Apostolmi 4
4
Peter ngò John Pama Jewmi Hoho Zülo
1Achinemiqo eno achineki khemi shou captain ngò Sadduceemiqo ishi Peter ngò John pama no timiqo pütsa ake dolo no pama lau ighi. 2Apostolmi pama no timiqo vilo Jisü akithí lono xülethughive keu eno kithimi xülethughive nikeu ghili pesü asheshu akeu ghenguno panongu ye ighono amloideve. 3Panongu no Peter ngò John pama küghaluve, eno avelau shive kehu, thoghiu tsalà tomo ke kutólo akughuki lo sǘve. 4Ikemu timi khunoqo no akükütsü sütsa chilu keno pülüluve; ikehu pülüluve kemi kikihi ye qhethonhe pungu kutólo ikughive.
5Tishiwo thoghiu ayekipemi, kichimi, eno ayeza kükütsümiqo Jerusalem lo kuhokumqoe. 6Achinetou Annas tilehi ae, eno Caiaphas, John, Alexander ngò kütami achinetou kibolomiqo ghí tilehi ae. 7Panongu no Peter ngò John panongu zülo sawo qhi no pama vilo ishi iniju: “Kiu küká momu kiu je lono nongu ye hipau shilu ani kea?”
8Ikehu Peter no Aghungu Kimthe no chhitoi shi püzü panoqo vilo pi: “Timi shou ayekipemi eno kichimiqo! 9Tsalá ishí küpüqhiyi keu kümlà apukhu kinitave keu lau pephe-piyeve keu eno pa ye kíshi no shipivive keno iniju nike ningu kusü aghí aye, 10hi ithilo, nongu Israelmi kümtsü: Hiye Nazareth nó ghami Jisü Khristo khuu nongu no yedave kemu Alhou no akithí lono xüputhuve keno pa je lono timi hipau shipivive no nongu zülo puthugho ani. 11Jisü ye
“ ‘nongu aki kishimiqo no atuqu milive keu
no akhotou tuqu shivae.’#4:11 Leshe 118:22
12Xakulu ye khuu lau nomu ithulu chemoe, kughengu atsütsǘ qholo ningu timi jeli pelo xakulu ithulu penike aje kütau kiumu tsüpe püamoe.”
13Kughou panongu no Peter ngò John pama mlo kumto ithulu püzü pama ye akiphiki lo wujumo kemi, inapügha timiqo paphi ipikeu ithive keno panongu ye akichiqhive no pama ye Jisü gholo ache kena ipi kimchiluve. 14Ikemu pama gholo timi shipivive keu puthugho akeu ithulu no panongu ye kiumu pimlave. 15Ike panongu no pama pelo Jewmi Hoho zülo no ipeve penike azah tsüve, eno tisheno panongu dolo no küptsae. 16Panongu dolo ishi iniju ae, “Ningu ye timi hi pama pesü kiu shiveni kea? Jerusalem lo xüküami kümtsü no pama no paküta keu amichipu kümlà shive keu ithivae, eno ningu ye tipau lachileve mülae. 17Ikemu hipau vehu timiqo dolo alau veküpha pemo nike ningu ye panongu pelo hinguno hilau ye Jisü je pesü kütami pütsa pemove nike pikichivenie.”
18Tisheno panongu no itaghi alou pama kusü eno pama vilo khilemu Jisü je lono kütsü momu shika kevilo pi azah tsüve. 19Ikemu Peter ngò John pama no khochile, “Alhou nhethe lo khikhiu no achipi kea: Nongu gholu keu no keo, pa gholu keu no kea? Nongu no küghatha julo. 20Ningu ghengu ye ningu no kiu ithulu eno chilu keno tipau ghili pimo keu shimlae.”
21Kichi kümsà kitheve kethiu panongu no pama phe puwuve. Panongu ye kíshi hi pama ghime kepu keno xakütha shimlave, kughengu kiu shive keno tipau ghenguno timi kümtsü no Alhou sheqhe ake. 22Kughengu timi khuu akümzapushi shipivive keno pa ye ampe lhobidi shou shive no ake.
Küpülümiqo no Inikhu
23Peter ngò John pama ye kuqhopheve kethiu idechilesü panow timiqo lau wuve eno achinetou ngò kichimiqo no pama vilo kiu pi keno kümtsü pesü panongu vilo lhepiyeve. 24Kughou panongu no hi chilu keno, panongu küqha no ighamuku Alhou vilo akighini shi. Panongu no hitoi inikhu, “Akughushu Mpeu, atsütsǘ, ayeghi, azüghi eno tipaqo lo akeu kümtsü nono mülà ke. 25Nono Aghungu Kimthe vechewo O qeu, eno ningu papù David kichí lono ishi pi:
“ ‘Kushiye shiyeqo ye muqhumüza ani kea?
eno kushiye timiqo ye adou lono kuchughu cheni kea?
26Ayeghi lo kükamiqo no kutò peighi
eno ayekipemiqo no kuhokumqo no
Ampeu lachile
eno pa no nukishe keu mjochileke.’#4:26 Leshe 2:1,2
27Kuchou no Herod ngò Pontius Pilate pama no Jewkumomiqo ngò Israel timi hipau mishighüna lo akemiqo sasü aqoshi kusho no kuchughu püzü nono nukisheve keu Akimthe qeu Jisü mjochileke. 28Panongu no O küká eno O pulou lono azünatha ghi kiu shi moayesa keno xatha pe püakeu tipau shike. 29Ampeu, itehi panongu no ningu kichi akeu jutsülo eno O qemiqo pelo amlo kumto shi O tsa pilu pelo. 30O qeu akimtheu Jisü je vechewo shikipivi eno akümzapu ngò amichipu kümlà shilu penike ow chhopuwo tsülo.”
31Panongu no akighini shive kethiu, khilehi panongu no kuho akeno tipau-a sükinie. Eno panongu kümtsü Aghungu Kimthe no chhitoive no amlo kumto shi Alhou tsape shie.
Küpülümiqo no Panonguw Küakini Pesü Küsaje
32Küpülümiqo kümtsü amlo eno akükümsü lakhi shie. Khunomu pa no kiu pighi aghí keno tiye paw kepi pükhamoe, ikemu panongu no kiu aghí keno kümtsü pesü aqǘ shi küsaje cheke. 33Apostolmiqo no aküka kumto lono tamo no Ampeu Jisü xülethughive keu shepe shi. Eno Alhou’w küpükini no ighono akumto shi panongu kümtsü gholo akümlà shikeu 34vechewo panongu dolo kumlhomi khumu shivemoe. Kughengu ado kümtsü lo khunoqo no ayeghi momu aki pighi akeno tipaqo jeve eno jelu keu pisa pesü ighino 35apostolmiqo pukhuphi lo qhi, eno tiye avehupu shi akemiqo lau kijé tsü ake.
36Levi laghami Cyprus lono ighi keu Joseph khuu Apostolmi no Barnabas ipi ku cheni keno (hipau kiqi ye shikumtokütsüu nopu), 37Pa no pighi achekeu alu jeve no pisa pesü apostolmiqo pukhuphi lo qhitsüe.
Selectat acum:
Apostolmi 4: STB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
