LUCAS 10
10
Jesús cu túuxtic u láak setenta yéetel ca'a p'éel
1Cu dzo'ocol lela', Yuumtzil tu yéeyaj xan u láak setenta yéetel ca'a túul aj canbalo'ob, ca tu túuxtajo'ob ca'aca'a túulil táanil ti' u ti'al u xíimbalto'ob tuláacal le caajo'ob yéetel le cúuchilo'ob tu'ux yaan u bino'. 2Ca tu ya'alaj ti'ob: Jach tu jaajile' sen ya'ab le cool kaabéet u jo'ocholo', ba'ale' le j meyajo'obo' jach jun p'íito'ob. Le beetique' káat óolte'ex ti' u yuumil le coolo' ca u túuxt u láak meyajo'ob u ti'al joch. 3Xeene'ex; je'el túuna' tene' táan in túuxtique'ex bey j tamano'ob ichil j chacmo'olo'ob. 4Ma' a bisique'ex sáabucan mix taakin, mix xanab, mix a wa'atale'ex a tzique'ex mix máac te j bejo'. 5Le quéen ocoque'ex ti' jun p'éel naje', a'ale'ex táanil: Jéedzel ti' le naja'. 6Wa yaan máax cuxa'an ich jéedzel te'elo', cu kamic le jéedzelo', ba'ale' wa mina'ane' cu suut ti' te'ex. 7P'áatene'ex chéen te j najo', jaante'ex yéetel uke'ex le ba'ax cu dza'abal te'exo', tumen jun túul j meyaje' unaj u bo'ota'al. Ma' a máane'ex chi'ichi' naj. 8Le quéen kuchuque'ex ti' jun p'éel caaj cu kamique'exe', jaante'ex le ba'ax cun dzaabil te'exo'. 9Dza'ex u toj óolal le máaxo'ob koja'ano'ob te'elo' yéetel a'ale'ex ti'ob: U ajawil Kue' dzo'oc u náadzal ti' te'ex. 10Ba'ale' wa ca kuchle'ex ti' jun p'éel caaj tu'ux ma' táan a ka'amale'exe', jóokene'ex tu noj beelilo'ob ca a wa'ale'ex: 11Tac u lu'umil a caajale'ex dzo'oc u takal ti' c ooque' c púustic ta táane'ex. Ba'ale' ojéelte'ex lela', u ajawil Kue' dzo'oc u náadzal ti' te'ex. 12Quin wa'alic te'exe', tu kiinil juicioe' asab yaan u p'is mukyajil le jaadz cun u kam u caajil Sodomao' ti' le cun u kam le caajo'.
Ma' u'uyajt'aan caajo'ob
(Mt 11.20-24)
13¡Óotzile'ex Corazín! ¡Óotzile'ex Betsaida! Tumen wa ca beeta'ac ca'ach ti' u caajilo'ob Tiro yéetel Sidón le chíicula'alo'ob beeta'ab ichile'exa' bejela'a' úuch u kex u tuuculo'obe' yéetel dzo'oc ca'ach u cutalo'ob ichil u ta'anil káak u búuquintmajo'ob tóotoch nook. 14Ba'ale' tu kiinil juicioe' asab yaan u p'is mukyajil le jaadz cun u kam u caajilo'ob Tiro yéetel Sidón ti' le can a kame'exo'. 15Cux túun teech, Capernaum, ¿Táan wa a tucultic bin líiksa'aquech tac ca'an? Ma', ba'ale' tac metnal bíin éemsa'aquech.
16Tu ya'alaj xan ti' u aj canbalo'ob: Le máax u'uyique'exe' teen cu yu'ubiquen; le máax ma' tu kamiquene' ma' tu kamic le máax túuxteno'.
Sunajic le setentáo' yéetel ca'a túul
17Le setenta yéetel ca'a túul aj canbalo'obo' suunajo'ob yéetel qui'imac óolal, táan u ya'alico'ob: Yuumtzil, tac le kaakas pixano'ob cu yu'ubico'ob c t'aan ta kaaba'.
18Jesuse' tu ya'alaj ti'ob: Bey, tene' tin wilaj u lúubul satanas bey u léembal cháac cu yéemel ca'ane'. 19Tene' dzo'oc in dzáic te'ex páajtalil u ti'al a pe'echa'aktique'ex cano'ob yéetel síina'ano'ob, yéetel u ti'al a t'onquinsique'ex máax p'ecmaile'ex. Mixba'al cu páajtal u beetic te'ex kaas. 20Ba'ale' ma' u qui'imacchajal a wóole'ex tumen le kaakas pixano'ob cu yu'ubico'ob a t'aane'exo', ba'ale' qui'imacchajac a wóole'ex tumen dzíiba'an a kaaba'ex te j ca'ano'.
Cu qui'imacchajal u yóol Jesús
(Mt 11.25-27; 13.16-17)
21Ti' le jun súutuco' sen qui'imacchaj u yóol Jesús tu yo'olal Quili'ich Pixane' ca tu ya'alaj: Quin qui'iqui' t'antiquech in Taata, u Yuumtzil ca'an yéetel lu'um, tumen le ba'alo'ob ta we'esaj ti' le mejen paalalo'obo' ta ta'acaj ti' le aj caanbalnajo'ob yéetel ca'anal u na'ato'obo'. Bey úuchic in Taata, tumen bey ta wóoltilac teech.
22In Taatao' dzo'oc u kubic teen tuláacal ba'al. Mix máac kaj óoltmail máax le Paalo' wa ma' chéen le Taatao', mix máac xan kaj óoltmail máax le Taatao' wa ma' chéen le Paalo' yéetel le máaxo'ob cun u yóolt le Paal u dzáa u kaj óolto'obo'.
23Ca túun tu pactaj le aj canbalo'obo' ca tu ya'alaj chéen ti' leti'ob: Qui' yóol le máaxo'ob cu pactico'ob yéetel u yicho'obe' ba'alo'ob ca wilique'ex te'exa'; 24tumen quin wa'alic ti' te'exe' ya'ab aj bóobato'ob yéetel ajawo'ob tu yóoltaj u yilo'ob le ba'alo'ob ca wilique'ex te'exa', ba'ale' ma' tu yilajo'obi'; tu yóoltaj u yu'ubo'ob le ba'alo'ob ca wu'uyique'ex te'exa', ba'ale' ma' tu yu'ubajo'obi'.
U quet t'aanil jun túul samariail jach utz
25Ca j wa'alaj jun túul u aj ca'anbesajil le a'almaj t'aano'. U ti'al u túuntic u yóol Jesuse' ca tu káataj ti': Aj ca'anbesaj, ¿ba'ax unaj in beetic u ti'al ca yanac teen cuxtal mina'an u xuul?
26Jesuse' tu núucaj ti': ¿Ba'ax dzíiba'an ti' le a'almaj t'aano'? ¿Bix a xoquic?
27U aj ca'anbesajil le a'almaj t'aano' tu núucaj: Yaabilt Yuumtzil a Ku yéetel tuláacal a pixan, yéetel tuláacal a muuk, yéetel tuláacal a na'at; yaabilt a láak je'el bix ca yaabiltcaba'e'.
28Ca túun j a'ala'ab ti' tumen Jesús: jach tu beel ta núuquilac. Wa ca beetic beyo', bíin yanac teech cuxtal.
29Ba'ale' u aj ca'anbesajil le a'almaj t'aano' tu yóoltaj ba'atel t'aane', ca tu ya'alaj ti' Jesús: ¿Máax túun in láak?
30Ca j núuca'ab ti' tumen Jesús: Jun túul máac luk Jerusalene' táan ca'ach u bin Jerico, ca j lúub tu kab j ocolo'ob, ca j luksa'ab tuláacal ba'ax yaan ti', lo'oloxa'abe' ca j p'a'at kas quimen. 31Ti' lelo' j máan jun túul aj kiin te j bejo' ba'ale' chéen tu yilaje' ca j táadzmáani'. 32Bey xan jun túul levita kuch te cúuchilo', le ca tu yilaje' j táadzmáan xan. 33Ba'ale' jun túul Samariail cu máan xan te j bejo', le ca tu yilaje' tu ch'a'aj óotzilil ti'. 34Tu nadzajubáa tu yicnal le máaco', tu dzáaj aceite yéetel vino tu yajilo'obe', ca tu kaxláantaj. Cu dzo'ocole' tu na'acsaj yóokol u yalak ba'alche', tu bisaj ti' jun p'éel u najil u'ula'obe' ca tu canantaj. 35Tu láak kiin, u ti'al u binbal le Samariailo', tu jóokesaj ca'a p'éel taakine', tu dzáaj ti' u yuumil le najo', ca tu ya'alaj ti': Canant le máaca'; wa ca xupic u masile', le quéen suunaquene' quin sutic teech. 36Ma'alob túun, ¿bix a wilic? ¿máacalmáac ti' le óox túul máaco'ob u láak le máax lúub tu kab le j ocolo'obo'?
37U aj ca'anbesajil le a'almaj t'aano' tu ya'alaj: Le máax tu ch'a'aj óotzilil ti'e'. Ca j a'ala'ab ti' tumen Jesús: Xeen, beet teech xan beyo'.
Marta Yéetel Maríae' cu xíimbata'alo'ob tumen Jesús
38Ca'aliquil táan u bino'obe', j kuch Jesús ti' jun p'éel chan caaj. Te'elo' jun túul co'olel, Marta u kaabae', tu kamaj Jesús tu yotoch. 39Martae' yaan jun túul u yíidzin, María u kaaba', máax j culaj tu ni' yooc Jesús u yu'ub u ca'ansajo'ob. 40Ba'ale' Martae' saatal yóol ti' u sen meyaj, ca j taal tu yicnal Jesuse' ca tu ya'alaj ti': Yuumtzil, ¿ma' wa táan a wilic in wíidzine' u p'atmajen tin juunal yéetel tuláacal le meyaja'? A'al ti' ca u yáanten.
41Ba'ale' Jesuse' tu núucaj ti': Marta, Marta, ya'abcach ba'alo'ob satic a wóol yéetel cu dzáic teech yaayaj óolal. 42Ba'ale' chéen yaan jun p'éel ba'al jach kabéet. Maríae' u yéeymaj u jach ma'alobil, lela' ma' bíin luksa'ac ti'i'.
Selectat acum:
LUCAS 10: MAYADC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Biblia Maya de Yucatán © Sociedades Bíblicas Unidas, 1992.
