YOANA 11
11
Kũthayũũkw’a kwa Lasalo
1 #
Lk 10.38,39. Kwaĩ mũndũ ũmwe mũwau, wetawa Lasalo, wa mũsyĩ wa Vethania, vala Meli na mwĩĩtu‐a‐inyia Matha matwĩe. 2#Yoa 12.3.Nĩ Meli ũsu ũla wamũvakie Mwĩaĩi mauta me mũuke mũseo, na aimũnyasya maũũ make na nzw’ĩĩ syake, na nĩ mwana‐a‐inyia wake Lasalo ũla waĩ mũwau. 3Nũndũ wa ũu eĩtũ‐a‐inyia mamũtũmana, makyasya, Mwĩaĩi, sisya, ũla wendete nĩ mũwau. 4#Yoa 9.3.Na Yesũ eew’a ũu, asya, Ũwau ũsu ti wa kĩkw’ũ, ĩndĩ nĩ kana Ngai ataĩwe na nĩ kana Mwana wa Ngai ataĩwe nũndũ waw’o. 5Na Yesũ nĩwamwendete Matha, na mwĩĩtu‐a‐inyia, na Lasalo. 6Na eew’a kana nĩ mũwau, amba kwĩkala vo vala waĩ mĩthenya ĩngĩ ĩlĩ. 7Nĩvo ĩndĩ ĩtina wa ũu wameie amanyĩw’a, Tũthii ĩngĩ Yutia. 8#Yoa 8.59; 10.31.Amanyĩw’a manwĩa, Lavai, oyu mĩtũkĩ Ayuti nĩmanamanthaa kũũkima na mavia; na wĩthi kw’o ĩngĩ? 9#Yoa 9.4,5; 1 Yoa 2.10.Yesũ asũngĩa, Masaa ma mũthenya ti ĩkũmi na elĩ? Ethĩwa mũndũ ethi na mũthenya, ndatulw’a, nũndũ niwene kyeni kya nthĩ ĩno. 10#Yoa 12.35; 1 Yoa 2.11.Ĩndĩ ethĩwa mũndũ ethi na ũtukũ, nũnũũtulw’a, nũndũ kyeni kĩi nthĩnĩ wake. 11#Mt 9.24; Lk 8.52.Aneena maũndũ asu: na ĩtina amea, Lasalo ũla mũnyanyae waitũ nũkomete; ĩndĩ nĩngũthi ngamũamũkye. 12Na ĩndĩ amanyĩw’a make mamwĩa, Mwĩaĩi, ethĩwa nũkomete, akavoa. 13Ĩndĩ Yesũ aneenaa ũndũ wa kikw’ũ kyake: ĩndĩ nĩmaisye eneena ũndũ wa kũkoma too. 14Nĩvo ĩndĩ Yesũ wamatavya vyũ, Lasalo nĩ mũkw’ũ. 15Na nĩngũtana kwondũ wenyu nũndũ ndinaĩ vo, nĩ kana mwĩtĩkĩle; ĩndĩ tũthii vala ũĩ. 16#Mko 10.32; 14.31.Na ĩndĩ Thomas, ũla wetawa Ĩvatha, wameie amanyĩw’a ala angĩ, Tũthii naitũ, tũkw’e vamwe nake.
17Na Yesũ avika, ethĩa nũminĩte matukũ ana e mbũanĩ. 18Na Vethania vaĩ vakuvĩ na Yelusaleme, ta maĩli elĩ; 19na aingĩ ma Ayuti nĩmookie kwa Matha na Meli, kũmakiakisya nũndũ wa mwana‐a‐inyia woo. 20Na ĩndĩ Matha, yĩla wewie kana Yesũ nĩwũkĩte, athi ũmũthaũa: ĩndĩ Meli ailyĩ nyũmba. 21#Yoa 11.3,32.Na ĩndĩ Matha amwĩa Yesũ, Mwĩaĩi, kethĩwa ũnaĩ kũũ, mwana‐a‐ia ndakw’a. 22Na nĩnĩsĩ o na yu kana ũndũ o na wĩva ũla wĩmwĩtya Ngai, Ngai akakũnenga. 23Yesũ amwĩa, Mwana‐a‐inyia waku akathayũũka. 24#Yoa 5.29; 6.40; Lk 14.14.Matha amwĩa, Nĩnĩsĩ akathayũũka ũthayũũkyonĩ wa mũthenya wa mũminũkĩlyo. 25Yesũ amwĩa, Ninyie ũthayũũkyo, na ninyie thayũ: ũla ũmbĩtĩkĩlaa, o na ethĩwa nũnũũkw’a, akeethĩwa na thayũ; 26#Yoa 5.24; 8.15.na o ũla wĩ na thayũ na ũmbĩtĩkĩlaa ndakakw’a o na ĩndĩĩ. Nũkwĩtĩkĩla ũu? 27#Yoa 6.69.Nake amwĩa, Ĩĩ, Mwĩaĩi: nĩnĩtĩkĩlĩte kana nue Klĩsto, Mwana wa Ngai, ũla wĩũka kũũ nthĩ. 28Na asya ũu, athi, amwĩta Meli mwĩĩtũ‐a‐inyia nzama, akyasya, Mũmanyĩsya e vaa, na nũnũũkwĩta. 29#Yoa 11.20.Nake eew’a ũu, ookĩla na mĩtũkĩ, na athi vala ũĩ. 30(Ĩndĩ Yesũ ndaĩ anamba ũvota mũsyi, ĩndĩ aĩ o vala Matha wakomanĩe nake.) 31Nĩvo Ayuti ala maĩ nake nyũmbanĩ makĩmũkiakisya, moona Meli, ũndu wokĩla na mĩtũkĩ na aũmaala, mamũatĩĩie, makĩsũanĩa ũendete mbũanĩ akaĩĩe vo. 32#Yoa 11.21.Na Meli, ooka vala ve Yesũ, na amwona, eevalũkya maũũnĩ make, akĩmwĩa, Mwĩaĩi, kethĩwa ũnaĩ kũũ, mwana‐a‐ia ndakw’a. 33#Yoa 13.21.Na Yesũ oona akĩĩa, na Ayũti ala mookanisye nake makĩĩa, eew’a woo vevanĩ, na aũũya, 34na asya, Mũnamwiie va? Mamwĩa, Mwĩaĩi, ũka ũkone. 35#Lk 19.41.Yesũ aĩa. 36Na ĩndĩ Ayuti masya, Kwa sisyai ũndũ ũnamwendete! 37Ĩndĩ amwe moo masya, Ũũ wasalukilye kĩlilinda metho, ndanaĩ atonya kũtuma mũndũ ũũ ũtakw’a? 38#Mt 27.60.Na ĩndĩ Yesũ eew’a woo ĩngĩ nthĩnĩ wake avika mbũanĩ. Nayo yaĩ ngunga, na yakunĩkĩlw’e na ĩvia. 39#Yoa 20.1.Na Yesũ asya, Vetai ĩvia. Matha, mwĩĩtu‐a‐inyia wa ũla mũkw’ũ, amwia, Mwĩaĩi, yuyu nũnũũnyunga; nũndũ ũmũnthĩ nĩ wa kana, akw’a. 40#Yoa 11.4,23,25,26.Yesũ amwia, Ndinakwĩa, kana, ethĩwa nũkwĩtĩkĩla, nũkwona ũnene wa Ngai? 41Na ĩndĩ maveta yĩla ĩvia. Na Yesũ aũngalalya metho, na asya, Asa, nĩngũũtũngĩa mũvea nũndũ nĩwambĩw’a. 42#Yoa 12.30.Nakwa nĩnĩsĩ kana mavinda onthe nũmbĩw’aa: ĩndĩ nũndũ wa ĩkomano yĩĩ yĩũngeme yĩnthyũlũlũkĩte naneena ũu, matonye kwĩtĩkĩla kana nue wandũmie. 43Na aneena maũndũ asu, aneena na wasya mũnene, Lasalo, umaala. 44Ũla eĩ mũkw’ũ aumaala, alingĩlĩtwe ngũa ya mathiko maũũ na moko; na ũthyũ wake wovetwe na kĩtambaa. Yesũ amea, Mũthasyei, na mũekei athi.
Athembi anene maisaman’ya ũndũ wa kũaa Yesũ
(MATHAYO 26.1–5; MALIKO 14.1–2; Luka 22.1–2)
45 #
Lk 16.31; Yoa 10.42; 12.42. Na ĩndĩ aingĩ ma Ayuti, ala mookie kwa Meli na moona ũndũ ũla wĩkie, mamwĩtĩkĩla. 46Ĩndĩ amwe moo mathi kwa Avalisi mamatavya maũndũ ala Yesũ wĩkie.
47Na ĩndĩ athembi ala anene na Avalisi moomban’ya nzama, na masya, Twĩĩka ata? Nũndũ mũndũ ũũ ekaa syama mbingĩ. 48Ethĩwa twĩmũeka ũu, andũ onthe makamwĩtĩkĩla: na Alomi makooka mose kũũ kwitũ na mbaĩ yaitũ. 49Ĩndĩ ũmwe wamo, ũla wetawa Kaiava, ũla waĩ mũthembi mũnene mwaka ũsu, amatavya, Mũi ũndũ mwĩsĩ, 50#Yoa 18.14.na mũtiũsũanĩa nĩkwaĩle inyw’ĩ, mũndũ ũmwe akw’e nũndũ wa andũ, nĩ kana mbaĩ yonthe ndĩkae. 51#Mwa 50.20; Kuma 28.30; Mot 27.21.Na ndaaneena ũu kwondũ wake: ĩndĩ nũndũ nĩwe waĩ mũthembi mũnene mwaka ũsu, athana kana Yesũ akamĩkw’ĩĩa mbaĩ; 52#Yoa 10.16; 1 Yoa 2.2; Mt 12.30.na ti ũndũ wa mbaĩ yoka ĩndĩ nĩ kana atonye kũmban’ya syana sya Ngai ila itwĩe inyaĩĩkĩtw’e syĩthĩwe ũmwe. 53Na ĩndĩ kuma mũthenya ũsu masaman’ya nĩ kana matonye kũmũaa.
54Na kwondũ wa ũu Yesũ ndaambĩla kwanganga eyumĩlĩtye katĩ wa Ayuti, ĩndĩ auma kw’o na athi nthĩ ĩla ĩthengeee weũnĩ, ndũanĩ yĩtawa Evalaimũ; na ekala vo vamwe na amanyĩw’a make. 55#2 Mav 30.17; Mko 10.32.Na mboka ya vasaka yaĩ vakuvĩ ũvĩka: na aingĩ maumie nthĩ ĩsu mambatie Yelusaleme vasaka ũtanamba ũvika, nĩ kana methesye. 56Na mamantha Yesũ, na maneenan’ya ene kwa ene, maũngamĩte ĩkalũnĩ, Mwĩona ata? Mwĩasya ndeũka mbokanĩ? 57Na ĩndĩ athembi anene na Avalisi maumisye mwĩao, kana, ethĩwa mũndũ nĩwĩsĩ vala ũĩ, aete ũvoo, nĩ kana mamũkwate.
Selectat acum:
YOANA 11: Mbivlia
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
