Matfey 3
3
İoan Vaatizedicinin nasaadı
1O vakıt geler İoan Vaatizedici İudeyanın çoluna da nasaat eder,
2deyip: «Dönün Allaha günahlarınızdan, zerä yaklaştı Gök Padişahlıı!»
3İoan odur, kimin için haberlediydi prorok İsaya: «Baaranın sesi çol erdä işidiler: „Saabiyä yolu hazırlayın, yolcaazları uzladın“».
4İoan giiyimniydi devä yapaasından rubaylan hem kuşanıktı deridän kayışlan. Onun imeesi – çekirgelär hem kır arı balı.
5İnsannar İerusalimdän, bütün İudeyadan hem İordanın dolaylarından çıkardılar ona.
6Vaatiz olardılar ondan İordan deresindä, açıklayarak kendi günahlarını.
7Açan İoan gördü çok farisey hem sadukey, ani ona gelärdilär, vaatiz olsunnar deyni, o dedi onnara: «Yılan yavruları, kim üüretti sizi, kaçasınız Allahın gelär üfkesindän?
8Yapın yakışıklı meyva, görünsün, ani döndünüz Allaha günahlarınızdan.
9Boşuna düşünmeyin, deyip: „Bizim bobamız – Avraam“, zerä söleerim sizä, ani Allah bu taşlardan var nasıl yapsın uşak Avraama.
10Artık nacak fidannarın kökündä saplı durêr. Herbir fidan, ani getirmeer ii meyva, kesilecek da ateşä atılacek.
11Bän sizi suylan vaatiz ederim, gösterilsin, ani döndünüz Allaha günahlarınızdan, ama bendän sora gelän – bendän taa kaavi. Bän diilim yakışıklı taşımaa Onun ayak kaplarını. O sizi Ayoz Duhlan hem ateşlän vaatiz edecek.
12Onun elindä kürek, O paklayacek tınazını. Boodayı toplayacek ambara, ama plävayı yakacek süünmäz ateştä».
İisus vaatiz olêr
13O vakıt İisus geldi Galileyadan İordan deresinä İoana, vaatiz olsun ondan deyni.
14İoan durgudardı Onu, deyip: «Bän lääzım Sendän vaatiz olayım, Sän sa bana gelersin?»
15Ama İisus ona cuvap etti: «Brak şindi, zerä bölä düşer, tamannayalım hepsini, ne dooru». Ozaman İoan braktı Onu, vaatiz olsun.
16Açan İisus vaatiz oldu da çıktı su içindän, gök açıldı da İoan gördü Allahın Duhunu, Angısı inärdi bir guguş gibi hem konardı İisusun üstünä.
17Göktän işidildi bir ses, ani dedi: «Budur Benim sevgili Oolum, Onda Benim isleeliim».
Selectat acum:
Matfey 3: GagNTL
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Bіblіyayı çevіrän İnstіtut, Moskva, 2006
