MATIU 10
10
A kaihora kokona hangavulu dongwana kairua
(Mak 3.13-19; Luk 6.12-16)
1I Jisas mo kware tabulutaki na nona ngwalagelo hangavulu dongwana kairua, mo bete a huirana lakwara kwara rana bakoto kinia rana livu letiuki na tanungwe hati, vake rana vakahiki na lengeana vatahae. #a Mak 6.7; Luk 9.1; b Mat 9.35; Mak 1.34; Luk 7.21
2A hina na kaihora* kokona hangavulu dongwana kairua aira hika. Tomuaki i Saemon, u kwareki i Pita, mai tuana i Aduru. Vunu i Semis mai tuana i Sione, i rarua i raranatu i Seveti. #Sione 1.40-41 3Vunu i Viliv, i Batolomiu, i Tomas, mai Matiu a tangaloi* na vilevile mane* a takis nona kavman. Vunu i Semis i natu i Alveas, i Tateas, #Sione 1.43 4mai Saemon hinea aia katukwale tina tangaloi* aira hi ramo karohuri na vanua noi God, a vanua Isrel*. Vunu i Sutas Iskariot, aia hini mo tovo kai Jisas lakwa na nona tavaluivuro. #Mat 26.25; 27.3; Mak 14.44; Sione 6.64; 12.4; 13.11; 18.2,5
I Jisas mo hora na nona kaihora kokona hangavulu dongwana kairua tivarea
(Mak 6.7-13; Luk 9.1-6)
5I Jisas mo hora na tangaloi hi hangavulu dongwana kairua tivarea mana leo hokinia hika. Mo viti lakwara kwara, “Tulu hatu vano vaki lo vanua na tangaloi tavalavarea tina gwaloana noi Isrel, diko vaki lo gwatuivanua na ngwera Sameria*. 6Vae tulu vano vaki mana gwaloana noi Isrel*. Aira hoki na sivsivi hinea rau sala. #Jer 50.6; Mat 15.24 7Tulu vano tulu heretuva tulu viti ‘A taro hinea i God ne hugwe koro na bulana tangaloi u garagarani.’ #Mat 3.2; 4.17; Luk 10.9,11 8Tulu vakahikinira hinea rau lenga, tulu rakatira hinea rau mate, tulu vai a tangaloi hinea a lengeana hati na vinu #10.8: A lengeana hati na vinu. Kona tagai na leo hi mana domianaki lo 8.2 lo leo hinea evina halaradu. u vaira rana ngwasara, vake tulu livu letiuki na tanungwe hati maira. A huirana hi lumiu tulu he volia tea, vae tulu ne boloki kinia a tangaloi rana hatu volikamu huri. 9Tulu hatu hago mane* lolo nomiu baos. 10Tulu hatu hago tanga huri halamiu, diko te lugwamiu vake, diko te kaikwokwori na garumiu vake, diko te kaitiko. A tangaloi mo boloki lakwa na tangaloi, u taritarisa lakwa na tangaloi vano hi kwara rana vangania. #Luk 10.4; Nam 18.31; Luk 10.7; 1 Kor 9.14; 1 Tim 5.18
11“Lolona tulu mo vano vaki lo gwatuivanua lakua diko kelekele, tulu ne taga kwara ihe tea u lagwa kwara ne lai tabetabekikamu tulu ne hugu maia tarisaki hi tulu ne vano tina vanua hi. 12Lolona tulu mo soro tilolo ingwa, tulu mo viti kwara, ‘A magemuana ne eno maikamu.’ 13Diko a tangaloi lolo ingwa hini ramo lai tabetabekikamu, tulu tiraki na nomiu leo karekarea na magemuana ne eno maira. Vae diko rahe lai tabetabekikamu tea, tulu tuku nomiu leo karekarea tiura. #Luk 10.5-6 14Vae diko te tokakivanua, diko te gwatuivanua nehe lai tabetabekikamu tea, tulu mo tiraki na vanua hini, tulu mo gahaki na gwia tina garumiu tau eia, vae rana kikilai kwara tulu halebohi tiura. #Bol 13.51 15Kareaki na viti lakwakamu, lo Rani na Arekiana #10.15: Rani na Arekiana. Kona taga A RANI NONA HUGWE lo Deksenare lo buku hika takuni. i God ne areki na tangaloi lo gwatuivanua Sotom maia Gomora vae ne areki na tangaloi lo gwatuivanua hi siletirarua.” #Luk 10.10-12
A tangaloi rana vai bulakikikamu
(Mak 13.9-13; Luk 21.12-17)
16Vunu i Jisas mo viti kwara, “Tulu rongo. Nu horakamu hoki na sivsivi vaki mana kwiriu ovi maira. Tulu tagahuri ne karea hoki na ngwata, vae tulu loli tabetabeki hoki na ngwaki. #a Luk 10.3; b Sione 10.12; Bol 20.29; d Rom 16.19 17Tulu tagahuri, huri a tangaloi rana kwiribibikamu rana lavikamu vaki lo nako na tangaloi tovotovo kwara rana arekikamu rana takwilikamu lolo noga vale* na tiutangaroa maira. 18Rana lavikamu rana kahi haro na doridorimiu koro na nako na tangaloi lalakua mana hugwe lalakua huriau. Vunu tulu ne matangwasaraki lavi na Roro Karea lakwara mana tangaloi tavalavarea tina gwaloana noi Isrel*. #a Mak 13.9; Luk 21.12-13; b Mat 24.14 19Diko rana lavikamu kwara rana kahi haro na doridorimiu hokinia hi, a domimiu ne hatu kwalao laliki kwara tulu ne viti aha, diko tulu ne viti kworohokinia. Tulu ne viti a hava leo a Tanungwe Kokona ne bete lakwakamu lo taroki hi vohoki, 20huri a leo vano hi tulu ne viti hete nomiu, rana vanamai tina Tanungwe noi Tamamiu hinea ne kwaha lalahikamu. #Luk 12.11-12
21“A tangaloi rana tovo matematei ratuaga vohoki kwara rana va mate. A tama rana vai kwehini lakwai raranatuga. A raranatu rana halebohi vovohi ratamaga mai raretahiga rana tovo matemateira. #Maeka 7.6 22Savi na tangaloi rana bega kikamu huriau. Vae ihe hi ne tu madimadi vaki lo gwereki aia ne ahi. #Mat 24.9; Mat 24.13 23Lolona rana vai bulakikikamu lo gwatuivanua katukwale, tulu kwalao vaki luna kairuaki. Na viti lakwakamu, tulu nehe vai vunuhi na nomiu bolokiana tea lo gwatuivanua savia Isrel, vae i nau, a Natu* na Tangaloi, na vanamai. #Mat 16.27-28; 24.27,30,37,44; 25.31; 26.64; Mak 13.26; 14.62; Luk 9.26; 17.30; 18.8; 21.27
24“A ngwalagelo he lakua sileti na nona tisa tea, vake a tangaloi boloki he lakua sileti na nona hugwe tea. #Luk 6.40; Sione 13.16; 15.20 25Vae u karea kwara a ngwalagelo hi ne mulemai hoki na tangaloi hi mo toko huhuia. Vunu vake, u karea kwara a tangaloi boloki hi ne mulemai hoki na nona hugwe. Diko a tangaloi rau kwahakwaha hati vovohi na hugwe na ingwa, rau kwarekinia i Bielsebal, hinea a hina na hugwe na tanungwe hati maira, vae rana kware na raranatu na hugwe na ingwa hi kina hina rau hati siletia hi.”
A tangaloi noi Jisas rana hatu mataku kina tangaloi
(Luk 12.2-7)
26I Jisas mo viti vake kwara, “Tulu hatu mataku kina tangaloi maira. A havakinau hinea a tangaloi u gui koroa vae i God ne ragahia, vatavataha na kinau a tangaloi rau tavunikinira vae i God ne taura vaki na ngwasara. #Mak 4.22; Luk 8.17 27A havakinau hini nu viti lakwakamu lolo bongi tulu ne viti taliku lolo rani, a havakinau hi tulu mo rongo tavuniki tulu viti talahaki tivarea lakwa na tangaloi rana rongo. 28Tulu hatu mataku kinira hinea rana kwohi matei na tarabehi, vae ranahe kwohi lavi na tanungwe tea, vae tulu mataku ki God, hinea ne vai lai ne magaraki na tarabehi mana tanungwe lolo kabu na kakadiki. #Sem 4.12 29Tulu domidomi lo kinau hika. Tulu ne voli lavi na manu kairua kwaririgi kina selen kaiono, vae diko i Tamamiu he tirakinia tea, hete kwara te katukwale tiura ne sovi tilo tano. 30Vae i kamu, a vulu na gwatumiu vake i God u valu savira u rovo ba. #1 Saml 14.45; Bol 27.34 31Vae tulu hatu mataku. I kamu tulu karekarea sileti na manu rusa.” #Mat 6.26; 12.12
A tangaloi rau huri i Jisas vae rana matangwasaraki kwara aira a nona tangaloi
(Luk 12.8-9)
32Vunu i Jisas mo viti kwara, “Ihe tea hinea rau viti matangwasarakiau lolo nako na tangaloi kwara aira a nogu, na vai kwehini vake hurira koro na nako i Tamagu lolo taetae. #Rev 3.5 33Vae ihe tea hinea rau viti tivarea lolo nako na tangaloi kwara aira hete nogu, i nau na viti tivarea vake kwara aira hete nogu, koro na nako i Tamagu lolo taetae.” #Mak 8.38; Luk 9.26; 2 Tim 2.12
I Jisas ne vai na tangaloi rana makwahekwahe
(Luk 12.51-53; 14.26-27)
34I Jisas mo viti “Tulu hatu domi kwara nu vanamai kwara na bete na magemuana lakwa na tangaloi na varamana. Nohe vanamai tea kwara na bete na magemuana kehekeheki, vae nu vanamai vake kwara na vai na tangaloi rana makwahekwahe rana vai vuro. 35Nu vanamai kwara a raranatu ngwera rana domi bulakiki i ratamaga, a raranatu vavine rana domi bulakiki i raretahiga, a ragwelika vavine rana domi bulakiki i ratubuga vavine. 36A tangaloi a nona tavaluivuro rana hati karakara, aira hinea lo nona vakabela vohoki. #Maeka 7.6
37“Ihe hi u lagwa mai tamana diko i retahina siletiau, he taritarisa tea kwara ne kwareki nogu tangaloi. Ihe hi u lagwa mai natuna a ngwera diko a vavine siletiau, he taritarisa tea kwara ne kwareki nogu tangaloi. #Dut 33.9 38Ihe hi he kwali na kaibetuna tea kwara ne huri na tanoi-garugu, he taritarisa tea kwara ne kwareki nogu tangaloi. #Mat 16.24; Mak 8.34; Luk 9.23 39Ihe hi u domidomi haburu huri na mamaurianana ne vakasalakinia, vae ihe hinea ne tiraki na mamaurianana huriau ne lavi na ahiana.” #Mat 16.25; Mak 8.35; Luk 9.24; 17.33; Sione 12.25
A kaitakwe
(Mak 9.41)
40Vunu i Jisas mo viti lakwara kwara, “Ihe hi u lai tabetabekikamu, u lai tabetabekiau. Ihe hi u lai tabetabekiau, u lai tabetabekinia hinea mo horeau. #a Mak 9.37; Luk 10.16; Sione 13.20; b Mat 18.5; Sione 12.44; Gal 4.14
41“Ihe hi u lai tabetabeki na tangaloi* duruduruki huri u kikilai kwara aia a tangaloi duruduruki, vae ne lai a kaitakwe ne taritarisa mana tangaloi duruduruki. Ihe hi u lai tabetabeki na tangaloi bakoto huri u kikilai kwara aia a tangaloi bakoto, vae ne lai a kaitakwe ne taritarisa mana tangaloi bakoto. #1 King 17.9-24; 2 King 4.8-37 42Kareaki na viti lakwakamu, ihe hi u bete a laha na kwai kangwkangwa vohoki lakwa na tangaloi vuroki te katukwale tiura hika hinea ramo huriau, huri u kikilai kwara aia a nogu ngwalagelo, kareaki aia ne hagwe na kaitakwena huri.” #Mak 9.41
Selectat acum:
MATIU 10: HWT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Havakinau New Testament © Bible Society of the South Pacific, 2016.
