Hechos 2
2
U taalbal Quili'ich Pixan
1Le ca'a j kuch u kiinil Pentecostese', láaj much'ucbal le ocsaj óolo'ob ti' jun p'éelili' cúuchil. 2Ca j téec u'uya'ab túun jun p'éel ka'am juum cu taal te j ca'ano', je'el bix u taal u juum jun p'éel ka'amcach iike' ca tu chupaj tuláacal le naj tu'ux culucbalo'obo'. 3Ca j chíicpaj ti'ob bey u tóoch'bal káake', t'oxa'an tu yóokol jujun túulilo'ob. 4Ca láaj chu'upo'ob yéetel Quili'ich Pixan, ca jo'op' u t'aano'ob ichil jejeláas t'aano'ob, je'el bix u beeta'al u t'aano'ob tumen quili'ich Pixane'.
5Ti' le kiino'obo', ti' yano'ob Jerusalén Judíob cu dzo'ocbesico'ob ba'ax cu ya'alic le a'almaj t'aano', taalja'ano'ob ti' tuláacal u lu'umilo'ob u yóokolcaab. 6Le ca j u'uya'ab le juumo', j much'laj le máaco'obo', ma' tu caxtico'ob ba'ax u tuculto'ob, tumen tu jujun túulile' táan u yu'ubico'ob u yúuchul t'aan le t'aan síijico'obo'. 7Jaka'an túun u yóolo'ob táan u ya'alico'ob tu baatzilo'ob: ¿Ma' wa j galileailo'ob tuláacal le máaco'oba'? 8¿Bix túun anil táan c u'uyic u t'aano'ob ti' le t'aano'ob síijico'ono'?
9Waye' yaan Partiailo'ob, Mediailo'ob, Elamilo'ob, Mesopotamiailo'ob, Judeailo'ob, Capadociailo'ob, Pontoilo'ob, yaan xan u taalo'ob ti' u lu'umil Asiae', 10Frigia yéetel Panfilia, Egipto yéetel ti' le u caajilo'ob Africa yaan paachil ti' Cireneo', bey xan yaan Romailo'ob caja'ano'ob waye', dze'edzec ti'obe' judíob sijnalo'ob, u láako'obe' chéen tu kamajo'ob u ocsaj óolal le judíobo'. 11Yaan xan máaxo'ob Cretailo'ob yéetel Arabiailo'ob; ba'ale' tuláacalo'on t u'uyaj u tzicbaltico'ob u qui'ichquelem meyajo'ob Ku ichil le t'aan síijico'ono'.
12Láaj jaka'an u yóolo'ob, ma' táan u caxtico'ob ba'ax u tuculto'ob, tu káatajo'ob: ¿Ba'ax u káat ya'al le ba'ala'? 13Ba'ale' u láako'obe' jo'op' u p'a'aso'ob táan u ya'alico'ob: Ba'ax cu yúuchule' cala'ano'ob.
Ba'ax tu ya'alaj Pedro ti' le máaco'obo'
14Wa'alchaj túun Pedro yéetel le u láak once apóstolo'obo', ca j ka'am t'aanaj ca tu ya'alaj: U cajnáalile'ex Judea yéetel tuláacal le caja'ane'ex Jerusaleno', ojéelte'ex lela' yéetel u'uye'ex ma'alob le ba'ax quin in wa'al ti' te'exa'. 15Le máaco'oba' ma' cala'ano'obi' je'el bix ca tucultique'exo', tumen táant u dzáic las nueve kiine'. 16U jaajile' lela' leti' le ba'ax tu tze'ectaj le profeta Joel le ca tu ya'alaje':
17Ti' le u dzooc kiino'obo', cu ya'alic Ku,
bin in ca'aj in wec in Pixan tu yóokol tuláacal máaco'ob;
le xi'ipalalo'ob yéetel le x ch'úupalalo'obo' yaan u t'aano'ob tin wo'olal,
le táanquelem máaco'obo' yaan u ya'alico'ob ca'anilbe'en ba'alo'ob, le nuxibo'obxano' yaan u wayaktico'ob náayo'ob.
18Ti' le kiino'obo' yaan in wequic in Pixan tu yóokol in j palitzilo'ob yéetel in x palitzilo'ob,
u ti'al ca t'aanaco'ob tin wo'olal.
19Yaan in we'esic jakbe'en ba'alo'ob te j ca'ano', yéetel yaan in dzáic chíiculalo'ob way lu'ume':
kiik, káak yéetel u múuyalilo'ob buudz.
20Le kiino' yaan u éekjoche'enchajal yéetel le ujo' yaan u suut bey ki'ike'
ma'ili' kuchuc u kiinil Yuumtzil, tumen le kiino' jun p'éel nojoch yéetel qui'ichquelem kiin.
21Tuláacal túun le máax cun u ch'a'a chi'it u kaaba' Yuumtzile' yaan u to'ocol.
22U'uye'ex túun, u cajnáalile'ex Israel, le ba'ax quin in wa'ala': Jesús Nazaretile', jun túul j xiib jaajcunta'ab tumen Ku ta táane'ex, tumen yéetel u kabe' Kue' tu beetaj nucuch jakbe'en chíiculalo'ob ichile'ex je'el bix ma'alob a wojelile'exo'. 23Mix yéetel beyo' le ca j ku'ub ti' te'ex je'el bix tu tucultaj yéetel tu nu'uctaj Ku ma'ili' úuchuque', te'exe' ta mache'ex yéetel ta quiimsaje'ex, tumen ta sinaje'ex ti' cruz yéetel u kab kaakas máaco'ob. 24Ba'ale' Kue' tu ca'a púut cuxquintaj, ca tu tocaj ti' u páajtalil le quíimilo', tumen ma' páatji u dzáancha'ata'al tumen le quíimilo'. 25Je'el bix tu ya'alaj ajaw David le ca j t'aanaj tu yo'olal Jesús:
Mantadz táan in wilic Yuumtzil tin táan, leti'e' ti' yaan tin x no'oje',
u ti'al ma' u beeta'al in quiquilanquil ti'olal mix ba'al.
26Le o'olale' chuup yéetel qui'imac óol in pucsi'ikal, beyxan tin wa'alaj u t'aanilo'ob qui'imac óolal.
Le o'olal xane' in wíinclile' yaan u je'elel ich alab óolal;
27tumen teche' ma' bíin a p'at in pixan ichil le quimeno'obo',
mix bíin a cha'a u kastal u wíinclil le a palitzil a yaabiltmaja'.
28Ta we'esaj teen u bejilo'ob cuxtal, bíin xan a chupen
yéetel qui'imac óolal tumen yaan a wantal tin wéetel.
29Sucu'une'ex, jun p'éel ba'al jach t'áalcab yanil, le c úuchben láakal Davido' j quíimi ca j mu'uqui, u mucnale' ti' yaan ichilo'on tac bejela'e'. 30Ba'ale' Davide' jun túul bóobat, yéetel u yojele' a'ala'an ti' tumen Ku yéetel kax t'aane' jun túul ti' u ch'i'ibale' bíin culac tu jalach káanche' lela' leti' le Cristo'. 31Le o'olal Davide', j t'aanaj bey táan u yilic ma'ili' úuchuque', j t'aanaj tu yo'olal u ca'a púut cuxtal Cristoe' ca tu ya'alaj: Ma' j p'a'at u pixan ti' u cúuchil le quimeno'obo' mix kaschaj u wíinclili'. 32Kue' tu ca'a púut cuxquintaj Jesús, lela' tuláacalo'on c jaajcuntic, 33Bey túuno' j líiksa'ab tumen u x no'oj kabil Ku, ca tu kamaj ti' le taatao' le Quili'ich Pixan a'ala'ab u dza'abalo'; yéetel tuláacal le ba'alo'ob dzo'oc a wilique'ex yéetel a wu'uyique'ex ti' leti' u taal. 34Tu jaajile' ma' David máax na'ac ca'ani'; tumen leti'e' tu ya'alaj: Yuumtzile' tu ya'alaj ti' in Yuumtzil: Culen tin x no'oj, 35tac quéen in dzáa a aj p'eeco'ob tu yáanal a wooc.
36Tuláacal u cajnáalilo'ob Israel unaj u yojéeltico'ob, x ma' ca'a p'éel óolalil, le Jesús máax ta sinaje'ex ti' cruze', beeta'ab Yuumtzil yéetel Cristo tumen Ku.
37Le ca tu yu'ubajo'ob lela', yaachaj u yóol u pucsi'ikalo'ob, ca tu káat chi'itajo'ob ti' Pedro yéetel ti' u láak apóstolo'ob: C sucu'une'ex ¿ba'ax unaj c beetic?
38Pedroe' tu núucaj ti'ob: Kex a tuucule'ex tu táan Junab Ku, yéetel ocja'anene'ex tu jujun túulile'ex tu kaaba' Jesucristo, u ti'al ca sa'atsa'ac a kebane'ex; bey túuno' Kue' bíin u dzáa te'ex xan le Quili'ich Pixano'. 39Le ba'ax a'ala'ana' a ti'ale'ex yéetel u ti'al a paalale'ex, u ti'al xan tuláacal le máaxo'ob náach yanilo'obo'; u ti'al tuláacal le máaxo'ob u káat c Yuum Ku u t'aano'obo'.
40Yéetel le t'aano'oba' bey xan yéetel u láak t'aano'obe', Pedroe' tu tzolaj u xiquino'ob, táan u ya'alic: Tzelaba'ex ti' u loolob wíiniquilo'ob kiino'oba'.
41Bey túuno' le máaxo'ob tu yu'ubajo'ob u tze'eque' ocja'anajo'ob; ti' le kiino' yanchaj míin tres mil máaco'ob u nupuba'ob ti' le ocsajóolo'obo'. 42Tuláacalo'ob j p'áato'ob yéetel chuca'an óolal ti' le ba'ax cu ca'ansico'ob le apóstolo'obo'. cuxlajo'ob yéetel nup óolal tu baatzilo'ob, yéetel cu much'talo'ob u ti'al payalchi' bey xan u ti'al u xet'o'ob le waajo'.
Bix cuxlajico'ob le yáax j ocsaj óolo'obo'
43Tuláacalo'ob láaj jaka'an u yóolo'ob, tu yo'olal le ya'ab jakbe'en ba'alo'ob bey xan le chíiculalo'ob j beeta'ab tumen le apóstolo'obo'. 44Tuláacal le ocsaj óolo'obo' jun múuch' yanilo'ob yéetel cu múuch' ti'alintico'ob u ba'aluba'ob. 45Cu conico'ob u lu'umo'ob yéetel tuláacal ba'ax yaan ti'obe', cu dzo'ocole' cu t'oxico'ob u taakinil je'el bix kabéetil ti'jujun túulile'. 46Sáamsamal cu múuch'taalo'ob kulnaj yéetel jun p'éelili' tuucul; te j najo'obo' cu xet'ico'ob waaj cu múuch' jantico'ob xan u janalo'ob ich qui'imac óolal yéetel cabal óolal. 47Cu qui'iqui' t'antico'ob Yuum Ku, utz u yila'alo'ob xan tumen tuláacal máac. Yuumtzil túune' sáamsamal cu nupic ti' le iglesiao' le máaxo'ob cu to'ocolo'obo'.
Selectat acum:
Hechos 2: MAYADC
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Biblia Maya de Yucatán © Sociedades Bíblicas Unidas, 1992.
