Luka 23
23
İisus kullanıcı Pilatın önündä
1Ondan sora hepsi kalktılar da İisusu Pilata götürdülär.
2Başladılar Onu kabaatlandırmaa bölä laflarlan: «Biz bulduk bu Adamı, bizim insanı kızıştırarkan kalkınmaa hem durgudarkan, harç ödämesinnär Kesara. O kendini sayêr Hristos – Padişah».
3Pilat sordu: «Sänsin mi İudeylerin Padişahı?» «Ölä, nicä söleersin», – cuvap etti İisus.
4Pilat dedi büük popazlara: «Bän bulmêêrım bir dä kabaat bu adamda».
5Onnar çok çalıştılar, deyip: «O kaldırêr insanı, üüreder bütün İudeyada, başlayıp Galileyadan burayı kadar».
İisus İrodun önündä
6Pilat, işidip bunu, sordu: «Bu adam Galileyadan mı?»
7Açan annadı, ani İisus İrodun kullanmasından, Onu İroda yolladı, angısı o günnerdä İerusalimdeydi.
8İrod, görüp İisusu, pek sevindi, zerä çoktan istärdi Onu görsün, çünkü Onun için işittiydi da umutlanardı görsün Onu yaparkan bir meraklı nışan.
9Koydu Ona çok soruşlar, ama İisus hiç cuvap vermedi.
10Büük popazlar hem bilgiçlär orada durardılar da büük üfkeylän amazlardılar Onu.
11İrod kendi askerlerinnän aşaalattı hem gülmää aldı İisusu, giidirdi Onu yalabık rubaylan, sora geeri yolladı Pilata.
12O gündän sora İrod hem Pilat dostlaştılar biri-birinnän, ama bu günä kadar duşmannık edärdilär.
İisus hem Varavva
13Pilat topladı büük popazları, öndercileri hem insanı
14da dedi onnara: «Getirdiniz bana bu Adamı, nicä birisini, angısı kızıştırêr insanı kalkınmaa. Ama aaraştırıp hepsini sizin önünüzdä, bulmadım bu Adamda bir dä kabaat, ne siz sölediniz.
15İrod da bulmadı, onuştan Onu geeri bizä yolladı. Görersiniz, bu Adam bişey yapmadı, ki ölümä kabaatlı olsun.
16Onuştan düüdürdüktän sora kolverecäm Onu».
/ 17Her Paskellä yortusunda Pilat lääzımdı kolversin kapanmışlardan birisini./
18Ama hepsi onnar baardılar bir seslän: «Ölümä Onu, kolver bizä Varavvayı!»
19Varavvayı zındana kapadıydılar kalkınmak hem adam öldürmäk beterinä, ne o yapmıştı kasaba içindä.
20Pilat enidän danıştı onnara, umutlanarak, kolversin İisusu,
21ama onnar baardılar: «Ger, ger Onu stavroza!»
22Pilat üçüncü sıra sordu: «Ne kötülük O yaptı? Bän bulmadım bir dä kabaat Onda ölüm için. Ölä ki, düüdürdüktän sora kolverecäm Onu».
23Onnar büük seslän baardılar hem zorladılar, ki İisus gerilsin stavroza. Onnarın /hem büük popazların/ baarmakları ensedilär.
24Pilat kararladı onnarın istediklerini tamannasın.
25Kolverdi onu, kim kapana kapalıydı kalkınmak hem adam öldürmäk için, onu, kimi istedilär, ama İisusu braktı onnarın istediinä.
İisusu gererlär stavroza
26Açan götürärdilär Onu stavroza germää, yolda durguttular bir adamı, adı Kirineli Simon, angısı kırdan gelärdi. Koydular onun omuzlarına stavrozu, ki İisusun ardına götürsün.
27İisusun ardına gidärdi bir sürü insan hem karılar, angıları aalardılar hem güüslerinä düüyärdilär.
28İisus, dönüp onnara, dedi: «İerusalimin kızları, aalamayın Benim için, ama aalayın kendiniz için hem uşaklarınız için.
29Zerä yaklaşêr vakıt, açan insan deyecek: „Ne mutlu uşaksız karılara, angıları hiç duudurmadılar hem hiç emzirmedilär!“
30Ozaman deyeceklär bayır kanaralarına: „Düşün bizim üstümüzä!“ hem bayırlara: „Örtün bizi!“
31Eer bu yapılarsaydı eşil fidannan, ne olacek ozaman, açan kuruyacek?»
32İisuslan barabar götürürdülär iki haydut, angılarını lääzımdı öldürsünnär Onunnan barabar.
33Etişip erä, neresinä deniler «Baş Kemii», orada stavroza gerdilär Onu hem iki haydudu: birisini saa, öbürünü sol tarafına.
34İisus deyärdi: «Boba, afet onnarı, zerä bilmeerlär, ne yapêrlar!» Attılar çetelä, payedip rubalarını biri-birinin arasında.
35İnsan durardı orada da siiredärdi. Öndercilär gülmää alardılar İisusu hem deyärdilär: «O başkalarını kurtardı; eer O Hristossaydı, Allahın Seçilmişi, ko Kendini kurtarsın!»
36Askerlär gülmää aldılar Onu. Yaklaştılar da verdilär iişi şarap,
37deyip: «Eer Sänseydin İudeylerin Padişahı, kurtar Kendini!»
38Onun başı üstündä yazılıydı /latin, urum hem çıfıt dilindä/: «İudeylerin Padişahı».
39Stavrozda gerili haydutlardan birisi kötülärdi Onu, deyip: «Eer sän Hristossaydın, kurtar Kendini hem bizi dä!»
40Ama öbürü azarladı onu, deyeräk: «Korkmêêrsın mı Allahtan, açan kendin dä bulunêrsın hep bu ceza altında?
41Bizim için dooru kabledelim yaraşır cezayı kabaatımız için, ama bu Adam yapmadı bir dä kötülük».
42Sora danıştı İisusa: «Saabi, aklına getir beni, açan gelecän Senin padişahlıına».
43İisus cuvap etti: «Dooru söleerim sana, büün olacan Benimnän rayda».
İisus öler
44Altıncı saadın dolayındaydı. Oldu büük karannık bütün memlekettä, ani tuttu üç saat, dokuzuncu saada kadar#23:44 Altıncı saat – üülen. Dokuzuncu saat – saat 15..
45Gün karardı, Ayoz binanın içyankı perdesi yırtıldı ortadan.
46İisus büük seslän baardı: «Boba, Senin elinä vererim duhumu!» Deyip bu lafları, salverdi duhunu.
47Asker üzbaşı, görüp, ne oldu, metinnedi Allahı, deyip: «Hakına, ani bu Adam kabaatsızdı!»
48Açan hepsi insan, kim geldiydilär siiretmää, gördülär, ne oldu, daalıştılar, herkezi düüyeräk kendi güüsünü.
49Hepsi, kim İisusu tanıyardı, hem karılar, angıları Galileyadan geldiydilär, dururdular uzakta da bakardılar, ne olêr.
İisusu gömerlär
50Orada vardı Sinedrion azalarından bir ii hem dooru adam, adı İosif,
51angısı pay almadıydı onnarın neetlerindä hem yaptıklarında. Bu adam iudeylerin Arimafeya kasabasındandı, Allahın Padişahlıını beklärdi.
52Bu adam gitti Pilata, İisusun güüdesini istedi.
53İndirdi Onu stavrozdan, sardı bir keten çarşaflan da koydu bir eni, oyulmuş kanara içindä mezara, neredä taa gömülmediydi kimsey.
54Bir cumaa günüydü, yaklaşardı cumertesi#23:54 Bibliyaya görä cumaa günü avşamnen gün kauştuktan sora çekeder cumertesi..
55Karılar, angıları geldiydilär İisuslan Galileyadan, gittilär İosifin ardına, gördülär mezarı hem nasıl erleştirildi İisusun güüdesi mezar içinä.
56Sora döndülär geeri, hazırladılar kokuları hem paalı yaaları, da cumertesi günü dinnendilär Zakona görä.
Selectat acum:
Luka 23: GagNTL
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Bіblіyayı çevіrän İnstіtut, Moskva, 2006
