JENESIS 14
14
U Abram u pyllait im ïa u Lot
1Ka la jia ruh ha ki sngi jong u Amraphel u syiem ka Shinar, u Ariokh u syiem ka Ellasar, u Khedorlaomer u syiem ka Elam, bad u Thidal u syiem ki Goiim; 2ba kine ki la ïaleh thma bad u Bera u syiem ka Sodom, bad u Birsha u syiem ka Gomorra, u Shinab u syiem ka Admah, bad u Shemeber u syiem ki Seboim, bad u syiem ka Bela ruh de, kaba long ka shnong Soar. 3Kine baroh, ki la ïashem lang ha ka pynthor Siddim, kaba long ka Duriaw Mluh. 4Haduh khat-ar snem ki la lah ïakohnguh ïa u Khedorlaomer, hynrei, ha ka bakhatlai ka snem ki la ïaleh thma ïa u. 5Bad ha ka bakhatsaw ka snem, la wan u Khedorlaomer, bad kita ki syiem kiba la long ryngkat bad u, bad ki la ïashoh noh ïa ki Rephaim ha Ashteroth Karnaim, bad ïa ki Sus ha Ham, bad ïa ki Emim ha ka 'dewmadan ka shnong Kiriathaim, 6bad ïa ki Hor ha u lum Seir jong ki, haduh ka 'dewmadan jong ka Paran, kaba hajan kata ka ri khlaw. 7Te ki la ïawan phai noh, bad ki la ïapoi ha En-mishpat, kaba long ka Kadesh, bad ki la ïashoh noh ïa ka ri baroh kawei jong ki Amalek, bad ïa ki Amor ruh de, kiba la ju ïashong sah ha Hasson-tamar.
8Te la mih ruh u syiem ka Sodom, bad u syiem ka Gomorra, bad u syiem ka Admah, bad u syiem ki Seboim, bad u syiem ka Bela, kaba long ka Soar; bad ki la ïaïeng riang ban ïapom bad kita ha ka pynthor Siddim; 9kata ka long pyrshah ïa u Khedorlaomer u syiem ka Elam, bad ïa u Thidal u syiem ki Goiim, bad ïa u Amraphel u syiem ka Shinar, bad ïa u Ariokh u syiem ka Ellasar; ki saw syiem kiba ïaleh ïa ki san. 10Bad ka pynthor Siddim ka la dap da ki thliew bsiang; bad ki syiem ka Sodom bad ka Gomorra ki la ïaphet ïap, bad ki la ïahap ruh ha kita; te kita kiba la dang sah ki la ïaphet ïap sha ki lum. 11Bad ki la ïarong noh ïa ka spah baroh jong ki Sodom bad Gomorra, bad ïa kiei kiei ki kynja jingbam baroh jong ki, hadien kata, ki la ïaleit noh. 12Bad ïa u Lot, uba shong ha Sodom, u khunruid jong u Abram, bad ïa ka spah jong u ruh, ki la ïashim noh, hadien kata, ki la ïaleit noh.
13Te la wan u nongphet ïap uwei, bad u la ïathuh ha u Abram u Hebru, uba la shong hajan ki dieng Sning u Mamre u kynja Amor, u para u Eshkol, bad u para u Aner: bad kine ki la ïasylla lok bad u Abram. 14Bad ynda u Abram u la ïohsngew ba la kem mraw ïa u khunruid jong u, u la phah kieng atiar ïa ki shakri jong u ïa kiba la lah ïoh hikai, bad ba la kha ïa ki ha ïing jong u hi, ïa laispah bad khatphra ngut, te u la beh ïa kita haduh ka shnong Dan. 15Bad u la pynïakhlad ïa lade ban ïaleh ïa ki, ma u bad ki shakri jong u mynmiet, bad u la shoh noh ïa ki, bad u la beh noh ïa ki, haduh ka Hobah, kaba long sha kadiang ïa ka Damaskos. 16Bad u la wallam pat ïa kata ka spah baroh, bad ïa u Lot ruh u khunruid jong u, bad ïa ka spah jong u ruh, u la wallam pat keiñ, bad ïa ki kynthei ruh de, bad ïa u paidlang.
U Melkhisedek u kyrkhu ïa u Abram
17Te u syiem ka Sodom u la wan tan ïa u Abram haba u wan phai na kaba shoh noh ïa u Khedorlaomer, bad ïa kita ki syiem kiba la don lem bad u, ha ka pynthor Shabeh, kaba long ka pynthor u syiem. 18#Heb. 7:1-10.Bad u Melkhisedek u syiem ka Salem u la wallam ïa u kpu bad ïa ka umsoh Waiñ: bad u la long u lyngdoh jong U Blei U Bahalor Tam Eh. 19Te u la kyrkhu ïa u, bad u da ong,
“To long ba la kyrkhu
ïa u Abram
na U Blei U Bahalor Tam Eh,
U Trai ka bneng
bad ka khyndew:
20bad to long ba la kyrkhu
ïa U Blei U Bahalor Tam Eh,
uba la aiti noh
ïa ki nongshun jong me
ha ka kti jong me.”
Te u Abram u la ai ïa kaba shiphew bynta ha u na ka jinglute baroh. 21Bad u syiem ka Sodom u la ong ha u Abram, “To ai ha nga tang ïa kita ki briew, te ïa kita ki mar to shim ha lade keiñ.” 22Te u Abram u la ïathuh ha u syiem ka Sodom, “Nga la kyntiew ïa la ka kti sha U Trai, uba U Blei U Bahalor Tam Eh, uba U Trai ka bneng bad ka khyndew, 23ba ngan ym shim ei ei ruh em na ka jong me baroh, naduh iwei i ksai haduh i jingteh ka juti; ba ïoh men ong, ‘Nga la pynriewbha ma nga ïa u Abram.’ 24Tang ïa kata hi ïa kaba la bam kita ki samla, bad ïa ka bynta kita ki briew kiba la ïaleit ryngkat bad nga, u Aner, u Eshkol, bad u Mamre; to shah ba kin ïashim ïa la ka bynta.”
Selectat acum:
JENESIS 14: KHB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The Bible Society of India