Mak 9

1Na ɔhanle ɔzɔle zolɛ kɛ, “Bɛhakye ɛhye! Bie mɔ gyi bɛ avinli ɛke mɔɔ bɛnrɛwu kɔkpula kɛ bɛkɛnwu Nyamenle belemgbunlililɛ ne kɛ yera zo wɔ tumi nu.”

Gyisɛse hakyile

(Mat 17.1-13; Luk 9.28-36)

2 # 2 Pit 1.17-18 Kenle nsia pɛle nu la, Gyisɛse vale Pita, Gyemise, yɛɛ Dwɔn hɔle boka tendenle bie azo, bɛ ngome ala a bɛwɔ ɛkɛ a. Na bɛnwunle kɛ Gyisɛse ɛhakyi bɛ nye zo, 3na ye tɛladeɛ ne ɛyɛ nwohyee mɔɔ awie biala mɔɔ wɔ aleɛabo la ɛnrɛhola ɛnrɛkpo ɛnrɛmaa ɔnrɛyɛ zɔhane a. 4Ɛdoavolɛma nsa ne nwunle Mosisi nee Yilaegya kɛ bɛ nee Gyisɛse ɛlɛtendɛ. 5Na Pita hanle hilele Gyisɛse kɛ, “Kilehilevolɛ, ɔle kpalɛ kɛ yɛwɔ ɛke a. Yɛbabɔ nzeseɛ nsa, wɔ ɛdeɛ ko, Mosisi ɛdeɛ ko, yɛɛ Yilaegya ɛdeɛ ko.” 6Ɛnee ɔdaye mumua ne ɔnnwu edwɛkɛ ko mɔɔ ɔha a, ɔboalekɛ ɛnee ɛzulolɛ kpole ɛha ye nee ɔ gɔnwo mɔ.

7 # Mat 3.17; Mak 1.11; Luk 3.22 Amungu rahedale bɛ nwo zo, na ɛnelɛ bie dendɛle amungu ne anu zele kɛ, “Me ra mɔɔ mekulo ye la ɛne, bɛdie ye!” 8Ɛkɛ ne ala bɛtotole bɛ nye, noko bɛannwu awie biala kɛ Gyisɛse angome mɔɔ bɛ nee ye gyi ɛkɛ ne la ala.

9Na bɛvi boka ne azo bɛlɛdwu la, Gyisɛse bɔle ye ɛdoavolɛma ne anloa kɛ, “Bɛmmaka mɔɔ bɛnwu ye la bɛkile awie biala, kɔkpula mekɛ mɔɔ Sonla Ra ne vi ewule nu kɛdwazo la.”

10Bɛlile ye edwɛkɛ ne azo, na bɛdabɛ ngome bɛdwenledwenlenle mɔɔ zile la anwo kɛ, “Ɛnee ewudwazo ɛhye a le duzu?” 11#Mal 4.5; Mat 11.14 Na bɛbizale Gyisɛse kɛ, “Duzu ati a mɛla kilehilevolɛma ne mɔ se ɔwɔ kɛ Yilaegya dumua ba ɛ?”

12Ɔbuale bɛ kɛ, “Ɔwɔ kɛ amgba Yilaegya dumua ba batoto ninyɛne muala boɛ. Na duzu ati a Nyamenle Edwɛkɛ ne ka kɛ Sonla Ra ne banwu amaneɛ somaa, na menli akpo ye ɛ? 13Memaa bɛade kɛ Yilaegya zɔhane ɛra dɛbadɛba, noko menli ambu ye, bɛyɛle ye mgbane mgbane, kɛmɔ Nyamenle Edwɛkɛ ne ka ye wɔ ɔ nwo la.”

Gyisɛse yɛ kakula nrenya mɔɔ sunsum ɛtane wɔ ɔ nwo la ayile

(Mat 17.14-21; Luk 9.37-43)

14Mɔɔ bɛradole ɛdoavolɛma mɔɔ ɛha la, bɛnwunle kɛ menli somaa ɛbɔ ɛyia bɛ, na mɛla kilehilevolɛma nee bɛ ɛlɛsu kpolera. 15Menli ne mɔ nwunle Gyisɛse la ɔzinle bɛ nwo na bɛnriandile bɛhɔzomanle ye bie. 16Gyisɛse bizale ɛdoavolɛma ne kɛ, “Duzu anwo kpolera a bɛ nee menli ne mɔ ɛlɛsu a?”

17Nrenya ko mɔɔ wɔ menli ne anu la zele kɛ, “Kilehilevolɛ, menvale me ra nrenya membale, ɔluakɛ sunsum ɛtane mɔɔ ɔmmaa ɔngola tendɛ la wɔ ɔ nwo. 18Kenle biala mɔɔ sunsum ɛtane ne kɛdwu aze la, ɔmaa kakula ne pɛ fi, ɔ nloa wu awubue, ɔtwi ɔ gye na ɔsa ketee. Menzele wɔ ɛdoavolɛma ne mɔ kɛ bɛdu sunsum ɛtane ne wɔ ɔ nwo, na bɛangola.”

19Gyisɛse zele bɛ kɛ, “Bɛmɛ mɔɔ bɛnlɛ diedi a! Me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔkpula kenlenzu? Bɛva kakula ne bɛrɛlɛ me!” 20Na bɛvale ye bɛrale. Sunsum ɛtane ne nwunle Gyisɛse ala la yɛɛ ɔmanle kakula ne dɔle mgbutike a. Ɔhundohundole ɔ nwo aze na ɔ nloa wule awubue. 21Na Gyisɛse bizale kakula ne ɔ ze kɛ, “Ɔvale zɛhae ɛyɛlɛ la yehyɛ ɔ?”

Nrenya ne buale kɛ, “Ye nretee ne anu ala yɛɛ ɔvale ye a. 22Mekɛ dɔɔnwo, yevuandi ye yedo nzule nee senle nu, mɔɔ anrɛɛ ɔwɔ kɛ ɔwu a. Na saa ɛkola debie biala yɛ a, ɛnee nwu yɛ anwunvɔne na boa yɛ.”

23Gyisɛse zele ye kɛ, “Saa ɛkola a? Sonla mɔɔ lɛ diedi la kola yɛ debie biala.”

24Na ndɛndɛ ne ala kakula ne ɔ ze hanle kɛ,#9.24 Mɔmoane mbuluku ne mɔ bie mɔ se: ɔvale ɛzunlɛ ɔhanle kɛ. “Melɛ diedi, na ɔle ekyi. Boa me maa me diedi ɛnyi.”

25Gyisɛse nwunle kɛ menli dɔɔnwo ɛlɛba arahyele bɛ nwo zo la, ɔdeanle sunsum ɛtane ne nu na ɔzele ye kɛ, “Sunsum mumule, ɛvi kakula nrenya ye anwo tu, mmabawolo ye bieko!”

26Na sunsum ɛtane ne deɛdeanle nuhua maanle kakula ne dɔle mgbutike bieko, na ɔvi ɔ nwo ɔdule. Kakula ne yɛle kɛ sonla mɔɔ ɛwu la, na awie biala hanle kɛ, “Yewu!” 27Na Gyisɛse zɔle ɔ sa manle ye zo na ɔdwazole ɔgyinlanle.

28Gyisɛse hɔle sua nu la ye ɛdoavolɛma ne bizale ye kɛ, “Duzu ati a yɛangola sunsum ɛtane ne tu ɛ?”

29Ɔbuale bɛ kɛ, “Debie biala ɛngola sunsum ɛtane ɛhye tu, kyesɛ nzɛlɛlɛ ala.”#9.29 Mbuluku bie mɔ fa sɔ zo kɛ: kyesɛ nzɛlɛlɛ nee ɛhɔnehyelɛ.

Gyisɛse ka ye ewule nwo edwɛkɛ bieko

(Mat 17.22-23; Luk 9.43-45)

30Gyisɛse nee ye ɛdoavolɛma ne vile ɛkɛ ne na bɛhɔvale Galeli bɛhɔle. Yeangulo kɛ awie biala kɛnwu ɛleka mɔɔ ɔwɔ la, 31ɔboalekɛ ɛnee ɔlɛkilehile ye ɛdoavolɛma ne kɛ, “Bɛbaye Medame Sonla Ra bɛawula menli sa nu bɛamaa bɛahu me, na ye kenle nsa ne anzi mebadwazo meara ngoane nu.”

32Ɛdoavolɛma ne ande ngilehilelɛ ɛhye abo, noko akee bɛzulole kɛ bɛkɛbiza ye ɔ bo.

Nwane a le kpole a?

(Mat 18.1-5; Luk 9.46-48)

33Nzinlii bɛrale Kapɛnayɛm, na bɛhɔle sua nu la Gyisɛse bizale ye ɛdoavolɛma ne kɛ, “Duzu a bɛzule nwolɛ kpolera wɔ adenle nu la?”

34 # Luk 22.24 Na bɛanye ye ɔ nloa, ɔluakɛ bɛlua adenle ne anu la ɛnee bɛlɛsu kpolera kɛ bɛ nuhua boni a le kpole wɔ bɛ avinli a. 35#Mat 20.26-27; 23.11; Mak 10.43-44; Luk 22.26 Yemɔti Gyisɛse dɛnlanle aze, ɔvɛlɛle ye ɛdoavolɛma bulu nee nwiɔ ne na ɔzele bɛ kɛ, “Awie biala mɔɔ kpondɛ menli ti ali la ɛli bɛ nzi na ɔzonle awie biala.” 36Akee ɔvale kakula ko ɔziele bɛ nyunlu ɛkɛ, ɔvale ɔ sa ɔdole ɔ kɔme na ɔzele kɛ, 37#Mat 10.40; Luk 10.16; Dw 13.20 “Awie biala mɔɔ ɔlua me ti ɔkɛlie ɛhye mɔ ko la, ɛlie me, na mɔɔ kɛlie me la, ɛtɛdiele me ngome, ɛnee yelie ahenle ne mɔɔ zoanle me la noko.”

Mɔɔ ɛngyi yɛ la wɔ yɛ afoa

(Luk 9.49-50)

38Dwɔn zele Gyisɛse kɛ, “Kilehilevolɛ, yɛnwunle nrenya bie kɛ ɔlɛ wɔ duma ɔlɛtu mbɔnsam, na yɛduale ye, ɔluakɛ ɔmboka yɛ nwo.”

39Gyisɛse zele bɛ kɛ, “Bɛmmatua ye, ɔluakɛ awie biala ɛnrɛhola ɛnrɛyɛ nwanwane debie wɔ me duma nu na nzinlii yeaha me nwo edwɛkɛ ɛtane. 40#Mat 12.30; Luk 11.23 Awie biala mɔɔ ɛngyi yɛ la wɔ yɛ afoa. 41#Mat 10.42 Bɛhakye ɛhye! Awie biala mɔɔ ɔluakɛ bɛle Kelaese ne ɛdeɛ la ati ɔkɛmaa bɛ nzule bɛkɛnlo la kɛnyia ahatualɛ wɔ nwolɛ.

Sɔnea mɔɔ twe sonla kɔ ɛtane nu la

(Mat 18.6-9; Luk 17.1-2)

42“Awie biala mɔɔ kɛgyegye menli mɔɔ bɛ diedi mɔɔ wɔ me nu la le kɛ ngakula ɛhye mɔ anu ko, na ɔkɛmaa ɔkɛminli ye diedi ne la, ɛnee noko ɔle kpalɛ kɛ anrɛɛ bɛdwele ɛdibolɛ ɛnlomboɛ kpalɛ bɛhendanle ɔ kɔme na bɛvuandinle ye bɛdole nyevile nu. 43#Mat 5.30 Yemɔti saa ɛ sa ko twehwe wɔ ahɔ ɛtane nu a, pɛ ye to! Ɔle kpalɛ kɛ ɛ sa ko na ɛkɛnyia ngoane tɛla kɛ ɛ sa nwiɔ na ɛkɛhɔ senle ne mɔɔ ɛnnu ɛlɛ la anu. [ 44Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.] 45Saa ɛ gyakɛ gyegye wɔ ahwe wɔ ahɔ ɛtane nu a, pɛ ye to! Ɔle kpalɛ kɛ ɛ gyakɛ ko na ɛkɛnyia ngoane tɛla kɛ ɛ gyakɛ nwiɔ na bɛkɛvuandi wɔ bɛkɛdo senle ne mɔɔ ɛnnu ɛlɛ la anu a. [ 46Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.] 47#Mat 5.29 Saa ɛ nye noko a twehwe wɔ ahɔ ɛtane nu a, tu ye to! Ɔle kpalɛ kɛ ɛ nye ko na ɛkɛnyia Nyamenle belemgbunlililɛ ne tɛla kɛ ɛ nye nwiɔ na bɛkɛvuandi wɔ bɛkɛdo senle ne mɔɔ ɛnnu ɛlɛ la anu a. 48#Aye 66.24 Ɛkɛ ne azonlɛ ɛnwu ɛlɛ, yɛɛ ye ndeanlɛ senle ne ɛnnu ɛlɛ.

49“Bɛbava ndɛnebualɛ senle ne bɛade awie biala anwo kɛ bɛfa ngyenle bɛte azubɔdeɛ nwo la.

50 # Mat 5.13; Luk 14.34-35 “Ngyenle le kpalɛ; na saa ɔta a, kɛ ɛkɛzi ɛkɛyɛ na yeayɛ menlemenle bieko ɛ?

“Bɛmaa bɛ ɛbɛlabɔlɛ ne ɛyɛ kɛ ngyenle, ɛde bɛ, na bɛ nee menli kɔsɔɔti ɛdɛnla anzonudwolɛ nu.”

Selectat acum:

Mak 9: NB

Evidențiere

Partajează

Copiază