Lukas 20
20
1Unkan anpetu kin hena wanji en tipi wakan kin ohna oyate kin waonspewicakiye, c̣a wootanin waśte kin he oyake c̣ehan, wawayuśnapi itancanpi, qa wowapi kagapi, qa wicaḣincapi kin, hena ekta ahi,
2Qa okiyapi, qa heciyapi; Tukte wicookihi on dena decen ecanon he; qa wicookihi kin de tuwe e nic̣u hecinhan, unkokiyaka po.
3Unkan waayupte c̣a hewicakiya; Miś eya taku wanji iciwangapi kta; he amayupta po:
4Johannes baptem wicaqu qon he maḣpiya eciyatanhan, qa iś wicaśta kin eciyatanhan, unma tukte he.
5Unkan iye iyakitedan iapi, qa heyapi; Maḣpiya kin eciyatanhan ce, unkeyapi kinhan, Tokeca wicayadapi śni he, eye kta:
6Tuka, Wicaśta kin eciyatanhan, unkeyapi kinhan, oyate kin inyan on unkininpi kta; Johannes wicaśta wokcan kin heca kecinpi.
7Unkan ayuptapi, qa tokiyatanhan un kin sdonyapi śni, keyapi.
8Unkan Jesus hewicakiya; Miś eya wicookihi tukte on dena ecamon kin nakun ociciyakapi kte śni ce.
9Hehan wiyacinpi kin de oyate kin owicakiyaka: Wicaśta wan hastanhanka iyuwi maga wan oju, qa maḣkicanyanpi kin heca owicaqu, qa makoce itehan wan ekta tehan yanka.
10Unkan wanna iyehantu qehan, taokiye wanji hastanhanka iyuwi maga waskuyeca kin etanhan qupi kta e, maḣkicanyanpi qon ekta yeśi; tuka maḣkicanyanpi qon kaśtakapi, qa cokadan hdeśipi.
11Unkan ake taokiye wanji tokeca yeśi; unkan iś eya kaśtakapi, qa śikśicaya kuwapi, qa cokadan hdeśipi.
12Unkan akeś iyamni wanji yeśi; unkan iś eya taopi, qa tankan eḣpeyapi.
13Hehan hastanhanka iyuwi maga tawa kin heya; Token ecamon kta he. Micinkśi waśtewakidake cin, hee yewaśi kta ce; okinni he wanyakapi kinhan yuonihanpi kta.
14Tuka maḣkicanyanpi kin he wanyakapi qehan, iye iyakitedan iapi, qa heyapi; Tawaye kte cin ne dee ce; iho po, unktepi kta; hecen unkiye tawaunyanpi kta ce.
15Hecen hastanhanka iyuwi maga itankan eḣpeyapi, qa ktepi. Heon etanhan hastanhanka iyuwi maga tawa kin token ecawicakicon kta he.
16Ito ku kta, qa maḣkicanyanpi kin hena owinankewicaye, c̣a hastanhanka iyuwi maga kin he tokan wicaqu kta ce, eya. Unkan he naḣonpi qehan, Hecetu śni ce, eyapi.
17Unkan awicatonwe c̣ehan heya; Hecen wowapi en kagapi qon he token kapi he; Tipi kagapi kin inyan ḣeyata iyeyapi qon hee wanna oise en itancan icaga ce:
18Qa tuwe inyan kin he ahinḣpaye cinhan kaḣuḣugapi kta; qa is inyan kin tuwe ahinḣpaye cinhan, hee pamdu kta ce.
19Unkan wawayuśnapi itancanpi, qa wowapi kagapi kin, hena he ehan iyaḣpayapi kta cinpi; tuka oyate kin kowicakipapi; wiyacinpi oyake cin he iye wicaka e iyukcanpi.
20Unkan awanyag kuwapi, qa wanjikji iye owotanna konzapi kin hena iwanyakapi kta e ekta ye wicaśipi; hecen oie kin iyaḣpayapi, qa wicaśta itancan towaśake qa tawacin kin en qupi kta.
21Unkan hena wiwangapi, qa heyapi; Waonspekiye cin, niye tanyan iyae, c̣a waonspeyekiya ece; qa tuwedan en eyatonwe śni; tuka Wakantanka ocanku tawa kin he awicakehan onspewicayakiya e sdonunniyanpi ce:
22Iho, Kesar wamnayanpi kin unqupi, qa iś unqupi kte śni, unma tukte hecetu he.
23Unkan wayupiya hnaye wacinpi kin he iwicayukcan, qa hewicakiya; Tokeca iyutanmayayapi he.
24Kaśpapidan wanji makipazo po. Akan owapi qa wakagapi kin de tuwe tawa he. Unkan ayuptapi qa; Kesar tawa ce, eyapi.
25Unkan hewicakiya; Heon Kesar taku tawa kin hena Kesar kicu po; qa Wakantanka taku tawa kin Wakantanka kicu po.
26Unkan oyate kin wicitokam oie kin iyaḣpayapi kte cin okitpanipi, qa waayupte cin he on inihanpi, qa inina hiyeya.
27Hehan Sadukee ake wicakini kta wanica keyapi kin hena wanjikji en hipi; wiwangapi,
28Qa heyapi; Waonspekiye cin, Moses kaken wowapi unkicagapi; Time cincu tawicu ton qa cinca nica ecen ṭe cinhan, iye sunkaku tawicu qon hduze c̣a cincu cinca icaḣkiciciye kta ce.
29Unkan hecen hunkawanjinkiciyapi śakowin: unkan tokapa kin tawicu ton, qa cinca nica ecen ṭa.
30Unkan iyokihe qon he hehan hduza; tuka cinca nica ecen ṭa.
31Unkan iyamni qon hduza; qa śakowinpi qon owasin hecen hduzapi, qa ecen ṭapi; unkan cinca nicapi.
32Unkan ehake winoḣinca iś eya ṭa.
33Iho, hecen wicakini kte cin ekta śakowin hduzapi qon, hena tukte wanji tawapi kta he, eyapi.
34Unkan Jesus waayupte, c̣a hewicakiya; Maka kin de cinca kin tawicutonpi, qa hihnatonpi:
35Tuka tona rnakoce kin he en opapi kte cin, qa wicaṭe cin etanhan kinipi kta iyececa wicadakapi kin hena tawicu tonpi śni, qa hihnatonpi śni ece.
36Qa nakun ake ṭapi kta okihipi śni; tuka hena maḣpiya ohnihde kin om akiyececapi ece, qa wicakini kin he hena cinca kin on etanhan Wakantanka cincawicaya ece.
37Unkan wicaṭe cin hena kiniwicakiyapi kta, Moses hee kaeś can yuḣaka ekta niciyaotaninpi; Abraham Wakantanka tawa, qa Isaak Wakantanka tawa, qa Jakob Wakantanka tawa, Itancan kin eciye ciqon he ehan.
38Tona ṭapi kin hena Wakanitanka tawapi śni, tuka ni unpi kin hena: owasin iye ekta ni unpi ece.
39Unkan wowapi kagapi kin wanjikśi hehan heciyapi; Waonspekiye cin, tanyan eha ce.
40He iyohakam tuwedan sanpa wiwanga tawaṭenye śni.
41Unkan hewicakiya; Token on Messiya Dawid Cinhintku kin eciyapi he.
42Odowan wowapi kin en Dawid iye ḣinca heya; Itancan kin Itancan mitawa kin heciya; Mietapu kin ekta iyotanka wo,
43Ecen tokaniyanpi kin hena nisiha oahe wicawakage kta ce.
44Hecen Dawid Itancan eciya hecinhan, token on cinhintku kta he.
45Unkan hehan oyate owasin naḣon hiyeye cin en, waonspewicakiye cin hewicakiya;
46Wowapi kagapi kin itonwicapa po; he iye śina hanskaska in omanipi, qa iciyopekiciyapi kin en owicakiyapi, qa omniciye tipi kin oyanke tokapa, qa wotapi kin en ohehdepi tokapa kin, hena hecekcen cinpi:
47Qa wiwazica tipi tawapi kin temyapi; qa ihdutaninpi kta on wocekiye hanska eyapi ece; hena iś iyotan woyaco tanka iyahdeic̣iyapi kta ce.
Selectat acum:
Lukas 20: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
