JENESIS 21
21
Ka jingkha ïa u Isaak
1Bad U Trai u la wan-i ïa ka Sara kumba u la lah ong, bad U Trai u la leh ïa ka Sara kumba u la lah ong. 2#Heb. 11:11.Namar ka Sara ka la punkhun, bad ka la kha ïa u khun ïa u Abraham ha ka jinglong tymmen jong u, ha kata ka Ïa keiñ ba la buh ïa kaba U Blei u la lah ong ha u. 3Bad u Abraham u la khot kyrteng ïa la u khun ba la kha ïa u, ïa uba la kha ka Sara ïa u, “u Isaak”. 4#Jen. 17:12; Ki Kam. 7:8.Bad u Abraham u la otsher ïa u Isaak u khun jong u haba u dang long phra sngi ka rta, kumba la lah hukum U Blei ïa u. 5Bad u Abraham u la long uba shispah snem ka rta, mynba la kha ha u ïa u Isaak u khun jong u. 6Te ka Sara ka la ong, “U Blei u la pynrkhie kmen ïa nga, bad baroh kat kiba ïohsngew kin ïarkhie kmen lem bad nga.” 7Ka la ong ruh, “Hato uei u ban da lah ong ha u Abraham, ba ka Sara kan da la ai buiñ ïa ki khun? naba nga la kha ïa u khun ïa u ha ka jinglong tymmen jong u keiñ.” 8Bad uta u khun khynnah u la nang san, te la pyniehnoh buiñ ïa u bad u Abraham u la thaw ka jingkhawai kaba khraw ha kata ka sngi ba la pyniehnoh buiñ ïa u Isaak.
Ka jingbeh noh ïa ka Hagar bad ïa u Ishmael
9Bad ka Sara ka la ïohi ïa u khun ka Hagar, kata ka kynja Ijipt, ïa uba ka la lah kha ïa u Abraham, ba u da rkhiebeiñ. 10#Gal. 4:29-30.Namar kata, ka la ong ha u Abraham, “To da beh noh ïa kane ka mraw bad ïa u khun jong ka: naba u khun jong kane ka mraw un ym long uba ïoh bynta lem bad u khun jong nga, bad u Isaak keiñ.” 11Te kane ka ktien ka la pynsngewsih shikatdei eh ïa u Abraham na ka bynta u khun jong u. 12#Rom. 9:7; Heb. 11:18.Hynrei, U Blei u la ong ha u Abraham, “Wat ai ba yn pynsngewsih ïa me na ka bynta uta u samla, bad na ka bynta ka mraw jong me; ha kiei kiei baroh ba ka Sara ka la ong ha me, to da pynshahshkor keiñ ïa ka ktien jong ka; naba ha u Isaak yn khot u symbai jong me. 13Bad shaphang u khun jong kata ka mraw ruh ngan pynlong ka jaid bynriew ïa u, namar u long u symbai jong me keiñ.” 14Ynda kumta, u Abraham u la khie dang step eh, bad u la shim ïa u kpu, bad ïa ka um shi lywa snieh, u la ai ruh ïa ki ha ka Hagar, u da buh ïa ki ha ka tyrpeng jong ka, bad ïa uta u khynnah ruh, bad u la phah noh ïa ka: ka ruh ka la leit noh, bad ka la ïaid sakma ha ka ri khlaw Beer-sheba.
15Te kata ka um ka la lut noh ha kata ka lywa snieh, ka te ka la buh ïa uta u khynnah hapoh kawei ka bniap. 16Bad ka la leit shong weibriew kham jngai marpyrshah ïa u, kumba shi sien siat khnam: naba ka la ong, “Ngam lah ban khmih ïa uto u khynnah haba un sa ïap noh.” Kumta, ka la shong marpyrshah ïa u, bad ka la pynjam eh ïa la ka ktien, ka da ïam ruh. 17Te U Blei u la ïohsngew ïa ka jingud lynñiar uta u khynnah; bad u angel U Blei u la khot ïa ka Hagar na bneng, bad u la ong ha ka, “Ka la jia aïu ïa pha Hagar? to wat sheptieng ho; naba U Blei u la ïohsngew ïa ka jingud lynñiar u khynnah nangtai ha kaba u don keiñ. 18To da ïeng mih noh, to da shim kynthup ïa u khynnah, bad to da bat ïa u ruh da la ka kti; naba ngan pynlong ïa u ka jaid bynriew kaba khraw.” 19Bad U Blei u la pynpeit ïa ki khmat jong ka, hadien kata, ka la ïohi ïa kawei ka pukri ba-mih umpohliew; bad ka la leit bad ka la pyndap ïa la ka lywa snieh da ka um, bad ka la ai ha uta u khynnah ba un dih. 20Bad U Blei u la long ryngkat bad uta u khynnah; te u la nang ïoh bor, bad u la shong sah ha kata ka ri khlaw, bad u la long u nongrah ryntieh. 21Bad u la shong sah ha ka ri khlaw Paran: bad ka kmie jong u ka la shim ka tnga ïa u na ka ri Ijipt.
Ka jutang hapdeng u Abraham bad u Abimelekh
22 #
Jen. 26:26. Ka la jia ruh mynkata, ba u Abimelekh bad u Phikhol u nongïalam barangbah, u paidïapom jong u, ki la ïakren ha u Abraham, ki da ong, “U Blei u long bad me ha kiei kiei baroh ïa kiba me leh: 23te mynta, namar kata, to smai noh ha nga hangne ha ka kyrteng U Blei ba men ym leh shukor ïa nga, lymne ïa u khun jong nga, lymne ïa u ksiew jong nga: hynrei, kat kum kata ka jinglehsbun ïa kaba nga la leh ïa me, ba me men leh kylliang pat ïa nga, bad ïa ka ri ha kaba me la shong nongwei.” 24Bad u Abraham u la ong, “Ngan smai keiñ.”
25Bad u Abraham u la sneng ïa u Abimelekh shaphang ka pukri um, ïa kaba ki shakri jong u Abimelekh ki la lah ïaknieh da ka bor. 26Te u Abimelekh u la ong, “Nga ngam shym la tip mano ba la leh ïa kane: ma me hi ruh mem shym la ïathuh keiñ ha nga, nga ruh ngam shym la ïohsngew shaphang kata, hynrei, tang ha kane ka sngi.” 27Ynda kumta, u Abraham u la shim ïa ki langbrot bad ïa ki masi, bad u la ai ïa ki ha u Abimelekh; bad ki la ïathaw ïa ka jutang baroh ar ngut. 28Bad u Abraham u la buh kyrpang hynñiew tylli ki khun langbrot kynthei na ka kynhun. 29Ynda kumta, u Abimelekh u la ong ha u Abraham, “Hato ïa-ei kine ki hynñiew tylli ki khun langbrot kynthei ïa kiba me la buh kyrpang?” 30U ruh u la ïathuh, “Naba ïa kine ki hynñiew tylli ki khun langbrot kynthei men shim ma me keiñ na ka kti jong nga, ïa ka ban long ka sakhi ha nga, ba long ma nga uba la tih ïa kane ka pukri.” 31#Jen. 26:33.Namar kata, u la khot kyrteng ïa kata ka jaka “ka Beer-sheba”; namar ba hangta ki la ïasmai baroh ar ngut. 32Kumta keiñ, ki la ïathaw ïa ka jutang ha Beer-sheba: ynda kumta, u Abimelekh, bad u Phikhol u nongïalam barangbah u paidïapom jong u, ki la ïamih joit, bad ki la ïaleit phai pat sha ka ri ki Philistia. 33Bad u Abraham u la thung ïa ka 'law kyntang ha Beer-sheba, bad hangta u la khot ha ka kyrteng U Trai, uba U Blei bymjukut. 34Bad u Abraham u la shong nongwei bun sngi eh ha ka ri ki Philistia.
Selectat acum:
JENESIS 21: KHB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India