Johannes 1
1
1Otokahe ekta Wicoie kin hee; Wicoie kin he Wakantanka kici un, qa Wicoie kin he Wakantanka kin ee.
2He otokahe ekta Wakantanka kici un.
3Iye eciyatanhan taku owasin kagapi; qa taku kin tokan tanhan takudan kagapi śni.
4Iye kin en wiconi; qa wiconi kin he wicaśta iyoyamwicaye cin hee.
5Iyoyanpa kin hee otpaze cin en omdesya un, tuka otpaze cin he iyowinkiye śni.
6Wicaśta wan Wakantanka eciyatanhan u śipi, he Johannes eciyapi.
7He wayaotanin hi, Iyoyanpa kin oyake kta; hecen iye eciyatanhan owasin wicadapi kta.
8Iyoyanpa kin he iye śni, tuka iyoyanpa kin he yaotanin kta e u śipi.
9Iyoyanpa wicakapi ḣince cin hee, wicaśta otoiyohi wicoicage kin en u iyoyamye cin hee.
10He wicoicage kin en un, qa iye wicoicage kin kaga, tuka wicoicage kin sdonyapi śni.
11Tona tawa kin hena ekta wicahi, tuka tawawicaye cin hena iyowinkiyapi śni.
12Tuka tona iyowinkiyapi kin hena Wakantanka cinca wicaya yakonpi kta e okihi wicaya, tona iye caje wicadapi kin hena.
13Hena wicawe eciyatanhan śni, qa wicaceḣpi tawacin kin eciyatanhan śni, qa nakun wicaśta tawacin kin eciyatanhan śni, tuka Wakantanka eciyatanhan wicatonpi.
14Unkan Wicoie kin he wic̣a. ceḣpi kagapi, qa unkiyepi kin en ounyan; qa wootanin tawa kin wanunyakapi, wootanin kin he Atkuku eciyatanhan iśnana icaga tawa kin he iyececa; wowaonśida wowicake ko ojudan.
15Johannes he yaotanin, qa heya niyan; Tuwe mihakam u kte cin he mitokam yawapi ce, epe ciqon he dee; he mitokam un nakaeś.
16Unkan woojudan tawa kin etanhan unkiye owasin unkicupi, qa he wowaśte wicowaśte in on.
17Woope kin he Moses wicaqu; tuka wicowaśte wowicake ko hena Jesus Messiya eciyatanhan u.
18Tuwedan tohinni Wakantanka wanyake śni; tuka Cinhintku iśnana icaga Atkuku maku ohna un kin he sdonye unkiyapi.
19Unkan Johannes woyake ciqon he dee; Jerusalem etanhan Juda oyate Wośnapi kagapi Lewi wicaśta ko ekta ye wicaśipi qa, Tuwe niye he, eciyapi.
20Tuka Johannes ohdake c̣a anakiḣbe śni, tuka ohdaka; Messiya kin he miye śni ce.
21Unkan wiwangapi; Nituwe he; Eliyas he niye he. Unkan, He miye śni ce, eya. Wicaśta wokcan kin he niye he, eciyapi. Tuka, Hiya, eya.
22Hehan, Ecin tuwe niye he, eciyapi: tona deciya unkuśipi hecinnan hośi wicunkakipi kta e heunniciyapi; Token onihdaka he.
23Unkan heya; Jehowa tacanku kin owotanna kicaga po, tuwe ḣewoskan eyanpaha un kin he miye ce, Isaya wicaśta wokcan eye ciqon iyececa.
24Unkan tona en u wicaśipi qon hena Pharisee etanhanpi.
25Unkan wiwangapi qa heciyapi; Hecen tokeca e baptem wicayaqu he; Messiya he niye śni, qa Eliyas he niye śni, qa wicaśta wokcan kin he niye śni hecinhan.
26Johannes awicayupte c̣a heya; Miye mini on baptem wicawaqu ece: tuka wanji nayajinpi kin cokaya najin tuka sdonyayapi śni;
27Tuwe mihektam u kte ciqon, tuka mitokam yawapi kin hee; tahanpe kin wakiyuśdoke kta eśta owakihi śni ce.
28Hena taku kin Bethabara, Jordan akasanpatanhan, econpi, he en Johannes baptem wicaqu.
29Anpetu iyokihe hehan Jesus etkiya u kin Johannes wanyake c̣a heya; Tacinca Wakantanka tawa, oyate waḣtanipi kin tokan eḣpeye kte cin he wanyaka po.
30Tuwe on hepe ciqon he dee; Wicaśta wan mihakam u kte cin he mitokam yawapi; he mitokam un nakaeś.
31Qa mis eya he sdonwaye śni; tuka Israel oyate kin ekta yuotaninpi kta e heon mini on baptem wicawaqu wahi ce.
32Unkan Johannes wayaotanin qa heya; Woniya kin he wakiyedan kaḣya maḣpiya eciyatanhan kuntkiya u wanmdaka, unkan he en hiyanka.
33Unkan he tuwe kin sdonwaye śni, tuka mini on baptem wicaqu maśi qon he omakiyaka; Tohan maḣpiya kin eciyatanhan Woniya kin kuntkiya ye c̣a, tuwe iyahde wandake cinhan he iye Woniya Wakan on baptem wicaqu kta.
34He wanmdaka e on mdaotanin; Wakantanka Cinhintku kin hee.
35Ake ihanḣanna hehan Johannes waonspewicakiye cin nom om en najin:
36Qa Jesus omani wanyake c̣ehan heya; Iho, Tacinca Wakantanka tawa kin he dee ce.
37Unkan waonspewicakiya nom ie cin he naḣonpi, qa Jesus ihakam yapi.
38Henan Jesus ihdamna, qa ihakam upi wanwicayake c̣a hewicakiya; Taku ayakitapi he. Unkan, Itancan, Waonspekiye eyapi kin he kapi, tukten yati he, eciyapi.
39Upi qa wanyaka po, ewicakiya. Unkan kici hdapi, qa tukte en ounye cin he wanyakapi, qa anpetu ihunniyan kici yukanpi: wanna oape wikcemna hehantu.
40Nom Johannes ia naḣonpi qa Jesus ihakam yapi qon, Andrew Simon Inyan sunkaku kin he unma ee.
41He cincu Simon tokaheya iyeye c̣a heciya; Messiya, he Sdayapi eyapi kin, iyeunyanpi ce:
42Qa Jesus ekta ai. Unkan Jesus wanyake c̣ehan heya; Simon Jona cinhintku kin he niye: Kephas eniciyapi kta, he Inyan eyapi kin hee.
43Ihanḣanna kin hehan Jesus Galile heciya ya, unkan Philip wanyake c̣a heciya; Mihakam u wo.
44Philip Bethsada hetanhan, nakun Andrew Inyan kici he otonwe tawapi.
45Philip Nathanael akipa, qa heciya; Moses woope en owa qon, qa wicaśta wokcanpi kin nakun, he wanna iyeunyanpi, Jesus Nazareth etanhan, Joseph cinhintku kin hee.
46Unkan Nathanael heciya; Nazareth etanhan taku waśte u okihi kta he. U qa wanyaka wo, Philip eciya.
47Jesus Nathanael en u wanyake c̣a he on heya; Wanyaka po, Israel wicaśta ḣinca wan he dee, wicahnaye wanin un ce.
48Nathanael heciya; Tokiyatanhan sdonmayaya he. Jesus ayupte c̣a heciya; Philip nico qon he itokam can ihukuya nayajin qon hen wanciyaka.
49Nathanael ayupte c̣a heciya; Itancan, Wakantanka Cinhintku, Israel oyate Wicaśtayatapi kin he niye.
50Unkan Jesus ayupte c̣a heciya; Can ihukuya nayajin wanciyaka epa, unkan heon wicayada he. Dena taku isanpa tanka wandake kta ce.
51Unkan heciya; Wowicake, wowicake eciyatanhan heciciyapi, Tokata maḣpiya kin yuzamnipi, qa Wakantanka taokiye kin wankantkiya yapi, qa ake kuntkiya upi, qa Wicaśta Cinhintku kin en himniciyapi wandakapi kta ce.
Selectat acum:
Johannes 1: DAKOTANT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Copyright 2015 American Bible Society. All Rights Reserved.
