LUCAS 13
13
Ba'ax o'olal kaabéet u kexic u tuucul máac
1Ti' le kiino'obo' j taal tu yicnal Jesús dze'edzec máaco'ob ca tu tzicbalto'ob ti' bix quíimsa'abic wa jay túul Galileailo'ob tumen Pilato yéetel bix xa'akta'abic u ki'ikelo'ob yéetel u ki'ikel le ba'alche'ob u quiimsmajo'ob u ti'al siibalo'obo'.
2Ca túun j a'ala'ab ti'ob tumen Jesús: ¿Táan wa a tucultique'exe' lela' j úuch ti' le máaco'obo' tumen asab kebano'ob ti' le u láak Galileailo'obo'? 3Quin wa'alic te'exe'; ma'. Wa ma' ta kexic a tuucule'exe', tuláacale'ex bíin xu'ulsa'aque'ex xan. 4¿Táan wa a tucultique'exe' le dieciocho máaco'ob quíimo'ob le ca j lúub u torreil Siloé yóokolo'obo' asab yaan u si'ipilo'ob ti' le u láak u cajnáalilo'ob Jerusaleno'? 5Quin wa'alic te'exe'; ma'. Wa ma' ta kexic a tuucule'exe', tac tuláacalile'ex bíin xu'ulsa'aque'ex xan.
U quet t'aanil jun cúul higo ma'atech u yichanquil
6Jesuse' tu ya'alaj le quet t'aan ti'oba': Jun túul máaque' u pakmaj jun cúul higo tu lu'um. Ca j bin u yil wa yaan u yich, ba'ale' mix jun p'éel tu caxtaji'. 7Ca tu ya'alaj ti' le máax canantic le lu'umo': Ile, tu yáam óox p'éel ja'ab quin taal in wil wa yaan u yich le che'a', ba'ale' mix jun téen tu dzáaj u yich. Ch'aque, ¿ba'ax u biilal yanil te j lu'uma'? 8Ba'ale' le máax canantic u lu'umo' tu núucaj ti': In dzuul p'at chéen ti' le ja'aba'. Bin in ca'aj in péecs u lu'umil yéetel bíin in ca'aj in dzáa u ta' tzíimin tu chuun. 9Yéetel lelo' wa cu dzáic u yiche', ma'alob; wa ma'e', ca ch'aquic túun.
Jesús cu dzáic u toj óolal jun túul co'olel tu kiinil sábado
10Jun téene' u ti'al sábadoe' táan u ca'ansaj Jesús ti' jun p'éel sinagoga. 11Te'elo' ti' yaan jun túul co'olel, dieciocho ja'abo'ob koja'anchajac tumen jun túul kaakas pixan p'atmajil p'uup'us u pu'uch; jun puli' ma' tu páajtal u tojquintic u wíinclil. 12Le ca j ila'ab tumen Jesuse' t'aani' ca j a'ala'ab ti': Co'olel, dzo'oc u p'atiquech a koja'anil.
13Jesuse' tu dzáaj u kab tu yóokol, tu séeblaquil tojchaj u wíinclil le co'olelo', ca jo'op' u qui'iqui' t'antic Ku. 14Ba'ale' u nojochil le sinagogao' j kuuxilnaji' tumen Jesuse' tu dzáaj u toj óolal le co'olelo' tu kiinil sábado. Ca tu ya'alaj ti' le máaco'obo': Seis kiino'ob yaan u ti'al u yúuchul meyaj, ca taaque'ex ti' le kiino'obo' u ti'al ca dza'abac a toj óolale'ex, ma' tu kiinil sábadoi'.
15Ca túun j núuca'ab ti' tumen Yuumtzil: J ca'a p'éel iche'ex, je'el máaxac ti' te'exe', ¿ma' wa cu wach'ic u wacax wa u tzíimin sábado yéetel cu luksic tu'ux cu janalo' u ti'al u bis u yuk ja'? 16Cux túun le co'olela' máax ti' u ch'i'ilancabil Abraham u taale', dzo'oc dieciocho ja'abo'ob ka'axac tumen satanase', ¿ma' wa unaj u wa'ach'al sábadoi'?
17Le ca tu ya'alaj Jesús lela', tuláacal u enemigoe' tu ch'a'ajo'ob subtal, ba'ale' tuláacal le máaco'obo' qui'imacchaj u yóolo'ob, tumen tu yilajo'ob le nucuch meyajo'ob tu beetaj Jesuso'.
U quet t'aanil u neek mostaza
(Mt 13.31-32; Mr 4.30-32)
18Ca túun tu ya'alaj Jesús: ¿Ti' ba'ax chica'an u ajawil Ku? ¿Ba'ax yéetel je'el u páajtal in quetique'? 19Bey je'el bix jun p'éel u neek mostaza cu pa'akal lu'um tumen jun túul máaque'. Cu nojoch che'etal; tu yo'olal u nojochile', tac le ch'íich'o'ob cu beetico'ob u ku'ob tu kabo'.
U quet t'aanil levadura
(Mt 13.33)
20Ca tu ya'alaj xan: ¿Ba'ax yéetel je'el u páajtal in quetic u ajawil Kue'? 21Bey je'el bix le levadura cu xa'akta'al tumen jun túul co'olel yéetel óox p'éel u p'iisil harina, u ti'al u beetic u líikil tuláacal le sacano'.
Le nu'unut' jonao'
(Mt 7.13-14,21-23)
22Jesuse', ca'aliquil táan u bin Jerusalene', ca'ansajnaj ti' le caajo'ob yéetel ti' le mejen cajtalilo'ob tu'ux j máano'. 23J káata'ab ti' tumen jun túul máac: Yuumtzil, ¿jun p'íit wa le máaxo'ob cu to'ocolo'obo'? Jesuse' tu núucaj:
24Ilawil a woocle'ex ti' le nu'unut' jool najo', tumen quin wa'alic te'exe' ya'ab máaco'ob cun u yóolto'ob ocli' ba'ale' ma' bíin páatchajco'obi'. 25Cu dzo'ocol u líikil u yuumil naj u kal le jool najo', te'ex ti' yane'ex táancabe' bíin koopnaque'ex yéetel bíin a wa'ale'ex: Yuumtzil, je'e to'on jool naj, ba'ale' leti' bíin u núuc ti' te'ex: Ma' in wojel tu'uxile'exi'. 26Bíin cáajac túun a wa'alique'ex: Jaano'on yéetel ukulnajo'on ta wéetel, j ca'ansajnajech xan tu noj bejilo'ob c caajal. 27Ba'ale' leti' bíin u núuc ti' te'ex: Dzo'oc in wa'alic te'exe' ma' in wojel tu'uxile'exi'; tuláacale'ex ca beetique'ex kaase', náachcuntaba'ex ti' teen. 28Ti' bíin okolnaque'exi' yéetel bíin jach'cojnaque'exi' le quéen a wile'ex Abraham, Isaac, Jacob yéetel tuláacal le aj bóobato'ob yano'ob tu ajawil Ku, ba'ale' te'exe' p'áate'ex táancab. 29Tumen bíin taalac máaco'ob j xaman, j noojol, j lakin yéetel j chikin, bíin culaco'ob janal tu ajawil Ku. 30Bey túuno' dze'edzec ti' le yano'ob paachil bejela'a' bíin máanaco'ob táanil, yéetel dze'edzec ti' yano'ob táanilo' bíin máanaco'ob paachil.
Jesús cu yokol tu yo'olal Jerusalén
(Mt 23.37-39)
31Ti' le kiino' j kuch dze'edzec fariseobe' ca tu ya'alajo'ob ti' Jesús: Náachcuntabáa ti' le cúuchila', tumen Herodese' u káat u quiimsech.
32Ba'ale' j núuca'ab ti'ob tumen Jesús: Xeene'ex a wa'ale'ex ti' le j tuusil caaj wíinico': Ile, bejela'e' yéetel sáamale' quin jóokesic kaakas pixano'ob yéetel quin dzáic u toj óolal koja'ano'ob, ca'abeje' quin dzo'ocsic. 33Ba'ale' unaj in xíimbal bejela'e', sáamale' yéetel ca'abej, tumen ma' tu páajtal u quíimil jun túul aj bóobat náach ti' Jerusalén.
34¡Jerusalén, Jerusalén ca quíimsic le aj bóobato'obo' yéetel ca ch'i'inch'inic le máaxo'ob cu túuxta'al teech tumen Kuo'! ¡Buca'aj u téenel tin wóoltaj in much'quint a paalalo'ob je'el bix jun túul x caax cu much'quintic u mejnilo'ob tu yáanal u xiike', ba'ale' ma' ta wóoltaji'! 35Ilawile'ex yaan u x tocoy cúuchiltal a cajtalile'ex, yéetel quin wa'alic te'exe', ma' bíin a ca'a ilene'exi' tac quéen kuchuc u kiinil a wa'alique'exe': Qui'iqui' t'anbil le máax cu taal tu kaaba' Yuumtzilo'.
Selectat acum:
LUCAS 13: MAYADC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Biblia Maya de Yucatán © Sociedades Bíblicas Unidas, 1992.
