ULÚKU 9

Ujísɔ̄si lɛ ayíkpó igwɛ́ɛpa ā tɛ̄hɔ̄ gɛcɛ

1Ujísɔ̄si lɛ ayíkpó igwɛ́ɛpa ā hīgwú tɔ̄há, anɔ́ɔ ó lɛ ɔfú mɛ́mla íkwu kpó lɛ uwá kéē nū odúúdú aálelékwū obɔ̄bí tɛ́ɛcɛ cɛ́ɛ́ kéē hɛ́ ācɛ tá ŋmá ōcē dóódu. 2Anɔ́ɔ ó lɛ uwá tɛ̄hɔ̄ gɛcɛ kéē nyɔ̄ gaá tɔ́ɔna kú olɛhɔ̄ kú ajɔ̄ɔ̄cɛ́ kú Ɔwɔicō lɛ ācɛ á. 3Anɔ́ɔ ó da uwá kahíníī, “Aá híīī bī ɔdā dúúmā ga iyāwu nyā ŋ́. Aá híīī bī ɔcí ō kwajɛ ámāŋ ka alítā ŋ́. Aá híīī bī igbo ámāŋ ka ije ŋ́. Aá kōō híīī bī úwé ɛpa ŋ́. 4Eko nɛ̄ aá le tá ipú igelī dóódu nɛ̄ ācɛ abɔ́ɔ mīyɛ aá, aá klá ɔlɛ́ ékpó ɔ́ɔmā ōfōōfūnū jāā gbéeko nɛ̄ āa nyɛ̄ɛ̄ ŋmá igelī ɔ́ɔmā. 5#Ācot 13.51#Ulúk 10.4-11Ɛga dúúmā nɛ̄ ācɛ ā í mīyɛ aá ŋ́, aá nyɛ̄ɛ̄ ŋmá ɔlɛ́ ɔ́ɔmā cɛ́ɛ́ aá lɛ úmlá nōo bá aá ikpó ā gwō bónū kóō mafú lɛ uwá ka Ɔwɔicō géē yá uwā italā.” 6Ayíkpó ā le pɛ́ i yɛ. É yɛ ŋmá ipɔ́lɛ́ éyi ga ipɔ́lɛ́ ɔhá yɔ̄ ī tɔ́ɔna kú ɔ̄kōolɔhi ā lɛ ācɛ klla yɔ̄ í hɛ́ ācɛ ā tá ŋmá ōcē ɛga dóódu.

Ɔtū kú Uhérɔ̄du le wuklíicō ohígbū Ujísɔ̄si

7 # Umát 16.14; Umák 8.28; Ulúk 9.19 Eko nɛ̄ Uhérɔ̄du, óndáajɛ kú Ugálīli, lɛ odúúdú aɔ́dā nēe bá ī yá ā pó ā, ó le yá ɔ̄ eyījii nɛ̄hi. Ohígbū ka ācɛ ōhī bá yɔ̄ í ka ka Ujɔ́ni oyúbatísim ɔ́ɔ le héyī ŋmá ɔlékwū ɛɛ́. 8Ācɛ ōhī kē bá yɔ̄ ī ka ka Ɛláyíja ɔ́ɔ hɛ́bɛ̄cɛ á, nááná ācɛ ɔhá ka ka éyi kú ipú ācomɛ́ɛbɛ nɛ̄ncɛ ā ɔ́ɔ le héyī ŋmá ɔlékwū ɛɛ́. 9Uhérɔ̄du kahíníī, “N cɛ̄ lɛ uwá lɛ Ujɔ́ni ikpɛ̄yí hɛ́, amáŋ ɔ̄nyɛ wɛ ɔ̄cɛ ā mɛ́ɛ̄ ā, nɛ̄ n gē pó aɔ́dā oyéeyījii lɛyíkwu ɔ́ nya ā.” Anɔ́ɔ ó yɔ̄ ī cēyītīkwū kóō lɛ Ujísɔ̄si má eyī á.

Ujísɔ̄si je ɔdōlé lɛ ācɛ ulá igwɛ́ɛpa cofigwó

10Ayíkpó ā pīyɛyí anɔ́ɔ é lɛ odúúdú ɔdā nēé yá kpɛ́mm ā kpó ka lɛ Ujísɔ̄si á. Ó lɛ uwá kpó tɔ̄ɔkwu, anɔ́ɔ é le plla wɛɛlɛ lɛyíkwu igelī kú Ubɛtsáyída á. 11Eko nɛ̄ ācɛ alɛwa le pó ka Ujísɔ̄si yɔ̄ ī ga Ubɛtsáyída ā, anɔ́ɔ é tá ɔ̄ ɔkwu á. Ó mīyɛ uwá, le ɛlā ka lɛ uwá lɛyíkwu ajɔ̄ɔ̄cɛ́ kú Ɔwɔicō, anɔ́ɔ ó le ācɛ odoōcē ā hɛ́tá á. 12Eko nɛ̄ ɛnɔ gbɔɔ́ ō gaajɛ ā, ayíkpó igwɛ́ɛpa ā le pɛ́ wā ɛgiyí Ujísɔ̄si gaá da ɔ́ kahíníī, “Lɛ ɛwa kú ācɛ nēe bá nyā nū ga igelī mɛ́mla aɛ́hɔ̄ nēe bá amānyā biílí ā, kéē í lɛ ɔdōlé dɔɔ̄kā má ī lé cɛ́ɛ́ kéē lɛ ɛga ogbɔga dɔɔ̄kā dúú, ohígbū ka amānyā wɛ ɛga nōo le fíyóó.” 13Amáŋ Ujísɔ̄si da uwá kahíníī, “Aá abɔ̄yī aá, aá le odée tíne lɛ uwá kéē lé.” É tá ɔ̄ ohi kahíníī, “Odúúdú ɔdā nɛ̄ alɔ lɛ ā wɛ igbō ɛhɔ̄ mɛ́mla ɛbéenyi ɛpa. A yɔ̄ ī leyīce alɔ ká ālɔ̄ nyɔ̄ í lɛ ɔdōlé lá lɛ ɛjɛ̄ɛ̄jī ɛwa nɛ̄hi nyā nɛɛ?” 14(Ācɛnyīlɔ nēe bá abɔ́ɔ ā lɛbɛ̄ɛka ulá igwɛ́ɛpa cofigwó ā.) Ujísɔ̄si da ayíkpó kú nū kéē ya kú ācɛ ā kéē má báajɛ ígwíígwu kú ofɛpa cigwó ofɛpa cigwó. 15Eko nɛ̄ ayíkpó ā lɛ ɔdā nōó ka ā yá kwɛyí ā, 16Ujísɔ̄si le igbo ɛhɔ̄ mɛ́mla ɛbéenyi ɛpa ā kpó, ó jeyi ga ɔkpáncō le ahínyá ta Ɔwɔicō ohígbū uwa, le uwá kpócē, anɔ́ɔ ó kwu uwā í kpó lɛ ayíkpó ā cɛ́ɛ́ kéē kɔ̄ lɛ ācɛ ā. 17Ɛjɛ̄ɛ̄jī uwā le lé le ipú nū jɛ̄ iyī uwā. Iwili nɛ̄ ayíkpó ā túbá ā wɛ omōōmu omblí igwɛ́ɛpa.

Upíta le ka tɛ́ɛcɛ ka Ujísɔ̄si ɔ́ɔ wɛ Ohɔ́nyɛtá á

18Ɛ̄cī éyi eko nɛ̄ Ujísɔ̄si yɔ̄ ī gbɔ̄ɔkɔ ōfōōfūnū ā, ayíkpó kú nū le pɛ́ wā ī tá ɔ̄. Ó da uwá ɔ̄kā kāhíníī, “Ɔ̄nyɛ nɛ̄ ɛwa kú ācɛ ā ka amí ɔ́ɔ wɛ ā?” 19#Umát 14.1,2; Umák 6.14,15; Ulúk 9.7,8É tá ɔ̄ ōhī kahíníī, “Ācɛ ōhī ka a wɛ Ujɔ́ni oyúbatísim, ācɛ ɔhá ka a wɛ Ɛláyíja, ɛ́ɛ́ nɛ̄ ācɛ ɔhá kē ka a wɛ éyi kú ācomɛ́ɛbɛ kú eko nɛ̄ncɛ̄ ā nōo héyī ŋmá ɔlékwu ā.” 20#Ujɔ́n 6.68,69Ó da uwá kahíníī, “Aá ā bɛ́ɛ, ɔ̄nyɛ nɛ̄ aá ka amí ɔ́ɔ wɛ ā?” Upíta tóohi kahíníī, “Awɔ wɛ Ohɔ́nyɛtá nɛ̄ Ɔwɔicō fu á.”

Ujísɔ̄si hɔ́būtá le ɛlā ikwu mɛ́mla ohéyī ŋmá ɔlékwū kú nū ka

21Anɔ́ɔ Ujísɔ̄si lɛ uwá ahɔ̄ pi lɔfú lɔfú ka, “Aá jámá da ɔ̄cɛ dúúmā ka amíɔ̄ɔ̄ wɛ Ohɔ́nyɛtá ā nóó n. 22Ó klla le da uwá kahíníī, “É géē yá ká ami, nōo wɛ Ɔyínɔ̄nyīlɔ kú Ɔ̄cɛ kóō móowē nɛ̄hi piíí. Anyākwɔ́cɛ, aótrɛ̄yí kú ācogwɛ́ɛya, mɛ́mla aútíca kú íne ā géē tá um tónū. Ācɛ géē je ami nōo wɛ Ɔyínɔ̄nyīlɔ kú Ɔ̄cɛ ā ŋmó. Amáŋ ɛ̄cī ɔ́mɛtá Ɔwɔicō géē je um héyī ŋmá ɔlékwū.”

23 # Umát 10.38; Ulúk 14.27 Anɔ́ɔ ó da odúúdu uwā kahíníī, “Ɔ́dāŋ ka ɔ̄cɛ dúúmā tíne kóō yɛce um, ó géē leyī gwu iyī nū bónū piíí. Cɛ́ɛ́ ó kwú ɔ̄cóonyɔ́kpá kú nū ú ɛ̄cī dóódu, cɛ́ɛ́ kóō yɛce um. 24#Umát 10.39; Ulúk 17.33; Ujɔ́n 12.25Ohígbū ka ɔ́dāŋ ka ɔ̄cɛ dúú lɛ abɔ̄ kwɔtū kóō nya oyēeyī kú nū tá, ó le lɛ ā, ó gáā lɛ oyēeyī opiyóó ŋ́. Amáŋ ɔ́dāŋ nɛ̄ ɔ̄cɛ dúú kwú oyēeyī kú nū ú tónū ohígbū um, ɔ̄cɛ ɔ́ɔmā géē lɛ oyēeyī opíyóó. 25Ile nyá nɛ̄ ɔ̄cɛ géē lɛ ɔ́dāŋ koó lɛ ɛjɛ̄ɛ̄jī ɛcɛ lɛ, amáŋ nɛ̄ anú abɔ̄yī nu gebí ámāŋ kéē kwú ɔ̄ í yíífi! 26Ɔ́dāŋ ka ɔ̄cɛ dúúmā ī yá uwēyī um mɛ́mla ɔdā nɛ̄ n gē nwā ā, ami, Ɔyínɔ̄nyīlɔ kú Ɔ̄cɛ géē híhó ka ɔ̄cɛ ɔ́ɔmā í wɛ ɔyíkpó kú um ŋ́ eko nɛ̄ ɔyínɔ̄nyīlɔ kú ɔ̄cɛ í wā ipú ɛgahi kú nū, mɛ́mla ɛgahi kú Ádā mɛ́mla aálelékwū-ōtɛ̄hɔ̄ kú Ɔwɔicō ā. 27N yɔ̄ í da aá ɛlā ɔkwɛ̄yi ka ācɛ ōhī bá amānyā nēe géē yēeyī cɛ́ɛ́ kéē lɛ ajɔ̄ɔ̄cɛ́ kú Ɔwɔicō má.”

É lɛ Ujísɔ̄si pīya ɛdɔ̄ɔ̄cɛ ɔ̄há

28Ɛ̄cī ahātá le gla nōó kɛlā nēe bá nyā ā, Ujísɔ̄si kwú Upíta mɛ́mla Ujɔ́ni mɛ́mla Ujémīsi ú le tá ɛyí ɛfu kéē gbɔ̄ɔkɔ lɛ Ɔwɔicō. 29Abɔ̄ ó yɔ̄ ī gbɔ̄ɔkɔ ā, eyī kú nū kwú pīya ɛdɔ ɛyɛ́ɛ́yí, úwé kú nū kwú pīya ɛnɛ̄hɛ́ gbɔɔ́ ō ceyī ŋmaáŋmaá. 30Igbeékpónú ācɛ ɛpa bá yɔ̄ ī kɛlā mla anú. É wɛ Umósīsi mɛ́mla Ɛláyíja. 31É bá yɔ̄ ī fíyajɛ nɛ̄ɛ̄nɛ̄hi mla ɛgahi nɛ̄hi ā. É wā gáā kɛlā lɛ Ujísɔ̄si lɛyíkwu ikwu nōo géē ŋmó ɔ̄ Ujerúsālɛm, nōo kē wɛ ɔdā nɛ̄ Ɔwɔicō miyā táajɛ lɛ ɔ́ ā. 32Upíta mɛ́mla ayíkpó ɛpa ɔhá ā lɛ iyɔ̄lā gbo liipú. Amáŋ é le héyī, lɛ oceyī nɛ̄ɛ̄nɛ̄hi kú Ujísɔ̄si mɛ́mla ācɛ ɛpa nēe háyi pī uwɔ̄ ā má. 33Eko nɛ̄ ācɛ ā bá yɔ̄ ī nyɛ̄ɛ̄ ŋmá ɛgiyí Ujísɔ̄si ā, Upíta da ɔ́ kahíníī, “Ɔkpani, ó lɔhi abɔ̄ alɔ bá amānyā ā! Alɔ géē lɛ áklɔ̄kpɛ ɛtá cē ce. Éyi wɛ ákú uwɔ, éyi wɛ ákú Umósīsi, cɛ́ɛ́ éyi wɛ ákú Ɛláyíja” (Ó kōō jé ɔdā nōó yɔ̄ í ka ā ŋ́.) 34Abɔ̄ ó yɔ̄ ī kɛlā ā, ojuja gā gaá klá uwá. Ufi lɛ uwá kwú abɔ̄ ācɛ ɛpa ā le pɛ́ tá ipú ojuja ā. 35#Ayis 42.1; Umát 3.17; 12.18; Umák 1.11; Ulúk 3.22#2 Upít 1.17,18Anɔ́ɔ Ɔwɔicō kɛlā ŋmá ipú ojuja ā kahíníī, “Ɔyínɔ̄nyīlɔ kú um, nɛ̄ n fu ā yɔ̄ á. Aá jāhɔ̄ lɛ ɔ́!” 36Eko nɛ̄ ɔkɔ ā le ɛlā ka kwɛyí ā, Ujísɔ̄si háyi ōfōōfūnū mɛ́ɛ̄ á. Ayíkpó ā le okónu klá tū ɛjɛ̄ɛ̄jī aɔ́dā nēé má ā, anɔ́ɔ é da ɔ̄cɛ dúúmā ɔdā nēé má ɛyí ɛfu eko ɔ́ɔmā ŋ́ má.

Ujísɔ̄si lɛ alelékwū obɔ̄bí nū ŋmá iyē kú ɔyípɔ̄nɔ̄nyīlɔ éyi

37Oŋmɔ́ɔ̄cī nū Ujísɔ̄si mɛ́mla ayíkpó ɛtá ā le hīlatá wāajɛ ŋmá ɛyí ɛfu ā, anɔ́ɔ ɛwa kú ācɛ wā í jīla Ujísɔ̄si ɔwɛ á. 38Ɔ̄cɛnyīlɔ éyi lɛ ɔkɔ cɛyí dɛ̄gba ŋmá ipú ɛwa ā kahíníī, “Utíca, n gbɔ̄ɔkɔ gā awɔ, lɛ ɔyínɔ̄nyīlɔ kú um nyatá gā um, anú wɛ ɔ̄cɛnyīlɔ ékpónú kú um á. 39Alelékwū obɔ̄bí éyi gē je ɔyínɔ̄nyīlɔ kú um nyā ojígógó gē yá kóō hɛ́ ɛgba dɛ̄ icííci. Ó gē cɛ̄ lɛ ajikpáakpáa ī je ɔ́ cɛ́ɛ́ ūwū gē kwu ɔ́ okónu. Ó gē yá ɔ̄ ágbe piyóó, ó kē dɔɔ̄kā ō mā ɔ̄ tá ŋ́. 40N gbɔ̄ɔkɔ lɛ ayíkpó kú uwɔ kéē lɛ ɔ́ nū tɛ́ɛ́cɛ, amáŋ é nū ɔ̄ glá ŋ́.” 41Ujísɔ̄si tóohi kahíníī, “Aá wɛ ācɛ nēé kpɔ́tūce Ɔwɔicō ŋ́, nēé klla í bīya íne kú Ɔwɔicō! Ɛ́gɛ́nyā nɛ̄ n gáā yɔ̄ mla aá gbojī, géē klá ī cībū aá gbojī lɛ ā ā?” Anɔ́ɔ ó da ɔnyīlɔ ā kahíníī, “Lɛ ɔyí uwɔ nɔ̄nyīlɔ bī wā amānyā.” 42Eko nɛ̄ ɔyínɔ̄nyīlɔ ā yɔ̄ ī wā ā, alelékwū obɔ̄bí ā lɛ ɔ́ tá fíyaajɛ, anɔ́ɔ ajikpáakpáa gbɔɔ́ ō je ɔ́ á. Ujísɔ̄si le ɛgba dɛ̄ ta alelékwū obɔ̄bí ā kóō le bɛ̄cɛ ŋmá iye kú ɔyí ā. Anɔ́ɔ ó le ɔyí ā hɛ́tá á. Ó kwú ɔyí ā ú kwúcē lɛ ádā nū. 43Odúúdú ācɛ ā le kpó hídáagó ohígbū ɔfú nɛ̄hi kú Ɔwɔicō nɛ̄ Ujísɔ̄si mafú ā.

Ujísɔ̄si klla lɛ ɛlā ka lɛyíkwu ikwū kú nū kpó

(Umát 17.22-23; Umák 9.30-32)

43 Eko nɛ̄ ɛjɛ̄ɛ̄jī ācɛ bá ī hídáagó kú odúúdú ɔdā nōó yá ā, ó da ayíkpó kú nū kahíniī, 44“Aá lɛ ɛlā nɛ̄ n gáā ka lɛ aá nyā pó tū ahɔ̄ lɔɔlɔhi! É géē je ami, Ɔ̄yínɔ̄nyīlɔ kú Ɔ̄cɛ ā tá ipú abɔ̄ kú ācɛ.” 45Amáŋ ayíkpó kú nū í jɛ́yí kú ɔdā nōó ka ā ŋ́. É le abōkléyī yá uwā cɛ́ɛ́ kéē jɛ́yí ɛlā ā ŋ́. Ufí í klla cɛ̄ lɛ uwá da ɔ́ ɔ̄kā lɛyíkwu ɛlā ā ŋ́.

Ɔ̄cɛ nōo fíyɛ́ dúú ajɔ̄ɔ̄cɛ́ kú Ɔwɔicō ā

46 # Ulúk 22.24 Ayíkpó ā gbɔɔ́ ō táafú mla iyī uwā lɛyíkwu ɔ̄cɛ nōo fíyɛ́ dúú ipú uwā ā. 47Ujísɔ̄si le ɔdā nēé yɔ̄ ī gbɛlá nū ā jé, anɔ́ɔ ó kwú ɔyí nɛ̄ŋ́cɛ́ éyi í wā í háyi pī iyī nū, 48#Umát 10.40; Ulúk 10.16; Ujɔ́n 13.20anɔ́ɔ ó da uwá kahíníī, “Ɔ̄cɛ dúúmā nōo mīyɛ ɔyípɛ̄ nyā ohígbū um, ayíbɛ ami nōó mīyɛ á. Ɔ̄cɛ dúú nōó mīyɛ um, ɔ̄cɛ nōo tū um ɛhɔ̄ ā nōó mīyɛ dúú á. Ohígbū ka ɔ̄cɛ nōó cɛgbá ŋ́ fíyɛ́ dúú ipú aá ā, anú wɛ ɔ̄cɛ nōo cɛgbá fíyɛ́ dúú á.”

Ɔ̄cɛ nōó wɛ olɛlā kú uwɔ ŋ́, wɛ ɔ̄cɛ ɔlɛ́ uwɔ

49Ujɔ́ni da Ujísɔ̄si kahíníī, “Ɔkpani, alɔ má ɔ̄cɛ éyi yɔ̄ ī bī iyē kú uwɔ le nū ebilíi tɛ́ɛcɛ ŋ́má ipú kú ācɛ. Alɔ da ɔ́ kóō mā ohígbū koó wɛ éyi kú ipú ígwu kú alɔ ŋ́.” 50Ujísɔ̄si da Ujɔ́ni mɛ́mla ayíkpó ohile kahíníī, “Aá híīī ci ɔ́ anú ŋ́, ohígbū ka ɔ̄cɛ nōó wɛ olɛlā kú aá ŋ́ kē wɛ ɔ̄cɛ ɔlɛ́ aá.”

Ipɔ́lɛ́ kú ācɛ Usamérīya nōo tá kóō mīyɛ Ujísɔ̄si ā

51Abɔ̄ eko nēé géē je Ujísɔ̄si gicō ga ɔkpáncō ā yɔ̄ gē wā ajaajɛ ā, ó lɛ ɔtū kú nū yéékpó ka anúɔ géē ga Ujerúsālɛm. 52Ó lɛ ācotɛ̄hɔ̄ tū ga ipɔ́lɛ́ éyi kú ācɛ Usamérīya nōo yɔ̄ ɔbū ā kéē lɛ inu nōó í gbɔga tútū lɛ ɔ́. 53Amáŋ ācɛ nēe bá abɔ́ɔ ā tá ká aá mīyɛ anú ŋ́, ohígbū kéē le jé péee kóō yɔ̄ ī ga Ujerúsālɛm. 54#2 Aɔ́cɛ́ 1.9-16Eko nɛ̄ ayíkpó kú nū Ujémīsi mɛ́mla Ujɔ́ni le ɔdā nōo yá ā má ā, anɔ́ɔ é kahíníī, “Óndú, a tíne kú alɔ lɛ ɔlá hīgwú ŋmá ɔkpáncō kóō lɛ uwá yi nɛɛ?” 55Amáŋ Ujísɔ̄si pīyeyī lɛ ɛgba dɛ̄ tū uwā kahíníī, “Aá jé ɛdɔ kú alelékwū nɛ̄ aá lɛ ā ŋ́. Ohígbū ka ami, Ɔyínyɔ̄nyīlɔ kú Ɔ̄cɛ í wā í kpó oyēēyī kú ācɛ yíífi ŋ́, amáŋ n wā gaá nya uwá tá.” 56Anɔ́ɔ Ujísɔ̄si mɛ́mla odúúdú ayíkpó kú nū le pɛ́ ga ipɔ́lɛ́ ɔhá á.

Ācɛ ōhī nēe dɔɔ̄kā ō yɛce Ujísɔ̄si ā

57Abɔ̄ é bá yɔ̄ í nyɔ̄ ɔwɛ ā, ɔnyīlɔ éyi da Ujísɔ̄si kahíníī, “N géē kwúcē uwɔ ga ɛga dúú nɛ̄ a ī nyɔ̄ ā.” 58Ujísɔ̄si da ɔ́ kahíníī, “Aɛ́pā lɛ ɔ̄gɔ̄ ɔlɛ́ uwā, aígbáanɔ kē lɛ ɔlɛ́. Amáŋ ami, Ɔyínɔ̄nyīlɔ kú Ɔ̄cɛ í lɛ ɛga nɛ̄ um gē lā kú abɔ̄yī n ŋ́.” 59Ujísɔ̄si da ɔ̄cɛ ɔhá kahíníī, “Yɛce um.” Amáŋ ɔnyīlɔ ā kahíníī, “Ɔkpani, lɛ ɛga je gā um ká n gaá lɛ ádā um nyī gbɔbū ɛ́ɛ́.” 60Ujísɔ̄si tá ɔ̄ ohí kahíníī, “Habɔ̄ aókwū tá kéē nyi aókwū kú uwā. Awɔ ā nyɔ̄ gaá tɔ́ɔna kú ɔ̄kā lɛyíkwu ajɔ̄ɔ̄cɛ́ kú Ɔwɔicō tɛ́ɛcɛ.” 61#1 Aɔ́cɛ́ 19.20Anɔ́ɔ ɔ̄cɛ ɔhá klla kahíníī, “N géē kwúcē uwɔ ɔkpani. Amáŋ lɛ ɛga je ga um ká n̄ nyɔ̄ gáā lɛ úŋmóō tá ācɛ ɔlɛ́ um gbɔbū ɛ́ɛ́.” 62Amáŋ Ujísɔ̄si tá ɔ̄ ohi kahíníī, “Ɔ̄cɛ dúú nōo gbɔɔ́ ō tá ɔgba ɛhɔ̄, nōo yɔ̄ ī pīyeyī má igbīhi ojígógó í gáā tíile lɛ ajɔ̄ɔ̄cɛ́ kú Ɔwɔicō glá ŋ́.”

Selectat acum:

ULÚKU 9: IFBCL

Evidențiere

Partajează

Copiază