeecanaje ojjaña meshijo ba'ecacuana, ojjaña Eyajo nequicacuana pea-ai huoojeapoquiajjitii epojji. 19Jamajjeya quiana oe poquicue ojjañajaajjicuana ojjaña meshijo ba'ecacuana sohuihuohuiya. Ojjaña joya ejo jjashahuabaquicaje'yocuana esohui huohuineineicue o ejo queaca'a ba'epoquijji. Enaojjohuasijje iñajeanobiapea-aicue cuana ecue Chiija bajjanijo, eya Ebacuaejjaja bajjanijo, Edojjoshahuapameja bajjanijo pea-ai. 20Huohuineicue cuana ecuea esohui, ojjaña jiquio eyaya quiana huohuipoquianaje huisotiiya, o majo jjashajja-ajjaquipoquijji pea-ai. Eya miquiananijjetii nequipoquije ojjaña pojjajo. Jiquio oe-ejjenei epojja oe epojjicuanajotiiya eya nequipoquijetii miquiananijje.—
Selectat acum:
MATEO 28: ESE
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright Mision Nuevas Tribus, 2006
